Tukōkelelei Bakumbi Ba Buswe Na Kwityepeja
Tukōkelelei Bakumbi Ba Buswe Na Kwityepeja
“Kōkelai boba bemulelele, ne kwibakōkelelela.”—BAHEBELU 13:17.
1, 2. I bisonekwa’ka bilombola amba Yehova ne Yesu i Bakumbi ba buswe?
YEHOVA LEZA ne Yesu Kidishitu wandi Mwana i Bakumbi ba buswe. Isaya wālaile amba: “Talapo bidi, Mfumwetu Leza ukāya bwa mukomokomo, ne kuboko kwandi kukalela kwadi; . . . Ukadisha luombe lwandi bwa mukumbi; ukakwatakanya twana-twamikōko mu kuboko kwandi, ne kwituselela mu kyadi kyandi; ne kukunkuja bityebitye yoya yamusha twana.”—Isaya 40:10, 11.
2 Buno bupolofeto bwa kujokejibwa bwāfikidile dibajinji pājokele bashele’ko Bene Isalela mu Yuda mu 537 K.K.K. (2 Bilongwa 36:22, 23) Kadi i bufikidile monka pānyongolwelwe bashele’ko bashingwe māni mu “Babiloni mukatakata” mu 1919 na Yesu Kidishitu, Shilusa Mukatampe. (Kusokwelwa 18:2; Isaya 44:28) Aye i “kuboko” kwa Yehova kwa buledi, kukongakenya pamo mikōko ne kwiikumba na kanye. Yesu mwine wānene amba: “Amiwa ne mukumbi muyampe ndyūkile bāmi, kadi bāmi bangyūkile.”—Yoano 10:14.
3. Yehova utele namani mutyima wa buswe ku muswelo ukumbwa mikōko yandi?
3 Bupolofeto bwa Isaya 40:10, 11 bulombola patōka kanye kadi na Yehova pakumba bantu bandi. (Mitōto 23:1-6) Yesu nandi paādi wingila pano panshi, wālombwele kanye ku bandi bana ba bwanga ne ku bantu’tu bonso. (Mateo 11:28-30; Mako 6:34) Yehova ne Yesu bādi bashikilwe mutyima mūmu wa bakumbi nansha bendeji ba Isalela bādi basūla luombe ne kwilumwesha malwa pambulwa bumvu. (Ezekyele 34:2-10; Mateo 23:3, 4, 15) O mwanda Yehova wālaile amba: “Nkapandija luombe lwami, kabidi keikekalangapo monka bu-kikwatwa; ino nkakalañanya umbukata mwa mikōko ne mikōko. Ebiyampe nkemika mukumbi umo pa ayo, nandi ukeidīsha, ke mwingidi wami Davida kadi; aye ukeidīsha, nandi ukekalanga mukumbi wayo.” (Ezekyele 34:22, 23) Mu ano mafuku a mfulo, Yesu Kidishitu, Davida Mukatampe, ye aye “mukumbi umo” utongelwe na Yehova kukumba bengidi Bandi bonso ba pano panshi, Bene Kidishitu bashingwe māni ne “mikōko mikwabo” mine.—Yoano 10:16.
Byabuntu Bitamba Mūlu Bipelwe Kipwilo
4, 5. (a) I kyabuntu’ka kilēme Yehova kyapele bantu bandi pano panshi? (b) Yesu nandi wāpele kipwilo kyabuntu’ka?
4 Yehova wāpele kipwilo kya Bwine Kidishitu kyabuntu kilēme na kutūla’ko “mukumbi umo,” mwingidi wandi pano pa ntanda, ke Yesu Kidishitu kadi. Kino kyabuntu kya Mwendeji utambile mūlu kyālailwe mu Isaya 55:4 amba: “Talapo bidi, namupele ke kamoni ka kudi bantu, kilongoji ne wakusomanya bantu’ba.” Bene Kidishitu bashingwe māni ne ba mu “kibumbo kikatampe” bongwijibwe pamo i batambe mu bano bantu bonso, mizo, tubila, ne ndimi. (Kusokwelwa 5:9, 10;7:9) I babunde kipwilo kya mizo yonso ke “luombe lumo,” lwendejibwa na “mukumbi umo,” kilongoji Yesu Kidishitu.
5 Yesu nandi i mulete kyabuntu kilēme ku kipwilo pano pa ntanda. I mwitupe bakumbi batyebatye ba kikōkeji beula Yehova ne Yesu mwine, mu kukumba luombe na kanye. Mutumibwa Polo wēsambīle pa kino kyabuntu kya buswe mu mukanda waātumine Bene Kidishitu ba mu Efisesa. Wāsonekele amba: “Pa kukanda mūlu waselele kibumbo kya bakutwa, kadi upana byabuntu ku bantu. . . . Wapene bamobamo ke batumibwa; ne bamobamo bakwabo bapolofeto, ne bangi nabo bamobamo basapudi; kadi bamobamo bakwabo nabo bakilelo, bangi nabo bafundiji; pa mwanda wa kukankamija bapandulwemo ku mīngilo ya bwingidi, bwa kutamija ngitu ya Kidishitu.”—Efisesa 4:8, 11, 12.
6. Lelo batadi bashingwe māni bengila mu bitango bya bakulumpe batelelwe namani mu Kusokwelwa 1:16, 20, ne tukanena bika pa bakulumpe batongelwe mu mikōko mikwabo?
6 Bino “byabuntu ku bantu” i batadi nansha bakulumpe batongelwe na Yehova ne na wandi Mwana, kupityila ku mushipiditu sandu amba bakumbe mikōko na kanye. (Bilongwa 20:28, 29) Ku ngalwilo, bano batadi bonso bādi enka bana-balume Bene Kidishitu bashingwe māni. Bonso bādi mu bitango bya bakulumpe bya mu kipwilo kishingwe māni bādi belekejibwe mu Kusokwelwa 1:16, 20 na “ñenyenye” nansha na “bamwikeulu” badi mu kuboko lwa lundyo kwa Kidishitu, ko kunena’mba mu bwendeji bwandi. Inoko mu ano mafuku a mfulo, kibalwa kya batadi bashingwe māni kyendanga kityepa pano panshi, o mwanda bakulumpe Bene Kidishitu bavule mu bipwilo ke ba mu mikōko mikwabo. Eyo, nabo byobatongibwa na bantunguluji ba Kitango Kyendeji kupityila ku bwendeji bwa mushipiditu sandu, nanshi tukokeja kunena amba badi mu kuboko kwa lundyo (nansha mu bwendeji) bwa Yesu Kidishitu Mukumbi Muyampe. (Isaya 61:5, 6) Shi ke pano, bakulumpe mu bipwilo byetu byobakōkele Kidishitu, Mutwe wa kipwilo, tufwaninwe nanshi kwingidila nabo pamo ne pa mfulo.—Kolose 1:18.
Kukōkela ne Kukōkelelela
7. I madingi’ka aletele mutumibwa Polo pangala pa motufwaninwe kumwena batadi Bene Kidishitu?
7 Yehova Leza ne Yesu Kidishitu, Bakumbi betu ba mūlu, basaka tukōkele ne kukōkelelela bakumbi batyebatye bobapele byepelo mu kipwilo. (1 Petelo 5:5) Mutumibwa Polo wāsonekele ku bukomo bwa mushipiditu amba: “Vulukai boba bemulelele, bemusapwidile mwanda wa Leza, ne kufwatakanya monka mwaendele būmi bwabo ne kwibalondela nenu monka. Kadi kōkelai boba bemulelele, ne kwibakōkelelela; ke-bantu abo batengele ponka pa mityima yenu, pamo bwa boba bakapitamo mu bukalama bwabo, amba balonge kino’ki ne tusepo, ne kukālala mpika, ke-kintu kino namino bānwe kemukamwenamopo kantu, mhm.”—Bahebelu 13:7, 17.
8. Polo witulomba “kufwatakanya” bika, ne i muswelo’ka ‘otukakōkela’?
8 Ivwana, Polo witulomba “kufwatakanya” nansha kubandaula na katentekeji mwendele būmi bwa kikōkeji bwa bano bakulumpe, kupwa twiule bino bimfwa bya lwitabijo. Kadi, witupa madingi amba tukōkele ne kukōkelelela bwendeji bwa bano bana-balume batongelwe. Mubandaudi wa Bible R. France ushintulula amba mu Kingidiki kibajinji, kishima kyalamwinwe bu “kōkelai” i kyokya “kingidijibwanga nyeke pa kukōkela, ino pa bute pa bute i ‘kunekenibwa,’ ko kunena’mba kwitabija na mutyima tō bwendeji bwabo.” Tukōkelanga bakulumpe mwanda Kinenwa kya Leza kitusoñanya kwibakōkela, kadi twi banekenibwe kala amba batele mityima ku tumweno twa Bulopwe ne twetu twine kumo. Na bubine, ketukabulwepo kusangala shi twitabije na mutyima tō bwendeji bwabo.
9. Mwanda waka bilomba twikale “kukōkelelela” nansha byotudi kala bakōkele?
9 Shi ke pano bikekala namani shi ketukulupilepo amba bwendeji bwa bakulumpe mu mwanda kampanda bo buyampe? Papo po palomba kukōkelelela. Ke-pantu bipēlanga kukōkela shi tuyukile myanda yonso moikadile ne twitabije’yo, ino wivwane tulonde bwendeji bwaletwa boketwivwanijepo senene nabya tubalombola amba tudi na mutyima wa kukōkelelela. Petelo, yewa wāikele ke mutumibwa, wāikele kukōkelelela uno muswelo.—Luka 5:4, 5.
Bubinga Buná bwa Kwingidila Nabo Pamo na Mutyima Tō
10, 11. Batadi ‘bāsapwile mwanda wa Leza’ ku Bene Kidishitu bakwabo namani mu myaka katwa kabajinji, ne dyalelo nadyo basapulanga’o namani?
10 Mu Bahebelu 13:7, 17 upwile kala kutelwa, mutumibwa Polo uleta bubinga buná botufwaninwe kukōkela ne kukōkelelela batadi Bene Kidishitu. Bubinga bubajinji i mwanda ‘betusapwilanga mwanda wa Leza.’ Vuluka amba bino “byabuntu ku bantu” i bipebwe kipwilo na Yesu “mwanda wa kukankamija bapandulwemo.” (Efisesa 4:11, 12) Yesu wākankamikile Bene Kidishitu ba mu myaka katwa kabajinji balonde milangwe ne mwiendelejo muyampe pa kwibasendulula kupityila ku bano bakumbi batyebatye ba kikōkeji. Bamo mu bukata mwabo bādi batuma mikanda ku bipwilo ku bukomo bwa mushipiditu. Yesu wāingidije bano batadi batongwe na mushipiditu mu kuludika ne kukankamika Bene Kidishitu babajinji.—1 Kodinda 16:15-18; 2 Temote 2:2; Tetusa 1:5.
11 Dyalelo nadyo Yesu wituludikanga kupityila kudi “umpika wa binebine, udi na manwa” wimaninwe na Kitango Kyendeji ne bakulumpe batongelwe. (Mateo 24:45) Shi tulēmekele Yesu Kidishitu “Mukumbi mwine mukatakata,” nabya tukalonda madingi a Polo anena’mba: “Lemekai boba baputumina mu mīngilo umbukata mwenu, bakwimulelela mudi Mfumwetu, ne kwimudingila madingi.”—1 Petelo 5:4; 1 Tesalonika 5:12; 1 Temote 5:17.
12. Le batadi “batengele ponka pa mityima” yetu muswelo’ka?
12 Bubinga bwa bubidi bwa kwingidila pamo na batadi Bene Kidishitu i mwanda “batengele ponka pa mityima” yetu. Shi abamone kantu mu mwikadila ne mu lwendo lwetu kabwanya kona būmi bwetu bwa ku mushipiditu, bapelakananga kwitupa madingi otusakilwa amba twisendulule. (Ngalatea 6:1) Kishima kya Kingidiki kyalamwinwe bu “batengele” kifunkila pa “kubulwa kulāla tulo.” Mungya mubandaudi umo wa Bible, “kilombola mukumbi utala pampikwa kukunuka.” Kadi kutentekela pa kuno kutadija kwa ku mushipiditu, bakulumpe padi bakeshanga mwanda wa kwitukambakena ku mushipiditu. Mwene tufwaninwe nanshi kwikala na mutyima wa kwingidila pamo na bano bakumbi batyebatye, bekankila’ko kwiula kanye ka Yesu Kidishitu “mukumbi mukatakata wa mikōko”?—Bahebelu 13:20.
13. Batadi ne Bene Kidishitu bonso bakeshintulwila kudi ani ne muswelo’ka?
13 Bubinga bwa busatu bwa kwingidila pamo na batadi i mwanda batengele potudi “pamo bwa boba bakapitamo mu bukalama.” Batadi bavulukanga amba i bakumbi batyebatye, bengila mu bwendeji bwa Yehova Leza ne Yesu Kidishitu, Bakumbi ba momwa mūlu. (Ezekyele 34:22-24) Yehova ye Mwinē mikōko, upotele’yo ‘ku mashi a Mwana wa aye mwine,’ o mwanda batadi batongelwe banenwe kukapita’mo nansha kukeshintulwila Kwadi pa muswelo obalela luombe Lwandi, lulomba kukumbwa ‘na kinyenye.’ (Bilongwa 20:28, 29) Eyo, batwe bonso tuyukile amba tukeshintulwila ku meso a Yehova pa muswelo otulonda bwendeji bwandi. (Loma 14:10-12) Kikōkeji kyetu ku bakulumpe batongelwe nakyo kilombola amba tukōkele Kidishitu, Mutwe wa kipwilo.—Kolose 2:19.
14. I bika bibwanya kulengeja batadi Bene Kidishitu bengile na “kukālala,” ne bikokeja kwitwikadila namani?
14 Polo wāletele bubinga bwa buná botufwaninwe kukōkelelela batadi Bene Kidishitu. Wāsonekele namino: “Amba balonge kino’ki ne tusepo, ne kukālala mpika, ke-kintu kino namino bānwe kemukamwenamopo kantu, mhm.” (Bahebelu 13:17) Bakulumpe Bene Kidishitu badi na kiselwa kilēma mwanda bibalomba kufundija, kukumba, kutangidila mu mwingilo wa busapudi, kulela bisaka byabo ne kupwija myanda ya mu kipwilo. (2 Kodinda 11:28, 29) Shi tukomenwe kwingidila nabo pamo, nabya tubabweja bulēmi ku kiselwa kyabo. Ke-bantu bakakalala. Kadi kubulwa kwingidila nabo pamo kekusangajangapo Yehova kadi ne batwe bene ketukamwena’mopo kantu. Inoko, shi tulēmekele bakulumpe ne kwingidila nabo pamo, nabya bakengila mingilo ibapelwe na tusepo, ne kino kikabweja bumo ne nsangaji mu mwingilo wetu wa kusapula Bulopwe.—Loma 15:5, 6.
Twikalei Kukōkelelela
15. I muswelo’ka otukalombola amba tukōkele ne kukōkelelela?
15 Kudi miswelo mivule mimweke yotukokeja kwingidila’mo pamo na batadi batongelwe. Le bikekala namani shi ngikadilo ya mu wenu mwaba ibashinta, ne bakulumpe abatūla kupwila kwa kwenda mu mwingilo wa budimi mu difuku ne nsaa itulomba netu tushinte mpangiko yetu? Nabya tulongei bukomo bwa kukwatakanya ino mpangiko impya. Na bubine, tukeselwa bikatampe. Lelo mutadi wa mingilo waiya kupempula kisumpi kyetu kya Kifundwa kya Kitabo? Nankyo tutambilei ne pa mfulo mu mwingilo wa busapudi mu mwine yenga’wa. Le tubapebwa kipindi ku Masomo a Mwingilo wa Kiteokratike? Nabya tulongei buninge bwa kukatanwa’ko ne kupityija kipindi kyetu. Lelo mutadi wa Kifundwa kya Kitabo wetulombola amba i difuku dya kisumpi kyetu dya kukundula Njibo ya Bulopwe? Nankyo tumulungei kuboko na kukwatakanya uno mwingilo pangya bukomo ne lupaka lwetu. Mu ino miswelo ne mu mikwabo mivule, tukalombola amba tukōkele bana-balume batongelwe na Yehova ne wandi Mwana bu bakulela luombe.
16. Shi mukulumpe kalondapo buludiki buletwa, mwanda waka ke bubingapo bwa batwe kutombokela?
16 Kyaba kimo, mukulumpe ukokeja kuleka kulonga bintu muludikila kabumbo ka umpika wa binebine ne Kitango kyandi Kyendeji. Shi wendelela enka namino, nabya ukeshintulwila kudi Yehova, “Mukumbi mwine, Mukulumpe Muledi wa mityima” yetu. (1 Petelo 2:25, MB) Nanshi kutunya nansha kuluba kwa bakulumpe kamukaya ke bubingapo bwa batwe kuleka kwibakōkela. Yehova keselangapo kubulwa kikōkeji ne butomboki.—Umbadilo 12:1, 2, 9-11.
Yehova Weselanga Boba Bengidila Pamo na Mutyima Tō
17. Le tufwaninwe kumona batadi betu namani?
17 Yehova Leza uyukile amba bana-balume batongelwe bu batadi i bantu bakubulwa kubwaninina. Inoko kupityila ku mushipiditu wandi, wibengidijanga mwanda wa kukumba bantu bandi pano panshi. Na bubine, monka mobikadile ku bakulumpe ye mobikadile ne ku batwe bonso—“bukomo [i] bwa Leza, ke bwa bātwe benepo, mhm.” (2 Kodinda 4:7) O mwanda tufwijanga’ko Yehova pa byonso byalonga kupityila ku bano batadi ba kikōkeji, kadi tulombolanga kino na kwingidila nabo pamo na mutyima tō.
18. Shi tukōkela batadi betu, na bubine, tukōkelanga bāni?
18 Batadi baloñanga bukomo bwabo bonso mwa kulondela bushintuludi buletele Yehova bwa mufwaninwe kwikadila bakumbi batongelwe kulela luombe lwandi mu mafuku a mfulo, mungya munenena Yelemia 3:15 amba: “Nkemupa bakumbi mwendele wami mutyima, bakemudisha ne kuyukidija ne kwivwanija.” Bine, bakulumpe botudi nabo bengilanga mwingilo mulumbuluke wa kufundija ne kukinga mikōko ya Yehova. Twendelelei nanshi kufwija’ko pangala pa mingilo yabo mikomo na kwingidila nabo pamo na mutyima tō, na kukōkela, ne kwibakōkelelela. Namino, tukalombola amba tufwijanga’ko Yehova ne Yesu Kidishitu, Bakumbi betu ba momwa mūlu.
Tupitulukei’mo
• Yehova ne Yesu Kidishitu i belombole namani bu Bakumbi ba buswe?
• Nansha shi tukōkele kala, mwanda waka tufwaninwe kadi kukōkelelela?
• I mu miswelo’ka mimweke motufwaninwe kulombola kikōkeji kyetu?
[Bipangujo bya Kifundwa]
[Kifwatulo pa paje 29]
Bakulumpe Bene Kidishitu balondanga bwendeji bwa Kidishitu
[Kifwatulo pa paje 31]
Kudi miswelo mivule yotukokeja kulombola’mba tukōkele bakumbi batongelwe na Yehova