Yehova Umwene Kikōkeji Kyobe na Mvubu

“Wami mwana, wikale wañeni ne kusangaja mutyima wami, amba nondolole yewa umpunika.”—NKINDI 27:11.

1. I mushipiditu’ka uyudile mu bantu ba dyalelo?

 M USHIPIDITU wa bwanapabo ne wa kubulwa kukōkela i muyule mu ino ntanda ya dyalelo. Mutumibwa Polo ushintulula kine kyobikadile namino mu mukanda waātumīne Bene Kidishitu ba mu Efisesa amba: “Kadi wemusangula ne bānwe badi bafwe pa kujilula bijila, ne bupola-mambo bwenu, mo mwanangile kala, mwikadile muswelo wa panopantanda, konka kudi mulopwe wa lupusa lwa luvula, wa mushipiditu wa kulonga mudi bāna bampikwa kikōkeji.” (Efisesa 2:1, 2) Bine, Satana Dyabola, “mulopwe wa lupusa lwa luvula,” i muboleje ntanda yonso na mushipiditu wandi wa kubulwa kukōkela. Wādi ulonga namino mu myaka katwa kabajinji, kadi pano po pene palonga namino tamba upangwa momwa mūlu kubwipi na kitatyi kya Divita I dya Ntanda.—Kusokwelwa 12:9.

2, 3. Le i bubinga’ka botufwaninwe kukōkelela Yehova?

² Ino batwe byotudi Bene Kidishitu, tuyukile amba Yehova Leza ufwaninwe kukōkelwa na mutyima wetu onso mwanda i Umpangi wetu, Mwine ukwatakanya būmi bwetu, Mubikadi wa buswe, ne Munyongolodi wetu. (Mitōto 148:5, 6; Bilongwa 4:24; Kolose 1:13; Kusokwelwa 4:11) Bene Isalela ba mu mafuku a Mosesa bādi bayukile amba Yehova ye Mwine wēbapele būmi kadi ye wādi Mukūdi wabo. O mwanda Mosesa wēbalombwele amba: “Mukatentekela kulonga nanshi mwemusoñaninye Yehova Leza wenu.” (Kupituluka 5:32) Bine, Yehova ye obādi bafwaninwe kukōkela. Ino abo, bukidi bonka batombokela Mubikadi wabo.

³ Lelo kikōkeji kyetu kidi na mvubu namani ku meso a Umpangi wa diulu ne ntanda? Kyaba  kimo Leza wāsoñenye mupolofeto Samwele kunena Mulopwe Solo amba: “Kikōkeji kipityile buya kitapwa.” (1 Samwele 15:22, 23) Mwanda waka kidi namino?

‘Kikōkeji Mokipityile Buya Kitapwa’

4. Le i muswelo’ka otukokeja kupa Yehova kintu kampanda?

⁴ Yehova byadi Umpangi, aye udi kala na bintu byonso bya ku ngitu byotudi nabyo. Byobidi namino, lelo kudi kadi kintu kampanda kyotukokeja kumupa? Eyo, kudi kintu kilēme mpata kyotukokeja kumupa. Le i kika? Tukokeja kutana malondololo mu uno musoñanya unena’mba: “Wami mwana, wikale wañeni ne kusangaja mutyima wami, amba nondolole yewa umpunika.” (Nkindi 27:11) Tukokeja kupa Leza kikōkeji kyetu. Nansha byotudi na ngikadilo ne bibidiji palapala, ino shi tukōkele, nankyo umo ne umo wa motudi ukokeja kutuluja Satana Dyabola wābepele na nshikani yonso amba bantu kebabwanyapo kukōkela Leza shi abatanwa na matompo. Bine dino i dyese ne dyese’po!

5. Lelo kubulwa kukōkela kufityijanga Umpangi mutyima namani? Leta kimfwa.

⁵ Leza utele mutyima ku butyibi botutyiba. Shi ketukōkelepo, bimufityijanga mutyima. Namani? Utapwanga ku mutyima shi muntu waenda mu dishinda dibi. (Mitōto 78:40, 41) Langa’po shi muntu ubela dyabeta waleka kulonda bijila bya bidibwa byobamujidikile mwanda wa akome, ino wikwete’ko enka na kudya bidibwa biningisha misongo yandi. Lelo muñanga muyampe umundapanga ukeivwana namani? Tuyukei amba ne Yehova nandi mo monka, utapwanga ku mutyima pa kumona bantu baleka kumukōkela, mwanda uyukile bipa bitamba ku kujilula bijila byandi bipāna būmi.

6. I bika biketukwasha tukōkele Leza?

⁶ I bika bikakwasha umo ne umo ekale na kikōkeji? I biyampe batwe bonso umo ne umo tulombe Leza ‘mutyima wa kikōkeji,’ mwālombele’o Mulopwe Solomone. Wālombele mutyima wa uno muswelo mwa kuyukila “kusansanya pa biya ne bibi” pa kutyibila bakwabo Bene Isalela mambo senene. (1 Balopwe 3:9) Netu tusakilwanga ‘mutyima wa kikōkeji’ shi tusaka kusansanya biyampe ne bibi mu ino ntanda iyudile mushipiditu wa butomboki. Leza i mwitupe Kinenwa kyandi, bintu bya kwifunda nabyo Bible, kupwila kwa Bwine Kidishitu, ne bakulumpe ba kilelo pa kipwilo mwanda wa tutamije ‘mutyima wa kikōkeji.’ Lelo twingidija biyampe bino byabuntu byonso?

7. Mwanda waka Yehova usakanga bininge kikōkeji kupita’ko bitapwa?

⁷ Mu uno mwanda, vuluka’mba wāsokwedile bantu bandi ba pa kala amba kikōkeji kidi na mvubu mpata kupita ne bitapwa bya banyema bine. (Nkindi 21:3, 27; Hosea 6:6; Mateo 12:7) Mwanda waka byādi namino, aye Yehova nandi ye wāsoñenye bantu bandi balambule bino bitapwa? Eyo, ino le yewa wādi ulambula kitapwa wādi utapa’kyo na milangwe’ka ku mutyima? Le wādi ulambula’kyo mwanda wa kusangaja Leza’ni nansha bu kajilwilo bitupu? Shi mutōtyi usaka bine kusangaja Leza, nabya ukekala na mutyima wa kukōkela misoñanya yonso ya Leza. Leza kadipo mvubu na bitapwa bya banyema, inoko kintu kya mvubu kyotukokeja kumupa i kikōkeji.

Kimfwa kya Kudyumukila’po

8. Mwanda waka Leza wānene kubikula Solo pa bulopwe?

⁸ Nsekununi ya mu Bible ya Mulopwe Solo ilombola patōka mvubu mikatampe ya kikōkeji. Solo wāshilwile bu muludiki mwityepeje kadi mutūkanye, ‘mutyetye mu meso andi.’ Ino mwenda myaka, mitatulo ne milangwe ya bubela yāshilula kuludika butyibi bwandi. (1 Samwele 10:21, 22; 15:17) Kyaba kimo, Solo wādi kaenda kukalwa na Bene Fidishitia. Samwele wāsapwila mulopwe amba ungilaija bidi ngiye kwela bitapwa kudi Yehova ne kuleta bulombodi bukwabo. Ino Samwele wāija kwiya mpika kitatyi kyādi kimutengelwe, bantu bāshilula kupalakana. Solo pa kumona nabya, “waela kyakwela kisōkwe.” Kino kyāfityije Yehova mutyima. Samwele pa kufika, mulopwe wāshilula kubingija kwandi kubulwa kikōkeji, amba mwanda abe Samwele wadi ubaije o mwanda nadi “neningija’tu ami mwine” kwela kyakwela kisokwe mwanda wa kutūkija Yehova mutyima. Ku meso a Mulopwe  Solo, kulambula kitapwa’kya ko kwādi kwa mvubu mpata kupita’ko kukōkela bulombodi bwa kwilaija Samwele āye ele kitapwa. Samwele wāmunena’mba: “Abe ubalonga kya bulembakane; kwalaminepo kyakanwa kya Yehova Leza obe kyakusoñenye.” Kubulwa kukōkela Yehova ko kwāfikije Solo ku kujimija bulopwe.—1 Samwele 10:8; 13:5-13.

9. Le Solo wāmwekeje namani amba kadipo na kikōkeji kudi Leza?

⁹ Lelo mulopwe wāboile ñeni ku uno mwanda wāmutene? Mhm! Mwenda mafuku, Yehova wāsoñenye Solo akatukije muzo wa Bene Amaleke, wāile kutamba Isalela bulwi mwanda ke mwanda. Solo kādipo ufwaninwe nansha kupandija banyema bobādi bamunine bene. Shako wākōkele pa ‘kutyumuna Bene Amaleke kushilwila ku Habila, na wenda ku Shula.’ Samwele pa kwiya kwimona nandi, mulopwe wāsangela bushindañani bwandi bya mwiko, kanena’mba: “Wikale mweselwe dyese kudi Yehova; nalama kyakanwa kya Yehova.” Ino Solo ne bantu bandi bājilwile misoñanya yobāpelwe, mwanda kebāipailepo Mulopwe Akaka ne “bañombe, ne binunenune, ne twana-twamikōko, ne byonso byadi biyampe.” Mulopwe Solo wābingija monka kubulwa kikōkeji kwandi amba: “Bantu [abapandija] bitabukile buyampe ku mikōko ne ku bañombe, kutapa bitapwa kudi Yehova Leza obe.”—1 Samwele 15:1-15.

10. Solo wābudilwe kuyuka bika?

¹⁰ Penepo Samwele wāsapwila Solo amba: “Lelo nsangaji ya Yehova ya mu byakwela bisōkwe ne mu bitapwa, i pityile pakatampe kukōkela kwa diwi dya Yehova’ni? Talapo bidi, kikōkeji kipityile buya kitapwa, ne kuteja nako kupityile buya māni a mikōko milume.” (1 Samwele 15:22) Yehova byaānene amba boba banyema i ba konakanibwa, nanshi kebākidipo kadi bafwaninwe kwelwa bu bitapwa.

Tukōkelei mu Bintu Byonso

11, 12. (a) Lelo Yehova umonanga namani bukomo botulonga mwanda wa kumusangaja mu butōtyi bwetu? (b) Lelo muntu ukokeja namani kwiongola’mba uloñanga kiswa-mutyima kya Leza aye nanshi kukōkela mpika?

¹¹ Bine, Yehova uloelelwanga pa kumona bengidi bandi ba dikōkeji bashala bōminine nansha byobapangwapangwa, basapula Bulopwe nansha bantu byobadi na bujundu, kadi batanwa ku kupwila kwa Bwine Kidishitu nansha byobekonda na mushikatyilo wa umbūmi! Bine kikōkeji kyetu mu ino myanda ya mvubu mu būmi bwetu bwa ku mushipiditu kisangajanga mutyima wandi! Bukomo botulonga mu kutōta Yehova i bulēme ku meso andi shi tulonga’bo na buswe. Bantu bakokeja kusūla mwingilo otuputuma nao, ino Leza ulamanga bitapwa byotumupa na mutyima umo kadi wibivulukanga.—Mateo 6:4.

¹² Ino pa kusangaja Leza wetu ne pa mfulo, tufwaninwe kukōkela mu myanda yonso ya būmi bwetu. Ketufwaninwepo kwiongola nansha dimo amba tukokeja kujilula misoñanya kampanda ya Leza shi tulēmekele butōtyi bwandi mu myanda mikwabo ya umbūmi. Kimfwa, muntu ubwanya kwiongola amba shi uvuija’tu butōtyi bwandi mu myanda kamukaya, kubapu, ukokeja kulonga busekese nansha kulonga bilubo bikwabo bikatampe. Bine kuno i kwididika mpata!—Ngalatea 6:7, 8.

13. Lelo kikōkeji kyotukōkele Leza kikokeja namani kutūlwa pa ditompo potudi kwa bunka?

¹³ Ne kadi tukokeja kwiipangula’mba, ‘Le nkōkelanga Yehova mu mingilo yami ya difuku ne difuku, nansha ke mu yoya myanda imweka bu intala ami mwine?’ Yesu wānene amba: “Aye utūkenye umbityetyetyetye nansha umbingi utūkenye. Nanshi aye wampikwa kutūkanya umbityetye nansha umbingi katūkanyapo, mhm.” (Luka 16:10) Lelo ‘tunañanga ne mutyima mubwaninine,’ nansha ke ‘mu mobo etu’ kemukokejapo kwitumona bakwetu? (Mitōto 101:2) Bine, bululame bwetu butūlwanga pa ditompo potudi mu njibo yetu. Mu matanda mavule mudi bantu na makompyuta ku mobo, bipēla kumona bifwatulo bya munyanji. Myaka ibala-inga kunyuma, i kutupu wādi ukokeja kutala bifwatulo bya wao muswelo shi kendelepo mu bifuko mwipwija bantu mukose na myanda ya busekese. Lelo tukalama na kikōkeji binenwa byānene Yesu amba: “Yewa wakutala mwanamukaji meso a  mutyima wakumusaka, nankyo wapu kupya kala mambo nandi umutyima wandi”? Bine, lelo tukapela nansha’tu kutala bifwatulo bya busekese? (Mateo 5:28; Yoba 31:1, 9, 10; Mitōto 119:37; Nkindi 6:24, 25; Efisesa 5:3-5) Le myanda ya ku televijo ilombola bantu ba bikandangobo nayo? Lelo twitabije milangwe ya Leza wetu udi na muya ‘ushikilwe yewa uswele bikungulu bya bulobo’? (Mitōto 11:5) Le myanda ya kukolwa malwa kufula nayo le? Bible ujidikile bunkolwankolwa, ino kadi udyumunanga Bene Kidishitu baleke kumunwa na “vinyu mingi.”—Tetusa 2:3; Luka 21:34, 35; 1 Temote 3:3.

14. I muswelo’ka otukalombola amba tukōkele Leza mu myanda itala lupeto?

¹⁴ Mu kintu kikwabo motufwaninwe kudyumuka i mu myanda itala lupeto. Kimfwa, le tukepuka kukuta nkuku ya kusaka kupeta bukidi na kulonga bintu bityibila ku budimbidimbi? Lelo twikalanga na mutyima wa kutyiba tushinda twa nketwa motutyina kufuta bitanshi’ni nansha tukōkelanga na mutyima umo ku mbila inena’mba “lambulai kudi abo bonso mo kyendelemo, musonko wende ku bamusonko”?—Loma 13:7.

Kikōkeji Kitononwa na Buswe

15. Mwanda waka ukōkelanga misoñanya ya Yehova?

¹⁵ Kukōkela misoñanya ya Leza kuletanga madyese. Kimfwa, shi ketutomepo mfwanka, shi tudi biyampe mu mwikadilo, ne shi tulēmekele buujila bwa mashi, tukokeja kwepa mbá imoimo. Ne kadi, shi tulonda bubinebine bwa mu Bible mu myanda mikwabo ya umbūmi, tukokeja kumwena byabuyabuya mu myanda ya lupeto, ya mushikatyilo na bantu, ne ya kisaka. (Isaya 48:17) Bino byabuyabuya byonso bimweke bikokeja kumonwa bu madyese alombola’mba bijila bya Leza bidi na kamweno. Inoko, buluji bukatampe botukōkelela Yehova i kuswa kotumuswele. Ketwingidilangapo Leza na kwisakila. (Yoba 1:9-11; 2:4, 5) Leza i mwitupe bwanapabo bwa kutonga kukōkela yense otusaka kukōkela. Tusakanga kukōkela Yehova mwanda tusakanga kumusangaja ne kulonga byoloke.—Loma 6:16, 17; 1 Yoano 5:3.

16, 17. (a) Le Yesu wākōkele Leza na mutyima wa buswe bwa binebine namani? (b) Le tukokeja kwiula Yesu namani?

 ¹⁶ Yesu wāshile kimfwa kilumbuluke kya kukōkela Yehova na mutyima wa buswe bwa binebine. (Yoano 8:28, 29) Paādi pano pa ntanda, “walombwelwe ñeni ya kikōkeji monka mu byobya byamalwa byāmwene.” (Bahebelu 5:8, 9) Namani? Yesu ‘wēpelulwile aye mwine, pa kukōkela ku lufu, nalo, kadi, e-ē! i lufu lonka lwa ku mutyi wa masusu.’ (Fidipai 2:7, 8) Nansha Yesu byaādi kala mukōkele momwa mūlu, kikōkeji kyandi kyātūdilwe monka pa ditompo pano panshi. Tukulupilei’tu amba Yesu i mubwanye bisakibwa bya kwingidila banababo ba ku mushipiditu ne bantu bakwabo badi na lwitabijo bu Mupidishitu nansha Kitobo Mukatampe.—Bahebelu 4:15; 1 Yoano 2:1, 2.

¹⁷ Le batwe netu le? Tukokeja kwiula Yesu na kutangidija kumeso kikōkeji kya kukōkela kiswa-mutyima kya Leza. (1 Petelo 2:21) Tukokeja umo ne umo kuloelelwa pa kumona buswe bwitutonona tukōkele misoñanya ya Yehova, nansha ke pobetutyinya mbavu ne potutononwa’mba tulonge bintu bibi. (Loma 7:18-20) Kino kilomba ne kwikala na mutyima wa kukōkela buludiki bwa boba betutangidile mu mutōtelo utōka, nansha byobadi bakubulwa kubwaninina. (Bahebelu 13:17) Kikōkeji kyotukōkela mbila ya Leza kufula i kilēme ku meso a Yehova.

18, 19. Lelo kikōkeji kyotukōkela Leza na mutyima umo kitambanga ku bika?

¹⁸ Dyalelo, kukōkela Yehova i ne kūminina kupangwapangwa mwanda wa kulama bululame bwetu. (Bilongwa 5:29) Ne kadi kukōkela musoñanya wa Yehova wa kusapula ne kufundija kwitulomba tūminine kufika ne ku mfulo ya ino ngikadilo ya bintu. (Mateo 24:13, 14; 28:19, 20) Tufwaninwe kūminina pa kwendelela kwibungila pamo na banabetu, nansha ino ntanda byoikokeja kwitutyinya mbavu. Leza wetu wa buswe uyukile biyampe bukomo botulonga pa kumukōkela mu ino myanda yonso. Ino pa kukōkela ne pa mfulo, tufwaninwe kulwa bulwi na ngitu yetu ya bubi, na kuvundamina bibi, koku tutamija mutyima wa kuswa biyampe.—Loma 12:9.

¹⁹ Shi twingidila Yehova na buswe ne mutyima wa kufwija’ko, aye uketwikadila bu yewa “upala mpalo boba bamukimba ne mikeketo.” (Bahebelu 11:6) Eyo, bitapwa bifwaninwe bidi na mvubu kadi i biyampe, ino kikōkeji kikunkane, kitononwa na buswe bwa kuswa Yehova, kyo kine kimusangaja’nka ne pa mfulo.—Nkindi 3:1, 2.

Usa Kulondolola Namani

• I kika kyotunenena amba tudi na kintu kya kupa Yehova?

• Le i bilubo’ka byālongele Solo?

• Ukalombola namani amba ukulupile amba kikōkeji i kipite bitapwa?

• I bika bikutonona ukōkele Yehova?

[Bipangujo bya Kifundwa]

[Kifwatulo pa paje 22]

Le ukōkelanga misoñanya ya Leza mu njibo mobe mwa bunka?