Dyumuka Kukanina kwa Mutyima

Bible unena amba, “mutyima utabukile bintu byonsololo budimbañani, ubela byamwikomwiko’tu.” (Yel. 17:9) Shi mutyima wetu wabila bininge kintu kampanda, le ketumonengapo bubinga bwa kulonga byousaka?

Bisonekwa bitudyumuna amba: “Mu mutyima mu shilukanga byakufwatakanya bibi, ne byakwipaya bantu, ne makoji, ne busekese, ne bwivi, ne mabela a kubepela bantu, ne butukani monka.” (Mat. 15:19) Mutyima wetu wa kyelekejo ubwanya kwitulubija ne kwitufikija ku kubingija kilongwa kampanda kekikwatañepo na kiswa-mutyima kya Leza. Kadi ketubwanyapo kuyuka byālongekele pa kupwa kulonga bintu pampikwa tunangu. Le i bika bibwanya kwitukwasha tujingulule kukanina kwetu kwa mutyima ku meso kwa kulonga bibi?

JINGULULA KUKANINA KOBE—NAMANI?

Tanga Bible difuku ne difuku ne kulangulukila pa byanena. Mutumibwa Polo wāsonekele amba, “mwanda wa Leza i wa būmi ne bukomo, mutabuke buī bwa lupanga lwa buī kubidi, wa kusaba ne kulala aku mutyima aku mushipiditu.” Musapu wa Leza udi mu Bible “i wa kampeja bukidi kakuyūkidila kufwatakanya ne kukanina kwa mutyima.” (Bah. 4:12) Na bubine kwibandaula kupityila ku byobya binena Bible kubwanya kwitukwasha bininge tujingulule kukanina kwetu kwa mutyima. Bine, shi tutanga Kinenwa kya Leza ne kulangulukila pa byokinena, tukekala na milangwe ya Yehova ne mumweno wandi!

Kwitabija madingi a mu Bisonekwa ne kwingidija misoñanya ya mu Bible kukakwasha mutyima wetu wa mundamunda—ke muntu wa munda ‘usapulanga bukamoni’ kadi. (Loma 9:1) Diwi dyetu dya munda dibwanya kwitukankaja tuleke kubingija bilongwa bibi.  Kadi, mu Bible mudi bimfwa bibwanya “kwitudyumuna.” (1 Kod. 10:11) Kuboila ñeni ku bino bimfwa kuketukankaja kutabula ditabula dibi. Le i bika byotufwaninwe kulonga?

Lomba Leza akukwashe ujingulule kukanina kobe kwa mutyima. Yehova ‘utompanga mutyima.’ (1 Bil. 29:17) “Utabukile bukatampe mityima yetu, uyūkile bintu byonsololo.” (1 Yoa. 3:20) Leza kabwanyapo kongolwa. Shi tulombole patōka byotusaka, milangwe yetu ne byotwabila mu milombelo, Yehova ubwanya kwitukwasha tujingulule kukanina kwa mutyima wetu. Tubwanya’nka ne kulomba Leza ‘apangulule motudi mutyima utōka.’ (Mit. 51:10) Nanshi pa kujingulula kulēmenene mutyima wetu, ketufwaninwepo kupēlula mpangiko ya milombelo.

Teja na katentekeji podi ku kupwila kwa bwine Kidishitu. Kuteja na katentekeji bifundijibwa ku kupwila kwa bwine Kidishitu kukokeja kwitukwasha tubandaule pampikwa budimbidimbi muntu wetu wa munda—ke mutyima wetu kadi. Nansha byoketubwanyapo kupebwa myanda mipya ku kupwila ne kupwila, ino tukevwanija biyampe misoñanya ya mu Bible ne bivulujo bya mvubu bitukwasha tubandaule kukanina kwa mutyima shi tutanwa’ko. Malondololo a batutu ne bakaka nao adi na mvubu pa kulumbulula muntu wetu wa munda. (Nk. 27:17) Kwitolwela batwe bene pa kyaba kya kwitana kitatyi ne kitatyi na banabetu bene Kidishitu ku kupwila, kubwanya kwitona. Kadi kubwanya kwitutwala ku ‘kukimba kiswa-mutyima kya batwe bene.’ (Nk. 18:1) Nanshi i biyampe twiipangule amba, ‘le ndi na kibidiji kya kutanwa ku kupwila konso ne kumwena’mo?’—Bah. 10:24, 25.

LE MUTYIMA WETU UKETUTWALA KWEPI?

Mutyima wetu udimbañana ubwanya kwitutwala ku kuluba mu bintu bivule mu būmi. Tubandaulei’ko bintu biná: Kulondalonda bintu bya ku ngitu, mutomeno mpata wa malwa, butongi bwetu bwa balunda ne byotulonga pa kwipwija mukose.

Kulondalonda bintu bya ku ngitu. Twi bapangwe na mutyima wa kusaka kuvuija bisakibwa byetu bya ku ngitu. Inoko, Yesu wāletele kimfwa kitudyumuna pa mwanda utala kumona bintu bya ku ngitu na mvubu mipitepite. Mu kyelekejo kyandi kimo, Yesu witwita tubandaule mwanda utala mpeta umo wādi na bitala biyule. Kākidipo kadi na kyaba pa kubika bya mwangulo bikwabo biyampe. Uno muntu wāpomwene bitala byandi ne kūbaka bikwabo bikatampe. Wādi kalanguluka amba: “Imana, nkalonge namino, nkatūte bitala byami’bya, nkashimikepo bikwabo bikatampe, ino e mo nkebyomeka bidibwa byami, ne bintu byami byonso biyampe. Ebiya nkanena mutyima wami’mba: Abe mutyima pano kōdi ne bintu bingi bingi binengele byakubikwa myaka ne myaka, kēkale bitupu pamo, kadyepo, katomepo, kēkale kusepelelapo.” Ino mpeta wākomenwe kuta mutyima ku kintu kekyepukibwapo: Būmi bwandi bwādi bubwanya kufula’nka bwine bufuku’bwa.—Luka 12:16-20.

Kitatyi kyotutama, tukokeja padi kuta mutyima bininge ku kuteakanya bintu bya ku ngitu bya kwitukwasha ku bununu, twashilula padi ne kubingija kwingila mansá a ntentekelo twaleka kwenda ku kupwila nansha kusūla mu muswelo kampanda biselwa byetu ya ku mushipiditu. Le tubulwepo kwilama ku milangwe ya uno muswelo? Nansha padi tukidi bankasampe  kadi bayukile amba kekudipo kaji kayampe katabukile mwingilo wa kitatyi kyonso. Ino, le tulekanga kwingila bu pania na kulanga amba tufwaninwe bidi kwikala na lupeto? Tubulwe’po kulonga pano bukomo bwa kwikala mpeta kumeso a Leza? Le i ani uyukile shi tubwanya kwikala bōmi kesha?

Mutomeno mpata wa malwa. Nkindi 23:20 unena amba, “kokekalapo umbukata mwa batomatoma vinyu.” Shi muntu udi na mutomeno mpata wa malwa, ubwanya kwibingija’mba kutoma kitatyi ne kitatyi ke kubipo. Ubwanya kunena’mba utomanga mwanda wa kwisangaja, ke mwandapo wa kukolwa. Shi tusakanga kutoma malwa mwanda wa kwisangaja, padi i biyampe kubandaula pampikwa budimbidimbi kukanina kwa mutyima wetu.

Butongi bwetu bwa balunda. Na bubine, kwitana kyaba kimo na bantu bampikwa kwitabija—kimfwa, ku masomo, ku kaji ne mu mwingilo wa busapudi—i kukomo kwepuka. Inoko, kupwana nabo ne kutamija kipwano kyotupwene nabo i kuyampe kyaba kimo. Le tubingijanga kino kipwano na kunena’mba badi na ngikadilo miyampe mivule? Bible witudyumuna amba, “kemukyongolwai; kwinangila kubi kuboleja miswelo milumbuluke.” (1 Kod. 15:33) Enka mubwaninya busala butyetye kona mema mayampe, kupwana na boba kebepēnepo kudi Leza kubwanya kwitona ku mushipiditu ne kwitutwala ku kwiula mumweno, muvwadilo, muneneno ne mwiendelejo wa ino ntanda.

Byotulonga pa kwipwija mukose. Bya busendwe bya dyalelo bitufwenyanga miswelo yonso ya kwipwija mukose, kadi kuvule kwine kutatanwa ne kwampikwa kufwaninwa ku mwine Kidishitu. Polo wāsonekele amba, “kujilula konso kwa bijila, ne kwabila kwine, kebikatelwa nansha dimo dine umbukata mwenu.” (Ef. 5:3) Le tukalonga namani shi mutyima wetu witutonona kutala nansha kwivwana bintu bya disubi? Tufwaninwe kuyuka amba muntu yense usakilwa kwisangaja nansha kwipwija mukose, ino muswelo onso wisangaja nansha ukaya muntu i mwanda umutala. Inoko, tulamei mu mutyima madingi a Polo ne kuleka kutala nansha kwivwana bintu bya disubi.

TUBWANYA KUSHINTA

Shi twāponene mu kupēlula mutyima udimbañana ne kwikala na kibidiji kya kubingija bilongwa bibi ne mwiendelejo wetu mubi tubwanya kushinta. (Ef. 4:22-24) Tubandaulei bidi bimfwa bibidi bya mu ano etu mafuku.

Miguel * wadi ufwaninwe kushinta milangwe yandi pa mwanda utala bintu bya ku ngitu. Unena amba: “Ami, wami mukaji, ne mwana twātambile ku ntanda imonwa bya busendwe biyampe kadi bya panopano ne kwikala na bituntwa bu kintu kya mvubu. Kyaba kimo nēpānine mu kukimba byonso byonadi mbwanya mu ino ntanda, na kulanga amba nadi mbwanya kulonga’byo pampikwa kwikala na mushipiditu wa kusanswa bya bupeta. Kepejije najingulula amba, kukimbakimba bintu bya ku ngitu dyadi dishinda dya kubulwa mfulo. Nalombele Yehova pa mumweno wami ne pa kukanina kwa mutyima wami. Namulombola amba, ami ne kyami kisaka tusaka kumwingidila ne pa mfulo. Twābwenye kukwata butyibi bwa kupēleja būmi bwetu ne kuvilukila kokwa kwadi kusakilwa basapudi bavule. Ne kwija mpika twabwanya kwingila bu pania. Twafula ku kumona amba ketusakilwapo bintu bivule bya ku ngitu mwanda wa kwikala na būmi buyampe ne bwa nsangaji.”

Mwanda watene Lee ulombola mwāmukwashishe kwibandaula pampikwa budimbidimbi aleke kipwano kibi. Lee unena amba, “nadi mpwana kitatyi ne kitatyi na beni bapotoloja bintu pa mwanda wa kaji kami. Nadi ndyukile amba bano bantu badi na mutomeno mpata wa malwa ino kwitana nabo kwadi nkusangaja. Nadi nkolwa bitatyi bivule, kupwa nkenealakanya. Nādi nenwe kubandaula mutyima wami pampikwa budimbidimbi. Madingi a mu Kinenwa kya Leza ne a bakulumpe ānkweshe ndyuke amba nādi kimba bine kupwana na bantu kebasenswepo Yehova. Pano mvuijanga kaji kami kupityila ku telefone kadi kino kibalengeja kwitana nabo kwikale kutyetye.”

Tufwaninwe kwikala bampikwa budimbidimbi ne kujingulula kukanina kwa mutyima wetu. Pa kulonga namino tufwaninwe kulomba Yehova etukwashe, koku tuvulukile amba, “aye uyūkile bifyo bya mutyima.” (Mit. 44:21) Kadi Leza i mwitupe Kinenwa kyandi kine kitukwasha twitale’mo pamo bwa mu kitalo. (Yak. 1:22-25) Kadi bivulujo ne madingi otutambula kupityila ku mabuku a bwine Kidishitu ne ku kupwila nabyo bidi na mvubu! Na ino mpangiko, tubwanya kulama mutyima wetu ne kunanga nyeke mu mashinda a boloke.

[Kunshi kwa dyani]

[Kifwatulo pa paje 22]

[Kifwatulo pa paje 23]

Le kutanga Bible difuku ne difuku kudi na lupusa’ka pa mutyima wetu wa kyelekejo?

[Kifwatulo pa paje 23]

Milombelo itukwashanga tuyuke muntu wetu wa munda

[Kifwatulo pa paje 23]

Kupwila kwa bwine Kidishitu kwitukwashanga tujingulule kukanina kwa mutyima wetu