Tusakidilei Bintu “Bikomo Bīne bya Leza”

“Aye Mushipiditu usakidilanga bintu byonsololo, ne bikomo bīne bya Leza kumo.”—1 KODINDA 2:10.

1. I bubinebine’ka bumobumo bwa mu Bible busangajanga befundi bapya ba Bible?

 BATWE bavule bene mu kipwilo kya Bwine Kidishitu tukokeja kuvuluka nsangaji yotwāivwene potwāyukile bubinebine. Twājingulwile mwanda waka dijina dya Yehova i dya mvubu, kine kilekele’ko Leza masusu, kyendela bantu bamo mūlu, ne byobya bitengele bantu ba kikōkeji kumeso’ku. Padi twadi tubandaula Bible pa kala ino kumona bino bintu mpika, mwanda byādi bifyame monka mobifyamine ku meso a bavule bene. Twadi pamo bwa muntu utala mu mema akuka adi na bya bulēme panshi. Na meso bitupu uno muntu kabwanyapo kumona bintu bivule bilumbuluke munshi mwa mema. Ino shi avwale makalashi nansha akande mu ka bwato kadi na dikalashi mu kyalo ukasangela dibajinji kumona mabwe a lubi akelema, mishipa, ne twishi twa pa lui ne bipangwa bikwabo bya kutendelwa. Mo monka netu pobashilwile kwitwivwanija Bisonekwa, twadi’tu na buyuki bwa kūlukūlu bwa bintu “bikomo bīne bya Leza.”—1 Kodinda 2:8-10.

2. Mwanda waka nsangaji ya kwifunda Kinenwa kya Leza i ya endaenda?

² Le tufwaninwe kuloedilwa enka buyuki bwa kūlukūlu bwa bubinebine bwa mu Bible? Kishima bintu “bikomo bīne bya Leza” kifunkila pa kwivwanija tunangu twa Leza tusokwedilwe Bene Kidishitu na mushipiditu sandu, ino bantu bakwabo kwikala nato mpika. (1 Kodinda 2:7) Bine, mu tunangu twa Leza kemudipo mfulo ya kwimanina’po mu bubandaudi bwitupa kuloelelwa! Shako ketukayukapo byonsololo bitala tunangu  twa mashinda a Leza. Nsangaji yotwadi nayo pa kuyuka bubinebine bwa bufundiji bwa kyalwilo bwa mu Bible ikendelela nyeke motudi shi twendelela na kusakidila bintu “bikomo bīne bya Leza.”

3. Mwanda waka tusakilwa kwivwanija ne pa mfulo buluji bwa nkulupilo yetu?

³ Mwanda waka tusakilwa kwivwanija bintu “bikomo”? Kwivwanija byotukulupile ne kine kyotukulupidile’byo—bubinga bwine bwa nkulupilo yetu—kukomejanga lwitabijo ne kikulupiji kyetu. Bisonekwa bitulomba twingidije “mutyima” wetu wa kulanga amba “[tu]tompe kiswa-mutyima wa Leza, ne mwikadile bulumbuluke, kuloelelwa, ne bu-bwaninine monka.” (Loma 12:1, 2) Kwivwanija mwanda waka Yehova witulomba twikale na mwiendelejo kampanda kukomejanga mutyima wetu wa kumukōkela. Nanshi, kuyuka bintu “bikomo bīne” kubwanya kwitupa buninge bwa kukomena matompo ne bilongwa bya kujilula, kadi kuketutonona twikale “kupyasakena mu mīngilo milumbuluke.”—Tetusa 2:14.

4. Lelo kifundwa kya Bible kilomba kulonga bika ne bika?

⁴ Pa kwivwanija bintu bikomo i biyampe kwifunda. Inoko kwifunda i kwishile na kutanga myanda kūlukūlu bitupu. Mwanda kwifunda kulomba kubandaula myanda ne kujingulula moikwatañenine na byobya byotuyukile kala. (2 Temote 1:13) Kadi kulomba ne kumona bubinga bwa bine byanenwa. Kwifunda Bible kulomba kadi ne kulanguluka pa muswelo wa kwingidija byotwifunda mwa kukwatyila butyibi buyampe ne mwa kukwashisha bakwetu. Kadi mu kifundwa kyetu mubadilwa ne “myanda yonso ītamba mu kyakanwa kya Mwine Leza,” mwanda “Kisonekwa kyonso i kya ku bukomo bwa mushipiditu wa Leza kadi kya kamweno.” (2 Temote 3:16, 17, New World Translation; Mateo 4:4) Kwifunda Bible ke mwingilopo munekene! Inoko kusangajanga, kadi kwivwanija bintu “bikomo bīne bya Leza” ke kukomenepo.

Yehova Ukwashanga Betyepeje Bamone Kwivwanija

5. Le i ani ukokeja kwivwanija bintu “bikomo bīne bya Leza”?

⁵ Kokilanga amba kubwanyapo kwivwanija bintu “bikomo bīne bya Leza” nansha shi kwadipo na ñeni ku masomo ne kwibidilepo kwifunda. Pādi Yesu wingila mwingilo wandi pano panshi, Yehova kāsokwedilepo bantu ba ñeni ne badyumuke mpango yandi, ino wāsokwedile’yo bakubulwa kufundijibwa, bantu bampikwa ñeni ino abo betyepeje ne betabija kufundijibwa na bengidi ba Leza. Bādi pamo bwa twana twa lukeke pa kudingakanibwa na boba bādi bafunde masomo a peulu. (Mateo 11:25; Bilongwa 4:13) Mutumibwa Polo wāsonekēle banababo mu lwitabijo pangala pa “byobya byebalongolwedile Leza, boba bakumusanswa” amba: “Leza wetusokwela’byo bātwe konka kudi mushipiditu; mwanda aye mushipiditu usakidilanga bintu byonsololo, ne bikomo bīne bya Leza kumo.”—1 Kodinda 2:9, 10.

6. Lelo 1 Kodinda 2:10 ushintulula namani?

⁶ Mushipiditu wa Leza usakidilanga namani “bintu byonsololo, ne bikomo bīne bya Leza kumo”? Yehova wingidijanga mushipiditu sandu wandi pa kuludika bulongolodi bwandi amba bupe bantu bandi bekutyile umbumo kwivwanija kwa Bible, pa kyaba kya kupa Mwine Kidishitu umo ne umo kusokwelwa kwandi bwa pala. (Bilongwa 20:28; Efisesa 4:3-6) Kujokoloka ntanda, bipwilo byonso  bidi na mpangiko ya muswelo umo ya kwifunda Bible. Mu bula bwa myaka, bifundijibwanga bufundiji buvule bwine bwa Bible. Mushipiditu sandu wingilanga mu bipwilo mwanda wa kukwasha bantu bekale na mutyima wa kwivwanija bintu “bikomo bīne bya Leza.”—Bilongwa 5:32.

Byobya Bibadilwa mu Bintu “Bikomo Bīne bya Leza”

7. Mwanda waka bavule bakomenwanga kwivwanija bintu “bikomo bīne bya Leza”?

⁷ Ketufwaninwepo kulanga’mba bino bintu “bikomo bīne” i bintu bikomo kwivwana. Shi bantu bavule i bakomenwe kwivwana bintu “bikomo bīne bya Leza” ke pa mwandapo wa tunangu twa Leza tukomene, ehe, i mwanda Satana ongolanga bantu bapele kutambula bukwashi buleta Yehova kupityila ku bulongolodi Bwandi.—2 Kodinda 4:3, 4.

8. I bintu’ka bikomo byēsambile’po Polo mu mukanda wandi ku Bene Efisesa shapita wa busatu?

⁸ Shapita wa busatu wa mukanda wa Polo ku Bene Efisesa ulombola amba bintu “bikomo bīne bya Leza” i bubinebine buvulevule buyukilwe kala na bantu ba Yehova, kimfwa kujingulula Lukunwa lwālailwe, kutongwa kwa bantu bakulupile kwenda mūlu, ne Bulopwe bwa Meshiasa. Polo wāsonekele amba: “[Kifibwe i] kyampikwa kuyūkijibwa kudi bāna ba bantu ba mu nkongo mikwabo, monka mo kyasokwelwa pano kudi batumibwa bandi bakola na bapolofeto mudi Mushipiditu; amba, baJentaila i bakwetu bakupyana, ne bukwetu bwa ku ngitu, ne bukwetu bwa pa kumwenamo ku mwanda-wamulao mudi Kidishitu Yesu.” Kadi Polo wānene amba wāpebwa mwingilo wa “kulaīja bantu bonso mwikadile bulobekwe bwa kifībwe kyafīlwe mu myaka yonso mudi Leza.”—Efisesa 3:5-9.

9. I kika kinenenwa amba kwivwanija bintu “bikomo bīne bya Leza” i dyese kotudi?

⁹ Polo wāendelele na kushintulula kiswa-mutyima kya Leza amba e ponka ‘payukijibwe badi momwa mūlu, ñeni ya Leza ya miswelo ne miswelo ya ponka pa kipwilo.’ (Efisesa 3:10) Bamwikeulu bamwenanga mu tunangu twa Yehova pa kubandila ne kwivwanija byobya byalonga mu kipwilo kya Bwine Kidishitu. Bine, twi badyese pa kwivwanija ne bintu bitele’ko bamwikeulu mutyima! (1 Petelo 1:10-12) Kupwa, Polo unena amba tufwaninwe kulonga buninge bwa “kukwatyija, pamo na bapandulwemo bonso, mwikadile kubaya [kwa lwitabijo lwa Bwine Kidishitu], ne kulepa kwalo, ne bulabwamūlu bwalo, ne bulabwapanshi bwalo.” (Efisesa 3:11, 18) Nanshi tubandaulei pano bimfwa bimobimo bya bintu bikomo bitulomba kwivwanija nakampata.

Bimfwa bya Bintu Bikomo Bine

10, 11. Mungya Bisonekwa, i kitatyi’ka kyāikele Yesu ke kipindi kibajinji kya ‘lukunwa’ lwa “mwana-mukaji” wa Leza wa momwa mūlu?

¹⁰ Tuyukile amba Yesu ye kipindi kibajinji kya ‘lukunwa’ lwa “mwana-mukaji” wa mūlu wa Leza utelelwe mu Ngalwilo 3:15. Pa kutandabula kwivwanija kwetu, tukokeja kwiipangula amba: ‘Yesu wāikele Lukunwa lwālailwe tamba kitatyi’ka? Lelo i mu kitatyi kyaādi kaile pano panshi’ni, i pa kubutulwa’ye bu muntu’ni, i pa kubatyijibwa’ni, nansha i pa kusanguka’ye?’

¹¹ Leza wālaile amba kipindi kya mūlu kya bulongolodi bwandi, kitelelwe mu bupolofeto bu “mwana-mukaji” wandi, kyo kyādi kya kulupula lukunwa lukasonsakanya nyoka ku mutwe. Ino mu bula bwa tununu twa myaka, uno mwana-mukaji wa Leza kālupwilepo kala lukunwa lubwanya konakanya Satana ne mingilo yandi. O mwanda bupolofeto bwa Isaya bwāmutelele bu “ñumba,” “mufītwe mu mutyima.” (Isaya 54:1, 5, 6) Mwenda mafuku, Yesu wābutulwa mu Betelema. Ino aye pa kupwa kubatyijibwa, wāikala ke mwana wa Leza wa ku mushipiditu, po pānene Yehova amba: ‘Uno i wami Mwana.’ (Mateo 3:17; Yoano 3:3) Ebiya, kipindi kibajinji kya ‘lukunwa’ lwa mwana-mukaji kyēyukanya. Mwenda mafuku, balondi ba Yesu nabo bashingwa māni ne kubutulwa ku mushipiditu sandu. “Mwana-mukaji” wa Yehova wādi wimona tamba kala bu “kabutwilepo,” pano wādi ‘kaimbe.’—Isaya 54:1; Ngalatea 3:29.

12, 13. Le i bisonekwa’ka bilombola amba bashingwe māni bonso badi pano panshi ye “umpika wa binebine, udi na manwa”?

 ¹² Kimfwa kya bubidi kya bintu bikomo bitusokwedilwe i mpango ya Leza ya kutonga bantu 144 000 mu muzo wa muntu. (Kusokwelwa 14:1, 4) Twitabije bufundiji bwa amba bashingwe māni bonso bekele’ko pano pa ntanda mu kitatyi kyo-kyonso bo abo babundile “umpika wa binebine, udi na manwa” wātelelwe na Yesu bu wa kupāna ‘bidibwa’ ku bapika Bandi. (Mateo 24:45) Le i bisonekwa’ka bibingija uno mwivwanino amba i moloke? Le Yesu wādi wisambila pa mwine Kidishitu ye-yense ukatamija banababo na kwibapa bidibwa bya ku mushipiditu?

¹³ Leza wālombwele muzo wa Isalela amba: “Banwe mwi bami batumoni, ne mwingidi wami o natonga.” (Isaya 43:10) Ino mu difuku 11 Kweji wa Nisane mwaka wa 33 K.K., Yesu wānene bendeji ba Isalela amba Leza wāpele muzo wabo kwikala bu mwingidi Wandi. Wānene amba: “Bulopwe bwa Leza bukemunyongolwa bukapebwa ku muzo bantu bakupana bipa byabo.” Ebiya wānena kibumbo amba: “Monaipo bidi, njibo yenu byo yemushīlwa masala.” (Mateo 21:43; 23:38) Njibo ya Isalela, mwingidi wa Yehova, yābudilwe kwikala ya binebine ne ya manwa. (Isaya 29:13, 14) O mwanda mu difuku dyonka’dya, pāipangwile Yesu amba: “Lelo yewa umpika wa binebine, udi na manwa i ani?” na bubine wādi wipangula amba: ‘I muzo’ka wa manwa ukapingakena pa Isalela bu mwingidi wa binebine wa Leza?’ Mutumibwa Petelo wālondolwele pa kunena ku kipwilo kya Bene Kidishitu bashingwe māni amba: “Mwi . . . muzo wa bu-ujila, bantu bakumunwa na Leza enka.” (1 Petelo 1:4; 2:9) Uno muzo wa ku mushipiditu, “Isalela wa Leza,” ye wāikele bu umpika umpya wa Yehova. (Ngalatea 6:16, MB) Enka mwādi mwikadile Bene Isalela bonso bu “mwingidi” umo, mo monka ne Bene Kidishitu bashingwe māni badi pano pa ntanda mu kitatyi kyo-kyonso nabo i “umpika wa binebine, udi na manwa” umo enka. Bine, tudi na dyese dya kupebwa ‘bidibwa’ kupityila kudi uno umpika wa Leza!

Kifundwa kya Kasuku Kibwanya Kwikala Kisangaja

14. Mwanda waka kwifunda Bible kuletanga nsangaji kupita kutanga’ye bitupu?

¹⁴ Shi tubafikila mu kwivwanija Kisonekwa, mwene twikalanga na nsangaji mwanda wa kukomeja kokikomejanga lwitabijo lwetu? O mwanda kwifunda Bible ko kuletanga ino nsangaji, kupita kutanga’ye bitupu. Pa kino, shi utanga mabuku a Bwine Kidishitu wiipangule amba: ‘Buno bushintuludi i bukwatañane namani na byondyukile kala pa uno mwanda? I bisonekwa’ka nansha i bushintuludi’ka bukwabo bubingija myanda inenwe mu kino kishinte?’ Shi usaka kukalongela’ko bukimbi, nabya soneka kipangujo kyosaka kukakimba malondololo, ne kukabandaula’kyo mu kwifunda kukwabo.

15. I bika byotukokeja kwifunda bibwanya kwitupa nsangaji, ne tukokeja kumwena’mo byabuyabuya bya nyeke namani?

¹⁵ Le i bika byokokeja kwifunda mwa kumwena nsangaji ya kuyukila’ko bintu bikwabo? I bintu pamo bwa kubandaula na mushike bipwano palapala byāsambile Yehova na bantu pangala pa kamweno kabo. Ubwanya kukomeja lwitabijo lobe na kwifunda bupolofeto butala padi Yesu Kidishitu, nansha na kubandaula vese ne vese wa mikanda ya bupolofeto ya mu Bible. Kadi lwitabijo lukaninga shi upituluka mu mānga ya ino myaka ya Batumoni ba Yehova, na kutanga kitabo Les Témoins de Jéhovah : Prédicateurs du Royaume de Dieu, shi  kidi mu ludimi loivwana. * Kutanga “Bipangujo bya Batangi” bya mu manimelo a Kiteba kya Mulami a mafuku kunyuma nako kuketukwasha twivwanije bisonekwa bishileshile. Ta mutyima ku muswelo ulangulukilwa pa bisonekwa ne muswelo obafudija mwanda wisambilwa’po. Namino nobe ukebidija “byakwivwana nabyo” byobe mwa kutamijija kusansanya. (Bahebelu 5:14) Kadi powifunda, lama byosokola’bya na kulemba’byo mu Bible obe nansha mu kalane mwa kushadila na byabuyabuya bya bwifundi bobe ne mwa kukwashisha nabyo bakwenu.

Kwasha Bankasampe Basangele Kwifunda Bible

16. Le ukokeja kukwasha namani bankasampe basangele kwifunda Bible?

¹⁶ Bambutwile bakokeja kulonga bivule mwanda wa kulangula ndyoko ya babo bana. Kemwakipelulai luté ludi na bankasampe lwa kwivwana bintu bikomo. Shi mupa bankasampe mitwe ya myanda ya kukimba kumeso kwa kwifunda Bible mu kisaka, mubwanya kwibanena balombole byobefundile. Kifundwa kya kisaka kikokeja kadi kwikala na bipindi bya kwiibidija mwa kukwashisha bankasampe bayuke mwa kubingijija lwitabijo lwabo ne byobefunda amba i bya bine. Ne kadi mukokeja kwingidija boloshile ‘ Voyez le bon pays ’ * pa kufundija bana bwifundi bwa bifuko bya ntanda ne kutōkeja myanda yomubandaula mu butangi bwa Bible bwa yenga ne yenga.

17. Mwanda waka bilomba bujalale potutandika kifundwa kya Bible kya kasuku?

¹⁷ Kifundwa kya kasuku kya Bible kikokeja kwikala kitobala ne kikomeja lwitabijo, ino kekifwaninwepo kukudila kitatyi kya kuteakanya kupwila kwa pa kipwilo. Kupwila i mukenga mukwabo wa kufundijibwa na Yehova kupityila kudi “umpika wa binebine, udi na manwa.” Inoko, kulongela’ko bukimbi bukwabo kukokeja kupeteja malondololo obe ku kupwila—kimfwa, ku Kifundwa kya Kitabo kya pa Kipwilo nansha ku Myanda Mikatampe ya butangi bwa Bible bwa yenga ne yenga ku Masomo a Mwingilo wa Kiteokratike.

18. Mwanda waka bukomo botulonga pa kwifunda bintu “bikomo bīne bya Leza” budi na mvubu?

¹⁸ Kwifunda na mushike Kinenwa kya Leza kukokeja kukukwasha ufwene kudi Yehova. Bible ulombola kamweno kadi mu kwifunda kwa uno muswelo amba: “Ñeni i bwa nsakwa, monka mwikadile bupeta i nsakwa; ino butabuke bwa ñeni i bwino bwa kwilama būmi bwa yewa udi nayo.” (Musapudi 7:12) Nanshi bukomo bulongwa pa kwivwanija na mushike bintu bya ku mushipiditu budi na mvubu. Bible ulaya boba bakimbidila’mba: “Ne kutana [mukatana] kuyukidija Leza.”—Nkindi 2:4, 5.

[Kunshi kwa dyani]

Le Ukokeja Kushintulula?

• Bintu “bikomo bīne bya Leza” i bintu’ka?

• Mwanda waka ketufwaninwepo kuleka’byo kwifunda bintu bikomo?

• Mwanda waka Bene Kidishitu bonso badi na nsangaji ya kwivwanija bintu “bikomo bīne bya Leza”?

• Ukamwena namani ne pa mfulo mu bintu “bikomo bīne bya Leza”?

[Bipangujo bya Kifundwa]

[Kifwatulo pa paje 28]

I kitatyi’ka kyāikele Yesu ke Lukunwa lwālailwe?

[Kifwatulo pa paje 31]

Bambutwile bakokeja kupa babo bana mitwe ya myanda ya kukimba kumeso kwa kifundwa kya kisaka