Būmi Bwinebwine bwa ku Mushipiditu Ukasokola’bo Namani?

MUTUMIBWA Polo wāsonekele amba: “Mutyima wa bya ngitu i lufu, ino mutyima wa Mushipiditu i būmi, ne ndoe ponka.” (Loma 8:6) Pa kunena namino, mutumibwa wālombwele amba kwikala muntu wa ku mushipiditu ke enkapo butongi ne mwikadila mulumbuluke kete. Ino na bubine, i mwanda utala būmi ne lufu. Le muntu wa ku mushipiditu udi na “būmi, ne ndoe” mu buluji’ka? Kukwatañana na Bible, uno muntu udi na ndoe mu ano mafuku—na aye mwine ne na Leza kumo—kadi ukamona būmi bwa nyeke mu mafuku āya kumeso. (Loma 6:23; Fidipai 4:7) O mwanda Yesu wānene amba: “Dyese dyo dyabo bakulandapala pa mutyima”!—Mateo 5:3.

Eyo, kutanga kotanga dino dipepala kulombola amba udi na mutyima wa kuyuka bintu bya ku mushipiditu—ne kino i kintu kiyampe. Ino, bantu badi na mimweno palapala pa uno mwanda, ne padi ye uno ubeipangula’mba: ‘Būmi bwinebwine bwa ku mushipiditu i būmi’ka? Ne muntu ukamona’bo namani?’

“Mutyima wa Kidishitu”

Mutumibwa Polo kālombwelepo’tu enka kamweno ne byabuyabuya bimwenwa mu kwikala muntu wa ku mushipiditu, ino wādi na bivule bya kunena pa būmi bwinebwine bwa ku mushipiditu i būmi’ka. Polo washintulwidile Bene Kidishitu ba mu kibundi kya kala kya Kodinda mwishidile muntu wa ku ngitu, yewa ulonda bilokoloko bya ngitu, ne muntu wa ku mushipiditu, yewa usangela bintu bya ku mushipiditu. Polo wāsonekele amba: “Mutyima wa bu-muntu keusepelelapo bya Mushipiditu wa Leza, ehe, ke-bintu abyo i bilembakane kudi aye.” Ku mutamba mukwabo Polo wāshintulula amba muntu wa ku mushipiditu uyukenanga ku “mutyima wa Kidishitu” wadi nao.—1 Kodinda 2:14-16.

Kwikala na “mutyima wa Kidishitu” pavule i kwikala ‘na mutyima na owa wādi na Kidishitu.’ (Loma 15:5; Fidipai 2:5) Ko kunena’mba, muntu wa ku mushipiditu i yewa ulanga mulangila Yesu, unanga mu mayo andi. (1 Petelo 2:21; 4:1) Wivwane muntu wenda wiula mutyima wādi na Kidishitu, nabya būmi bwandi bwa ku mushipiditu bukenda buninga ne kakabulwepo kumona bityebitye “būmi, ne ndoe.”—Loma 13:14.

Mwa Kuyukila “Mutyima wa Kidishitu”

Pa kusaka kwikala na mutyima wa Kidishitu, bilomba bidi kuyuka uno mutyima. Nanshi ditabula dibajinji dya kwikala na būmi bwa ku mushipiditu i kukimba kuyuka mulangilo wa Yesu. Ino le ukayuka namani mutyima wādi na muntu wāikele’ko pano panshi pano ke papite myaka 2 000? Biyampe, le wikalanga uyuka namani mānga ya bantu batumbe ba pa kala ba mu yenu ntanda? Padi i na kutanga myanda ibatala. Mo monka, kutanga mānga ilembelwe ya Yesu o muswelo mwinemwine wa kuyuka mutyima wādi na Kidishitu.—Yoano 17:3.

Pa bitala Yesu, kudi nsekununi iná ya mānga itobala—Maevanjile asonekelwe na ba Mateo, Mako, Luka ne Yoano. Kutanga ino nsekununi na katentekeji kukakukwasha umone muswelo wādi ulanga Yesu, mwiivwanino wandi wa mushike, ne kine kyādi kimutonona kulonga bintu. Shi witūdile’ko kyaba kya kulanguluka pa byotanga pangala pa Yesu, ukashilula kumona mu ñeni yobe Yesu wādi muntu wa muswelo’ka. Nansha shi wimonanga kala bu mulondi wa Kidishitu, buno butangi ne kulanguluka kebikabulwepo kukukwasha wikale “kutama umbuntu, ne mu ñeni ya Mfumwetu Umpandiji Yesu Kidishitu.”—2 Petelo 3:18.

Pano na ino myanda mu ñeni, tubandaule bisonekwa bimobimo mu Maevanjile, tumone byālengeje Yesu ekale muntu wa  ku mushipiditu. Kupwa, ukeipangula muswelo obwanya kwiula kimfwa kyaāshile.—Yoano 13:15.

Būmi bwa ku Mushipiditu ne “Kipa kya Mushipiditu”

Evanjile ya Luka inena’mba mushipiditu sandu wa Leza wātūkile Yesu paādi ubatyijibwa, o mwanda Yesu ‘wāyudilwe mushipiditu sandu.’ (Luka 3:21, 22; 4:1) Yesu nandi wālombwele balondi bandi mvubu idi mu kuludikwa na mushipiditu sandu wa Leza, ke bukomo bwandi bwingila kadi. (Ngalwilo 1:2; Luka 11:9-13) Mwanda waka kino i kya mvubu? Mwanda mushipiditu wa Leza bo bukomo bushinta mutyima wa muntu, penepa kaifwana mutyima wa Kidishitu. (Loma 12:1, 2) Mushipiditu sandu ulupulanga mu muntu ngikadila pamo bwa “buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula.” Ino ngikadila—itelwa na Bible bu “kipa kya mushipiditu”—ko kayukeno kayukilwa’po muntu wa ku mushipiditu. (Ngalatea 5:22, 23) Mu kīpi, muntu utele mutyima ku bintu bya ku mushipiditu i muntu uludikwa na mushipiditu wa Leza.

Yesu wālombwele kipa kya mushipiditu mu mwingilo wandi onso. Ngikadila pamo bwa buswe, kanye, ne buyampe i bimweke patōka mu muswelo waādi ushikete na boba bādi bamonwa bu batupwaipwai. (Mateo 9:36) Tala kimfwa mwanda umo usonekelwe na mutumibwa Yoano. Tutanga’mba: “Pa kupita [Yesu] wamwene muntu mpofu mutambe nabo munda.” Bana ba bwanga ba Yesu nabo bāmwene uno muntu ino bamumona bu kipya-mambo. Kebepangula’mba: “Wabipije i ani? le i uno’ni, i ku bakumubutulako?” Balondakani na uno muntu nabo bādi bāmumwene, ino bonso bādi bamumona bu wa lulombo. Bānena’mba: “Le uno keayepo kadi wadi ushikete ulomba byakulomba?” Ino Yesu aye wāmwene uno mpofu bu muntu ufwaninwe kukwashibwa. Wēsamba na mpofu’wa ne kumubelula.—Yoano 9:1-8.

Uno mwanda ubakufundija bika pa mutyima wādi na Kidishitu? Dibajinji, Yesu kādipo usebula bantu betyepeje ino wādi wibevwanina kinyenye. Dya bubidi, kādipo wikaka kukwasha bakwabo. Le nobe ulondanga kino kimfwa kyāshile Yesu? Lelo umonanga bantu na mwādi mwibamwena Yesu, na kwibakwasha balumbulule būmi bwabo ne kwikala na lukulupilo lwa kumeso? Nansha le udi na mutyima wa kwifukwija boba ba majina ne kufutulula batupwaipwai? Shi umona bantu mwādi mwibamwena Yesu, nabya bine ulondanga kimfwa kyandi.—Mitōto 72:12-14.

Būmi bwa ku Mushipiditu ne Milombelo

Nsekununi ya Maevanjile ilombola amba Yesu wādi divule dine ulomba Leza. (Mako 1:35; Luka 5:16; 22:41) Mu bula bwa mwingilo wandi pano panshi, wādi witūdila’ko kitatyi kya kulombela. Mwana bwanga Mateo usoneka’mba: “Byātalwile bibumbo [Yesu] wakandile lūlu kasuku kandi kulombela.” (Mateo 14:23) Yesu wādi umona bukomo mu bino bitatyi bya kwisamba talala na Shandi wa mūlu. (Mateo 26:36-44) Dyalelo, bantu ba ku mushipiditu nabo bakimbanga mikenga ya kwisamba na Leza, mwanda bayukile amba kino kikakomeja kipwano kyobapwene na Umpangi ne kikebakwasha bekale balanga pamo bwa Kidishitu.

Divule Yesu wādi ulombela kyaba kilampe. (Yoano 17:1-26) Kimfwa, kumeso kwa kutonga bantu 12 ba kwikala batumibwa bandi, “waendele ku lūlu kulombela, wadi ulombela Leza bufuku bonso.” (Luka 6:12) Bantu ba ku mushipiditu nabo nansha byokebashikilwangapo bufuku bonso mu kulombela, ino balondanga kimfwa kya Yesu. Kumeso kwa kukwata butyibi bukatampe umbūmi, betūdilanga’ko kitatyi kya kulomba Leza, kukimba bwendeji bwa mushipiditu sandu wandi mwa kutongela bintu bikakomeja būmi bwabo bwa ku mushipiditu.

Yesu wālombwele kadi malango a mushike mu milombelo yandi otukokeja kwiula potulombela. Ivwana binene Luka pangala pa muswelo wādi ulombela Yesu bufuku bukya ke lufu lwandi. “Ebiya kwikala mu misongo mīne mikata waningija nakampata kulombela penepo ino byanga byandi byālamuka pamo bwa  mano makatampe a mashi ke anokela panshi.” (Luka 22:44) Yesu wādi kala ulombanga na kininga, ino pa kutanwa na ano matompo makatampe mu būmi bwandi, po pene “waningija nakampata”—bine ne milombelo yandi yalondololwa. (Bahebelu 5:7) Bantu ba ku mushipiditu nabo balondanga kimfwa kya Yesu. Pobatanwa na matompo makomokomo, bekalanga ‘baningija nakampata’ mu kulombela kudi Leza amba ebape mushipiditu sandu, buludiki ne bukwashi.

I kimweke patōka amba Yesu wādi mwana-mulume mu milombelo, o mwanda bandi bana ba bwanga bādi basaka kumwiula. Pa kino, bāmulombele amba: “Abe Mfumwetu witulombola mwakulombela.” (Luka 11:1) Dyalelo boba batele mutyima ku bintu bya ku mushipiditu ne basaka kuludikwa na mushipiditu sandu nabo balondanga kimfwa kya Yesu pobalomba Leza. Bine, būmi bwinebwine bwa ku mushipiditu bwendelanga pamo na milombelo.

Būmi bwa ku Mushipiditu ne Busapudi bwa Myanda Miyampe

Mu Evanjile ya Mako mudi nsekununi ya Yesu paādi undapa babela bavule, kufika’nka ne ku kyolwa bininge. Kadi lubanga aye pa kwenda kwa bunka kukalombela, batumibwa bandi baiya kebamunena’mba bantu bavule bamukimbanga, kepabulwe padi i mwanda wa kundapibwa. Ino Yesu wēbanena amba: “Twendei bidi nanshi ku bibundi bilondakene ne kino nako nkasapwilekopo myanda.” Ebiya Yesu wēbashintulwila amba: “Mwanda kyo naīdile i kyonka kino’ki.” (Mako 1:32-38; Luka 4:43) Eyo, nansha byādi Yesu undapa bantu, ino kusapula myanda miyampe ya Bulopwe  bwa Leza o wādi mwingilo wandi mwine mukatampe.—Mako 1:14, 15.

Dyalelo, boba balombola bakwabo myanda ya Bulopwe bwa Leza bo badi na mutyima wa Kidishitu. Yesu wāsoñenye bonso basaka kwikala balondi bandi amba: “Endai nanshi mukafundijei mizo yonso ya bantu nabo ke bāna-babwanga, . . . ne kwibalombola balaminine byonso byo nemulaīle ami mwine.” (Mateo 28:19, 20) Ne kadi, Yesu wālaile amba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.” (Mateo 24:14, Myanda Miyampe ku Bonso) Kinenwa kya Leza kilombola amba mwingilo wa kusapula ukengilwa ku bukomo bwa mushipiditu sandu, nanshi kwingila na kininga uno mwingilo i kayukeno ka būmi bwinebwine bwa ku mushipiditu.—Bilongwa 1:8.

Kusapula musapu wa Bulopwe ku bantu ntanda yonso kulomba bukomo bwa midiyo ya bantu bengila umbumo. (Yoano 17:20, 21) Boba bengila uno mwingilo ke enkapo bantu ba ku mushipiditu ino i bantu balongololwe kujokoloka ntanda yonso. Le ukokeja kujingulula bantu balonda mayo a Kidishitu, basapula ne kusapula myanda miyampe ya Bulopwe ntanda yonso?

Le Nobe Kodi pa Ludingo’ka?

Bine, tuno tuyukeno ne tukwabo to tuyukilwanga’po muntu wa ku mushipiditu, ino le abe nobe kodi pa ludingo’ka mu bino byabandaulwa? Pa kuyuka pokodi wiipangule’mba: ‘Le ntañanga nyeke Bible, Kinenwa kya Leza ne kulangulukila pa byontanga? Lelo kipa kya mushipiditu i kimweke mu būmi bwami? Le ne mwana-mulume nansha mwana-mukaji mukomo mu milombelo? Lelo ndi na mutyima wa kwilunga na bantu basapula busapudi bwa myanda miyampe ya Bulopwe bwa Leza ntanda yonso?’

Kwibandaula pampikwa kwididika kukakukwasha uyuke shi kodi pepi mu būmi bobe bwa ku mushipiditu. Tubakukankamika utabule matabula mafwaninwe tamba’nka pano amba umone “būmi, ne ndoe ponka.”—Loma 8:6; Mateo 7:13, 14; 2 Petelo 1:5-11.

[Kapango/Bifwatulo pa paje 5]

TUYUKENO TWA BŪMI BWA KU MUSHIPIDITU

◆ Kuswa Kinenwa kya Leza

◆ Kupa kipa kya mushipiditu

◆ Kulomba Leza nyeke ne na kininga

◆ Kusapwila bantu myanda miyampe ya Bulopwe