Kunekenya—I Pepi Poyukilanga’ko?

BAMO badi bamona Jesse Livermore bu nsunga munekenye mu bonso ba mu mukenza witwa bu Wall Street mwanda utyibanga butyibi buyampe mu bya busunga. Pa kino, wadi mungwije bupeta bwa ntanda ne miseke. Uvwala kotyi mulumbuluke kutabuka, ushikata mu njibo ya byumba 29, kadi wendejibwa na shofele mu kotoka kafita katelwa bu Rolls-Royce.

David * wadi nandi usaka kwikala uno muswelo. Byaadi mpingakani wa mwendeji wa tyapu mitumbe, kadi kapita mukatampe, wadi padi na mukenga wa kwikala mwimaniji wa kompani’ya. Wadi usaka kwikala mpeta, muntu wa ntumbo. Ino David wakwata butyibi bwa kuleka kano kaji. Wanene’mba: “Ndyukile amba nkibwanyapo kumona kadi dikwabo kaji ka lupeto na kano.” Ulanga David wālongele kilubo?

Bavule balanga amba kunekenya i kupeta, kuyukana, ne kutumba. Inoko boba badi na byabupeta bakokeja kūminwa ne kubulwa kitungo mu būmi bwabo. Kino i kimweke mu būmi bwa Mukelenge Livermore. Nansha byaadi mpeta, būmi bwandi bwadi buyule tusua, binkumbulu, ne mitompwe. Wadi ulwa na luba lwa njia, busongi bufwefwefwe, ne kubulwa kupwana bininge na bandi bana. Dyuba dimo, pa kupwa kujimija bupeta buvule, Mukelenge Livermore washikete mu kitomeno kya hotela yandi ya nkuo, kadila pangala pa byamujimine. Wanena bamupe malwa,  wavungulula kalane kandi ne kusoneka’mo lwimu lwa kushadika mukajandi. Pa kupwa kutoma, watwela mu ka kyumba ka kufula mwampikwa mwinya ne kwiipaya weipaya.

Shako, weipaile pangala pa myanda mivule, inoko kino kilombola bubinebine bwa mu Bible amba: “Boba batele mityima’mba, tusakwikala bampeta . . . abapu kwitapatapa ku misongo ya ntanda ne ntanda.”—1 Temote 6:9, 10.

Mwene bimweka amba boba bamona amba kwikala mpeta, pa kitenta, nansha na ntumbo ko kunekenya badi na kipimo kibi kya kuyukila’po? Le abe nobe wimonanga bu munekenye? Mwanda waka? I pepi poyukilanga kino? Lelo i bika bikutonona umone amba kuno ko kunekenya? Kishinte kilonda’ko kikabandaula madingi akulupilwa akweshe bavule bene bekale kunekenya. Tutale nobe muswelo okokeja kunekenya.

[Kunshi kwa dyani]