I Bikomo Kwityepeja

BANTU bavule bamonanga amba mu ntanda ya dyalelo i bibi kwityepeja. Bantu basomanya bakwabo ne bamweka bu banekenye i boba batādila bakwabo, ba kibengo, ne bakimba kulonga enka byobasaka. Bantu bavule babilanga enka būmi budi na bampeta ne bantu ba ntumbo, ke bwa bantu betyepeje nansha batūkanye, ehe. Boba badi na būmi buyampe beanyanga amba kyobekadile biyampe i kwipāna kobepēne bikatampe mu mingilo. Pa kyaba kya kwityepeja, betatulanga pangala pa kunekenya kobanekenye.

Mukimbi umo mwine Kanada wesambile pa “kuvula kwa bantu ‘belangila enka abo bene’” mu yabo ntanda. Bakwabo balanga amba tudi mu ntanda ya kwisangaja pampikwa kusela biselwa ne kumona amba bantu bata mutyima enka ku bintu byabo pano bendanga bavudila’ko. Mu ntanda ya uno muswelo, bimweka amba kwityepeja ke kuyampepo.

Na bubine, bantu batyetye kete bo babwanya kupela uno mulangwe wa amba i biyampe bakwabo betyepeje, mwanda bipēla kushikata na bantu ba uno muswelo. Inoko mu ino yetu ntanda ya kwitaka’i, bamo badi na moyo wa kwityepeja, kutyina’mba bakwabo bakebamwena.

Bible, Kinenwa kya Leza kyālaile amba mu bitatyi byotudi’mo bino bantu bakekala “ba bikandangobo, ne bakapuni ka kwitatula.” (2 Temote 3:1, 2) Mwene nobe witabije amba buno bupolofeto i bufikidile? Ulanga kwityepeja kudi na mvubu? Nansha umona nobe amba muntu mwityepeje umonwanga bu muzoze, upēla kudilwa bintu pa mutwe?

Pa kino, Bible witupa bubinga buyampe bwa kumwena mvubu ya kwityepeja ne kutamija’yo. Kadi witupa mumweno mujalale ne muyampe udi mu ino ngikadila, ne kulombola amba kwityepeja kwa bine i kiyukeno kya bukomo, ke kya buzozepo.

[Kifwatulo pa paje 3]

I muswelo’ka otufwaninwe kumona bilongwa byetu?