“Byo Mwapwa Kuyuka Leza”—Pano ke Bika?
“Byo Mwapwa Kuyuka Leza”—Pano ke Bika?
“Byo mwapwa kuyūka Leza.”—NGAT. 4:9.
UKALONDOLOLA’PO BIKA?
Mwanda waka i biyampe kubandaula kitatyi ne kitatyi mukanda wa ku mushipiditu wa bubandaudi?
Mwanda waka mwine Kidishitu mutame ku mushipiditu ufwaninwe kwendelela kutama ku mushipiditu?
Mwanda tufwaninwe kulangulukila pa lwitabijo lwetu ne kwipāna kotwipēne kudi Yehova?
1. Mwanda waka pilote ulondanga mukanda wa bubandaudi kumeso kwa kutumbuka?
BAPILOTE batumbukanga divule biyampe na amviyo babandaulanga bidi mukanda wa bubandaudi udi na myanda 30 ne kupita. Shi kebalondelepo na katentekeji mukanda wa bubandaudi kumeso kwa kutumbuka, bapilote bakuvudija byaka bya kulonga akishinda ya malwa. Le uyukile pilote usoñanibwe nakampata kudinga mukanda wa bubandaudi kitatyi ne kitatyi? I pilote wa bwino buvule! Pilote ubwanya kwikala bukidi bonka na kiloelenga ne kukomenwa kubandaula kanda ne kanda kumeso kwa kutumbuka.
2. Le i mukanda’ka wa bubandaudi usoñanibwe bene Kidishitu kubandaula?
2 Pamo bwa pilote mwiteakanye biyampe mu ñeni, ubwanya nobe kwingidija mukanda kampanda wa bubandaudi pa kuyuka shi lwitabijo lobe kelukatelententapo kitatyi kyosakilwa’lo bininge. Ekale shi wabatyibwe panopano nansha shi kodi mwingidile Leza myaka mivule, kubandaula kitatyi ne kitatyi bukatampe bwa lwitabijo lobe ne kwipāna kobe kudi Yehova Leza kudi na mvubu. Kukomenwa kwibandaula kitatyi ne kitatyi kadi na kininga, kubwanya kutwala ku koneka kwa ku mushipiditu. Bible witudyumuna amba: “Yewa ufwatakanya’mba: Naimana; atūkanye pa kutyina’mba, wakapona.”—1 Kod. 10:12.
3. Le bene Kidishitu ba mu Ngalatea bādi basakilwa kulonga bika?
3 Bene Kidishitu ba mu Ngalatea bādi basakilwa kubandaula bukatampe bwa lwitabijo lwabo ne kusangela bwanapabo bwabo bwa ku mushipiditu. Kupityila ku kitapwa kyandi, Yesu wāshitwidile boba bonso bamwitabije dishinda dya kuyuka Leza mu muswelo wa kutendelwa—ke kwikala bu bana ba Leza kadi! (Ngat. 4:9) Pa kushala nyeke mu kino kipwano kiloe, bene Ngalatea bādi bafwaninwe kupela mfundijo ya Bayuda bene bādi bebaningila balame Mukanda wa Bijila wa Mosesa. Bine, Bajentaila bakubulwa kutwejibwa kwisao bādi mu bipwilo kebādipo munshi mwa Mukanda wa Bijila! Bayuda ne Bajentaila bādi basakilwa kwendelela ku mushipiditu. Kino kyādi kilomba kuyuka amba, kebādipo babwanya kutūla’ko boloke bwabo kupityila ku mpangiko ya Mukanda wa Bijila wa Mosesa.
MATABULA MABAJINJI PA KUYUKA LEZA
4, 5. Le Polo wāpele bene Ngalatea madingi’ka, ne etutala ne batwe namani?
4 Madingi a mutumibwa Polo ku bene Ngalatea āsonekelwe na kitungo kya: kukankaja bene Kidishitu ba mu kitatyi kyo-kyonso baleke kuvundamina bubinebine bwa mu Bible ne kujokela ku bintu bya kunyuma. Yehova wāpele mutumibwa bukomo bwa mushipiditu mwanda wa kukankamika boba bādi mu bipwilo bya mu Ngalatea ne batōtyi Bandi bonso amba, bemanije nshinkidingi.
5 I biyampe batwe bonso tuvuluke muswelo otwānyongolwelwe ku bupika bwa ku mushipiditu ne kwikala Batumoni ba Yehova. Pa kulonga namino, tubandaulei’ko bidi bino bipangujo bibidi: Le ukivulukile matabula owatabwile pa kubwanya bisakibwa bya kubatyijibwa? Le ukivulukile muswelo owāyukile Leza ne kuyukwa nandi, ebiya waikala na bwanapabo bwa binebine bwa ku mushipiditu?
6. Le i mukanda’ka wa bubandaudi otusa kubandaula?
6 Na bubine, batwe bonso twātabwile matabula kitema. Ano matabula adi pamo bwa mukanda wa ku mushipiditu wa bubandaudi, alombwelwe mu kapango kanena amba “Matabula Atwala ku Lubatyijo ne Kwendelela Kutama.” Kuvuluka kitatyi ne kitatyi ano matabula kitema, kuketukomeja tuleke kujokela ku bintu bya ino ntanda. Monka mutumbukilanga biyampe pilote wa bwino kadi mudyumuke na kubandaula bidi dibajinji mukanda wandi wa bubandaudi, nobe ukakwashibwa ūminine mu mwingilo wa kikōkeji na kubandaula mukanda obe wa ku mushipiditu wa bubandaudi.
BOBA BAYUKILWE NA LEZA BATAMANGA NYEKE KU MUSHIPIDITU
7. Le i kyelekejo’ka kyotufwaninwe kulonda ne mwanda waka?
7 Mukanda wa bubandaudi wa pilote umuvulujanga’mba udi na kibidiji kya kulonda na katentekeji kumeso kwa kutumbuka ko-konso. Netu tubwanya kwibandaula kitatyi ne kitatyi batwe bene ne kubandaula kibidiji kyetu kyotwādi tulonda tamba kubatyijibwa kwetu. Polo wāsonekēle Temote amba: “Londa mu kyelekejo kya myanda mikomo, yo waivwene kudi ami, mu kwitabija, ne mu lusa lwa mu Kidishitu Yesu.” (2 Tem. 1:13) Ino “myanda mikomo” itanwa mu Kinenwa kya Leza. (1 Tem. 6:3) Pamo bwa kifwatulo kya sendwe kitulombola mwikadile foto yonso mituntulu, ‘kyelekejo kya bubinebine’ nakyo kitulombolanga bya kulonga mwa kumwena ne kulonda byobya bisaka Yehova kotudi. Nanshi tubandaulei matabula etutwēle ku kubatyijibwa pa kuyuka shi tulondanga mu kyelekejo kya bubinebine.
8, 9. (a) Mwanda waka tufwaninwe kwendelela kutama mu buyuki ne mu lwitabijo? (b) Leta kimfwa kilombola mvubu ya kutama ku mushipiditu ne mwanda waka i mwingilo ulomba kitatyi kilampe.
8 Kintu kibajinji ku mukanda wetu wa bubandaudi i kwikala na buyuki. Kupwa tubwanya kutamija lwitabijo. Inoko, tufwaninwe kutama nyeke mu bino bintu bibidi. (2 Tes. 1:3) Kuno kutama kulomba kushinta bityebitye. ‘Kutama’ kushintulula kulundila’ko nansha kubaija. Nanshi pa kupwa kubatyijibwa tufwaninwe kwendelela kutama ku mushipiditu, mwanda wa kutama kwetu kuleke kujokela kunyuma.
9 Tubwanya kudingakanya kutama kwetu kwa ku mushipiditu na kutama kwa mutyi. Mutyi ubwanya kutama mu muswelo utulumukwa, nakampata shi miji yao i mitwele panshi bininge nansha kwala. Kimfwa, mityi imo ya mitondo ya Lebanona ibwanya kufika pa bula bwa kyūbakwa kya mametele 37, kadi ikalanga mikomo, miji yayo itwelanga panshi bininge kadi kityimbatyi kidi na bukata bwa mametele 12. (Lwimbo 5:15) Shi kipindi kibajinji kya kutama lubilolubilo kibafule, mutyi utaminanga’ko mu muswelo keubwanyapo kumonwa. Myaka pa kupwa ipunguluka, kityimbatyi kyabaya, miji yatwela panshi bininge ne kwiala, kadi bino bintu bilengejanga mutyi ushimatyije bininge. Mo mwikadile ne kutama kwa ku mushipiditu kwa bene Kidishitu. Tubwanya kutama bukidibukidi ku mushipiditu kitatyi kyotushilula’tu kwifunda Bible ne kubatyijibwa. Boba badi mu kipwilo basangalanga pa kumona kwendelela kwetu. Tukokeja’nka ne kubwanya bisakibwa bya kwikala bu bapania nansha kupebwa madyese makwabo. Mu myaka ilonda’ko, kwendelela kwetu kwa kutama ku mushipiditu kekubwanyapo padi kumonwa. Nansha nabya, tusakilwa monka kutama mu lwitabijo ne mu buyuki bwa “muntu mutame mwine, ku kitompekejo kya kīmano kya kuyūjibwa kwa Kidishitu.” (Ef. 4:13) O mwanda twendelalanga, kutamba ku ngalwilo kutūla ne ku kwikala mwine Kidishitu mutame ku mushipiditu, ko kunena’mba mutyi mukomo kadi mutame biyampe.
10. Mwanda waka bene Kidishitu basakilwa kutama nansha shi i batame ku mushipiditu?
10 Ino kutama kwetu kwa ku mushipiditu kekufwaninwepo kwimanina papo. Buyuki bwetu busakilwa kuvudila’ko ne lwitabijo lwetu nalo monka na monka. Mu uno muswelo tukala miji mu nshi ya Kinenwa kya Leza. (Nk. 12:3) Mu kipwilo kya bwine Kidishitu mudi batutu ne bakaka bavule bālongele uno muswelo. Kimfwa, tutu umo wadi mukulumpe mu bula bwa myaka makumi asatu ne kupita wamwene amba ukitaminanga’ko ku mushipiditu. Unena amba: “Kusangela konsangedile Bible kwendanga kuvudila’ko. Monanga nyeke mikenga ya kwingidija misoñanya ne bijila bya mu Bible mu miswelo palapala. Kadi kusangela konsangedile mwingilo kukyenda kuvudila’ko.”
TAMIJA KIPWANO KYOBE NA LEZA
11. Le i muswelo’ka otubwanya kuyuka Yehova biyampe mwenda mafuku?
11 Mu kutama kwetu mubadilwa ne kufwena kudi Yehova pamo bwa Mulunda kadi Tata wetu. Usakanga twimone bu betabijibwe. Kadi usakanga tuyuke’mba twibasanshibwe kadi na mutyima-ntenke pamo bwa mwana wimona bu musashibwe ne udi na mutyima-ntenke kitatyi kyapambilwe bīpa na mbutwile wa kilelo, nansha na motwiivwaninanga netu kitatyi kyotudi na balunda ba bine ne ba kikōkeji. Monka mobwanya kumwena, kino kipwano kekitamangapo lubilolubilo. Pa kusaka kumuyuka ne kumuswa bitulomba kitatyi. O mwanda pa kuyuka Yehova biyampe, sumininwa kwitūdila’ko kitatyi kya kutanga Kinenwa kyandi difuku ne difuku. Kadi tanga nimelo ne nimelo ya Kiteba kya Mulami ne Réveillez-vous ! kubadila’mo ne mabuku makwabo esambila pa Bible.
12. Le i bika byotufwaninwe kulonga pa kuyukwa na Yehova?
12 Balunda na Leza batamanga ku mushipiditu kupityila ku milombelo yabo yampikwa budimbidimbi ne kupityila ku kipwano kiyampe. (Tanga Malaki 3:16.) ‘Matwi a Yehova adi pa kwisāsa kwabo kwa pa kulombela.’ (1 Pet. 3:12) Pamo bwa mbutwile wa buswe, Yehova utejanga na katentekeji milombelo yetu yotulomba bukwashi. Nanshi, tufwaninwe ‘kushikilwa monka mu kulombela.’ (Loma 12:12) Ketubwanyapo kwikala nyeke bene Kidishitu batame bininge pa kubulwa bukwashi bwa Leza. Kadi ketubwanyapo kukomena ne kunekenya batwe bene mitabakano ya ino ntanda. Shi tuleke kūminina mu milombelo, ketukamonepo nyeke bukomo bupāna Leza ne mutyima tō. Le usangelanga muswelo olombelanga’ni nansha umwene bu usakilwa kwendelela mu uno mwanda?—Yel. 16:19.
13. Mwanda waka kwitana pamo na banabetu bene Kidishitu kudi na mvubu pa kutama ku mushipiditu?
13 Yehova usangelanga boba bonso “bakimba kinyemeno mwadi;” ino nansha pa kupwa kuyuka Leza, tusakanga kwilunga nyeke na kipwilo mwanda wa kwitana na bantu bamuyukile. (Nah. 1:7, Bisonekwa Bitokele) Mu ino ntanda iyudile kutyumukwa mutyima, i biyampe twikale mu bukata mwa batutu ne bakaka bakankamika. Le mudi byabuyabuya’ka? Ukatana mu kipwilo bantu bakakutonona ‘usanswe mingilo milumbuluke.’ (Bah. 10:24, 25) Buswe bwa kwilombola umo ku mukwabo bwāsonekele Polo ku Bahebelu bwituvulujanga bu bana na bana, kisaka kya batōtyi badi na mutyima umo ne kipwilo. Kulombola buswe bwa uno muswelo kulomba kwingidila pamo na bene Kidishitu bakwabo. Tūla kayukeno pa mukanda obe wa bubandaudi kitatyi kyonso kyotanwa ku kupwila ne kyolondolola’ko.
14. Mwanda waka kwisāsa kwetu ne kushinta i kwa endaenda?
14 Kwikala kotwikele bene Kidishitu kwimanine dibajinji pa kwisāsa ne pa kwalamuka, nansha kuvundamina bubi bwetu. Inoko kuno kwisāsa i kwaendaenda. Byotudi bantu bampikwa kubwaninina, tukidi na bubi bufyeme motudi pamo bwa nyoka mwintonte utengele kusumana. (Loma 3:9, 10; 6:12-14) Tubambilei meso kumeso pampikwa kwilwa bilubo byetu. Na bya dyese, Yehova witutūkijije mutyima kitatyi kyotulwa na kininga na bukōkekōke bwetu ne kyotulonga bukomo bwa kushinta. (Fid. 2:12; 2 Pet. 3:9) Bukwashi bukatampe i bwa kubandaula muswelo otwingidija kitatyi, tumweno twetu, ne kuleka kulondalonda tumweno twa batwe bene. Kaka umo usoneka amba: “Nātamine mu bubinebine, ino na mumweno mwishile kulampe na wa Yehova. Wādi ufwaninwe kutyinwa bininge, kadi nādi nemona bu nkibwanyapo kumusangaja.” Mwenda mafuku, uno kaka washilula “kusunkuta ku mushipiditu” mwanda wa kujimija bintu bivule bya ku ngitu. Wendelela na kunena’mba, “kewādipo mwanda wa kubulwa kuswa Yehova, ino i pa mwanda nkyādipo bine muyukile. Ino, pa kupwa kulombela milombelo mivule, nashilula kushinta mumweno wami.” Ubweja’ko amba: “Namwene amba Yehova wāndudikile pamo bwa mwana, wankwasha nekenye kijika kimo ne kimo, wanombola na kanye bintu byomfwaninwe kulonga.”
15. Le Yesu ne Shandi bamwene bika?
15 ‘Sapwila bantu’ myanda miyampe. Mwikeulu wa Leza wālombwele Petelo bino binenwa ne batumibwa bakwabo pa kupwa kwa kunyongololwa mu kifungo mu kingelengele. (Bil. 5:19-21) Bine, kwenda yenga ne yenga mu mwingilo wa busapudi i mwanda mukwabo udi mu mukanda wa bubandaudi. Yesu ne Shandi bamwene lwitabijo ne mwingilo wetu. (Kus. 2:19) Pamo’nka na mulombwedile’kyo mukulumpe utelelwe mu musango udi kūlu amba: “Mwingilo wa busapudi i mwingilo otufwaninwe kwingila.”
16. Mwanda waka i biyampe kulangulukila pa kwipāna kotwipēne kudi Yehova?
16 Langulukila pa kwipāna kobe. Kituntwa kilēme mpata kyotudi nakyo i kipwano kyetu na Yehova. Uyukile bantu bandi. (Tanga Isaya 44:5.) Bandaula ne milombelo ponka mwikadile ne mutyityile kipwano kyopwene nandi. Pa uno mwanda, vuluka mvubu ya difuku dyowābatyibwe. Kino nakyo kikakukwasha uvuluke amba, lubatyijo lobe i kilomboji kya butyibi bukatampe bokwakwete kashā.
IKALA PABWIPI NA YEHOVA NA KŪMINA
17. Mwanda waka tusakilwa kūminina pa kwikala pabwipi na Yehova?
17 Polo pa kusonekela bene Ngalatea, wālombwele kamweno kadi mu kūminina. (Ngat. 6:9) Kino kidi na mvubu ne ku bene Kidishitu dyalelo. Shako ukatanwa na matompo, ino Yehova ukakukwasha. Lomba nyeke mushipiditu sandu. Ukasengibwa kitatyi kikapingakanibwa njia na nsangaji, malangatyima nao na ndoe. (Mat. 7:7-11) Langulukila pa kino: Shi Yehova utele byoni mutyima, lelo banwe bamusenswe ne bepāne kwadi ke pepi? (Mat. 10:29-31) Nansha shi utanwe na mitabakano’ka, kokajokela kunyuma nansha kuzoza. Bine tudi na madyese mavule mwanda twi bayukwe na Yehova!
18. ‘Byowapwa kuyuka Leza,’ pano usa kulonga bika?
18 Shi wayukile Leza ne kubatyijibwa panopano, pano ke bika? Endelela na kuyuka Yehova biyampe ne kutama ku mushipiditu. Ino shi kodi mulonge myaka mivule tamba ubatyijibwa, pano ke bika? Nobe ufwaninwe kuvudija ne kutandabula nyeke buyuki bwa kuyuka Yehova. Ketwakalengwai nansha dimo kipwano kyotupwene nandi. Ino, batwe bonso tufwaninwe kubandaula mukanda wetu wa ku mushipiditu wa bubandaudi kitatyi ne kitatyi pa kuyuka shi twendelelanga na kutama mu kipwano kyotupwene na Yehova Leza, Tata wetu wa buswe kadi Mulunda.—Tanga 2 Kodinda 13:5, 6.
[Bipangujo bya Kifundwa]
[Kifwatulo pa paje 13]
[Kifwatulo pa paje 15]
Mutyi wendelelanga kutama. Bene Kidishitu nabo mo monka
[Kapango pa paje 17]
MATABULA ATWALA KU LUBATYIJO NE KWENDELELA KUTAMA
1 Tushilulanga na ‘kwifunda kuyuka’ Yehova ne Yesu Kidishitu wandi Mwana.—Yoa. 17:3
2 Lwitabijo lwetu lutamanga kitatyi kivula buyuki.—Yoa. 3:16
3 Twabijanga kitatyi ne kitatyi Yehova mu milombelo.—Bil. 2:21
4 Tuyukanga mvubu idi mu kupwana nyeke na bakwetu badi na lwitabijo na lwetu.—Bah. 10:24, 25
5 Twisāsanga bubi bwetu.—Bil. 17:30
6 Twalamukanga ne kuleka bilongwa bibi.—Bil. 3:19
7 Lwitabijo lwetu lwitutononanga tunene kumeso a bakwetu.—2 Kod. 4:13
8 Twipānanga batwe bene kudi Yehova mwanda wa kulonda Yesu biyampe.—1 Pet. 4:2
9 Twepēne na kubatyijibwa mu mema.—1 Pet. 3:21
