Mwa Kuyukila Butōtyi bwa Bine
Mwa Kuyukila Butōtyi bwa Bine
BIPWILO bivule binenanga amba byobya byobafundija bitambanga kudi Leza. Nanshi i biyampe tulonde binenwa bya Yoano mutumibwa wa Yesu, wāsonekele amba: “Banwe baswe, kemukītabijai [binenwa bya] mishipiditu yonso, mhm, nanshi tompai mishipiditu, shi ya kwa Leza; ke-bantu bapolofeto ba bubela bavule bene balupukile panopantanda.” (1 Yoano 4:1) Lelo tukatompa namani kintu mwa kuyukila shi kitamba kudi Leza?
Kintu kyo-kyonso kitamba kudi Leza kimwekejanga bumuntu bwandi, kupityidila buswe, ngikadila yandi ipityile yonso. Kimfwa, kulula luvumba, kwine kwitupanga muswelo wa kuloelelwa mwenye wa biyombo, maluba, ne mukate ukyopoka pa mudilo, i kintu kilombola buswe bwa Leza. Bukomo bwetu bwa kumona muponeno wa dyuba, bipupulu, nansha kumungamunga kwa mwana mutyetye bulombola’mba Leza wituswele. Ne bukomo bwetu bwa kwivwana ñimbo milumbuluke, kudila kwa toni, nansha diwi dya muntu otusenswe nabo bulombola buswe bwa Leza. Ne kipangila kya batwe bantu, nansha byokidi kyakubulwa kubwaninina, nakyo kilombolanga buswe bwa Leza. O mwanda twimwenanga bubinebine bwa binenwa byānene Yesu amba: “Dyese dya kupana ditabukile dya kupebwa.” (Bilongwa 20:35) Netu tuloelelwanga kulombola buswe mwanda tupangilwe mu “kyelekejo kya Leza.” (Ngalwilo 1:27) Nansha Yehova byadi na ngikadila mikwabo mivule, buswe bo butādile bumuntu bwandi bonso.
Bilembwa bitamba kudi Leza bifwaninwe kumwekeja buswe bwandi. Bipwilo bya ino ntanda bidi na bilembwa bivule bya pa kala. Lelo bino bilembwa i bibwanye kulombola buswe bwa Leza?
Kunena na bubine, bilembwa bivule bya bipwilo bishintululanga kūlukūlu mwituswelele Leza nansha motukokeja netu kumuswela. O mwanda bantu midiyo na midiyo kebalondololwangapo pobepangulanga’mba, “Mwanda waka tumona kilomboji kya buswe bwa Leza mu bupangi ino masusu ne bibi kupwa mpika?” Ino Bible ye dibuku dya myanda ya Leza dimo kete dya kala dishintulula ne pa mfulo mwikadile buswe bwa Leza. Kadi ditufundijanga mwa kulombwela buswe.
Dibuku Disambila pa Buswe
Bible, Kinenwa kya Leza, usokola’mba Yehova i “Leza wa kisanso.” (2 Kodinda 13:11, Myanda Miyampe ku Bonso) Bible ushintulula muswelo wāikele buswe kutonona Yehova ape bantu babajinji būmi bwampikwa misongo ne lufu. Ino butomboki bwa kutombokela lupusa lwa Leza bwātweja masusu mu bantu. (Kupituluka 32:4, 5; Loma 5:12) Nansha nankyo, Yehova wālongele kintu kya kujokeja byobya byājimine. Kinenwa kya Leza kinena’mba: “Aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Bisonekwa Bikola bimwekejanga patōka tō buswe bwa Leza pa kulombola muswelo wapele Yesu umbikalo umbwaninine mwanda wa kujokejeja bantu ba kikōkeji ndoe.—Danyele 7:13, 14; 2 Petelo 3:13.
Bible unena mu kikonge mbila inenwe bantu kulonda’mba: “Kwivwana aye kwādi wamulondolola’mba: Ukasanswa Yehova Leza obe, ne mutyima obe onso, ne muya obe onso, ne manwa obe onso. Kino kyo kibajinji kidipo ne bukata’kyo. Kya bubidi kikwabo kidingakene nakyo’mba: Ukasanswa mukwenu na abe mwine. I ponka pa bino bijila bibidi e po pa kitako kya mukanda onso wabijila.” (Mateo 22:37-40) Bible witelanga’mba i wa ku bukomo bwa mushipiditu wa Leza. Byamwekeja patōka bumuntu bwandi, o mwanda tukulupile na bubine amba i mutambe kudi “Leza wa kisanso.”—2 Temote 3:16.
Shi tulonde’tu uno musoñanya umo bidi, tukokeja kujingulula i bilembwa’ka bya pa kala bitambile binebine kudi Leza. Kadi buswe bo buyukanya batōtyi ba bine ba Leza, mwanda beulanga Leza mu kulombola buswe.
Mwa Kuyukila Bantu Baswele Leza
Boba baswele Leza bya binebine bayukananga patōka, nakampata pano potudi mu kitatyi kitwa mu Bible bu “mafuku a kumfulo.” Pano bantu bavule ‘besenswe abo bene, ne bupeta kumo, . . . bakusanswa byamazua pakatampe kudi Leza mpika.’—2 Temote 3:1-4.
I muswelo’ka okokeja kuyuka bantu baswele Leza? Bible unena’mba: “Kusanswa Leza i kulama binenwa byandi.” (1 Yoano 5:3, MB) Kuswa Leza ko kutonona bantu balēmeke misoñanya ya mu mwikadilo. Kimfwa, Kinenwa kya Leza i kijidike bijila mu myanda ya kusambakena pamo ne busongi. Ba kusambakena pamo i enka boba besongele kete, kadi busongi bufwaninwe kwendelela nyeke. (Mateo 19:9; Bahebelu 13:4) Lolo umo wa mu Eshipanye mufunde myanda ya Leza ku masomo wakapwidile kokwa kwadi kwifunda na mutyima tō Batumoni ba Yehova bijila bya mu Bible bitala pa mwikadilo, wanena’mba: “Natambile’ko mukankamikwe, ke’nkapo na mīsambo yadi isambila pa Bisonekwa kete, mhm, ino i ne na bumo budi umbukata mwa bano bantu, ne na mwikadilo wabo mulumbuluke kupita, kadi ne na bilongwa byabo biyampe.”
Kutentekela pa buswe bobaswele Leza, Bene Kidishitu ba bine bayukenanga ne ku muswelo obalombola buswe ku bakwabo. Mwingilo wabo upityile yonso i wa kusapwila bakwabo lukulupilo lumo kete ku bantu, ke Bulopwe bwa Leza kadi. (Mateo 24:14) I kutupu kintu kibwanya kumweja bakwabo byabuyabuya bya endaenda kipityile kwibakwasha bayuke Leza. (Yoano 17:3) Kadi Bene Kidishitu ba bine balombolanga buswe ne mu miswelo mikwabo. Bakwashanga mu muswelo mufike’po boba basusuka. Kimfwa, paponene kimpengele kya ntanda mu Itadi, julunale wa mu Itadi walombwele amba Batumoni ba Yehova “bengilanga bintu bimweke, batambika kuboko ku boba basusuka, pampikwa kubanga kipwilo kyobadi’mo.”
Kadi, kutentekela pa kuswa kobaswele Leza ne bakwabo, Bene Kidishitu ba bine beswele abo bene na bene. Yesu wānene amba: “Mwanda mupya uno o nemulá amba: Mwikale kwisanswa bānwe bene na bene. Po ponka po bakemuyūkila bu-bāna-bami-babwanga ponka pa kwisanswa mo mwikadile bānwe bene.”—Yoano 13:34, 35.
Lelo buswe bwiswele Bene Kidishitu ba bine i bumweke amba i bwishile na bwa bakwabo? Mo mwalangile Ema, lolo umo wa kaji ka ku njibo. Wingilanga ku La Paz, mu Bolivi, mudi ntondo ya kwishila kwa tubila ikalañanya divule bampeta na balanda. Unena’mba: “Musunsa umbajinji onaendele ku kupwila kwa Batumoni ba Yehova, namwene mwana-mulume mutūkanye uvwele biyampe ushikete wisamba na mwana-mukaji Mwine India. Nadi nkyamwene kashā kintu kya uno muswelo. Ponka’po, nayuka kala amba bano kebabulwepo kwikala bantu ba Leza.” Ne nsongwakaji Mwine Brezile utelwa bu Miriam nandi wanene amba: “Nkyadipo na nsangaji, nansha ke mu kisaka kyetu mwine. Konamwene’tu dibajinji buswe mu bilongwa, i ku Batumoni ba Yehova.” Mu États-Unis, mwimaniji umo wa misapu ya ku
televijo walembele amba: “Shi bantu bavule badi na mwiendelejo na udi mu kyenu kipwilo, longa uno muzo keukidipo mowikadile’mu. Ami’ko ndi muneni wa misapu, ino ndyukile amba bulongolodi bwenu bwimanine pa buswe ne pa lwitabijo lukomo mudi Umpangi.”Kimba Butōtyi bwa Bine
Buswe i kayukeno kashiyañanya batōtyi ba bine na bakwabo. Yesu wādingakenye kutana butōtyi bwa bine na kutana dishinda diyampe ne kwenda’mo. Dino dyo dishinda dimo kete ditwala ku būmi bwa nyeke. Yesu wānene amba: “Twelelai pa kakibelo katyetye, ke-kintu kyokya kibelo i kikatampe kyenda kukoneka, ne dishinda nadyo monka, kadi bakatwela monka i bangi bangi. Ino kabelo ka kutwala ku bumi a! a! a! butyeko! ne dishinda monka: ne bakwikamona i batyetye.” (Mateo 7:13, 14) Kudi enka kitango kimo kya Bene Kidishitu ba bine kinangila pamo na Leza mu dishinda ditwala ku butōtyi bwa bine. Nanshi kutonga kipwilo kampanda kudi na mvubu. Shi utane dino dishinda ne kwenda’mo, nabya ubatana dishinda dilumbuluke kashā, mwanda dyo dishinda dya buswe.—Efisesa 4:1-4.
Langa’po bidi nsangaji yokekala nayo pa kwenda mu dishinda dya butōtyi bwa bine! Bine, udi pamo bwa abe wenda pamo na Leza. Mwanda kudi Leza ko kosa kwifundila tunangu ne buswe mwa kwikadila mu kipwano kilumbuluke na bakwenu. Kadi kudi Leza ko kokayukila kine kikadile’ko būmi, kadi ukokeja kwivwanija milao yandi ne kukulupila būmi bwa kumeso. Bine, kukealakanyapo nansha dimo kine kyowakimbīle butōtyi bwa bine.
[Kifwatulo pa paje 3]
Mu bilembwa byonso bya pa kala bya myanda ya Leza, enka Bible ye usokola buswe bwa Leza
[Kifwatulo pa paje 5]
Bene Kidishitu ba bine bayukenanga ku buswe bobalombola mu bilongwa