Yehova Upānanga “Mushipiditu Sandu ku Bakumulomba”

“Lelo ino bānweko babi, muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana Mushipiditu Sandu ku bakumulomba?”—LUKA 11:13.

1. I kitatyi’ka kyotusakanga kukwashibwa na mushipiditu sandu?

 ‘BUNKA bwami nkibwanyapo. Poso na bukwashi bwa mushipiditu sandu, nabya mbwanya kūminina ano matompo!’ Lelo nobe kodi mwiivwane uno muswelo? Bine, mo mwiivwaninanga Bene Kidishitu bavule. Padi weivwene namino pa kupwa kuyuka amba ubapi luba lukatampe. Nansha padi i kitatyi kyafwile mwinē pobe okemudi balale nandi myaka mivule mu busongi. Pakwabo padi i kitatyi kyapwile nsangaji yobe penepa weivwana njia ku mutyima. Mu bitatyi bya tusua umbūmi, padi wamwene amba i enka mushipiditu wa Yehova wakukwatakenye na kukupa “bukatampe bwine bwa bukomo.”—2 Kodinda 4:7-9; Mitōto 40:1, 2.

2. (a) I bikoleja’ka bilwa na Bene Kidishitu ba bine? (b) Le i bipangujo’ka byotukabandaula mu kino kishinte?

² Bene Kidishitu balwanga na mitabakano yenda ībweja’ko ne na lwana lwa ntanda yampikwa Bwine Leza. (1 Yoano 5:19) Kadi, balondi ba Kidishitu batambwanga na Satana Dyabola aye mwine, ulwa divita disumanane na boba “bālamine bijila bya Leza, ne kulamata ku busapudi bwa Yesu.” (Kusokwelwa 12:12, 17) Nanshi ke kya kutulumukapo shi tusakilwa bukwashi bwa mushipiditu wa Leza nakampata mu kino kitatyi. Le tukalonga bika pa kusaka twendelele kutambula mushipiditu wa Leza muvulevule? Ne mwanda waka tukulupile amba Yehova udi na mutyima wa kwitupa bukomo botusakilwa potudi mu matompo? Tukatana malondololo a bino bipangujo mu byelekejo bibidi bya Yesu.

Lombela na Bukankamane

3, 4. I kyelekejo’ka kyāletele Yesu, ne kitala namani myanda ya kulombela?

³ Mwanā bwanga umo wa Yesu wālombele amba: “Abe Mfumwetu witulombola mwakulombela.” (Luka 11:1) Yesu wālondolola na  kupa bandi bana ba bwanga byelekejo bibidi. Kibajinji i kya muntu watambula mweni, ne kya bubidi i shabana uteja mwanandi. Pano tubandaule bino byelekejo bibidi kimo ne kimo.

⁴ Yesu wānene amba: “Lelo ani wa kwenu shi udi ne mulunda nandi, ebiya amwendele pa kankatyi ka bufuku kamunena’mba: Abe mulunda nami nsaka kwajime mikate īsatu. Mwanda wa mweni wamfikila kwami, wiya kulampe, ino nami nabulwe byakumutekela. Ebiya kwivwana udi mu njibo amutentulule’mba: Kokinkambakanya, mhm, ku kibelo i kushite ne twana twami ngidi nato pa butanda, ami nkidipo mwakulangukila nkupeko, mhm? Nanshi nemusapwila’mba, nansha kalangukile kumupela bulunda, ino i mwanda wa bukankamane bwandi ukalanguka kumupa byonso byābudilwe.” Kupwa Yesu washintulula kino kyelekejo mokitadila myanda itala kulombela, amba: “Ebiya ami nemunena’mba: Mwikale kulomba nankyo kikemupebwapo; kadi mwikale kusaka, nankyo mukekimonapo; kadi mwikale kututula, nankyo kikemushitwilwapo. Ke-bantu bonso bakulomba bapebwanga kadi wakusaka umonangapo, kadi wakututulapo aye ushitwilwanga.”—Luka 11:5-10.

5. Le kyelekejo kya muntu mukankamane kitufundija bika pa motufwaninwe kulongela shi tulombela?

⁵ Kino kyelekejo kikomo kwilwa kya muntu mukankamane kilombola motufwaninwe kulongela shi tulombela. Ivwana, Yesu wānene amba shi muntu’wa wapelwe byabudilwe i pangala pa “bukankamane bwandi.” (Luka 11:8) Muneneno “bukankamane bwandi” utanwa musunsa umo mu bilembwa bibajinjibajinji bya Bible. I bwalamuni bwa kishima kya Kingidiki kishintulula pa bute pa bute “kubulwa bumvu.” Divule kubulwa bumvu i kato katyani. Inoko, kubulwa bumvu nansha bukankamane bunenwe pano i ngikadilo milumbuluke, itendelwa. Ye mobikadile ne mu mwanda wa mufikilwa wa mu kino kyelekejo. Kaivwenepo bumvu pa kulomba na bukankamane byobya byaadi ubudilwe. O mwanda Yesu utela uno mufikilwa bu kimfwa kiyampe kotudi, mwanda milombelo yetu ifwaninwe nayo kukankamenwa. Yehova usaka ‘twendelele kulomba, twendelele kusaka, twendelele kututula.’ Bine, kakabulwepo kupāna “Mushipiditu Sandu ku bakumulomba.”

6. Mu myaka ya Yesu, kibidiji kya kulubula beni kyādi kimonwa namani?

⁶ Yesu ketulombwelepo’tu enka mwa kulombela—na bukankamane—ino i ne kine kyotufwaninwe kulombela namino. Pa kumona kino biyampe, tubandaulei mwādi mukokeja kumwena boba bādi bateja kyelekejo kya Yesu kya muntu mukankamane mungya kibidiji kyabo kya kulubula beni. Bisonekwa bivule bilombola amba mu myaka isekunwinwe mu Bible, kutundaila beni kyādi kibidiji kya kukwata makasa abidi, nakampata shi beni’ba i bengidi ba Leza. (Ngalwilo 18:2-5; Bahebelu 13:2) Kubulwa kizaji i bumvu bukatampe. (Luka 7:36-38, 44-46) Na ino milangwe mu ñeni, tujokelei ku mānga ya Yesu.

7. Mwanda waka mufikilwa wa mu kyelekejo kya Yesu kadipo na bumvu bwa kulangula mulunda nandi?

⁷ Mufikilwa wa mu kyelekejo watambula mweni umbukata mwa bufuku. Mufikilwa wamone amba ufwaninwe kutekela mweni wandi bidibwa, ino ‘wabulwe bya kumutekela.’ Kudi aye uno i mwanda wa kupelakana nao! Wādi ufwaninwe kwielaela asokole mukate. O mwanda waenda kwa mulunda nandi pakubulwa bumvu kamulangula. Amba: “Abe mulunda nami nsaka kwajime mikate īsatu.” Wamulombe na bukankamane kufika’nka ne byaapebwa byabudilwe. Penepa wemone bu mufikilwa muyampe mwanda pano wasokola mikate.

Shi Tusaka Bivule, Tukalomba Bivule

8. I bika biketutonona tulombe mushipiditu sandu na bukankamane?

⁸ Kino kyelekejo kilombola bika pa kine kyotufwaninwe kukankamena mu milombelo? Mukelenge’wa wāendelele na kulomba mikate mwanda wāyukile amba shi udi nayo  nabya ukavuija senene kiselwa kyandi kya bu mufikilwa. (Isaya 58:5-7) Shi kadipo nayo, nabya ukatunya. Netu mo monka, tuyukile amba shi tudi na mushipiditu wa Leza tukavuija senene shē mwingilo otupelwe batwe Bene Kidishitu, nanshi twendelelei na kulomba Leza, amba etupe uno mushipiditu. (Zekadia 4:6) Mwanda shi ketudipo nao, tukakomenwa. (Mateo 26:41) Pano ubamone kamweno kotukokeja kumwena mu kino kyelekejo? Shi tumwene mushipiditu wa Leza bu kintu kitusakilwa bukidibukidi, nabya tukalomba’o.

9, 10. (a) Leta kimfwa kilombola amba tufwaninwe kulomba mushipiditu kudi Leza na bukankamane. (b) I kipangujo’ka kyotufwaninwe kwiipangula ne mwanda waka?

⁹ Pa kusaka tumone ñeni yotuboila’ko dyalelo, langa shi muntu umo mu kisaka kyenu wabela pa bukata bwa bufuku. Le ukalangula muñanga mwanda wa aye emukwashe? Shi misongo’ya i mityetye, kukamulangulapo. Ino shi i luba lwa mukunka, nabya ukamwita ne bumvu bwine mpika. Mwanda waka? Mwanda udi na mwanda wa kampeja-bukidi. Uyukile amba bwino bwandi kyo kintu kikokeja kwimukwasha. Shi kemumwabije nabya i lufu. Mo monka ne batwe Bene Kidishitu ba bine netu tudi na mwanda wa kampeja-bukidi. Ke-pantu Satana unangakananga “bwa ntambo ubuluma” ukimba kwitubokota. (1 Petelo 5:8) Pa kushala bōmi ku mushipiditu, bukwashi bwa mushipiditu wa Leza budi na mvubu mpata. Wivwane ketwabije Leza wa kwitukwasha nabya tubafu. Nanshi tulombei Leza mushipiditu sandu wandi na bukankamane. (Efisesa 3:14-16) Shi tulonge namino, nankyo tukekala na bukomo bwa ‘kūminina pototo ne ku mfulo kwine.’—Mateo 10:22; 24:13.

¹⁰ Pano i kipite buya twitūkije ne kwiipangula amba, ‘Bine, milombelo yami i ya bukankamane?’ Vuluka, shi uyukile biyampe amba tusakilwa bukwashi bwa Leza, nabya tukalomba mushipiditu sandu na bukankamane.

I Kintu’ka Kitutonona Tulombe na Kikulupiji?

11. Le Yesu wāingidije namani kyelekejo kya shabana ne mwana pa mwanda utala milombelo?

¹¹ Kyelekejo kya Yesu kya mufikilwa mukankamane kilombola mutyima ufwaninwe kwikala na yewa ulombela—muntu mwitabije. Ino kyelekejo kilonda’ko kilombola mwikadile yewa uteja milombelo—Yehova Leza. Yesu wāipangwile amba: “Shi kudi bānwe mwana alombe mukate kudi shandi, amupe dibwe’ni, a? Kadi shi mwita ino amupe nyoka’mba ke mwita’ni? Ebiya pakwabo, shi alombe dī, kadi amupe kaminye?” Ebiya Yesu wingidija kino na kunena’mba: “Lelo ino bānweko babi, muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana Mushipiditu Sandu ku bakumulomba”!—Luka 11:11-13.

12. Kyelekejo kya shabana uteja bilomba mwana kilombola muswelo’ka mutyima wa Yehova wa kusaka kwitaba ku milombelo yetu?

¹² Mu kino kimfwa kya shabana witaba kudi mwana, Yesu usokola’mo malango a Yehova pa boba bonso banyemena kwadi mu milombelo. (Luka 10:22) Dibajinji, tala  kwishila kudi’po. Yehova i mwishile na muntu wa mu kyelekejo kibajinji wēkakile kwitaba mulunda, mwanda aye udi bwa shabana wa kilelo, usaka kulonga byalomba wandi mwana. (Mitōto 50:15) Kadi Yesu ulombola mutyima wa kusaka udi na Yehova potudi pa kulangulukila pa bintu bikata na kushilula na bityetye. Amba shi bantu “babi,” bapyene bubi, bakokeja kupa babo bana bintu biyampe, le Tata wetu wa mūlu ke pepi? Bine, ukapāna na mutyima wa bu kyaba bulāle mushipiditu sandu ku kisaka kya batōtyi bandi!—Yakoba 1:17.

13. I bika byotufwaninwe kukulupila potulomba Yehova?

¹³ I ñeni’ka yotuboila’ko? Tufwaninwe kukulupila amba shi tulombe Tata wetu wa mūlu mushipiditu sandu, bine kakabulwepo kwitupa kyotumulombele. (1 Yoano 5:14) Potunyemena kwadi kyaba ne kyaba mu milombelo, Yehova kakanenapo amba: “Kokinkambakanya, mhm, ku kibelo i kushite.” (Luka 11:7) Monka mwānenene Yesu, amba: “Mwikale kulomba nankyo kikemupebwapo; kadi mwikale kusaka, nankyo mukekimonapo; kadi mwikale kututula, nankyo kikemushitwilwapo.” (Luka 11:9, 10) Bine, Yehova ‘uketwitaba potumwita.’—Mitōto 20:9; 145:18.

14. (a) I milangwe’ka mifwe ivutakanyanga bamo balwa na matompo? (b) Shi tulwanga na matompo, mwanda waka i biyampe tulombe Yehova na kikulupiji?

¹⁴ Kyelekejo kya Yesu kya shabana wa kilelo kilombola kadi amba buyampe bwa Yehova i bukata kutabuka ne buyampe bulombolwa na bashabana ba pano panshi. Nanshi kekudipo ufwaninwe kwimona amba Yehova i mumufityilwe shi watompibwa. Satana kinkwa netu ye usaka tufwatakanye uno muswelo. (Yoba 4:1, 7, 8; Yoano 8:44) Kekudipo kyotufwaninwe kwikadila na milangwe ya kwitopeka. Yehova katompwangapo na “bubi.” (Yakoba 1:13) Kabwanyapo kwitupa matompo adi pamo bwa nyoka nansha bwa kaminye. Tata wetu wa mūlu upānanga “binengele ku bakumulomba.” (Mateo 7:11; Luka 11:13) Eyo, wivwane tusangela buyampe bwa Yehova ne mutyima wandi wa kwitukwasha, nabya tukekala na mutyima wa kumulomba na kikulupiji. Kadi mu uno muswelo, tukamulombola malango etu onso pamo bwa mulembi wa mitōto wāsonekele amba: “Binebine Leza waivwana; watele mutyima ku diwi dya lulombelo lwami.”—Mitōto 10:17; 66:19.

Mwikadile Mushipiditu Sandu bu Nsenga-Mukwashi Wetu?

15. (a) Yesu wālaile bika pangala pa mushipiditu sandu? (b) I muswelo’ka umo witukwasha mushipiditu sandu?

¹⁵ Yesu wāpitulukile mu kikulupiji kyaāletele mu byelekejo byandi kumeso’tu kwa lufu lwandi. Wālombwele batumibwa bandi pangala pa mushipiditu sandu amba: “Nami nkalomba kudi Tata ino aye ukemupa Nsenga-mukwashi mukwabo wakwikala nandi  mafuku onso nyeke.” (Yoano 14:16) Yesu wālaile amba uno nsenga nansha mushipiditu sandu ukāya pa balondi bandi mu mafuku a kumeso, kubadila’mo ne ano etu. Le witukwashanga bininge dyalelo mu muswelo’ka umo? Mushipiditu sandu witukwashanga bidi tūminine matompo meshileshile. Namani? Mutumibwa Polo wālwile na matompo ushintulula mu mukanda wandi ku Bene Kidishitu ba mu Kodinda mwāmukwashishe mushipiditu wa Leza. Tutalei bidi mu kīpi byaāsonekele.

16. Ngikadilo yetu ikokeja kwiifwana namani na ya Polo?

¹⁶ Dibajinji Polo ulombola patōka banababo betabije amba wādi ulwa na “mwiba mu ngitu,” ditompo kamukaya. Kupwa wānena amba: “Namwisashila Mfumwetu [Yehova] disatu na’mba: Kimfundukepo.” (2 Kodinda 12:7, 8) Bine kewamufundukilepo nansha byaālombele Leza amufundule dino disusu. Padi nobe ulwanga na ngikadilo ya uno muswelo. Pamo bwa Polo, kodi mulombele na bukankamane ne na kikulupiji, ulomba Yehova afundule ano matompo. Nansha byokodi mulombe misunsa ne misunsa, makambakano obe akidi nobe. Le ko kunena’mba Yehova kalondolwelepo milombelo yobe ne amba mushipiditu sandu keukukweshe? Mhm, ke amopo! (Mitōto 10:1, 17) Tala monka byānene mutumibwa Polo.

17. Yehova wālondolwele namani milombelo ya Polo?

¹⁷ Leza wālondolwele milombelo ya Polo amba: “Buntu bwami i bukubwanine; ke-buntu bukomo bwami bufikile ponka pa bubwanine monka umbukōkekōke.” Polo wānene amba: “Nanshi, nkētumbika ne mutyima tō mu bukōkekōke bwami, e nabyako, amba bukomo bwa Kidishitu bungikale po ndi” bwa dipema. (2 Kodinda 12:9; Mitōto 147:5) Na bubine, Polo wāmwene amba bukomo bwa Leza, kupityila kudi Kidishitu, bwādi bumukinga pamo bwa dipema padi. Dyalelo nadyo, Yehova ulondololanga milombelo yetu mu muswelo umo onka. Ukiñanga bengidi bandi pamo bwa mwemba wa dipema.

18. Mwanda waka tukokeja kūminina matompo?

¹⁸ Bine, dipema kedikankajangapo mvula kunoka nansha luvula kupukuma, ino dikiñanga muntu ku bino byonso. Ne mwemba ulupuka ku “bukomo bwa Kidishitu” nao keukankajangapo matompo etuponena nansha bikoleja bitufikila. Ino witukiñanga ku mushipiditu amba bintu bya ino ntanda ne kwitutamba kwitutamba mulopwe wayo byaketusanshija. (Kusokwelwa 7:9, 15, 16) Shi ke pano, ekale ulwanga na matompo apela ‘kukufunduka,’ nankyo kulupila’tu amba Yehova uyukile bulwi bowikonda nabo, kadi uketaba ku “diwi dya kwabija kobe.” (Isaya 30:19; 2 Kodinda 1:3, 4) Polo wāsonekele amba: “Leza i wabinebine, wampikwa kwimulekelela’mba: Batompibwe na bitabuke bukomo bwabo; ino nanshi, ponka pa kyakutompa, nandi ukasaula dishinda dya kupandilamo, amba mumone mwakutūkijija mutyima monka.”—1 Kodinda 10:13; Fidipai 4:6, 7.

19. Tukasumininwa kulonga bika, ne mwanda waka?

¹⁹ Eyo, ‘mafuku a mfulo’ a ino ntanda yampikwa Bwine Leza i mayule “myaka ya malwa.” (2 Temote 3:1) Inoko ku bengidi ba Leza bino ke bitatyipo byobatunya kulwa nabyo. Mwanda waka? Mwanda mushipiditu sandu wa Leza, owa wapāna muvule ne na mutyima tō ku bonso bamulomba na bukankamane ne kikulupiji, wibakwashanga ne kwibakinga. Nanshi tusumininwei kulomba difuku ne difuku mushipiditu sandu.—Mitōto 34:6; 1 Yoano 5:14, 15.

Usa Kulondolola Namani?

• Le tusakilwa mushipiditu sandu wa Leza?

• Mwanda waka tukulupile amba Yehova uketabija potumulomba mushipiditu sandu?

• Mushipiditu sandu witukwashanga namani tūminine matompo?

[Bipangujo bya Kifundwa]

[Kifwatulo pa paje 13]

I bika byotukokeja kwifunda ku kyelekejo kya Yesu kya mufikilwa mukankamane?

[Kifwatulo pa paje 15]

Le ulombanga mushipiditu sandu wa Leza na bukankamane?

[Kifwatulo pa paje 16]

I ñeni’ka yowaboila padi Yehova ku kyelekejo kya shabana wa kilelo?