Bibi—Lelo I Bipite Kipimo?

Mwanuke mwana-mulume waboya kintu kyaamona mu budimi, nanshi i bombe mutebwe panshi, ponka’pa wamusabe meso ne kumulemeka lonso. Lolo umo waela wandi mwana wa lukeke mu busala budi kufula kwa dishinda. Mwingidi umo mutalulwe pa kaji, wajokela kwaadi wingidila’kwa ne kwasa muntu yense wamona, kupwa weipaya ne aye mwine. Mukelenge umo mulēmantu waone bana na kulāla nabo ku bukomo.

BINE i bya bulanda, mwanda malapolo a bilongwa bibi na bino o ke mwikadila pi na pi dyalelo. Ne kibi kutabuka, ano malapolo apūtwanga na nsekununi ya kutūkija tubila, kwiipaya kwa bana na bana, ne butumbula. Julunale umo walupwilwe mu 1995 wanene amba: “Ino myaka katwa i mibi kutabukididila, bine i myaka ya Satana. Tamba kala, kekwaikelepo kashā kitatyi na kino kidi bantu na manwa mavulevule ne mutyima wa kwipaya bantu midiyo ne midiyo mwanda’po’tu i ba musaka ungi, mutōtelo ungi nansha ludingo kamukaya.”

Mu kino kitatyi kimo kyonka, bantu bonakanya luvula, bona ntanda, benda batukija bupeta bwayo, ne kukubija misaka ya banyema. Lelo bantu babwanya kupwija bino bibi byonso ne kwalamuna ntanda ke kifuko kilumbuluke, kyakubulwa kyaka? Mwene kukimba kulonga namino bidi pamo’nka bwa kuteka mema na lunyungo ne kupungulwila’o mu kisaku? Polofesele umo, walembele myanda mivule itala pa bintu bibi, wanene amba: “Ami ndi na mutyima wa kipyupyu wa kushinta bintu mu ino ntanda ne kwiilongolola. Ino mobimwekela, ino ntanda keibwanyapo kulongoloka.” Kepabulwe padi nobe ye momwenanga.

Muswelo wenda ino ntanda ubwanya kudingakanibwa na bwato bwenda pa dijiba ditomboke, papukuma luvula dyuba ne dyuba. Nansha shi muntu usaka kwenda mutamba’ka, bukomo bonso bwalonga bukakankalwa. Bwato bukaselwa enka na kimpumpu ne mwa kwimikila’bo mwine mukomo.

Ku mutamba umo, kuno koneka kwa ngikadilo kubwanya kulambikwa ne kubulwa kubwaninina kwa bantu. (Loma 3:23) Inoko’ko, kuvula kwa bibi kwenda kwilundila’ko kupita ne pa bibi pene kekutwikwapo enka bantu kete. Bimweka amba bantu baludikwanga na bukomo bwampikwa kumweka kadi butyani. Shi i amo, lelo i bukomo’ka, ne tubwanya kwikinga’ko namani? Kishinte kilonda’ko kisa kulondolola bino bipangujo.

[Kutambile Kifwatulo pa paje 3]

© Heldur Netocny/Panos Pictures