Kwasha Bakwenu Bakōkele Byobya Bifundija Bible

“Ino yoya ya mu nshi milumbuluke bo boba bakutelekapo mwanda beulamine mutyima umo wa kunengela, ebiya bapanga bipa ne kutūkija mutyima ponka.”—LUKA 8:15.

1, 2. (a) I kika kilupwidilwe dibuku Lelo I Bika Bine Bifundija Bible? (b) Lelo Yehova i mwesele namani mwingilo wa bantu bandi wa kulonga bana ba bwanga mu ino myaka?

 “DINO dibuku i diyampe mpata. Botwifunda nabo Bible bedisenswe. Nami nedisenswe. Dino dibuku dikwasha kushilula bifundwa bya Bible ponka na ponka.” Bino byo byānene pania umo, mwingidi wa kitatyi kyonso Kamoni wa Yehova pa mwanda utala dibuku Lelo I Bika Bine Bifundija Bible? * Musapudi mukwabo wa Bulopwe mununu wanene pa mwanda utala dino dibuku dyonka amba: “Naikele  na dyese dya kukwasha bantu bavule kuyuka Yehova umbula bwa myaka 50 yokendi mwingile mwingilo wami. Ino pano nkokeja kunena’mba, dino dibuku dya kwifunda’mo i dya kutendelwa. Binenwa bya pa bifwatulo bitūkijanga mutyima ne byelekejo nabyo byonka bisangaja.” Lelo nobe ye momwenanga dibuku Bifundija Bible? Dino dibuku dikwasha pa kwifunda Bible i dilupulwe mwanda wa ufikidije musoñanya wa Yesu wa amba: “Endai nanshi mukafundijei mizo yonso ya bantu, . . . kadi ne kwibalombola balaminine byonso byo nemulaīle ami mwine.”—Mateo 28:19, 20.

² Ne kutatana mpika, Yehova usangalanga pamona Batumoni bandi midiyo 6 ne musubu bakōkela ku bwendeji bwa Yesu bwa kulonga bana ba bwanga. (Nkindi 27:11) I kimweke patōka amba Yehova weselanga bukomo bobalonga. Kimfwa mu 2005, myanda miyampe yasapwilwe mu matanda 235 ne kwaendejibwe bifundwa bya Bible 6 061 500 ne musubu. Ne bilupukile’ko i bino: bantu bavule ‘baivwene mwanda wa Leza, beusepelela, ke pamo na mwanda wa bantupo, ehe, i na mwanda wa Leza.’ (1 Tesalonika 2:13) Mu myaka ibidi ipityile’i, kintu kya bana ba bwanga bapya tununu tutwa tutano ne kupita bebwejeje’ko, bakwatañanya būmi bwabo na misoñanya ya Yehova ne kwipāna bepāna abo bene kudi Leza.

3. I bipangujo’ka bitala pa mwa kwingidijija dibuku Bifundija Bible byotusa kubandaula mu kino kishinte?

³ Lelo wemwenine nsangaji ya kwendeja muntu kampanda kifundwa kya Bible panopano? Kujokoloka ntanda yonso kukidi bantu ba “mutyima umo wa kunengela” abo pa kwivwana mwanda wa Leza ‘beulama, ebiya bapa bipa ne kutūkija mutyima ponka.’ (Luka 8:11-15) Shi ke pano, tubandaulei muswelo okokeja kwingidija dibuku Bifundija Bible mu mwingilo wa kulonga bana ba bwanga. Tusa kubandaula bipangujo bisatu mu mīsambo yetu: (1) Lelo ukokeja namani kushilula kifundwa kya Bible? (2) I manwa’ka a mwa kufundijija endeka senene? (3) I muswelo’ka okokeja kukwasha muntu ekale nandi mwifundi kadi mufundiji wa Kinenwa kya Leza kisonekwe?

Muswelo Okokeja Kushilula Kifundwa kya Bible

4. Mwanda waka bamo bekakanga pa kwifunda Bible, ne i muswelo’ka obwanya kwibakwasha bakomene kuno kwikaka?

⁴ Shi abakunena kutumbuka munonga na ditabula’tu dimo, padi ukokeja kupela mulangwe’wa. Ino shi padi ka dibwe ka kutyampa’po pa bukata ukokeja kutompa. Mo monka ne muntu udi na mingilo mikwabo ukokeja kwikaka pa kwifunda Bible. Mwinē njibo ubwanya padi kulanga’mba pa kwifunda bilomba kitatyi kilampe ne bukomo. Lelo ukokeja kumukwasha namani anekenye kuno kwikaka? I na kumulombola bipindi palapala ne myanda imo mu mīsambo yenu mu kīpi, na kwingidija dibuku Bifundija Bible amba umutungulule ku kwifunda Kinenwa kya Leza kitatyi kyonso. Shi wilongolola senene kyaba kyonso kyomujokela’mo, bidi pamo bwa dibwe dya kusambukila’po dikamufikija ku kusamba bulunda na Yehova.

5. Lelo mwanda waka ufwaninwe kutanga dibuku Bifundija Bible?

⁵ Inoko, dibajinji dya kukwasha muntu amwene mu dibuku Bifundija Bible, ufwaninwe bidi abe mwine kuyuka’dyo senene. Lelo kodi mutange dino dibuku tamba ku ngalwilo  kufika ne ku mfulo? Ba mulume ne mukaji bamo baselele dino dibuku pobaendele mu konje, bashilula kwiditanga pobadi batūja pa kyabu. Mwana-mukaji umo wa mu kine kibundi’kyo webafwena paadi upoteja tubintu ku bañenda, watanga kala mutwe wa mwanda amba Lelo I Bika Bine Bifundija Bible? Walombola ba mulume ne mukaji’ba amba, pabapite’tu mansaa matyetye nandi nomba Leza ampe kilondololwa pa kino kipangujo kyonka kino. Bano ba mulume ne mukaji bapa uno mwana-mukaji dino dibuku na nsangaji. Lelo nobe ‘wikūdilanga’ko kitatyi’ kya kutanga dino dibuku, nansha’tu mu masekonde matyetye shi poilaijañana nansha potūja ku kaji nansha ku masomo? (Efisesa 5:15, 16, NW) Shi ulonga nankyo, ukeibidija biyampe na dino dibuku dya kwifunda nadyo Bible, kadi nankyo ukamona ne mukenga wa kwisamba na bakwenu pangala pa myanda idi’mo.

6, 7. Lelo i muswelo’ka okokeja kwingidija dibuku Bifundija Bible pa kushilula bifundwa bya Bible?

⁶ Shi kopāna dino dibuku mu mwingilo wa busapudi, ingidija biyampe byelekejo, bisonekwa, ne bipangujo bidi pa paje 4, 5, ne 6. Kimfwa, ukokeja kushilula mīsambo na kwipangula amba, “Lelo i kwepi kutanwa bwendeji bukulupilwa mwa kulwila na bikoleja bya bantu dyalelo?” Pa kupwa kuteja na katentekeji kilondololwa kya muntu, tanga 2 Temote 3:16, 17, ne kumushintulwila amba Bible uletanga madingi a binebine a mwa kupwijija bikoleja bya bantu. Kupwa kokela milangwe ya mwimvwaniki pa paje 4 ne 5, ne kumwipangula’mba: “Lelo i mwikadilo’ka ukukambakanya bininge pa ino ilombwelwe pano?” Shi mwinē njibo wafunka’po umo, munene akwate dibuku potanga mu Bible obe kisonekwa kikwatañene na uno mwanda. Kupwa tanga paje 6, ne kwipangula mwimvwaniki amba, “Pa bino bipangujo bisamba bidi kunshi kwa uno paje, i kyepi kyoabila bakulondolole?” Shi watonge’po kimo, mulombole shapita mutanwa kilondololwa, mushile dibuku, mwilayei mwa kwimwena mwanda wa kwisambila pa kyakyo kipangujo.

⁷ Bino byanenwa’bi, byonso bikokeja kulongwa kubwipi mu minite itano. Enka mu ino minite mityetye yonka’i, ukokeja kuyuka bivule bitala musapwilwa, kutanga bisonekwa bibidi ne kushintulula’byo, ne kwala kyalwilo kya kujokela’ko dikwabo. Mīsambo yobe mīpi na mwinē njibo ikokeja kwikala bu nsulo ya kumukankamika kukatampe ne kumusenga kwadi kumusakilwa. Pa kino, nansha shi muntu wadi na mingilo, ukokeja kwitabija kupityija pamo nobe minite mikwabo mityetye amba umukwashe kutabwila’ko ditabula dikwabo ne kutwela mu ‘dishinda ditwala ku būmi.’ (Mateo 7:14) Mu bitatyi mu bitatyi, mwimvwaniki paenda ubweja’ko kusangela, ne kitatyi kya kupityija mu kwifunda nakyo kyenda kilepa. Kino padi ke ne kushikata’ko shi wakwadila ne kifundwa kekitungilwa bula.

Manwa a Mwa Kufundijija Apa Bipa

8, 9. (a) I muswelo’ka obwanya kukwasha mwifundi wa Bible mwa kulwila na bijika ne matompo akokeja kutana? (b) I kwepi kobwanya kutana bingidilwa kebipi mudilo bya kūbaka nabyo lwitabijo lukomo?

⁸ Shi muntu washilula kukōkela byobya bifundija Bible, ukabwanya ne kukomena bijika bikokeja kumukankaja endelele. Mutumibwa Polo wānene amba: “I binebine ne bonso batele mutyima ku bwine-Leza kupangwapangwa ko kwabo.” (2 Temote 3:12) Polo wādingakenye ano matompo na mudilo ubwanya kusoka byubakwa nabyo bya bulēme butyetye, ino washia’ko enka bya bulēme kimfwa bya nsahabu, ndalama, ne mabwe malēme keonekapo. (1 Kodinda 3:10-13; 1 Petelo 1:6, 7) Pa kukwasha mwifundi wa Bible atamije ngikadilo ilombwa mwa kunekenenya matompo akatana, i biyampe kumukwasha kūbaka lwitabijo lwandi na bingidilwa kebipi mudilo.

⁹ Kaimba wa mitōto wādingakenye “myanda ya Yehova” amba “i mitōke tō; bwa ndalama mitompe mu nkelwa ya panshi, misungululwe pasamba-pabidi.” (Mitōto 12:6) I bine, Bible udi na bingidilwa bya mvubu bikokeja kwingidijibwa mwanda wa kūbaka nabyo lwitabijo. (Mitōto 19:7-11; Nkindi 2:1-6) Dibuku Bifundija Bible ditulombolanga mwa kwingidijija Bisonekwa senene shē.

10. I muswelo’ka okokeja kukokela milangwe ya mwifundi pa Bible?

¹⁰ Pomwifunda, kokela milangwe ya mwifundi  pa bisonekwa biletelwe mu shapita ne shapita omwifunda. Ingidija bipangujo mwanda wa kukwasha mwifundi emvwanije bisonekwa bikatampe kadi lombola mwa kwibingidijija. Dyumuka kumūminija kya kulonga. Ino abe londa kimfwa kya Yesu. Pāmwipangwile mwine-bijila, Yesu wālondolwele amba: “Lelo kyokya kidi mu mukanda bālembele namani? Lelo wikitañanga namani nobe?” Uno muntu wālondolola munenena Bisonekwa, Yesu nandi wamukwasha muswelo wa kwingidija misoñanya mu būmi bwandi. Kupityila ku byelekejo Yesu wāmukweshe amone muswelo wakokeja kutengwa na bufundiji. (Luka 10:25-37) Dibuku Bifundija Bible didi na byelekejo bivule byokokeja kwingidija mwanda wa kukwasha mwifundi engidije misoñanya ya mu Bisonekwa mu būmi bwandi.

11. Lelo i misango inga yomufwaninwe kwifunda mu kifundwa ne kifundwa?

¹¹ Dibuku Bifundija Bible i dingidije muneneno upēla, kadi wampikwa kitonto pa kushintulula Kinenwa kya Leza, monka mwādi mushintulwila Yesu milangwe mikomo mu bishima bipēla. (Mateo 7:28, 29) Nobe londa kimfwa kyandi. Pāna musapu mu muswelo upēla, utōkeja milangwe, ne wa binebine. Kokapita myanda bukidibukidi. Ino, ngikadilo ne lūku lwa mwifundi byo bikalombola bungi bwa misango ya kwifunda mu kifundwa ne kifundwa. Yesu wādi ukengelela pafudile bukomo bwa bandi bana ba bwanga ne kadipo wibalundikila myanda mivulevule kupita pa yobasakilwa mu kine kitatyi’kya.—Yoano 16:12.

12. Lelo mbwejo ifwaninwe kwingidijibwa namani?

¹² Dibuku Bifundija Bible didi ne na mbwejo ya myanda mikatampe 14. Byodi mufundiji, i abe’wa wa kuyuka i muswelo’ka wa kwingidija biyampe ino myanda, kukwatañana na bisakibwa bya mwifundi. Kimfwa, shi mwifundi wakankalwa kulama byafunda nansha udi na kipangujo kitala pa nkulupilo yadi nayo kala, penepo bikokeja kwikala biyampe kukokela milangwe yandi pa kipindi kampanda kya mu mbwejo ne kumuleka atale uno mwanda aye mwine. Pakwabo napo kadi, bisakibwa bya mwifundi bikokeja kukulomba mubandaule pamo nandi ino myanda. Mbwejo idi na bishinte bya mu Bisonekwa bya kamweno, kimfwa “‘Muya’ ne ‘Mushipiditu’—Bino Bishima na Bubine Bidi na Buluji’ka?” ne “Kuyuka ‘Babiloni Mukatakata.’” Mukokeja kwisambila pa ino myanda na mwifundi obe. Mitwe ya myanda idi mu mbwejo byokeidipo na bipangujo bya kifundwa, o mwanda bikulomba kwiibidija bidi ino myanda mwa kwipangwila bipangujo biluji.

13. Milombelo ikwashanga namani mu kuningija lwitabijo?

¹³ Mitōto 127:1 unena’mba: “Poso Yehova ashimike njibo, bashimika baputuminangamo bitupu bitupu.” Nanshi polongolola kifundwa kya Bible, lomba bukwashi kudi Yehova. Milombelo yolombela ku ngalwilo ne ku mfulo kwa kifundwa ne kifundwa ifwaninwe kulombola mutyityile kipwano kyobe na Yehova. Kankamika mwifundi ekale kulomba Yehova tunangu twa kwivwanija Kinenwa kyandi ne kumona bukomo bwa kwingidija madingi andi mu būmi. (Yakoba 1:5) Shi ulonge namino, nankyo mwifundi ukakomejibwa mwa kūminina mu matompo, kadi lwitabijo lwandi lukenda luninga.

Kwashai Befundi ba Bible Nabo Bekale Bafundiji

14. Mwifundi wa Bible usakilwa kwendelela’ka?

¹⁴ Shi botwifunda nabo Bible basaka kulama “byonso” byālaile Yesu ku bandi bana ba bwanga, bibalomba kwendelela kutamba pa bu befundi ba Kinenwa kya Leza kwikala bafundiji bakyo. (Mateo 28:19, 20; Bilongwa 1:6-8) Lelo i muswelo’ka okokeja kukwasha mwifundi endelele namino?

15. Mwanda waka ufwaninwe kukankamika mwifundi wa Bible atanwe ku kupwila kwa Bwine Kidishitu?

¹⁵ I kyendele’mo kwita mwifundi aye atanwe pamo nobe ku kupwila kwa pa kipwilo tamba’tu pa pomushilula kwifunda. Mushintulwile amba ku kupwila ko kobetufundijanga mwa kwikadila bafundiji ba Kinenwa kya Leza. Mu bula bwa mayenga kampanda ku mfulo kwa kifundwa ne kifundwa kya Bible, shiya’ko minite mityetye ya kumushintulwila mupityilanga mpangiko ya bufundiji bwa ku mushipiditu botutambulanga ku kupwila palapala ne ku kubungakana. Lombola biyampe kamweno komwenanga mu  ino mikenga. (Bahebelu 10:24, 25) Shi mwifundi washilula kupwila kyaba ne kyaba, nabya kakejepo kwikala mufundiji wa Kinenwa kya Leza.

16, 17. I bitungo’ka bimobimo bikokeja kwitungila mwifundi wa Bible ne kufikila’po?

¹⁶ Kankamika mwifundi wa Bible etungile bitungo byakokeja kufikila’po. Kimfwa, mukankamike asapwile babutule ne ku balunda nandi byobya byafunda. Kadi mulombole amba ubwanya ne kwitungila kitungo kya kutanga Bible yense mutuntulu. Shi ubamukwasha kwikala na kibidiji kya kutanga Bible kitatyi kyonso ne kwikilama, nankyo ukamwena’mo mafuku onso nansha pakekala ke mubatyijibwe. Kutentekela pa kino, wabulwa’po kukwasha mwifundi etungile kitungo kya kuvuluka’ko nansha’tu kisonekwa kimo kimo kileta malondololo ku bipangujo bikatampe bya mu shapita ne shapita ya dibuku Bifundija Bible? Shi alonge namino, ukekala “busendwe, wampikwa ne kyāfwijibwa bumvu, wakolokela monka mu mwanda wa binebine.”—2 Temote 2:15.

¹⁷ Pa kyaba kya kufundija mwifundi kupituluka’tu enka mu bisonekwa bitupu nansha kunena myanda idi’mo, ino mukankamike alombole mwakokeja kushintulwila’byo muntu umwipangula mwikadile kukulupila kwadi nako munda mwandi. Kya kumwena’ko kīpi kikokeja kumukwasha, abe ikala bwa wabutule wandi nansha mwingidi nandi umwipangula ashintulule nkulupilo yandi. Palondolola mwifundi, mulombole ayuke mwa kulondolwela na “butuukanye ne kilemeko ponka.”—1 Petelo 3:15, Myanda Miyampe ku Bonso.

18. Shi mwifundi wa Bible wabwanya bisakibwa bya bu musapudi wampikwa kubatyijibwa, lelo i bukwashi’ka bukwabo bobwanya kumukwasha?

¹⁸ Mwenda mafuku, mwifundi ukokeja kubwanya bisakibwa bya kwenda mu busapudi. Mulombole amba kupebwa lupusa lwa kutambila mu mwingilo’u i dyese. (2 Kodinda 4:1, 7) Shi bakulumpe abapu kubandaula mwifundi amba wabwanya bisakibwa bya bu musapudi wampikwa kubatyijibwa, mukwashe kuteakanya musapwilo upēla ne kumushindikila mu mwingilo wa budimi. Endelela na kwingila nandi pamo kitatyi kyonso mu bipindi palapala bya mwingilo, kadi mufundije mwa kwilongolwela ne mwa kulongela kujokela’mo kupya kupa bipa. Kimfwa kyobe kilumbuluke kikamukwasha bininge.—Luka 6:40.

‘Wipandije Abe Mwine ne ba Kukwivwana Bene Kumo’

19, 20. I bitungo’ka byofwaninwe kwitungila, ne mwanda waka?

¹⁹ I bine, kukwasha muntu amone “kuyūkidija kwa binebine” kulomba kwingila bininge. (1 Temote 2:4) Inoko, kekudipo nsangaji ya mu būmi idingakene na yoya ya kukwasha muntu akōkele byobya bifundija Bible. (1 Tesalonika 2:19, 20) Bine, tudi na dyese dikata dya kwikala bu “bakwingila mīngilo pamo na Leza” ya kufundija ntanda yonso!—1 Kodinda 3:9.

²⁰ Yehova, kupityila kudi Yesu Kidishitu ne bamwikeulu bandi ba bukomo, usa kwimuka panopano ponka na boba ‘bampikwa kuyūka Leza, ne boba bampikwa kukōkela myanda-miyampe ya Mfumwetu Yesu.’ (2 Tesalonika 1:6-8) Būmi bwa bantu pano budi pa katele-bulenda. Lelo kwitungilapo kitungo kya kwendeja nansha’tu kifundwa kimo kya Bible mu dibuku Lelo I Bika Bine Bifundija Bible? Poingila uno mwingilo, ukamona “mwakwipandijija abe mwine, ne bakukwivwana bēne kumo.” (1 Temote 4:16) Pano po pene pamwekelela amba tufwaninwe kwikala na kampeja-bukidi ka kukwasha bantu nabo bakōkele byobya bifundija Bible.

[Kunshi kwa dyani]

Lelo I Bika Byowefunda?

• Lelo i kitungo’ka kilupwidilwe dibuku Bifundija Bible?

• Lelo i muswelo’ka okokeja kushilula kifundwa kya Bible mu dibuku Bifundija Bible?

• Lelo i manwa’ka a mwa kufundijija apa bipa senene?

• I muswelo’ka okokeja kukwasha mwifundi nandi ekale mufundiji wa Kinenwa kya Leza?

[Bipangujo bya Kifundwa]

[Kifwatulo pa paje 11]

Le wingidijanga senene dino dibuku?