Le Uboyanga Mikenga ya Kusapula Nkulupilo Yobe?

“LE BUBINEBINE bwinebwine budi’ko?” Kino kyo kishinte kyobapele bana ba masomo ba mu Polonye amba batandabule na kulemba. Madingi a pa kulemba kino kishinte adi anena’mba: “Ketusakilwapo kuyuka bubinebine bwinebwine. Mwanda i kutupu usaka’bo. Ne bubinebine bwinebwine i kutupu’bo.” Agata, wa myaka 15 ufundanga ku sekondele kadi Kamoni wa Yehova, watyibile mbila ya kuboya uno mukenga asapwile bakwabo nkulupilo ya mutōtelo wandi.

Kumeso kwa kwikwata’ko na kusoneka, Agata walombele Yehova amuludike, kupwa kakimbe myanda yonso yayukile pa kino kishinte. Watana myanda ya uno muswelo mu Kiteba kya Mulami kya difuku 1 Kweji 7, 1995. Washilula na kipangujo kyāipangwile Pontyusa Pilato kudi Yesu amba: “Lelo kyakyo kyabinebine nakyo i kika?” (Yoano 18:38) Agata wasonekele amba, kino kipangujo kyadi kya kapuni, pamo bwa aye unena’mba: ‘Bubinebine? I kintu’ka? Kebwikalanga’kopo ne kwikala kwine!’ Agata wasonekele kadi amba: “Kipangujo kya Pilato kimvulujanga madingi aletelwe pa kulemba kino kishinte.”

Kupwa wesambila pa mulangwe wa muntu aye mwine—amba kimona umo bu bubinebine mukwabo kwikimona bu bubinebine mpika, kadi amba pakwabo bonso babidi bakokeja kulanga “bya bine.” Penepa Agata waipangula amba, “I ani umbukata mwetu ukasaka kukanda mu amviyo shi uyukile amba bijila biludika maamviyo ke bya binebinepo?” Ebiya wakokela milangwe ku Bible amba: “Kukulupila Kinenwa kya Leza kyo kyalwilo kya kuyuka myanda ya binebine.” Ku mfulo walombola kikulupiji kyandi amba boba bakimba bubinebine bwinebwine bine kebakabulwepo kwibusokola.

Agata wapelwe mpalo ya dipolome dya kutendelwa ne dyese dya kutangila kalasa katuntulu bilembwa byandi. Balunda nandi ba ku masomo bamo baitabije kwifunda nandi Bible. Agata ufwija’ko pangala pa uno mukenga wa kusapula nkulupilo yandi na bakwabo. Bine, shi nobe ute mutyima ku mikenga ya kusapula lwitabijo lobe kukabulwepo kumwena’mo. Lelo i mikenga’ka yokaboya?