Londalonda Kitungo kya Leza Dyalelo

“[Kidishitu] wafwidile bonso’mba, boba badi ne būmi kebakeikadilangapo na būmi abo bene, mhm.”—2 KODINDA 5:15.

1. Sekununa myanda yemwenine mishonele umo mu mwingilo wandi.

 MISHONELE utelwa bu Aaron * uvuluka’mba: “Ku myotoka ya basivile, wetu o wādi mubajinji kutwela mu kibundi kimo kitolwele kulampe kya mu Afrika kupwa kwa divita dya bana na bana ba ntanda imo. Kekwadipo muswelo wa kwisambulwila mawi na kipwilo kityetye kya mu kine kibundi’kya, motwadi tufwaninwe kukatūdila banabetu bya bukwashi. Ne kadi twaselele bidibwa, bivwalwa, ne bitabo, pamo ne bande wa video umo unena amba Les Témoins de Jéhovah: un nom, une organisation. * Bantu basangedile musapu baile bangi kutala’ye mu ‘njibo ya sinema’ ya mu kibundi’kya—kyadi kitanda kimo kikatampe mwadi manyeto ne televijo—leka, twalombola’ye misunsa ibidi mituntulu! Misunsa yonso yotwalombwele’ye, kwadi kulupuka bifundwa bivule bya Bible. Bine, kwalupukile bipa biyampe.”

2. (a) Mwanda waka Bene Kidishitu i batyipe lukwembo lwa kwingidija būmi bwabo mu mwingilo wa Leza? (b) I bipangujo’ka byotusa kubandaula?

² Mwanda waka Aaron ne balunda nandi beelele mu mwingilo mukomo pamo bwa uno? Mwanda i bapāne būmi bwabo kudi Leza ne basenswe kwingidija’bo kukwatañana na kitungo kyandi pa kufwija’ko Leza pangala pa kikūlwa kya Yesu Kidishitu. Bene Kidishitu bonso bepāne i batyipe lukwembo, pamo bwa Aaron ne balunda nandi, amba “kebakeikadilangapo na būmi abo bene, mhm,” ino bakalonga bukomo bwabo bonso “pa mwanda wa myanda-miyampe.” (2 Kodinda 5:15; 1 Kodinda 9:23) Bayukile amba pakafika mfulo ya ino ngikadilo ya bintu, lupeto lonso ne bitenta mu ino ntanda kebikekalapo kadi na bulēme. O mwanda pobadi na būmi ne bukomo, basakanga kwingidija’byo mungya kitungo kya Leza. (Musapudi 12:1) Lelo tubwanya kwingidija’byo namani? Ne i kwepi kotukatana bukankamane ne bukomo bwitusakilwa pa kwingidija’byo? Ne i mikenga’ka ya mwingilo yotupelwe?

Kutabula Matabula a Kamweno Kitatyi ne Kitatyi

3. I matabula’ka a kyalwilo afwaninwe kutabulwa pa kulonga kiswa-mutyima kya Leza?

³ Ku Bene Kidishitu ba bine, kulonga kiswa-mutyima kya Leza i kiselwa kya mu būmi bonso. Kushilulanga na matabula a kyalwilo kimfwa kwilembeja ku Masomo a Mwingilo wa Kiteokratike, kutanga Bible difuku ne difuku, kwenda mu mwingilo wa busapudi, ne kwendelela kufika ne ku lubatyijo. Potwendelela kumeso, tuvulukanga binenwa byānene mutumibwa Polo amba: “Pyasakena ku bino bintu bino’bi; wielelele monka; amba bantu bonso bamone mōendela utamina.” (1 Temote 4:15) Ketwendelelangapo kumeso pa mwanda wa ntumbo yetu, ino i kilomboji kya kusumininwa kotusumininwe kulonga kiswa-mutyima pampikwa kwikaka. Kulonga kino kulombola’mba tulekanga Leza aludike matabula etu mu byonso byotulonga mu būmi, ne wituludikanga biyampe kutabuka motukokeja kwiludikila batwe bene.—Mitōto 32:8.

4. I muswelo’ka otubwanya kupangila moyo kulampe?

⁴ Inoko kutatana nansha kwisakila kupitepite kubwanya kona kwendelela kwetu mu mwingilo wa Leza. (Musapudi 11:4) Nanshi, kumeso kwa kutana nsangaji ya bine mu kwingidila  Leza ne bakwetu, tufwaninwe bidi kupangila moyo wetu kulampe. Kimfwa, Erik wadi ulanga kukengidila mu kipwilo kya ludimi lungi. Ino, wadi ulangalanga’mba: ‘Lelo bikañendekela’tu? Lelo nkasangela banabetu? Le nabo bakansangela?’ Usekununa’mba: “Nafudile ku kujingulula’mba mfwaninwe kuta banabetu mutyima kutabuka’ko kwita’o ami mwine. Nakwete butyibi bwa kuleka kulangalanga pa uno mwanda, nashilula kwielelela’nka mu byonadi mfwaninwe kulonga. Nalombele Leza ankwashe, ne kwenda naendelela’mo. Pano nsangelanga bikata mwingilo wami kwine’kwa.” (Loma 4:20) Bine, ponso potwendelela kwingidila Leza ne bakwetu kwampikwa kwikaka, tukamwena’mo nsangaji ne kuloelelwa.

5. Mwanda waka tufwaninwe kutandika bintu na katentekeji pa kulondalonda kitungo kya Leza? Leta kimfwa.

⁵ Kulondalonda kitungo kya Leza kulomba kadi ne kutandika bintu na katentekeji. I biyampe tuleke kwapula mapu mangimangi etumuna bupika mu ino ngikadilo ya bintu ne etubudija bwanapabo bwa kwingidila Leza. Bible wituvuluja’mba: “Mwapudi i mupika wa mwapulwa.” (Nkindi 22:7) Kukulupila mudi Yehova ne kutūla bintu bya ku mushipiditu pa kifuko kibajinji kwitukwasha tulame ino myanda mu ñeni. Kimfwa, Guoming ne banababo bana-bakaji babidi, mu kifuko kyobashikete ne inabo, lupoto lwa kufutyila njibo i lukande bibi ne i bikomo kumona kaji kayampe. Bengidijanga lupeto lwabo na ñeni ne kwikwasha na kamukōlo abo bonso, mwa kumwena twa kwibakwasha nansha shi bamo kebadipo na kaji. Guoming unena’mba: “Bitatyi bimo, ketwadipo tufutwa batwe bonso. Nansha nabya, twendelelanga kwingila mwingilo wa bu pania ne kulela mama. Bine, tufwija’ko Mama mwanda kadipo usaka tuleke bintu bya ku mushipiditu mwanda wa ku mukimbila bya ku mukwasha mu būmi.”—2 Kodinda 12:14; Bahebelu 13:5.

6. I kimfwa’ka kilombola muswelo otubwanya kukwatañanya būmi bwetu na kitungo kya Leza?

⁶ Shi wi mwielelele mu kukimba bintu bya ku ngitu—lupeto nansha bikwabokwabo—pa kutangidija kitungo kya Leza bikulomba kushinta kukatampe. Pavule kuno kushinta kekwiyangapo na mu kukopa kwa diso, ne shi ubakomenwa musunsa umbajinji, kokatuyuka amba nakankalwa. Tala kimfwa kya Koichi, wadi upityijanga kitatyi kivule mu kwipwija mukose. Koichi wefundile Bible ukidi’tu nsongwalume, ino wadi umuninwe na makayo a video mu bula bwa myaka mivule. Difuku dimo Koichi weipangula’mba: ‘I bika’le bine byononga pano? Nekidi enka na myaka 30 ne musubu, ne nkidipo ne kitungo kine kyonetungile mu būmi!’ Koichi washilula monka kwifunda Bible ne kwitabija bukwashi bwa kipwilo. Nansha byaadi ushinta bityebitye, ino kalekele’byopo. Mfulo mfulō, na kulombela na kininga ne na bukwashi bwa buswe bwa bakwabo, wenyongolola mu bupika bwa makayo aadi uswele. (Luka 11:9) Panenwa pano, Koichi wingilanga na nsangaji bu mwingidi wa mingilo.

Wifunde Kwikala na Bujalale

7. Mwanda waka tufwaninwe kwikala na ndiñamano potwingidila Leza?

⁷ Kulondalonda kitungo kya Leza kulomba tulonge bukomo na muya wetu onso. Ketufwaninwepo kulondalonda’kyo na kinkosela nansha na mulēle. (Bahebelu 6:11, 12) Nansha namino, Yehova kasakilepo twikale kupungila—ku ngitu, mu ñeni, nansha mu malango. Kwitabija na kwityepeja amba ketubwanyapo kuvuija mwingilo wa Leza na bukomo bwa batwe bene kumutumbijanga ntumbo ne kadi kulombola amba tudi na bujalale. (1 Petelo 4:11) Yehova i mwitulaye kwitupa bukomo botusakilwa pa kulonga kiswa-mutyima kyandi, ino ketufwaninwepo kutabuka mikalo yetu, na kukimba kulonga bintu byaketuningilepo. (2 Kodinda 4:7) Shi tusaka kwingidila Leza kwampikwa kupungila, tufwaninwe kwingidija bukomo bwetu na ndiñamano.

8. I bika byafikile nsongwakaji umo Mwine Kidishitu wadi koku wingidila Yehova, koku nako wingila bya ntanda, ne i kushinta’ka kwaashintyile?

⁸ Kimfwa, kaka Ji Hye wikalanga kutunduka kwa Azia, wingilanga bu pania pano ke myaka ibidi koku aye mutyinibwe ne kaji. Uno kaka ushintulula’mba: “Noñanga bukomo bwami bonso, koku ñingidila Yehova, koku nako ñingila  bya ntanda, inoko bufuku ndalanga enka mansaa atano kete. Nadi nkikidipo na bukomo pangala pa bubinebine, ne kusangela bintu bya ku mushipiditu kwine kwadi ke kwenda kutyepa.” Pa kusaka’mba Ji Hye engidile Yehova ‘ne mutyima wandi onso, ne muya wandi onso, ne ñeni yandi yonso, ne bukomo bwandi bonso,’ wakimbile kaji kangi kengilwa mu kitatyi kityetye. (Mako 12:30) Aye mwine unena’mba: “Nansha byonadi ntyinibwa mbavu na ba mu kisaka amba ñendelele kukimba lupeto, ino nalongele buninge bwa kutangidija kitungo kya Leza kumeso. Monanga lupeto lufwaninwe lupota bintu bya mvubu, kimfwa bivwalwa bimweka ku bantu. Ne kadi, pano neivwananga biyampe, mwanda ke ndalanga tulo bukū! Nsangelanga mwingilo wami, kadi pano ne mukomo ku mushipiditu. Mwanda pano nemusonsoloke ku byongo ne bilabi bya ino ntanda.”—Musapudi 4:6; Mateo 6:24, 28-30.

9. Bukomo botulonga mu mwingilo wa budimi buteñanga bantu namani?

⁹ Ke bonsopo babwanya kwingidila Leza bu basapudi ba kitatyi kyonso. Shi wikondanga na bununu, na kusosomwa mu ngitu, nansha na bikoleja bikwabo, yuka’mba Yehova usangelanga bininge kikōkeji kyobe ne mingilo yonso yomwingidila na mutyima umo. (Luka 21:2, 3) Pa kino, muntu nansha umo umbukata mwetu kafwaninwepo kupēlula byobya byotulonga, nansha shi i bityetye. Kimfwa, tubakasapula ku mobo kampanda ino kwampikwa kutana’ko muntu nansha umo usangela musapu wetu. Pa kupwa kutaluka’ko, bene njibo babwanya padi kwisambila pa bupempudi bwetu mu mansaa nansha mafuku kampanda, nansha shi kekwadipo witutambula! Ketulañangapo amba bonso bevwana myanda miyampe banenwe’nka kwitabija’yo, shako bamo baketabija. (Mateo 13:19-23) Bakwabo babwanya kwitabija ke mungya kala kukwatañana na kushinta kwa ngikadilo ya ntanda nansha ya būmi bwabo. Eyo, potwingila mwingilo mungya bukomo bwetu, batwe twingidilanga Leza. “Tudi bakwingila mīngilo pamo na Leza.”—1 Kodinda 3:9.

10. Lelo i mikenga’ka ishitwidilwe bonso mu kipwilo?

¹⁰ Kadi, batwe bonso tubwanya kukwasha ba mu kisaka kyetu ne batutu ne bakaka ba ku mushipiditu. (Ngalatea 6:10) Kimfwa kyetu kiyampe kibwanya kwikala na lupusa lukatampe pa bakwetu ne kuvulukwa nyeke. (Musapudi 11:1, 6) Shi bakulumpe ne bengidi ba mingilo bengila mingilo yabo na kusumininwa,  bakakwasha ku kulama ngikadilo miyampe ne bukomo bwa kipwilo, ne mwingilo wa Bwine Kidishitu ukenda utanta. Tukulupile amba shi ‘tuvudilwe pakatampe pene, mafuku onso nyeke, monka mu mīngilo ya Mfumwetu,’ nabya ‘kuputumina kwa mu mingilo yetu kekudipo kwa bitubitupu.’—1 Kodinda 15:58.

Londalonda Kitungo kya Leza bu Mwingilo Obe wa Nyeke

11. Lelo i mikenga’ka mikwabo yotudi nayo kutentekela pa wa kwingila na kipwilo kyetu?

¹¹ Byotudi Bene Kidishitu, netu tuswele būmi, kadi tuswele kutumbija Leza mu byonso byotulonga. (1 Kodinda 10:31) Tukeselwa madyese mavule mu uno mwingilo kitatyi kyotusapula na kikōkeji myanda miyampe ya Bulopwe ne kufundija bakwetu balaminine byonso byalaile Yesu. (Mateo 24:14; 28:19, 20) Kutalula’mo madyese a kwingidila pamo na kyetu kipwilo, tudi kadi ne mikenga mikwabo ya kwingila kokwa kusakilwa basapudi bavule, shi mu mwaba mukwabo, ludimi lungi, nansha mu ntanda mikwabo. Bakulumpe ne bengidi ba mingilo kebasongele bakokeja kwitwa ku Masomo a Bufundiji bwa mingilo, kupwa bajoka kukengila kokwa kusakilwa Bene Kidishitu bapye, mwabo nansha mu ntanda bene. Balume ne bakaji badi mu mwingilo wa kitatyi kyonso bakokeja kubwanya bisakibwa bya kukafunda ku masomo a Ngileade a bamishonele ne kukengidila mu matanda a bweni. Ne kukyendelela kusakibwa bengidi ba kwituma ba kwingila mingilo mishileshile ku Betele ne ya lūbako, ne kulongolola bifuko ya kupwidila ne mabilo a misambo.

12, 13. (a) I muswelo’ka okatonga mingilo yokokeja kwingila? (b) Leta kimfwa kilombola’mba ñeni imwena muntu mu mwingilo kampanda ibwanya kumukwasha mu mingilo mikwabo.

¹² Lelo i mingilo ya muswelo’ka yokokeja kwingila? Byodi mwingidi wa Yehova mwipāne, endelela nyeke kulonda bwendeji bwandi ne bwa bulongolodi bwandi. “Mushipiditu” wandi muyampe ukakukwasha kukwata butyibi boloke. (Nehemia 9:20) Divule mwingilo ubwanya kutwala muntu ku mwingilo mukwabo, kadi ñeni ne bwino byamwena’mo bikokeja kwikala na kamweno ku mwingilo mukwabo wakengila mwenda mafuku.

¹³ Kimfwa, Dennis ne mukajandi Jenny, bengilanga kitatyi ne kitatyi mu mingilo ya lūbako lwa Mobo a Bulopwe. Papwile kupita kimpumpu kitelwa bu Katrina kunshi kwa États-Unis, bakakweshe bu bengidi ba kwituma. Dennis ulombola’mba: “Kwingidija bwino botwatambwile mu lūbako lwa Mobo a Bulopwe mwanda wa kukwasha banabetu kwetuletele nsangaji mikatampe. Kufwija’ko kwadi kwitufwija boba botwadi tukwasha i kwitutenge binebine. Bisumpi bikwabo bivule bya bukwashi kebyabwenyepo  uno mwingilo wa kūbakulula mobo. Ino Batumoni ba Yehova abo papo badi kala ke bapwe kulongolola nansha kubakulula mobo 5 300 ne musubu ne Mobo a Bulopwe mavule. Bantu bamwene bino, ne pano i basangele musapu wetu.”

14. Lelo i bika byokokeja kulonga shi usaka kwingila mwingilo wa kitatyi kyonso?

¹⁴ Lelo ubulwe’po kulondalonda kitungo kya Leza na kutonga mwingilo wa kitatyi kyonso bu mwingilo obe wa nyeke? Shi ulonge namino, yuka’mba ukatambula madyese mavule. Shi ngikadilo yodi’mo keikupepo muswelo wa kwingila’o, padi bikulomba kushinta bintu kampanda. Lombela pamo na mwālombelele Nehemia wādi usaka kukengila mwingilo wa mvubu, amba: “Nakwisashila abe Mfumwami, . . . umweshe biyampe mwingidi obe.” (Nehemia 1:11) Kupwa, longela mungya milombelo yobe na kukulupila yewa “wivwananga kulombela.” (Mitōto 65:2) Shi usaka Yehova akwesele mu bukomo bolonga na kumwingidila ne pa mfulo, ufwaninwe kulonga buninge. Shi ubakwata butyibi bwa kwingila mwingilo wa kitatyi kyonso, sumininwa nabo. Mwenda mafuku, ñeni yobe ikenda ivula, ne nsangaji yobe nayo monka na monka.

Būmi bwa Nsangaji Binebine

15. (a) I bika byotumwena mu kwipangula ne mu kutanga myanda ya boba ke bengidile Leza kitatyi kilampe? (b) Tela’ko nsekununi imo ya mu būmi yomona bu ikankamika.

¹⁵ Lelo i bipa’ka byobwanya kutengela mu kulondalonda kitungo kya Leza? Ipangula boba bengidila Yehova mwingilo wa kitatyi kyonso, nakampata boba ke bapityije myaka mu uno mwingilo. Bine, ukamona’mba badi na būmi bwa nsangaji! (Nkindi 10:22) Bakakulombola’mba Yehova kabulwangapo kwibakwasha nansha ke mu makambakano mwine, amba bamone bisakibwa byabo ne bikwabo’po. (Fidipai 4:11-13) Tamba mu 1955 kutūla mu 1961, Kiteba kya Mulami kyalupwile nsekununi ya būmi bwa bantu ba kikōkeji mu mutwe wa mwanda unena’mba: “Nondalondanga Kitungo Kyami mu Būmi.” Tamba penepa, ke kulupulwe nsekununi mikwabo ya mu būmi tununu ne tununu. Nsekununi imo ne imo ilombola mushipiditu wa bupyasakane ne nsangaji bituvuluja byobya binenenwe mu mukanda wa Bilongwa bya Batumibwa. Bine, kutanga ino nsekununi ikankamika kuketutonona netu tunene amba, ‘Nami mfwaninwe kwikala na būmi bwa uno muswelo!’

16. Lelo i bika bikadijanga būmi bwa Bwine Kidishitu na kitungo ne nsangaji?

¹⁶ Aaron, otwatelanga ku ngalwilo, uvuluka’mba: “Mu Afrika, namwene bankasampe bavule baselakana koku ne koku kobakimba kitungo mu būmi. Ino i kutupu nansha umo kadi mwikitane. Inoko batwe papo tulondalonda kitungo kya Leza na kusambakanya myanda miyampe ya Bulopwe, kadi twikonda na būmi abo’ko budi na kitungo. Twemwenine bine amba dyese dya kupana ditabukile dya kupebwa.”—Bilongwa 20:35.

17. Mwanda waka tufwaninwe kulondalonda kitungo kya Leza tamba pano?

¹⁷ Lelo abe nobe? Lelo ulondalondanga kitungo’ka? Shi kudipo na kitungo kya ku mushipiditu kipotoloke, bikwabo bikakuyudila. Lelo i kika kyokajimijija būmi bobe pangala pa byobya bitubeleñenya ino ngikadilo ya bintu ya Satana? Kekukidipo kula, pasa kuposoka “kyamalwa kibūke,” bupeta ne bitenta kebisapo kwikala na mvubu. Kya mvubu i kupwana na Yehova. Bine, ketukabulwepo kusangala pa kuyuka amba twaingidile Leza ne bakwetu ne kulondalonda kitungo kya Leza mu būmi bwetu ne pa mfulo!—Mateo 24:21; Kusokwelwa 7:14, 15.

[Kunshi kwa dyani]

Le Ukokeja Kushintulula?

• Yehova umwene namani mwingilo otumwingidila?

• Le kulonda byotwitungīle ne bujalale kwitukwasha namani twingidile Leza ne bakwetu?

• Lelo i mikenga’ka itushitwidilwe?

• I muswelo’ka otubwanya kulondalonda bine būmi budi na kitungo tamba pano?

[Bipangujo bya Kifundwa]

[Kifwatulo pa paje 25]

I biyampe twikale na bujalale potwingidila Yehova na muya wetu onso

[Kifwatulo pa paje 26]

Mwingilo ukola udi mu miswelo mivule mine