Lelo ‘Ukanangila mu Mushipiditu’?
Lelo ‘Ukanangila mu Mushipiditu’?
“Nangilai mu Mushipiditu, nabya kemukwatwapo ne kilokoloko kya ngitu.”—NGALATEA 5:16.
1. I muswelo’ka otukapwija mutyima uzumbazumba pangala pa kulubila mushipiditu?
KUDI muswelo wa kupwija mutyima uzumbazumba pangala pa kulubila mushipiditu sandu wa Yehova. I na kulonga kyokya kinene mutumibwa Polo amba: “Nangilai mu Mushipiditu, nabya kemukwatwapo ne kilokoloko kya ngitu.” (Ngalatea 5:16) Shi tuludikwa na mushipiditu wa Leza nabya bilokoloko bya ngitu kebiketunekenyapo.—Loma 8:2-10.
2, 3. Shi tunangila mu mushipiditu, i bika byotukalonga?
2 Shi ‘tunangile mu mushipiditu,’ bukomo bwa Leza bwingila, nabya tukakōkela Yehova. Tukekala na ngikadila ya bwine Leza mu mwingilo wetu, mu kipwilo, ku njibo, ne konso pi na pi. Kipa kya mushipiditu kikamweka mu bilongwa byotulongela mwine petu, betu bana, banabetu betabije, ne bantu bakwabo.
3 Shi tudi na “būmi monka mwikadile Leza mu mushipiditu” nabya tukakomena bubi. (1 Petelo 4:1-6) Wivwane tuludikwa na mushipiditu, nankyo ketukalongapo bubi bukoma kulekelwa. Ino i bintu’ka bikwabo bilumbuluke byotukalonga shi twendelela kunangila mu mushipiditu?
Ikala Pabwipi na Leza ne na Kidishitu
4, 5. Kunangila mu mushipiditu kuketukwasha tumone Yesu namani?
4 Tubwanya kupwana kipwano kya mpwaninine na Leza ne wandi Mwana mwanda tunangilanga mu mushipiditu sandu. Polo wālombwele banababo betabije ba mu Kodinda pa mwanda utala byabuntu bya mushipiditu amba: “Neumpe ñeni [banwe bādi batōtyi ba bankishi] ya kunena’mba: Kekudipo muntu, nansha umo, wakwisamba uMushipiditu wa Leza’mba: Yesu i mufinge mafingo; mhm; kadi kutupu muntu, nansha umo, uyūkile kunena’mba: Yesu i Mfumwami; poso monka mudi Mushipiditu Sandu.” (1 Kodinda 12:1-3) Mushipiditu o-onso utonona bantu ku kufinga Yesu nabya wao mushipiditu utambanga kudi Satana Dyabola. Batwe Bene Kidishitu banangila mu mushipiditu tusumininwe amba Yehova wāsangwile Yesu mu bafwe ne kumuzunzula peulu pa bipangwa byonsololo. (Fidipai 2:5-11) Tudi na lwitabijo mu kitapwa kya kikūlwa kadi twitabije amba Yesu ye Mfumwetu otupelwe na Leza.
5 Ino bamo bādi betela bu Bene Kidishitu mu myaka katwa kabajinji K.K. bātunine Yesu amba Yesu kailepo mu ngitu. (2 Yoano 7-11) Bakwabo pa kwitabija ino milangwe mifwe, bāsumbula lufundijo lwa bine lutala padi Yesu, Meshiasa. (Mako 1:9-11; Yoano 1:1, 14) Nanshi kunangila mu mushipiditu ko kwitukankaja kuponena mu bupondo. Ino shi twikale badyumuke ku mushipiditu nabya tukendelela kutambula buntu bwa Yehova ne ‘kunangila mu bya binebine.’ (3 Yoano 3, 4) Nanshi tusumininwei kunyema bupondo bonso amba tulame kipwano kikomo kyotupwene na Tata wetu wa mūlu.
6. Lelo i ngikadilo’ka iletanga mushipiditu wa Leza mu boba banangila mu mushipiditu?
6 Polo wābadīle bupondo bwa kutōta bankishi ne kwiketa kwa palapala pamo na “mīngilo ya ngitu,” ke busekese ne kujilula kwa bijila kadi. Kupwa wāshintulula’mba: “Boba badi bā Kidishitu Yesu baipaīle ngitu ku [mutyi wa masusu], ne bisakasaka-mutyima, ne byakilokoloko byabyo byonso kumo. Wivwane kadi tumwene būmi mudi Mushipiditu, nankyo nanshi tunangile monka mudi Mushipiditu.” (Ngalatea 5:19-21, 24, 25) Le i ngikadilo’ka iletwanga na bukomo bwingila bwa Leza mu boba bamwena būmi mu mushipiditu ne kunangila monka? Polo wāsonekele amba: “Kipa kya mushipiditu i buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula.” (Ngalatea 5:22, 23, New World Translation) Tubandaulei pano miswelo palapala ya kino kipa kya mushipiditu.
“Ne Kwisanswa Bātwe Bene na Bene”
7. Buswe i bika, kadi buyukenanga ku bintu’ka bimo?
7 Buswe—kipindi kimo kya kipa kya mushipiditu—divule i kisanso kikatampe ne kyampikwa mwino ku bakwenu, kyendela pamo na lulamato lwa kyanga kobadi. Bisonekwa binena’mba “Leza i buswe” mwanda ye kimfwa kīsokwele kya ino ngikadilo. Buswe bukatampe bwa Leza ne bwa wandi Mwana pa batwe bantu i bumweke mu kitapwa kya kikūlwa kya Yesu Kidishitu. (1 Yoano 4:8, Bisonekwa Bitokele; Yoano 3:16; 15:13; Loma 5:8) Batwe balondi ba Yesu netu tuyukenanga enka ku buswe botwiswele batwe bene na bene. (Yoano 13:34, 35) Eyo, twi basoñanibwe “kwisanswa bātwe bene na bene.” (1 Yoano 3:23) Kadi Polo unena amba buswe budi na kitūkijetyima ne kanye. Kebudipo na mukao, kebwianyangapo, kebuloñangapo byampikwa kwendela’mo, kadi kebukimbangapo tumweno twa abo bwine. Buswe kebukwatwangapo nsungu nansha kuvuluka kisansa. Busepelelanga bubinebine, ino kebusepelelangapo bukondame. Buswe butyumwinanga umanwi, bwitabijanga, bukulupilanga, ne kūminina byonso. Kadi kebukankalwangapo.—1 Kodinda 13:4-8, NW.
8. Mwanda waka tufwaninwe kuswa bakwetu botutōta nabo Yehova?
8 Shi tuleke mushipiditu wa Leza ulupula motudi buswe, nabya buno buswe bukamweka mu kipwano kyetu na Leza ne na mukwetu. (Mateo 22:37-39) Mutumibwa Yoano usoneka’mba: “Wakubulwa kusanswa wikele mu lufu. Ino yewa ushikilwe mwanabo i ntapani; kadi muyūkile’mba, kekudipo ntapani, nansha umo, udi ne būmi bwa nyeke bwikele mudi aye, mhm.” (1 Yoano 3:14, 15) Ntapani mu Isalela wādi ukokeja kupandila mu kibundi kya kinyemeno enka shi kadipo ushikilwe waipaile’wa. (Kupituluka 19:4, 11-13) Wivwane netu tuludikwe na mushipiditu sandu nankyo tukaswa Leza, batōtyi netu, ne bantu bakwabo.
“Tusepo twa Yehova I Bukomo Bwenu”
9, 10. Nsangaji i bika, ne i bintu’ka bimo bituletela nsangaji?
9 Nsangaji i katōkwe, dyese, ne tusepo. Yehova i “Leza wa dyese ne dyesepo.” (1 Temote 1:11; Mitōto 104:31) Mwana uloelelwe kulonga kiswa-mutyima kya Shandi. (Mitōto 40:8; Bahebelu 10:7-9) Kadi “tusepo twa Yehova i bukomo” bwetu.—Nehemia 8:10.
10 Nsangaji ya Leza itupanga kuloelelwa kukatampe potulonga kiswa-mutyima kyandi mu bitatyi bikomo, bya bulanda, ne mu kupangwapangwa. Bine, “kutana kuyukidija Leza” i kintu kya nsangaji! (Nkindi 2:1-5) Kipwano kya nsangaji kyotupwene na Leza kimanine pa buyuki bwa bine ne pa lwitabijo lotudi nalo mwadi ne mu kitapwa kya kikūlwa kya Yesu. (1 Yoano 2:1, 2) Kubadilwa mu bu bana na bana bumo kete bwa ntanda yonso i nsulo mikwabo ya nsangaji. (Zefenia 3:9; Hakai 2:7) Kadi lukulupilo lwetu lwa Bulopwe ne dyese dya kusapula myanda miyampe i bintu bitupa nsangaji. (Mateo 6:9, 10; 24:14) Kekudipo motwidilwa nsangaji ya kukamona būmi bwa nyeke. (Yoano 17:3) Umo ne umo “ukasangala byamwiko’tu” pangala pa luno lukulupilo lukatakata.—Kupituluka 16:15.
Ikala wa Ndoe ne Kitūkijetyima Ponka
11, 12. (a) Ukashintulula amba ndoe i bika? (b) Ne ndoe ya Leza itushikatyijanga namani?
11 Ndoe—kipindi kikwabo kya kipa kya mushipiditu—i ngikadilo ya kushikata ku matwi talala, pakubulwa kuvutakanibwa. Tata wetu wa mūlu i Leza wa ndoe, kadi i betukulupije amba: “Yehova ukēselanga bantu bandi dyese dya ndoe.” (Mitōto 29:11; 1 Kodinda 14:33) Yesu wānene bandi bana ba bwanga’mba: “Ne ndoe mīne yayo, nemushila’yo, i ndoe ya ami mwine yo nemupa.” (Yoano 14:27) Le yadi ya kukwasha namani balondi bandi?
12 Ndoe yāshile Yesu ku bandi bana ba bwanga ifukatyijanga mityima ne ñeni kadi ifundulanga moyo. Kutabukidila ino ndoe yāile kitatyi kyobātambwile mushipiditu sandu. (Yoano 14:26) Netu byotuludikwa na uno mushipiditu ne mungya milombelo yetu, tudi na “ndoe ya Leza” mikatakata itūkija mityima ne ñeni yetu. (Fidipai 4:6, 7) Ne kadi mushipiditu wa Yehova witukwashanga twikale talala kadi mu ndoe na banabetu betabije ne na bantu bakwabo.—Loma 12:18; 1 Tesalonika 5:13.
13, 14. Lelo kitūkijetyima i bika, ne mwanda waka tufwaninwe kutūkija mutyima?
13 Kitūkijetyima i kikwatañane na kwikala mu ndoe, mwanda i kutyumwina kotutyumwina lonji nansha bibi umanwi koku tukulupile amba myanda ikalumbuluka. Leza utūkije mutyima. (Loma 9:22-24) Yesu nandi mo monka udi na ino ngikadilo. Netu tumwenanga’mo mwanda Polo wāsonekele amba: “Po nafwilwako lusa i ponka pano’mba, Yesu Kidishitu ēlombwele monka mudi ami mutabukemo, mwātūkijije mutyima wandi ku byonso, ke kyelekejo kya ku boba bakukamwitabija, ne būmi bwa nyeke ponka.”—1 Temote 1:16.
14 Ngikadilo ya kutūkija mutyima itukwashanga tūminine kitatyi kitunena bakwetu bintu bisansa nansha byambulwa kwendela’mo. Polo wāsoñenye banababo Bene Kidishitu amba: “Mwikale kwibatūkijija mutyima bonsololo.” (1 Tesalonika 5:14) Batwe bonso byotudi bampikwa kubwaninina ne tulubanga, tusenswe bantu bekale na mutyima mutūke potudi, bekale na kitūkijetyima pa bilubo byotwibalubila. O mwanda nanshi netu tufwaninwe “kutūkija mutyima . . . ne tusepo ponka.”—Kolose 1:9-12.
Lombola Kanye ne Buyampe
15. Shintulula kanye i bika, kadi leta bimfwa bya kanye.
15 Kanye kamwekanga potuta bakwetu mutyima na kwibanena binenwa bya bulunda ne kwibalongela bilongwa bibakwasha. Yehova i wa kanye, ne wandi Mwana mwine kumo. (Loma 2:4, MB; 2 Kodinda 10:1) Bengidi ba Leza ne Kidishitu wandi balombwa kwikala na kanye. (Mika 6:8; Kolose 3:12) Shako kudi ne bamo kebādipo bapwene na Leza ino bālombwele “mutyima muyampe,” ke kanye kadi. (Bilongwa 27:3; 28:2) Nanshi na bubine netu tukokeja kulombola kanye shi ‘tunangila mu mushipiditu.’
16. I ngikadilo’ka imoimo ifwaninwe kwitutonona tulombole kanye?
16 Kanye kakokeja kumweka nansha shi tudi na bubinga bwa kulobela mwanda wa muntu wetunena bisansa nansha kwitulonga bibi. Polo wānene amba: “Funai bulobo kemukapīlaimo mambo ponka; kemukashikija dyuba’nka na bukalabale bwenu, mhm! nansha dyabola kemukamujikwila kyaba, mhm. Mwikale ne kanye bānwe bene na bene, ne mutyima wa kukōka, mwikale kwilekela bānwe bene, monka mwemulekele aye Leza mudi Kidishitu.” (Efisesa 4:26, 27, 32) Kutabukidila i biyampe tulombole kanye ku boba batanwa na matompo. Eyo, mukulumpe Mwine Kidishitu ukabulwa kanye shi watunya kuleta madingi a mu Bisonekwa mwanda’tu wa kutyina kusanshija muntu umwekelele patōkelela amba udi mu kyaka kya kusasuka mu dishinda dya “buyampe bonso, ne boloke, ne binebine.”—Efisesa 5:9.
17, 18. Buyampe i bika, ne ino ngikadila idi na kamweno’ka mu būmi bwetu?
17 Buyampe i bulumbuluke, ngikadilo yanwa, nansha mwikadila wa muntu muyampe. Leza i muyampe kupita bonsololo. (Mitōto 25:8; Zekadia 9:17) Yesu i mulumbuluke kadi udi na ngikadilo yanwa. Ino kāitabijepo kutelwa bu “Muyampe” pamo bwa kitenta kitatyi kyobamutelele bu “Mufundiji muyampe.” (Mako 10:17, 18) Mwanda mobimwekela wādi ujingulwile amba enka Leza ye mutabuke buyampe byamwiko’tu.
18 Bukomo botudi nabo bwa kulonga biyampe bukalakanibwanga na bubi botupyene. (Loma 5:12) Inoko, tukokeja kulombola ino ngikadilo shi tulomba Leza etufundije “ñeni ya kutyiba-mambo kulumbuluke.” (Mitōto 119:66) Polo wālombwele banabetu betabije ba mu Loma amba: “Banwe banabetu, ami mwine ndyukile tu’mba mwi balumbuluke, muyukile mwa kulongela.” (Loma 15:14, MB) Mutadi Mwine Kidishitu ulombwa ekale “wakusanswa bilumbuluke.” (Tetusa 1:7, 8) Shi tuludikwa na mushipiditu wa Leza, nabya tukayukana bu bantu bayampe, ne Yehova ‘uketuvuluka pa biyampe byotulonga.’—Nehemia 5:19; 13:31.
“Kwitabija kwa Binebine”
19. Shintulula lwitabijo mungya Bahebelu 11:1.
19 Lwitabijo—lubadilwa nalo mu kipa kya mushipiditu—“i kusumininwa kwa mu bintu bikulupilwe kadi, ne kuyūkidila kwa mu byobya bintu byampikwa kumweka.” (Bahebelu 11:1) Ekale tudi na lwitabijo, nabya tukasumininwa amba bine Yehova ukafikidija milao yandi. Kuyukidija bintu byampikwa kumweka nako kufwaninwe kwikala na kyalwilo kikomo mwanda mo mushintulwilwa lwitabijo. Kimfwa, bintu bipangibwe bitulombola amba kudi Umpangi wibipangile. Luno lo lwitabijo lotukalombola shi tunangila mu mushipiditu.
20. Lelo “bubi bwitūminine” i bubi’ka, ne tukepuka buno bubi ne mingilo ya ngitu mine muswelo’ka?
20 Kubulwa lwitabijo i “bubi bwitūminine.” (Bahebelu 12:1) Tufwaninwe kwiubija mu mushipiditu wa Leza shi tukimba kwepuka mingilo ya ngitu, kusanswa bya bupeta, ne lufundijo lwa bubela, bintu byona lwitabijo. (Kolose 2:8; 1 Temote 6:9, 10; 2 Temote 4:3-5) Mushipiditu wa Leza uletanga lwitabijo mu bengidi ba Yehova dyalelo ludi na lolwa lwādi na batumoni ba kumeso kwa Bwine Kidishitu ne bakwabo batelelwe mu Bible. (Bahebelu 11:2-40) Kadi kwetu “kwitabija kwa binebine” kwampikwa buzazangi kukakomeja lwitabijo lwa bakwetu.—1 Temote 1:5; Bahebelu 13:7.
Ikala Utalala ne Kwīfula
21, 22. Le kutalala i bika, ne mwanda waka tufwaninwe kwikala na butalale?
21 Kutalala i kwikala mutūkanye mu mwikadilo ne mu bilongwa. Kutalala kubadilwa mu ngikadilo ya Leza. Tuyukile kino mwanda Yesu wāiwile Shandi mu muswelo mubwaninine, wādi kijiba ntalela. (Mateo 11:28-30, BB; Yoano 1:18; 5:19) Penepa i bika bisakibwa ku batwe bengidi ba Leza?
22 Batwe Bene Kidishitu tulombwa kwikala na “mutyima wa kupwana ne bantu bonso.” (Tetusa 3:2) Tufwaninwe kulombola butalale mu mwingilo wetu. Boba batame ku mushipiditu bafwaninwe kudingila Mwine Kidishitu ulubile mwanda wa kumwaluja ino “ne mityima [yabo] mituukanye.” (Ngalatea 6:1, MB) Batwe bonso tukatuntwila ku bumo ne ndoe ya Bwine Kidishitu shi tudi ‘na kwityepeja ne butalale.’ (Efisesa 4:1-3) Ino tukalombola ino ngikadila ya kutalala shi enka tunangila mu mushipiditu ne shi twifula.
23, 24. Kwīfula i bika, ne kuketukwasha muswelo’ka?
23 Kwīfula kuketukwasha twikale kwishisa mu milangwe, mu binenwa, ne mu bilongwa byetu. Yehova wāikele “kwitūkija” aye mwine ku meso a Bene Babiloni bāile kusala Yelusalema. (Isaya 42:14) Mwanandi nandi ‘wētushidile kitompekejo’ kya kwīfula mu masusu. Mutumibwa Petelo wāpele banababo Bene Kidishitu madingi amba “ku kuyukidija nako munyingishe kubwanya’ko kwifula.”—1 Petelo 2:21-23; 2 Petelo 1:5-8, MB.
24 Bakulumpe Bene Kidishitu nabo balombwa kwīfula. (Tetusa 1:7, 8) Bine, bonso baludikwa na mushipiditu sandu bafwaninwe kwīfula, ne shi balonge uno muswelo bakepuka busekese, mutonko, ne kintu kyo-kyonso kibwanya kwibasansanya na Yehova. Shi tuleke mushipiditu wa Leza upa motudi kwīfula, nabya tukapwana na bakwetu mwanda tukekala na muneneno ne mwiendelejo wa bwine Leza.
Nanga Nyeke mu Mushipiditu
25, 26. Le kunangila mu mushipiditu kudi na madyese’ka dyalelo ne mu mafuku āya kumeso?
25 Wivwane tunangile nyeke mu mushipiditu, nankyo tukekala basapudi ba Bulopwe bapyasakane. (Bilongwa 18:24-26) Tukekala balunda bayampe, kutabukidila bene Leza bakaloelelwa kupwana netu. Kadi byotuludikwa na mushipiditu sandu, tukekala nsulo ya kukankamika ku mushipiditu batōtyi botutōta nabo Yehova. (Fidipai 2:1-4) Mwene kino kyo kyabila Bene Kidishitu bonso?
26 Mu ino ntanda ya Satana, kunangila mu mushipiditu ke mwandapo munekene. (1 Yoano 5:19) Inoko, midiyo ne midiyo ya bantu banangilanga’mo. Shi tukulupile mudi Yehova na mutyima wetu onso, nankyo tukaloelelwa mu būmi bwa dyalelo, ne tukendelela nyeke kunangila mu mashinda moloke a Yewa upāna mushipiditu sandu.—Mitōto 128:1; Nkindi 3:5, 6.
Ukalondolola’po Namani?
• ‘Kunanga mu mushipiditu’ kutala namani kipwano kyotupwene na Leza ne Mwanandi?
• Kipa kya mushipiditu sandu kidi na ngikadilo’ka?
• Tukalombola kipa kya mushipiditu wa Leza mu miswelo’ka imoimo?
• Kunanga mu mushipiditu kutala namani būmi bwetu bwa dyalelo ne bwa kumeso?
[Bipangujo bya Kifundwa]
[Kifwatulo pa paje 13]
Ikala na kanye mu binenwa ne mu bilongwa