Kemwakakōkai mu Kufwija’ko Kwenu

“Ē! keyo! mifwatakanyo yobe kulema’yo buleme kudi ami abe Leza! Ē! keyo bukata mbadi yayo!”—MITŌTO 139:17.

1, 2. Mwanda waka tufwaninwe kusangela Kinenwa kya Leza, ne mulembi wa mitōto wāfwijije’ko namani?

 KOKWA ko kwādi kutubukila kukunka. Pādi palongololwa tempelo ya mu Yelusalema, Hilekia Kitobo Mukatampe wātene “mukanda-wabijila wa Yehova wapelwe Mosesa’wa,” eyo, kino kyādi kitentwilo kibajinjibajinji kyāvuilwe kusonekwa myaka 800 kunyuma! Ulanga Yoshia, Mulopwe wakaminwe Leza, wēivwene namani pobāmuletele uno mukanda kumeso andi? Bine, wāsangele mpata, wānena ne Shafana mulembi eutange na diwi ditunduke.—2 Bilongwa 34:14-18.

² Dyalelo bantu midiyo ne midiyo badi kala na Mukanda wa Leza mutuntulu nansha kipindi. Lelo kino kyo kilengeja Bisonekwa bikale bya mvubu mityetye? Mhm! Na bubine abyo byobidi na milangwe ya Mwinē bukomo bonso isonekelwe pa mwanda wa kamweno ketu. (2 Temote 3:16) Davida mulembi wa mitōto, pa kulombola mwamwena Kinenwa kya Leza, wālembele namino amba: “Ē! keyo! mifwatakanyo yobe kulema’yo buleme kudi ami abe Leza! Ē! keyo bukata mbadi yayo!”—Mitōto 139:17.

3. I bika bilombola’mba Davida wādi muntu mupye ku mushipiditu?

³ Kufwija’ko kwa Davida pangala pa Yehova, pa Kinenwa Kyandi, ne pa mpangiko ya mutōtelo Wandi wa bine kekwatalelepo. Mwiivwanino wa Davida i mumweke mu mitōto mivule itobala yaābundile. Kimfwa mu Mitōto 27:4, wāsonekele amba: “I kimo kyonka kyo nalomba kudi Yehova, e kyonka kyo nkalondalonda; na’mba ngikale mu njibo ya Yehova mafuku onso a būmi bwami, mandila buya bwa Yehova, ne kulanga mu njibo īkola.” Mu Kihebelu kibajinjibajinji kishima “kulanga” kishintulula kubandila, kukonkotola, kusantaula, kuloelelwa, kutala na luyaluya, kutobadilwa. I kimweke patōka’mba Davida wādi mupye ku mushipiditu, muntu ufwija’ko Yehova pa mpango yandi ya ku mushipiditu ne kudya kabese ne katye ka bubinebine bwa ku mushipiditu kaleta Leza. Kino kimfwa kya kufwija’ko kyo kifwaninwe kwiulwa.—Mitōto 19:7-11.

Fwija’ko pa Kuyuka Kowayuka Bubinebine bwa mu Bible

4. Mwanda waka Yesu “[wātōkelwe] mu mushipiditu”?

⁴ Kujingulula Kinenwa kya Leza kekulondangapo lūku nansha masomo a ino ntanda aleta ditatu. Ino ako kwimanine pa buntu bwa Leza bwapa boba betyepeje, ba mityima myoloke, bayukile bisakibwa byabo bya ku mushipiditu. (Mateo 5:3; 1 Yoano 5:20) Yesu pa kulangulukila pa bantu bamo bakubulwa kubwaninina badi na majina abo malembwe mūlu, “[wātōkelwe] mu mushipiditu, ino wanena’mba: Nakufwijapo abe Tata, Mwine wa mūlu ne panshi, ubafuko byo wafile byobya ku bakudyumuka, ne ku bañeni, nanshi ku twana-twa-lukeke ubasokola’byo.”—Luka 10:17-21.

5. Mwanda waka bana ba bwanga ba Yesu kebādipo bafwaninwe kukwatyila ku nzeinzei bubinebine bwa Bulopwe bobāsokwedilwe?

⁵ Yesu pa kupwa kulombela milombelo itamba ku mutyima, wāvundamukila kudi bandi bana ba bwanga kanena’mba: “Dyese ne dyese dya oa meso a kumona byo mumonapo bānwe. Ke-ne-muntu nemunena’mba: Bapolofeto ne balopwe badi bangi bangi badi basaka kumona byobya byo mumonapo, nanshi kebebimwenepo, mhm, kadi kwivwana byo mwivwananga bānwe ne kwibīvwana mpika.” Eyo,  Yesu wākankamikile balondi bandi ba kikōkeji baleke kukwatyila ku nzeinzei bubinebine bwa Bulopwe bobāsokwedilwe. Buno bubinebine kebwāsokwedilwepo ku nkongo ya bengidi ba Leza babajinji ne “ku bakudyumuka, ne ku bañeni” ba mu mafuku a Yesu!—Luka 10:23, 24.

6, 7. (a) Lelo i buluji’ka botudi nabo bwa kufwijija’ko Yehova pa mwanda wa bubine bwandi? (b) I kwishila’ka kumwekele dyalelo pa bukata bwa mutōtelo wa bine ne wa bubela?

⁶ Mu ano etu mafuku namo tudi na buluji buvule bwa kufwijija’ko Yehova pa mwanda wa bubine bwandi, ke-muntu, kupityila kudi “umpika wa binebine, udi na manwa,” witupanga bujinguludi bwa mushike bwa Kinenwa kyandi. (Mateo 24:45; Danyele 12:10) Mupolofeto Danyele wāsonekele pa bitala mafuku a mfulo amba: “Bangibangi bakanyemanga koku na koku, ne kuyukidija kukavudijibwa bungibungi.” (Danyele 12:4) Mwene witabije amba buyuki bwa Leza dyalelo ‘bubavudijibwa’ ne amba bengidi ba Yehova badishibwanga senene ku mushipiditu?

⁷ Bine, ntundubuko ya ku mushipiditu ya bantu ba Leza i mishile na kavutakanya ka bipwilo bya Babiloni Mukatakata! Pa kino, bantu bavule i bavutakanibwe ne kukolejibwa na bipwilo bya bubela, o mwanda bavundamukilanga ku mutōtelo wa bine. Badi pamo bwa mikōko keiso ‘kwiabila nandi [Babiloni Mukatakata] myanda’ nansha kutambula ku mpupo yandi.’ Yehova pamo ne bengidi bandi betanga ino mikōko kutwela mu kipwilo kya bine kya Bwine Kidishitu.—Kusokwelwa 18:2-4; 22:17.

Boba Bayukile Kufwija’ko Batūtyikilanga Kudi Leza

8, 9. Lelo binenwa bya Hakai 2:7 bifikidilanga muswelo’ka dyalelo?

⁸ Yehova wānene pangala pa njibo yandi ya ku mushipiditu amba: “Nkatenkenya mizo yonsololo, ne bintu bisaka mityima bya mizo yonso bikāyanga; penepo nkayuja ino njibo ino’i ne ntumbo.” (Hakai 2:7) Buno bupolofeto bwa kutendelwa bwāfikidile mu kitatyi kya Hakai pājokele basheleshele’ko ba mu bantu ba Leza kūbakulula tempelo mu Yelusalema. Dyalelo nadyo, binenwa bya Hakai bifikidilanga monka mu tempelo mikatampe ya Yehova ya ku mushipiditu.

⁹ Bantu midiyo ne midiyo batūtyikilanga kala mu tempelo ya kyelekejo mwanda wa kutōta Leza “mu mushipiditu ne binebinepo,” kadi mwaka ne mwaka tununu ne tununu twa “bintu bisaka mityima bya mizo yonso” twipungulwilanga’mo. (Yoano 4:23, 24) Kimfwa, lapolo ya ntanda yonso ya mu mwaka wa mingilo wa 2006 ilombola’mba bantu 248327 babatyijibwe mwanda wa kulombola kwipāna kobepēne kudi Yehova. Kino i kintu kya bantu bapya 680 ku difuku ne difuku! Buswe bobaswele bubinebine ne kusaka kobasaka kwingidila Yehova bu basapudi ba Bulopwe bilombola amba bine i bakokwe na Leza.—Yoano 6:44, 65.

10, 11. Sekununa mwanda mumweke ulombola muswelo wasangedile bantu bubinebine bwa mu Bible.

¹⁰ Bavule mu bano ba mityima myoloke bakokēlwe ku bubinebine mwanda baikele “kusansanya mubukata mwa boloke ne bapupakane, mubukata mwa yewa wingidila Leza ne yewa wampikwa kumwingidila.” (Malaki 3:18) Tala kimfwa kya ba Wayne ne Virginia, ba mulume ne mukaji bādi mu kipwilo kya Mishoni ino abo na bipangujo bivule byampikwa  kulondololwa. Bādi bashikilwe mvita kadi bādi bavutakanibwa ñeni pa kumona mwendeji wa kipwilo ulombelela basola ne byabulwi. Pobādi benda banunupila’ko bemwene bu basūlwe na ba mu kipwilo, nansha byāfundije Virginia masomo a mu kipwilo myaka mivule yenga ne yenga. Banena’mba: “I kutupu wādi witupempula nansha kuta mutyima ku būmi bwetu bwa ku mushipiditu. Kipwilo kyādi kisaka’ko enka lupeto lwetu. Twadi bavutakanibwe ñeni.” Kadi bāikele kuvutakanibwa pa kumona kipwilo kyabo kipa bantu ba ngitu imo lupusa lwa kusambakena pamo.

¹¹ Mwenda mafuku, munkana wa ba Wayne ne Virginia, kupwa ke wabo mwana, baikala Batumoni ba Yehova. Ku ngalwilo bidi ba Wayne ne Virginia kebasangedile’byopo, ino kupwa bashinta ne kwitabija baitabija kifundwa kya Bible. Wayne unena’mba: “Mu makweji asatu kete, twafundile’mo bivule bitala Bible kupita ne byotwafundile mu bula bwa myaka 70! Ketwadipo tuyukile nansha’mba dijina dya Leza i Yehova, nansha myanda ya Bulopwe, ne Paladisa pano pa ntanda mine mpika.” Kitatyi kityetye, bano ba mulume ne mukaji bashilula kutanwa ku kupwila kwa Bwine Kidishitu ne kutambila mu mwingilo wa busapudi. Virginia unena’mba: “Twadi tusaka kulombola muntu yense bubinebine.” Bonso babidi babatyijibwe mu 2005 abo papo na myaka ilumba ku 80. Ko kunena banena’mba: “Tubatana kipango kya Bwine Kidishitu bwa bine.”

Fwija’ko pa ‘Kulongololwa mu Mingilo Milumbuluke’

12. Lelo i bika Yehova byapanga nyeke bengidi bandi, ne tukalonga bika pa kusaka tumwene’mo?

¹² Yehova ukwashanga nyeke bantu bandi balonge kiswa-mutyima kyandi. Kimfwa, Noa, wātambwile bulombodi ne ndudi mipotoloke ya mwa kupopela safini—mwingilo wādi ufwaninwe kwingilwa pa kitatyi mwendele ndudi! Ne ye mowāingidilwe. Mwanda waka? Mwanda Noa wālongele “monso mwamusoñaninye Leza, e monka mwālongele.” (Ngalwilo 6:14-22) Dyalelo nadyo Yehova ulongololanga bengidi bandi balonge kiswa-mutyima kyandi. Bine, mwingilo wetu umbajinji i kusapula myanda miyampe ya Bulopwe bwa Leza butūdilwe’ko ne kukwasha bantu ba mityima myoloke bekale bana ba bwanga ba Yesu Kidishitu. Monka mobyādi bikadile kudi Noa, kikōkeji kyo kiketulengeja tubwanye uno mwingilo. Tufwaninwe kulonda na kikōkeji buludiki bwitupa Yehova kupityila ku Kinenwa kyandi ne ku bulongolodi bwandi.—Mateo 24:14; 28:19, 20.

13. Lelo Yehova witufundijanga kupityila ku bika?

¹³ Pa kusaka’mba tuvuije mwingilo wetu, tufwaninwe ‘kwingidija kingidilwa kyetu mokyolokele,’ ke Kinenwa kya Leza kadi, mwanda kyo “[kimwenwa’mo] pa kufundija, ne kukwasha, ne kudingila madingi, ne kulombola ñeni ya umboloke; amba muntu wa Leza ēkale umbwanye byonso, ne kulongololwa biyampe senene, shē, mu mīngilo yonso milumbuluke.” (2 Temote 2:15; 3:16, 17) Yehova witupanga bufundiji bwa mvubu kupityila ku kipwilo kya Bwine Kidishitu, monka mwādi upānina’bo mu myaka katwa kabajinji. Dyalelo, Masomo a Mwingilo wa Kiteokratike ne Kupwila kwa Mingilo biloñwanga mu bipwilo 99 770 kujokoloka ntanda yonso yenga ne yenga mwanda wa kwitukwasha mu mwingilo. Lelo nobe ufwijanga’ko pangala pa kuno kupwila kwa mvubu na kutanwa’ko kitatyi ne kitatyi ne na kwingidija byonso byofunda’ko?—Bahebelu 10:24, 25.

14. I muswelo’ka ulombolanga bengidi ba Leza kufwija’ko kwabo pa madyese abo a kumwingidila? (Tweja’mo ne myanda yowamona mu tabulo pa paje 27-30.)

¹⁴ Midiyo ne midiyo ya bantu ba Leza ntanda yonso ipēne mu busapudi mwanda wa kulombola kufwija’ko kwabo pa buno bufundiji. Kimfwa mu mwaka wa mingilo wa 2006, basapudi ba Bulopwe 6 741 444 basapwile mansaa 1 333 966 199 ne kwendeja bifundwa bya Bible 6286618. Ino i myanda’tu ibala inga ikankamika ya mu lapolo wa ntanda yonso. Tukwita utale na katentekeji ino lapolo ne kukankamikwa nayo monka mwākankamikilwe banabetu ba mu myaka katwa kabajinji pa kwivwana lapolo ya kwendelela kwa mwingilo wa busapudi mu kyabo kitatyi.—Bilongwa 1:15; 2:5-11, 41, 47; 4:4; 6:7.

15. Mwanda waka ketufwaninwepo kutyumukwa mutyima pa mwanda wa mwingilo otwingidila Yehova na muya onso?

 ¹⁵ Mutyima wa kufwija’ko Leza ne mitendelo imutendelwa mwaka ne mwaka bilombolanga kufwija’ko kwa mushike kwa bengidi ba Yehova pa mwanda wa mukenga obapelwe wa kuyuka Yehova ne kusapula bukamoni. (Isaya 43:10) I bine, kitapwa kya lutendelo kipāna batutu ne bakaka banunu, babela, nansha babilemafu kikokeja kudingakanibwa na tulupeto twa mwana-mukaji wa kishala. Ino ketufwaninwepo kwilwa amba Yehova ne wandi Mwana basangelanga boba bengidila Leza na muya onso, ponso pafudile bukomo bwabo.—Luka 21:1-4; Ngalatea 6:4.

16. Lelo i bingidilwa’ka bya kufundija nabyo bitupele Leza mu kino kitatyi?

¹⁶ Kutentekela pa kwitufundija mingilo, Yehova, kupityila ku bulongolodi bwandi, i mwitukumbanye na bingidilwa bilumbuluke bya kufundija nabyo. Mu myaka makumi ipityile’i, twadi na Bubinebine butwala ku bumi bwa Nyeke ne nyeke, Ukokeja kwikala ne būmi bwanyeke mu Paladisa pano pantanda, ne Buyuki Butwala ku Būmi Bwanyeke, kadi panopano tudi na Lelo I Bika Bine Bifundija Bible? Boba bonso badi na mutyima wa kufwija’ko pangala pa bino bingidilwa bengidijanga’byo senene mu busapudi.

Ingidija Senene Dibuku Bifundija Bible

17, 18. (a) Lelo i bipindi’ka bya dibuku Bifundija Bible byosangelanga kwisambila’po mu mwingilo obe? (b) I bika byanene mutadi wa kipindi umo pa dibuku Bifundija Bible?

¹⁷ Dibuku dya mashapita 19 dinena’mba Lelo I Bika Bine Bifundija Bible? i kyabuntu mu mwingilo wetu, mwanda muneneno wadyo i utōka, upēla, ne mbwejo yadyo i ya mushike. Kimfwa, shapita wa 12 udi na mutwe wa mwanda unena’mba “Ikala na Būmi Busangaja Leza.” I shapita ushintulwila mwifundi muswelo wakokeja kwikala mulunda na Leza, kintu kimona bavule amba kekibwanikapo kadi kekikabwanikapo. (Yakoba 2:23) Lelo kino kingidilwa kya kwifunda nakyo Bible kyātambwilwe muswelo’ka?

¹⁸ Mutadi wa kipindi umo wa mu Ostrali waletele lapolo amba dibuku Bifundija Bible “didi  na myanda ikokela bukidibukidi besambi netu mu mīsambo.” Ubweja’ko kadi amba i dipēla kwingidija, “i dipe basapudi bavule ba Bulopwe kikulupiji ne nsangaji mu mwingilo. O mwanda ke kya kutulumukapo shi bamo beditanga bu Kituntwa kya Nsahabu!”

19-21. Sekununa myanda imoimo mimweke ilombola mvubu ya dibuku Bifundija Bible.

¹⁹ Mwana-mukaji umo wa mu Giyana wanene tutu umo pania waile ku yandi njibo amba: “I Leza’tu wakutuma.” Mwana-mulume wadi ushikata na uno lolo bya ntekele-nkuvwike wamunyemene ne kumushila bana babidi. Pania wapūtula dibuku Bifundija Bible pa shapita 1 ne kutanga na diwi ditunduke musango wa 11 udi munshi mwa kamutwe ka mwanda katyetye kanena’mba “Leza Umonanga Namani Bukondame Botulwa Nabo?” Pania unena’mba: “Uno mwanda wamutengele bininge. I bine, watalukile, wajokela kunyuma kwa butyike, kadila.” Uno mwana-mukaji waitabije kifundwa kya Bible na kaka wa mu kyabo kibundi ne pano wendelelanga kumeso.

²⁰ José wa mu Eshipanye, wafwidilwe mukaji mu akishida ya motoka. Penepa wakimba kupwija njia na bintu bikolwañana, kupwa wakamona ne bayuki ba mikadilo ya bantu. Ino, kutupu wabwenye kulondolola kipangujo kyadi kikambija José kya’mba: “Mwanda waka Leza walekele mukajami afwe?” Difuku dimo, José wetene na Francesc, obengilanga nandi mu kompani imo. Francesc wamunena befunde shapita 11 wa dibuku Bifundija Bible, unena’mba “Mwanda Waka Leza Ulekele’ko Masusu?” Nshintulwilo ya mu Bisonekwa ne kyelekejo kya mwadimu ne mwanā masomo byatenga José bininge. Washilula kwifunda na kininga, wakatanwa ne ku kubungakana kwa kipindi, kupwa wakapwila ne ku Njibo ya Bulopwe.

²¹ Roman, nsunga wa mu Polonye wa myaka 40, wadi nyeke ulēmekele Kinenwa kya Leza. Ebiya kifundwa kyandi kyadi kyendelela’tu na nabyanabya mwanda wadi mutyintyidilwe bininge na kaji kandi. Inoko, wakatenwe ku kitango kya distrike watambula’ko ne dibuku Bifundija Bible. Ponka’pa washinta mwikadilo wandi mu muswelo utendelwa. Unena’mba: “Mu dino dibuku, mo mwibungile bufundiji bonso bwa kyalwilo bwa mu Bible, ne kupunga kintu kimo kituntulu.” Roman pano wifundanga kitatyi kyonso Bible ne wendelelanga biyampe.

Kufwija’ko Kobe Kwende Kuvula

22, 23. Lelo i muswelo’ka otukendelela na kufwija’ko pangala pa lukulupilo lwitubikilwe kumeso?

²² Monka mokyashintulwidilwe ku Kitango kya Distrike “Kukūlwa Kubafwena!,” Bene Kidishitu ba bine batengele “bukūdi bwa nyeke na nyeke” bulaile Leza ne bubwanikile kupityila ku mashi amwangile Yesu Kidishitu. Kekudipo muswelo mukwabo muyampe wa kulombola kufwija’ko pa luno lukulupilo na owa wa kwitōkeja “ku mīngilo mifwe, ke mwingila mīngilo ya Leza wa būmi.”—Bahebelu 9:12, 14.

²³ Eyo, kūminina kūminina na kikōkeji midiyo isamba ne musubu ya basapudi ba Bulopwe mu mwingilo wa Leza papo koku ne koku kuyule lupusa lwa bya kusakasaka bine i kingelengele. Kadi i bukamoni bulombola’mba bengidi ba Yehova bafwijanga’ko bininge pangala pa madyese obadi nao a kwingidila Leza, pa kuyuka’mba “kuputumina kwa mu mīngilo [kwabo] kekudipo kwa bitubitupu mudi Mfumwetu.” I biyampe kuno kufwija’ko kwende kuvula!—1 Kodinda 15:58; Mitōto 110:3.

Usa Kulondolola Namani?

• I bika bitufundija mulembi wa mitōto pa bitala kufwija’ko Leza ne pa mpangiko yandi ya ku mushipiditu?

• Lelo binenwa bya mu Hakai 2:7 bifikidilanga namani dyalelo?

• Lelo i muswelo’ka ulongolwele Yehova bengidi bandi mwa kumwingidila’bo senene?

• Lelo i bika byokokeja kulonga mwa kulombwela kufwija’ko kobe pa buyampe bwa Yehova?

[Bipangujo bya Kifundwa]

[Kifwatulo pa paje 31]

Yehova witulongololanga mwa kulongela kiswa-mutyima kyandi