Kukimba Malondololo Mayampe

Nkokeja namani kulama bumeni bwa ngitu yami?

Nonge bika kisaka kyami kikale mu nsangaji?

Mbwanya kulonga bika ngikale na dyese dya kulama kaji kami?

LELO kasha kweipangwile bino bipangujo? Le kodi musokole malondololo a kamweno akukwasha binebine? Mwaka ne mwaka, kintu kya mabuku 2 000 meshileshile alupulwa aletanga madingi esambila pa ino myanda ne mikwabo ya mvubu. Mu Beletanye kete, batangi basumbulanga lupeto lwa mwabo lupite ne pa midiyo 80 (kubwipi kwa madolala midiyo 150) ku mwaka mwanda wa kumona mabuku apāna madingi a mwa kulwila na bikoleja bya umbūmi. Mu États-Unis, busunga bwa mabuku aleta bukwashi atwejanga kintu kya madolala midiyo 600 ku mwaka. Na bubine, kudipo kasuku kobe mu kukimba madingi mayampe a mwa kulwila na būmi bwa difuku ne difuku.

Mulembi umo wesambīle pa madingi atanwa mu ino milwi ne milwi ya mabuku amba: “Mabuku mapya mavule apitulukapitulukanga enka mu byalembelwe kala.” Bine, madingi mavule atanwa mu ano mabuku i enka oa adi kala mu dibuku dimo dya tunangu dibadilwa mu mabuku āsonekelwe kalā pano pa ntanda. Dino dibuku i dyabanibwe ntanda yonso kutabuka mabuku makwabo. Kadi i dyalamunwe dyonso nansha kipindi mu kintu kya ndimi 2 400. Buvule bwa bitabo byonso ke bitampwe i midiyala 4,6 ne kupita. Dino dibuku ke dingipo, i Bible.

Bible unena patōkelela’mba: “Bisonekwa byonsololo bisonekeja Leza shi bika, shi bika, byo bimwenwamo pa kufundija, ne kukwasha, ne kudingila madingi, ne kulombola ñeni ya umboloke.” (2 Temote 3:16) Eyo, Bible kasonekelwepo’tu bu dibuku dya kwitukwasha bitupu. Ino kine kyo dyasonekelwe i kwitusokwela kyokya kitusakila Leza. Ino nansha namino, Bible ubwanya kukwasha muntu alwe na makambakano etuponena batwe bonso, kadi ulaile amba bonso balonda byanena bakamwena’mo kamweno. (Isaya 48:17, 18) Wivwane muntu alonde madingi a kamweno adi’mo kakabulwepo kumwena’mo, ekale wa muzo’ka, wa kibutwila’ka, nansha mufunde namani.