Kampanye Kateakanibwe Senene Kapanga Bipa

María Isabel i nkasampe musapudi mukankamane wa mu kibundi kya San Bernardo kidi mu Amerika wa kunshi mu ntanda ya Shili. Aye ne kisaka kyabo i bene kibundi kya Mapuche. Kisaka kyabo kyalongele bukomo na bupyasakane bwa kukwatakanya kushimikwa kwa kipwilo kipya mu ludimi lwisambwa mu Mapuche, lutelwa ne bu Mapudungun.

Kitatyi kyānenwe amba, Kivulukilo kya lufu lwa Kidishitu kikalongwa ne mu ludimi lwa Mapudungun ne amba, i kutampwe tukanda 2000 twa lwito lwa Kivulukilo mu luno ludimi twa kwabanya, kino kyālangulwije María Isabel. Le i bika byaādi ubwanya kulonga pa kukwasha? Wāvulukile myanda mimweke ya bankasampe Batumoni bakwabo bātene bipa biyampe kitatyi kyobādi basapwila bakwabo ba ku masomo ne badimu babo. Wēsambile na bambutwile bandi pa uno mwanda, ebiya abo bonso pamo bakwata butyibi bwa amba María Isabel alonge bukomo bwa kulangulukila pa mpangiko ya kwabanya tukanda twa lwito ku masomo. Le wētūdile mpangiko’ka?

Dibajinji, María Isabel wākalombele bemaniji ba masomo lupusa lwa kulamika kakanda ka lwito pa kibelo kikatampe kya masomo. Baitabija ne kumutendela pangala pa mpangiko yandi. Difuku dimo ku kwibungila pamo kwa lubanga, mwimaniji wa masomo waela’nka ne musapu na lansevwa pa mwanda utala kakanda ka lwito!

Kupwa, María Isabel walomba kupempula tulasa tonso. Badimu pa kupwa kumupa lupusa, waipangula mu kalasa ne kalasa ka bana ba masomo shi mwādi bene Mapuche. Unena’mba, “nādi nanga’mba mwādi’tu padi mwa kutanwa bana ba masomo 10 nansha 15 batambile mu bisaka bya bene Mapuche ku masomo onso matuntulu, ino badi’ko bavule kutabuka—nafula ku kupāna tukanda twa lwito 150!”

“WĀDI UKULUPILE AMBA I MUNTU MUTAME”

Lolo umo wāmwene kakanda kalamike pa kibelo kikatampe kya masomo, wāipangwile muntu wafwaninwe kwisambila nandi pa kinkumenkume. Langa’po bidi mwaātulumukile kitatyi kyōbakamutūdile kudi nkasampe mwana-mukaji wa myaka dikumi! “Wādi ukulupile amba i muntu mutame,” ye María Isabel unena koku umungamunga. Pa kupwa kumupa kakanda ka lwito ne kumushintulwila mu kīpi, María Isabel walomba uno lolo adelese pa kusaka’mba aye ne bambutwile bandi bakamupempule mwanda wa kumusapwila bivule pa Bulopwe bwa Leza. Bine basapudi 20 bengila mu mwaba wisambwa ludimi lwa Mapudungun, bāsangele pa kumona uno lolo wāiya ku Kivulukilo na bantu bakwabo bene Mapuche 26 bāsangedile. Pano kino kisumpi ke kipwilo kyendanga kitanta!

Nansha shi udi na myaka’ka, ubulwe’po kukwata mpangiko ya uno muswelo ya kwita bakwenu ba ku masomo ne bengidi-nobe ku Kivulukilo, ku dishikulu dya bantu bonso, nansha ku kitango kya distrike? Ubulwe’po kulonga bukimbi mu mabuku etu mwanda wa kutana myanda mimweke ibwanya kukupa milangwe ya mwa kulongela’mba ino mpangiko ipe bipa? Kadi, lomba mushipiditu sandu wa Yehova ukukwashe wikale na bukankamane bwa kwisamba yandi myanda. (Luka 11:13) Shi ulonge namino, nobe ubwanya kutulumuka bininge ne kukankamikwa na bipa bikalupuka ku bukomo bolonga.