Myanda Mikatampe ya mu Mukanda wa Lwimbo lwa Ñimbo
Mwanda wa Yehova I Mūmi
Myanda Mikatampe ya mu Mukanda wa Lwimbo lwa Ñimbo
“PAMO’NKA bwa divu umbukata mwa miba, e monka mwikadile ne mukena wami mwana-mukaji umbukata bwa bāna bana-bakaji.” “Pamo’nka bwa mutyi wa mwembe umbukata bwa mityi ya muntanda, e monka mwikadile ne wami muswe mwana-mulume umbukata mwa bāna bana-balume.” “Lelo i ani mwine uno’u umweka’nka bwa lubanga bwē, wa būya’nka bwa kweji, utōka’nka bwa dyuba?” (Lwimbo lwa Ñimbo 2:2, 3; 6:10) Ano mavese adi mu mukanda wa Lwimbo lwa Ñimbo atobala’po kashā! Mukanda mutuntulu i lulumbi lwa bishima bidi na buluji kadi bilumbuluke, o mwanda utelwa bu “Lwimbo lwa ñimbo (nansha’mba Lwimbo lutabuke buya mu ñimbo).”—Lwimbo lwa Ñimbo 1:1.
Wābundile’lo i Solomone Mulopwe wa Isalela wa kala, kubwipi na mwaka wa 1020 K.K.K., mu kipindi kibajinji kya myaka 40 ya kubikala kwandi, kadi i lwimbo lwa mānga ya buswe bwa nsongwalume umo mukumbi na nsongwakaji wa kunja, Mwine Shulama. Mu bantu batelelwe mu luno lulumbi mudi ne inandya uno nsongwakaji, batutu wandi, “bāna ba Yelusalema bana-bakaji [bansongwakaji ba mu kipango],” ne “bāna ba Ziona bana-bakaji [bansongwakaji ba mu Yelusalema].” (Lwimbo lwa Ñimbo 1:5; 3:11) I bikomo ku mutangi wa Bible kuyuka i ani wisamba mu Lwimbo lwa Ñimbo, ino shi atale byobanena ne i kudi ani kobanena’byo nabya kukabulwepo kujingulula muneni wabyo.
Uno musapu wa Lwimbo lwa Ñimbo ubadilwa mu Kinenwa kya Leza pangala pa buluji bubidi bwa mvubu mikatampe. (Bahebelu 4:12) Buluji bubajinji, witufundija buswe bwa bine bufwaninwe kwikala pa bukata bwa mwana-mulume ne mwana-mukaji. Buluji bwa bubidi, luno lwimbo lulombola buswe budi pa bukata bwa Yesu Kidishitu na kipwilo kya Bene Kidishitu bashingwe māni.—2 Kodinda 11:2; Efisesa 5:25-31.
‘KEMUKILANGULAI’PO BUSWE MONDI’
“Amfifye ne mififyo ya kyakanwa kyandi; mwanda busanswe bobe butabukile vinyu kunengela.” (Lwimbo lwa Ñimbo 1:2) Mīsambo ya mu Lwimbo lwa Ñimbo ibashilula na bino bishima bya nsongwakaji wa kunja wa kwityepeja waletwa mu dipema dya mulopwe Solomone. Le wafika’mo namani?
Unena’mba: “Bāna ba lolo bana-balume banjingilwa mutyima ko ndi, bauntūla bu-kalama ka madimi a mañanza.” Batutu wandi abamujingilwa mutyima mwanda, ku muketeko wa mvula, nsongwalume mukumbi wamwite bende nandi mu lunango. Pa kusaka kumupeleja kwenda, abamupe kiselwa kya kulama madimi kutyina “tumizeu tutyū, tonakanya madimi a mañanza.” Uno mwingilo ubamufikija kubwipi na kipango kya Solomone. Abamone bupopoke bwandi aye padi “mu budimi bwa ntōle,” penepa ko kumuleta mu kipango.—Lwimbo lwa Ñimbo 1:6; 2:10-15; 6:11.
Uno nsongwakaji nansha byaabila mukumbi muswe wandi, ino bana-bakaji ba mu kipango abamunena amba “enda dyobe mu kipola kya luombe’lwa” ukamukimbe. Ino Solomone aye kasakile’po kumuleka ende. O mwanda washilula kumwanya buya bwandi ne kumulaya kumupa “mpiko ya nsahabu ne mvuma ya ndalama.” Bino byonso kebitenekelepo mutyima wa uno nsongwakaji. Penepa nsongwalume mukumbi’wa wafika mu kipango kya Solomone, wamone nsongwakaji’wa, kaela lubila’mba: “Talapo bidi, wi mupopoke abe mukena wami; talapo, wi mupopoke.” Nsongwakaji nandi watyipija bana-bakaji ba mu kipango amba: “Kemutununapo nansha kulangula lusa [“buswe,” NW], po kelwaswile.”—Lwimbo lwa Ñimbo 1:8-11, 15; 2:7; 3:5.
Bipangujo bya mu Bisonekwa Bilondolwelwe:
1:2, 3—Mwanda waka busanswe bwa nsongwalume mukumbi budi pamo’nka bwa vinyu ne dijina dyandi pamo bwa māni? Vinyu isangajanga mutyima wa muntu kadi māni mapungululwe pa mutwe nao atalajanga, mo monka ne busanswe bwa nsongwalume ne dijina dyandi byādi bikomeja ne kusenga nsongwakaji. (Mitōto 23:5; 104:15) Bene Kidishitu ba bine, nakampata bashingwe māni, nabo bakomejibwanga ne kukankamikwa pobalangulukila pa buswe bwibaswele Yesu Kidishitu.
1:5—Mwanda waka nsongwakaji wa kunja wadingakenye bufityi bwandi na “mapema a Kedala”? Moya a bambuji obādi bapunga nao bintu ādi akwasha mu bivule. (Umbadilo 31:20) Kimfwa, “bisandi bya makupo bya moya a bambuji” byākweshe mu kupunga “kipema [kya] peulu pa kipema-kya-kikalo.” (Divilu 26:7) Mapema a Kedala ādi mapungwe, monka mupungilwa ne dyalelo mapema a Balabu, batelwa bu Bedouin, na moya afita a mbuji.
1:15—Le nsongwalume mukumbi wādi usaka kunena bika paānene’mba: “Meso obe adi bwa a bankunda”? Nsongwalume mukumbi wādi unena’mba meso a nsongwakaji mukena wandi ādi malembeke kadi makōkele pamo bwa a bankunda.
2:7; 3:5—Mwanda waka abatyipija bana-bakaji ba mu kipango “pa bansunu ne tusha-tukaji ba muntanda”? Bansunu ne tusha i banyama bayukane bu bayampe ne balumbuluke. Nanshi, nsongwakaji Mwine Shulama wādi utyipija bana-bakaji ba mu kipango amba kebakilangula buswe mwadi nansha ke pa kintu’ka kiyampe ne kilumbuluke.
Ñeni Yotuboila’ko:
1:2; 2:6. Busanswe ke bubipo kwilombola kitatyi kyomwinangila mwanda wa kwisonga. Inoko, ba mwana-mulume ne mwana-mukaji bafwaninwe kuta mutyima amba bino bilomboji bikale bya kisanso kya bine, ke bya kulangulapo kilokoloko, kibwanya kwibatwala ku busekese.—Ngalatea 5:19.
1:6; 2:10-15. Batutu wandya Mwine Shulama bāpelele mwanabo ende na mukena wandi kwa bunka mu ngulu, ke kunenapo amba wādi kisekese nansha amba wādi na mutyima wa kulonga bibi. Inoko, bādi bakimba’tu kumukinga kutyina wākekuja mu ngikadilo ibwanya kumutwala mu ditompo. Nanshi i kya ñeni boba benangila mwanda wa kwisonga bepuke kwitolwela kufula kwa bunka bwabo.
2:1-3, 8, 9. Nsongwakaji Mwine Shulama nansha bya wādi mupopoke ino wētyepeje pa kwimona bu “maluba a [musanza wa] Shalone.” Byādi nsongwakaji’wa muyampe kadi mukōkele kudi Yehova, nsongwalume mukumbi wādi umumona mu milangwe amba udi pamo’nka bwa “divu umbukata mwa miba.” Le i bika byotukokeja kunena padi nsongwalume nandi? Byaādi nandi wa buya bwa dyangi wādi ku meso a nsongwakaji pamo’nka bwa “nsunu.” Kadi ku mushipiditu, wādi wakaminwe Yehova ne kwipāna kwadi. Nsongwakaji amba: “Pamo’nka bwa mutyi wa mwembe [uleta mwemba ne bipa] umbukata bwa mityi ya mutanda, e monka mwikadile ne wami muswe mwana-mulume umbukata mwa bāna bana-balume.” Mwene lwitabijo ne kwipāna yo ngikadilo isaka Leza mu boba bakimba kwisonga?
2:7; 3:5. Uno nsongwakaji wa kunja kasolokelwepo mutyima kudi Solomone. Kadi watyipija bana-bakaji ba mu kipango amba kebakilangula buswe mudi aye bwa kuswa ungi poso enka nsongwalume mukumbi’wa. Ke biyampepo kadi kebifwaninwepo kukena muntu ungi. Nkunga Mwine Kidishitu usaka kusonga ufwaninwe kukimba enka mwingidi wa dikōkeji wa Yehova kete.—1 Kodinda 7:39.
“I MWANDA KA O MUKATADILA MWINE SHULAMA”?
Tala “yewa ukanda muntanda mutuputupu pamo’nka bwa malenga a mwishi.” (Lwimbo lwa Ñimbo 3:6) Le bana-bakaji ba mu Yelusalema batalanga bika? Batalanga Solomone ne bengidi bandi bajokela mu kibundi! Kadi mulopwe wiyanga pamo na nsongwakaji Mwine Shulama.
Nsongwalume mukumbi nandi wiya ulonda nsongwakaji, na pano waikala na dyese dya kwimona nandi. Aye ukimulombola amba ukimuswele, nsongwakaji nandi wamulombwedidila’mba usaka batambe mu kibundi, kanena’mba: “Poso’nka dyuba ditalale, kadi ne minjiñinina inyeme, penepa nansha ke ñenda ku lūlu lwa mpakwa, ne ku kalūlu ka ensense.” Nsongwakaji waite mukumbi “atwele mu budimi bwandi, ne kudya bipa byandi bilumbuluke.” Nandi amba: “Natwela mu budimi bwami, kaka wami musongwa wami.” Bana-bakaji ba mu Yelusalema ke bebanena amba: “Dyai, balunda . . . , tomai, eyo, tomai [buswe bwa] ntanda ne ntanda, a bakena”!—Lwimbo lwa Ñimbo 4:6, 16; 5:1.
Nsongwakaji Mwine Shulama pa kupwa kusekunwina bana-bakaji ba mu kipango kilotwa kyandi webalombola’mba: ‘Mbelanga buswe.’ Nabo abamwipangula’mba: “Lelo muswe obe patabukile muswe mukwabo i paka, a?” Nandi webalondolola amba: “Muswe wami mwana-mulume i utōka ne butyidi pya-a, mutabuke’tu umbukata bwa bantanda ne ntanda.” (Lwimbo lwa Ñimbo 5:2-10) Solomone pa kumutendela byamalwa, nsongwakaji watentulula na kwityepeja’mba: “Lelo i mwanda ka o mukatadila mwine Shulama”? (Lwimbo lwa Ñimbo 6:4-13) Mulopwe pa kumona amba uno o mukenga wa kumunekenya, wamwanya na bishima bivulevule. Inoko nsongwakaji aye kasha ūminina mu buswe bwaswele nsongwalume mukumbi. Ku mfulo Solomone wamuleka ende kwabo.
Bipangujo bya mu Bisonekwa Bilondolwelwe:
4:1; 6:5—Mwanda waka nywene ya nsongwakaji i midingakanibwe na “luombe lwa bambuji”? Kuno kudingakanya kulombola amba nywene yandi yādi ijimuka ne kweñenya pamo’nka bwa moya afita a bambuji.
4:11—Kunena Mwine Shulama amba “milomo yobe isūmanga bwa buki; buki ne mabele bidi munshi mwa ludimi lobe” bishintulula bika? Buki bwa musungusungu i buyampe kadi butobala kutabuka buki bwa mu bisa. Nanshi kuno kudingakanya, ne kokwa kwa amba buki ne mabele bidi munshi mwa ludimi lwa nsongwakaji, bikoma’tu buyampe ne butobaji bwa binenwa bya Mwine Shulama.
5:12—I mulangwe’ka udi mu bino binenwa bya amba “meso andi i pamo’nka bwa a bankutyi ku lubamba lwa tunonganonga twa mema; koijibwa ne mabele”? Nsongwakaji utendela meso mayampe a mukena wandi. Padi udingakanya ne kusāsula kufita kwa nkishi wa mu diso ujokolokelwe na bitōka na bankutyi bafituluka boya mu mabele.
5:14, 15—I kika kitelelwa makasa ne maulu a mukumbi mu uno muswelo? Nsongwakaji wisambila padi pa minwe ya mukumbi idi pamo bwa mubumbulu wa nsahabu ne mala andi bwa dibwe dya belele. Kadi udingakanya maulu andi na “bipanda bya mifinye” mwanda i makomo kadi malumbuluke.
6:4—Mwanda waka nsongwakaji utelwa bu “Tilaza”? “Tilaza” kyādi kibundi kya Bene Kenani kyākwetwe na Yoshua, kitatyi kya Solomone pa kupita, kyāikala kibundi kibajinji kwingidijibwa bu mwipata mwa bulopwe bwa kungala bwa Isalela bwa bisaka dikumi. (Yoshua 12:7, 24; 1 Balopwe 16:5, 6, 8, 15) Dibuku dimo dinena’mba: “Bimweka bu kyādi kibundi kya buya bwa dyangi, o mwanda kitelelwe pano’pa.”
6:13—Le “luja lwa Mahanaimi” i luja’ka? Uno muneneno ukokeja ne kwalamunwa bu “luja lwa bitango bibidi.” Kibundi kitelwa bu Mahanaimi kyādi bukila bwa kutunduka bwa Munonga wa Yodano kubwipi na munonga wa Yaboko. (Ngalwilo 32:2, 22; 2 Samwele 2:29) “Luja lwa Mahanaimi” lufunkila padi pa luja lwādi lujibwa mu kino kibundi pa masobo.
7:4—Mwanda waka Solomone udingakanya nshingo ya nsongwakaji Mwine Shulama na “kitēba kya meno a nzovu”? Dibajinji, uno nsongwakaji wātendelwe amba: “Nshingo yobe idi bwa kitēba kya Davida.” (Lwimbo lwa Ñimbo 4:4) Kiteba kikalanga kilakila, kityekitye, kadi dino dya nzovu dikalanga disenena. Nanshi Solomone wādi utendela butyetye ne kusenena kwa nshingo ya mwana-mukaji’wa.
Ñeni Yotuboila’ko:
4:1-7. Mwine Shulama pa kupela bya maondo bya Solomone, wālombwele amba nansha byaādi wakubulwa kubwaninina kadipo na ngikadilo myoneke. Ngikadilo yandi miyampe yatuntwidile’ko buya bwa mpala yandi. Ne bana-bakaji Bene Kidishitu ba bine nabo bafwaninwe kwikala uno muswelo.
4:12. Pamo bwa budimi busawe na lupango nansha lubumbu butwelelwa enka pa kibelo kishite’ko loko, nsongwakaji Mwine Shulama wādi ulamine kisanso kyandi enka ku yewa ukekala wandi mulume. Bine, i kimfwa kilumbuluke ku bana-bakaji ne bana-balume Bene Kidishitu kebasongele!
‘LUBIMBI LWA YEHOVA’
Batutu wandya Mwine Shulama abamumone wiya kwabo, abaipangula’mba: “Lelo i ani yeu ukanda muntanda mutuputupu, usendamina pa muswe wandi mwana-mulume?” Mafuku kunyuma, tutu wandi umo wanene’mba: “Shi aye i nsakwa, longa tukashimika padi kitēba kya ndalama; ino shi aye i kibelo, longa tukamushita ne bibalu bya mutondo.” Pano buswe bwa Mwine Shulama pa kupwa kutompibwa’bo matompo, unena’mba: “Ami ngidi bwa nsakwa, ino mabele ami adi’nka bwa bitēba byayo; ponkapo nadi mu meso andi pamo’nka na umo wamona ndoe she-e.”—Lwimbo lwa Ñimbo 8:5, 9, 10.
Buswe bwa bine i “lubimbi’tu lwa Yehova.” Mwanda waka? Mwanda butamba kudi Yehova. Ye aye watūdile motudi bukomo bwa kuswa. Nanshi mimbi yabo ya mudilo keibwanyapo kubulwa. Lwimbo lwa Ñimbo lwelekeja senene buswe bwa mwana-mulume ne mwana-mukaji mwanda ‘i bukomo pamo bwa lufu.’—Lwimbo lwa Ñimbo 8:6.
Lwimbo lwa Ñimbo lwa Solomone lulombola biyampe kijimba kikutyile Yesu Kidishitu na boba babadilwa mu “musongwa” wandi wa mūlu. (Kusokwelwa 21:2, 9) Buswe bwa Yesu pa Bene Kidishitu bashingwe māni bupityile ne bwa mwana-mulume na mwana-mukaji. Kabumbo ka musongwa nako i kepāne kwadi na mutyima umo. Yesu wāpēne na buswe būmi bwandi ne pa mwanda wa “mikōko mikwabo.” (Yoano 10:16) Nanshi batōtyi bonso ba bine bakokeja kwiula kimfwa kya buswe ne kwipāna kukunkane kwa Mwine Shulama.
[Kifwatulo pa paje 16]
Lwimbo lwa Ñimbo lwitufundija bika pa boba basaka kwisonga?