Kinenwa Kya Leza Kiludike Matabula obe

“Mwanda obe i kinanu kya ku maulu ami, kadi i kitōkeji kya mu dishinda dyami.”—MITŌTO 119:105.

1, 2. Mwanda waka bantu bavule i bakomenwe kutana ndoe ne nsangaji ya bine?

 LELO ubavuluka difuku dyowaipangwile muntu dishinda dya kwenda? Padi wadi kodi kubwipi na kufika, ino wafwatakanya amba ubeluba ke ku mfulo’tu. Nansha padi wadi bine mwilube ne kebikulombe ushinte dishinda. Lelo mu bino bitatyi byonso bibidi, kumwenepo mvubu ya kulondela bikulombola muntu ujingulwile kuntu’kwa senene? Mwanda yewa ujingulwile’ko ukakukwasha bine mwa kufikila.

² Pano kepadi tununu twa myaka, muzo wa muntu onso i mutompe kwiendeja mousakila kwampikwa bukwashi bwa Leza. Ao pa kwiendeja namino, po pene bantu bakubulwa kubwaninina abajimina. Abakomenwa’tu ne kutana dishinda ditwala ku ndoe ne nsangaji ya bine. Le mwanda waka abakomenwa kutana’byo? Mupolofeto Yelemia wāsonekele pano kepadi myaka 2500 amba: “Kekidipo mu muntu unañanga kolola matabula andi.” (Yelemia 10:23) Muntu yense wiendeja mwasakila pampikwa kwitabija bukwashi bwine bufwaninwe, yao nankyo wakomenwa komenwē. I bine, muzo wa muntu usakilwa kuludikwa!

3. Mwanda waka Yehova Leza ye mufwaninwe kupita bonso kupa bantu buludiki, ne i mulaye kulonga bika?

³ Yehova Leza ye aye mufwaninwe kuleta buno buludiki. Mwanda waka? Mwanda aye ye uyukile kupita bonso mupangilwe bantu. Kadi uyukile senene muswelo wālubile bantu ne obājimine. Uyukile monka kine kisakilwa bantu pa kusaka’mba bajokele mu dishinda. Pakwabo kadi, Yehova byadi Umpangi, uyukile nyeke kyokya kilumbuluke kotudi. (Isaya 48:17) Nanshi, tukulupilei bya bine mu mulao usonekelwe mu Mitōto 32:8 amba: “Nkakulombolanga ñeni, ne kukufundija mu dishinda dyōkendanga: Nkakupanga ñeni ne dīso dyami ponka padi abe.” Ne kutatana kwine mpika, Yehova upānanga buludiki buyampe mpata. Ino lelo wituludikanga muswelo’ka?

4, 5. Lelo binenwa bya Leza bibwanya kwituludika namani?

⁴ Mulembi umo wa mitōto wānene Yehova mu milombelo amba: “Mwanda obe i kinanu kya ku maulu ami, kadi i kitōkeji kya mu dishinda dyami.” (Mitōto 119:105) Binenwa ne bivulujo bya Leza bitanwanga mu Bible, ne byo bibwanya kwitukwasha tunekenye bijika byotutana mu kashinda ketu. I bine, potutanga mu Bible ne kuleka myanda’ya ituludike twimwenanga batwe bene kufikidila kwa Isaya 30:21 unena’mba: “Ebiyampe matwi obe akevwana kinenwa kunyuma amba: Dine dino’di dyo dishinda, nangaimo.”

⁵ Shi utale biyampe, ukamona amba Mitōto 119:105 ilombola mingilo ibidi ingila Kinenwa kya Leza. Umbajinji, kitukwashanga bu kinanu kya ku maulu etu. Potutanwa na bikoleja bya difuku ne difuku, tufwaninwe kuleka misoñanya ya mu Bible iludike matabula etu amba tutyibe mbila miyampe ne kwepuka makinga ne byongo bya ino ntanda. Wa bubidi, bivulujo bya Leza bitōkejanga dishinda dyetu, tumone mwa kukwatyila butyibi bukwatañene na lukulupilo lwetu lwa kukekala na būmi bwa nyeke mu Paladisa itulaile Leza. Shi dishinda dyetu didi tō, tubwanya kunañuna byonso—biyampe nansha bibi bilupuka ku byotulonga. (Loma 14:21; 1 Temote 6:9; Kusokwelwa 22:12) Shi ke pano, tubandaulei kamo ne kamo binenwa  bya Leza bitanwa mu Bible mobikokeja kwikadila kinanu kya ku maulu etu ne kitōkeji mu dishinda dyetu.

“Kinanu kya ku Maulu Ami”

6. Lelo i mu ngikadilo’ka mukokeja binenwa bya Leza kwikala bu kinanu ku maulu etu?

⁶ Tukwatanga butyibi difuku ne difuku. Butyibi bumo bubwanya kumweka bu butyetye, inoko kitatyi kimo tubwanya kutana bikoleja bitūla pa ditompo mwikadilo wetu, kubulwa budimbidimbi kwetu, nansha kwetu kubulwa kwikuja mu bya ntanda. Pa kusaka tunekenye ano matompo, tufwaninwe kwikala na “byakwivwana nabyo [byetu] bībidile kala bya kuyūkidila ne bulumbuluke ne bibi.” (Bahebelu 5:14) Potutambula buyuki bwa binebine bwa Kinenwa kya Leza ne kulumbulula mwimvwanino wa misoñanya yakyo, i kwibidija kotwibidija mutyima wetu wa mundamunda wa kwitukwasha tutyibe butyibi busangaja Yehova.—Nkindi 3:21.

7. Lombola ngikadilo imo ikokeja kupa Mwine Kidishitu mutyima wa kwenda kisense na bengidi nandi bakubulwa kwitabija.

⁷ Tulete kimfwa. Lelo abe wi muntu mutame usaka na mutyima umo kusangaja mutyima wa Yehova? (Nkindi 27:11) Shi i amo, nankyo wi wa kufwijibwa’ko. Ino langa shi difuku dimo bomwingila nabo abakwite kwenda nabo ku makayo a kwitamuna bidyoma. Basenswe kwikala nobe ku mingilo ino kebasake kadi kwikala nobe ne kukwabo mu bitatyi ke bya kajipo. Padi wi mumone ne kumona kala amba bano bantu ke babipo. Badi padi ne na mwikadilo muyampe. Lelo ukalonga’po namani? Le kwitabija lwito lwabo kusa kuleta kyaka? Le Kinenwa kya Leza kikakukwasha namani utyibe butyibi buyampe mu uno mwanda?

8. Lelo i misoñanya’ka ya mu Bisonekwa iketukwasha tulangulukile pa myanda ya kisense?

⁸ Tala misoñanya ibala-inga ya mu Bisonekwa. Umo bidi okokeja kala kuvuluka i owa utanwa mu 1 Kodinda 15:33, unena’mba: “Kwinangila kubi kuboleja miswelo milumbuluke.” Lelo kulonda uno musoñanya kukulomba kupelelela bantu bakubulwa kwitabija? Bisonekwa bilondolola’mba, mhm. Tala bidi, ne mutumibwa Polo mwine wādi uswele “bantu bonsololo,” kwela’mo ne bakubulwa kwitabija bene. (1 Kodinda 9:22) Bwine Kidishitu bwine bwitulomba tute bakwetu mutyima—kwela’mo ne boba boketudipo nabo mu lwitabijo lumo. (Loma 10:13-15) I bine, tubwanya namani kulonda madingi anena’mba “tulonge biyampe ku bakwetu bonso” shi twipalula na bantu basakilwa bukwashi?—Ngalatea 6:10.

9. I madingi’ka a mu Bible etukwasha twikale na bujalale mu mwanda utala kupwana na bengidi netu?

⁹ Inoko, kupwana na mwingidi nobe i kwishile mpata na kusamba nandi bulunda. Pano po paiya musoñanya mukwabo wa mu Bisonekwa. Mutumibwa Polo wādyumwine Bene Kidishitu amba: “Kemukēkula mu kisense kya bampikwa kwitabija.” (2 Kodinda 6:14) Lelo kunena’mba “kemukēkula mu kisense kya bampikwa kwitabija” kushintulula namani? Mabible amo alamwine’po amba “kemukitwikai lupungu lumo,” “kemukatompa kwingidila  pamo mu kisense,” nansha “lekai kupwana nabo kipwano kyampikwa kufwaninwa.” Lelo i kyaba’ka kikalanga kipwano na mwingidi nobe ke kyampikwa kufwaninwa? Lelo i kitatyi’ka kyo kipitanga mikalo ne kwikala ke kisense kibi? Mu uno mwanda, Bible, Kinenwa kya Leza kikokeja kukuludika.

10. (a) Lelo Yesu wādi utonga bapwani nandi namani? (b) Lelo i bipangujo’ka bikokeja kukwasha muntu atonge biyampe wa kupwana nandi?

¹⁰ Tala kimfwa kya Yesu, wādi usenswe bantu tamba ku bupangi bwabo. (Nkindi 8:31) Paādi pano panshi wāsambile bulunda bukatampe na balondi bandi. (Yoano 13:1) Wāikele’nka ne “kuloelelwa” muntu wādi na milangwe mifwe mu myanda ya Leza. (Mako 10:17-22) Inoko Yesu wādi uyukile pa kukadikila mu kutonga bapwani ba pa mutyima. Kādipo upwana bininge na bantu kebasenswe kulonga kiswa-mutyima kya Shandi. Kitatyi kimo Yesu wānene amba: “Ino bānwe mwi balunda nami, wivwane mulongele monka mo nemujidikila.” (Yoano 15:14) I bine, ukokeja kupwana na mwingidi nobe kampanda. Ino wiipangule bidi: ‘Lelo uno muntu udi na mutyima wa kulonda misoñanya ya Yesu? Lelo uswile kwifunda myanda ya Yehova, mwine wānenenwe na Yesu amba ye otufwaninwe kutōta? Lelo ulondanga misoñanya imo yonka yononda ami Mwine Kidishitu?’ (Mateo 4:10) Shi wisamba na bengidi nobe ne kunena ukoma mvubu ya kwingidija misoñanya ya mu Bible, nankyo kulondolola ku bino bipangujo kukakupēlela.

11. Tela mu myanda mufwaninwe binenwa kya Leza kuludika matabula etu.

¹¹ Binenwa bya Leza bikokeja kwikala bu kinanu ku maulu etu mu myanda mivule. Kimfwa, Mwine Kidishitu mulofwa ukokeja kupebwa kaji kene kaadi ukimba. Inoko, i kaji ka nshikije-dyuba, ne shi etabije’ko nankyo ukashilula kubulwa kupwila kwa Bwine Kidishitu ne mingilo imo ya mu mutōtelo wa bine. (Mitōto 37:25) Mwine Kidishitu mukwabo ubwanya kukokwa bininge na kwipwija mukose kujilula patōkelela misoñanya ya mu Bible. (Efisesa 4:17-19) Ungi nandi ukokeja kufītwa mutyima bukidibukidi pangala pa kubulwa kubwaninina kwa batōtyi nandi. (Kolose 3:13) Mu ino myanda yonso tufwaninwe kuleka Kinenwa kya Leza kikale kinanu ku maulu etu. I bine, shi tulonde misoñanya ya mu Bible, tukanekenya kikoleja kyonso kyotutanwa nakyo mu būmi. Kinenwa kya Leza kyo “[kimwenwa’mo] pa kufundija, ne kukwasha, ne kudingila  madingi, ne kulombola ñeni ya umboloke.”—2 Temote 3:16.

“Kitōkeji kya mu Dishinda Dyami”

12. Lelo binenwa bya Leza bibwanya namani kwikala kitōkeji kya mu dishinda dyetu?

¹² Mitōto 119:105 unena kadi amba binenwa bya Leza bibwanya kutōkeja mu dishinda dyetu ne kumunika kotwenda. Ketushilwepo mu kitonto pa mwanda utala bya kumeso, mwanda Bible i mwitushintulwile kikadile’ko ngikadilo imbi pano pa ntanda ne moikafudila. Bine, tuyukile amba pano tudi mu “mafuku a kumfulo” a ino ngikadilo mibi ya bintu. (2 Temote 3:1-5) Kuyuka kotuyukile bīya kumeso kufwaninwe kuludika būmi bwetu pano. Mutumibwa Petelo wālembele amba: “Ebiya pa kumona’byo byobya byonso bikasunguluka namino, lelo kitufwaninwa kwikala muswelo wa bu-bantu ka? wakwikalamo bu-bakola ba bwine-Leza. Bakutengela ne kusakidila byamalwa kwiya kwa difuku dya Leza.”—2 Petelo 3:11, 12.

13. Lelo mwanda wa kampeja-bukidi wa mu kino kyetu kitatyi ufwaninwe kuludika mulangilo ne būmi bwetu muswelo’ka?

¹³ Mulangilo wetu ne būmi bwetu bifwaninwe kulombola kikulupiji kyotukulupile binebine amba “panopantanda papitanga, ne kilokoloko kyapo kīne kumo.” (1 Yoano 2:17) Kulonda misoñanya ya mu Bible kuketukwasha tutyibe butyibi buyampe pa bitungo byetu bya kumeso. Kimfwa, Yesu wānene amba: “Badikilai bidi kusaka bulopwe bwa Leza, ne boloke bwandi kumo, ebiya nankyo ne byabyo byonso bikemutentekelwapo.” (Mateo 6:33) Bine tufwija’ko mpata bansongwa bavule betabija kinenwa kya Yesu kadi bendelela na kwingila mwingilo wa kitatyi kyonso! Bakwabo—padi i kisaka’tu kituntulu—bavilukilanga kokwa kusakibwa bininge basapudi ba Bulopwe.

14. Lelo kisaka kimo kya Bene Kidishitu kyatandabwile namani mwingilo wakyo?

¹⁴ Tala kisaka kimo kya Bene Kidishitu kidi na bantu baná batambile mu États-Unis baenda mu Repiblike Dominikene kukengidila pamo na kipwilo kidi mu kibundi kikata kya  bantu 50 000. Kipwilo kidi na basapudi ba Bulopwe 130. Ino, ku Kivulukilo kya lufu lwa Kidishitu kya mu 12 Kweji 4, 2006 kwatenwe bantu 1 300! Mu mwaba’wa budimi bwadi ‘kebutōkeje, ke ku kwangula’ mwanda mu makweji’tu atano uno tata, lolo, mwana mwana-mulume, ne mwana mwana-mukaji bonso pamo badi kebendeja kala bifundwa bya Bible 30. (Yoano 4:35) Shabana unena’mba: “Pa kipwilo’pa padi batutu ne bakaka 30 baile mwanda wa kukwasha’po. Mu bano’ba, bantu 20 i batambile mu États-Unis, baba bakwabo mu Bahama, Kanada, Itadi, Nuvele Zelande, ne mu Eshipanye. Bafikile na kyanga kya busapudi ne kino kyakabija banabetu bene ba pa kipwilo’pa.”

15. Lelo i madyese’ka omweselwe mwanda wa kubadikija komubadikije tumweno twa Bulopwe kumeso mu būmi bwenu?

¹⁵ Shako, bavule kebadipo na bukomo bwa kuvilukila kuntu kukwabo mwanda wa kukengila kokwa kusakilwa bukwashi. Inoko boba bavilukanga—bashintanga bintu mu būmi mwa kumwena kitatyi kya kukwasha—bine beselwanga madyese pa kutanwa mu uno mwingilo. Konso komwingila, shi kwepi shi kwepi, kemukabulwepo nsangaji shi mwingidila Yehova na bukomo bwenu bonso. Shi mubadikije tumweno twa Bulopwe kumeso mu bwenu būmi, Yehova wimulaya “kwimupungulwila dyese, ino kekukekalapo kyaba kibwane kya kutambula’dyo.”—Malaki 3:10.

Kumwena mu Buludiki bwa Yehova

16. I kamweno’ka kotukamona shi tubaleka binenwa bya Leza bituludike?

¹⁶ Monka motwekimwena, binenwa bya Yehova bituludikanga mu miswelo ibidi. Bitukwashanga bu kinanu ku maulu etu tumone mwa kunangila mu dishinda dyoloke ne kwituludika potutyiba butyibi. Kadi bitōkejanga mu dishinda dyetu, amba tumone senene bidi kumeso. Kadi kino kyo kitukwasha tulonde kidyumu kitudyumuna Petelo amba: “Mwiningijei pa mityima yenu, mutūkijei ne kukulupidila biyampe, senene shē, buntu bwakukemuletelwa pa kukasokolwa kwa Yesu Kidishitu.”—1 Petelo 1:13.

17. Lelo kifundwa kya Bible kiketukwasha namani tulonde bwendeji bwa Leza?

¹⁷ Bine ne bine ponka Yehova upānanga buludiki. Ino kipangujo i kino, le usa kukōkela’bo? Shi usaka kwimvwanija bwendeji bupāna Yehova, nankyo witūdile’ko kitatyi kya kutanga kipindi kampanda kya mu Bible difuku ne difuku. Langulukila pa byobya byotanga, tompa kujingulula kiswa-mutyima kya Yehova mu byotanga’bya, tala mu miswelo palapala mokokeja kwingidija’byo mu būmi bobe. (1 Temote 4:15) Kupwa ingidija bukomo bwa kulanga potyiba butyibi bwa abe mwine.

18. Lelo i mpalo’ka yotukapalwa shi tuleka Kinenwa kya Leza kituludika?

¹⁸ Shi tuleke misoñanya ya mu Kinenwa kya Leza itwendeja, nankyo iketumunikila ne kwitupa buludiki botusakilwa potutonga kya kulonga mu mwanda kampanda. Tukulupile binebine amba Yehova wālembeje binenwa’bi mwanda wa kudyumuna “bendalale ke badyumuke.” (Mitōto 19:7) Shi tubaleka Bible ekale kalombwe ketu, nankyo tukekala na mutyima wa mundamunda utōka ne nsangaji ya kuyuka’mba tubasangaja mutyima wa Yehova. (1 Temote 1:18, 19) Kadi shi binenwa bya Leza biludike matabula etu difuku ne difuku, ku mfulo Yehova uketupala mpalo ya būmi bwa nyeke ne nyeke.—Yoano 17:3.

Lelo Ukivulukile?

• Mwanda waka i kya mvubu kuleka Kinenwa kya Yehova Leza kiludike matabula etu?

• Lelo binenwa bya Leza bikokeja namani kwikala bu kinanu ku maulu etu?

• Lelo binenwa bya Leza bikokeja namani kwikala bu kitōkeji kya mu dishinda dyetu?

• Le kifundwa kya Bible kitukwasha namani tulonde bwendeji bwa Leza?

[Bipangujo bya Kifundwa]

[Kifwatulo pa paje 19]

I kitatyi’ka kikokeja kwikala kibi kupwana na muntu wampikwa kwitabija?

[Kifwatulo pa paje 20]

Bapwani ba Yesu ba pa mutyima bādi bantu basenswe kulonga kiswa-mutyima kya Yehova

[Kifwatulo pa paje 21]

Lelo būmi bwetu bulombolanga’mba tubadikije bidi tumweno twa Bulopwe kumeso?