‘Ketwakapungilai’

“Ketukikōkai mu kulonga bilumbuluke.”—NGAT. 6:9.

USA KULONDOLOLA NAMANI?

I mpangiko itūdilwe’ko itukwasha tulame bupyasakane bwetu ku bubinebine?

Kuta mutyima ku butōtyi kukwatañene nami na kutanwa ku kupwila kwetu?

Butyibi bumobumo botukwata bulombolanga muswelo’ka shi tūminine nansha bapungile mu mwingilo wetu?

1, 2. Kuyuka senene bulongolodi bwa Yehova bwa mūlu ne panshi kutamijanga kikulupiji kyetu namaniitukwasha twikale na kikulupiji’ka?

 I KYAKUTENDELWA kashā pakuyuka’mba tudi mu bulongolodi bukatampe bwa mūlu ne panshi. Bimonwa bidi mu Ezekyele shapita 1 ne Danyele shapita 7 bilombola patōkelela bikalonga Yehova mu mafuku a mfulo. Yesu uludikanga kipindi kya pano panshi kya bulongolodi bwa Yehova mwanda wa kipāne mu kusapula myanda miyampe, kukwatakanya ku mushipiditu boba bengila uno mwingilo, ne kwimanina butōtyi bwa bine bwa Yehova. Bine, kino kitupa kikulupiji mpata mu bulongolodi bwa Yehova!—Mat. 24:45.

² Lelo bine tutabwilanga pamo na buno bulongolodi bwa kutendelwa? Le kupyasakena kwetu ku bubinebine kwendanga kubaila’ko’ni nansha kwendanga kutyepa? Pa kupwa kulangulukila pa bino bipangujo, tukokeja kumona’mba padi ketudi bashilule kukōka, nansha kujimija’ko bupyasakane bwetu. Bino i bintu bikokeja kwitufikila. Mu myaka katwa kabajinji, mutumibwa Polo wākankamikile bakwabo bene Kidishitu balonde kimfwa kya bupyasakane kya Yesu. Polo wālombwele’mba kino kikebakwasha baleke ‘kukōka ne kupungila pa mityima yabo.’ (Bah. 12:3) Muswelo umo onka ne batwe, kubandaula kotwabandawile na katentekeji kishinte kibadikile, kilombola mwingidila bulongolodi bwa Yehova dyalelo, kufwaninwe kwitukwasha tulame bupyasakane ne kūminina kwetu.

3. Le i bika bikwabo byotusakilwa mwanda wa kuleka kupungila, ne i bika byotusakubandaula mu kino kishinte?

³ Inoko, Polo wālombwele bu kudi bikwabo bitusakila pa kuleka kupungila. Wānene amba tufwaninwe kwielela’ko “kulonga bilumbuluke.” (Ngat. 6:9) Nanshi tusakilwa kulonga buninge. Pano tutalei bidi miswelo itano ya mwingilo wetu ikokeja kwitukwasha tushale bemanije nshinkidingi ne kutabwila pamo na bulongolodi bwa Yehova. Ebiya umo ne umo ukokeja kutala shi kudi myanda imoimo yafwaninwe kuta’ko mutyima mpata pamo ne kisaka kyandi.

 KUPWILA MWANDA WA KWIKANKAMIKA NE KUTŌTA

4. Mwanda waka tukokeja kunena’mba kupwila i kipindi kikatampe kya butōtyi bwetu?

⁴ Kwibunga kwikalanga nyeke kwa mvubu ku bengidi ba Yehova. Mu kīkalo kya mishipiditu yakubulwa kumweka, bipangwa bya ku mushipiditu bikalanga bibunga kumeso a Yehova pa kitatyi kitungwe. (1 Bal. 22:19; Yoba 1:6; 2:1; Dan. 7:10) Mu Isalela wa kala, muzo wadi wibunga pamo ‘amba balombolwe, ne kwakamwa Yehova Leza wabo.’ (Kup. 31:10-12) Bayuda ba mu myaka katwa kabajinji badi na kibidiji kya kwenda ku shinakoka kutanga’ko Bisonekwa. (Luka 4:16; Bil. 15:21) Kino kilombola’mba kubungakana kwaendelele ne pāshimikilwe kipwilo kya bwine Kidishitu, ne kadi i kipindi kikatampe mpata mu butōtyi bwetu dyalelo. Batwe bene Kidishitu babine “twitei mityima bātwe bene na bene ya pa kwisombela ku lusa ne mīngilo miyampe.” Tusakilwa kwendelela na “kwikwasha bātwe bene; ne byo [twamona] difuku [dya Yehova] dibafwena po pene pa kuningija.”—Bah. 10:24, 25.

5. I muswelo’ka otukokeja kwikankamika batwe bonso ku kupwila kwetu?

⁵ Muswelo umo wa mvubu otwikankamika i na kupāna ku kupwila kwetu. Tulombolanga patōka lwitabijo lwetu na kulondolola ku kipangujo kitampilwe, na kushintulula kisonekwa, na kusekununa mu kīpi mwanda mumweke ulombola tunangu tudi mu kulonga misoñanya ya mu Bible, nansha mu muswelo mukwabo. (Mit. 22:22; 40:9) Ekale tupwilanga ke padi myaka mivule, nansha shi twi bapya, tuyukile’mba kupwila kwikalanga nyeke kukankamika kitatyi kyotwivwana malondololo atamba ku mutyima, a batutu ne bakaka—batame ne banuke bene.

6. Kupwila kwetu kwitukwashanga namani twikale bakomo ku mushipiditu?

⁶ Le i bubinga’ka bukwabo bumwenine Leza wetu amba kwibunga kitatyi ne kitatyi kudi na kamweno? Kupwila, bitango, ne bitango bikatampe bitukwashanga twikale na kininga kya kwisamba pampikwa moyo ne kūminina kupangwapangwa nansha buñumauma budi mu myaba yotusapula’mo. (Bil. 4:23, 31) Mīsambo imanine pa Bisonekwa itukankamikanga ne kwitukwasha tushale bemanije mu lwitabijo. (Bil. 15:32; Loma 1:11, 12) Bufundiji ne kwikankamika kwetu po twibunga mu butōtyi kwitukwashanga twimwene batwe bene nsangaji ya bine ne kwitupa ‘mwakōlolokwa ku mafuku a malwa.’ (Mit. 94:12, 13) Komite wa Bufundiji wa Kitango Kyendeji wimanine kuteakakanibwa konso kwa mpangiko ya bufundiji bwa bantu ba Yehova ntanda yonso. Mwene’mba tufwaninwe kulombola kufwija’ko pa bingidilwa byotudi nabyo bitukwasha twivwanije senene bufundiji bwa kamweno ku kupwila kwa yenga ne yenga mu mwaka!

7, 8. (a) Le kitungo kibajinji kya kupwila kwetu i kitungo’ka? (b) Kupwila, kukukwashanga ku mushipiditu muswelo’ka?

⁷ Inoko kudi kintu kikwabo kya mvubu kutabuka byabuyabuya byetu byotumwena mu kupwila. Kitungo kyetu kibajinji kyotwibungilanga pamo i kutōta Yehova. (Tanga Mitōto 95:6.) Bine tudi na dyese’po kashā dya kutumbija Leza wetu wa kutendelwa! (Kol. 3:16) Yehova uloelelwanga butōtyi bwetu bwa kyaba ne kyaba shi tutanwa ku kubungakana kwa bu Leza ne kunena’ko. (Kus. 4:11) Nanshi kekyakutulumukapo shi twibakankamikwe’mba: “Ne kuleka’byo kubungakana mpika pamo na muswelo wa bamobamo”!—Bah. 10:25.

⁸ Lelo tumwene kupwila kwetu kwa bwine Kidishitu bu mpangiko ya kwitukwasha tūminine kufika ne pakonakanya Yehova ino ngikadilo imbi ya bintu? Shi tumwene namino kupwila kwetu kukabadilwa mu ‘byokya bitabukile kunengela.’ (Fid. 1:10, MB) Ketwakalekai kintu nansha kimo, nansha kikale kikatampe namani kitubudije mukenga wa kwilunga pamo na banabetu mu kutōta Yehova.

 KUKIMBA BANTU BA MITYIMA MYOLOKE

9. Tuyukile namani amba mwingilo wa busapudi i wa mvubu mpata?

⁹ Kwipāna mu mwingilo wa busapudi nako kwitukwashanga tutabwile pamo na bulongolodi bwa Yehova. Pādi Yesu pano pa ntanda wētushidile uno mwingilo. (Mat. 28:19, 20) Kushilwila’nka pene’pa, mwingilo wa busapudi bwa Bulopwe ne wa kulonga bana ba bwanga wāikele ke mwingilo umbajinji wingilwa na bulongolodi bonso bwa Yehova. Mu ano mafuku, myanda mimweke ilombola’mba bamwikeulu bakwashanga ku uno mwingilo ne kwituludikila ku bantu “badi mu ngikadilo mifwaninwe kutambula būmi.” (Bil. 13:48; Kus. 14:6, 7, New World Translation) Kipindi kya bulongolodi bwa Yehova, kidi pano panshi, kyo kitangidile ne kukwatakanya uno mwingilo wa mvubu mpata. Lelo netu tutūdile uno mwingilo bu umbajinji mu būmi bwetu?

10. (a) Leta kimfwa kilombola muswelo otukokeja kushala nyeke basanswe bubinebine. (b) Le mwingilo obe wakukweshe namani uleke kupungila?

¹⁰ Kwikala bapyasakane mu busapudi kuketukwasha tulame buswe botuswele bubinebine. Tala byanenene Mitchel, mukulumpe ke mwije kadi pania wa lonso. Wanene’mba: “Nsenswe kusapwila bantu bubinebine. Nangulukilanga pa, Kiteba kya Mulami nansha Réveillez-vous ! bya panopano ne kusangela tunangu, bujinguludi ne ndiñamano mifike’po idi mu dipepala ne dipepala. Nsakanga kutambila mu busapudi, ne kutala muswelo witaba bantu ku musapu, ne mwa kulangwila kusangela kwabo. I mwingilo wa busapudi o unkwashanga nshale mwimanije  nshinkidingi. Nekankilanga’ko amba mingilo mikwabokwabo keyakantwelela mu kitatyi kyami kya busapudi.” Mo monka ne batwe, shi tuvudilwe bya kulonga mu mwingilo wetu ukola, kino kiketukwasha tushale bemanije nshinkidingi mu ano mafuku a mfulo.—Tanga 1 Kodinda 15:58.

KUDYA BIDIBWA BYA KU MUSHIPIDITU

11. Mwanda waka tufwaninwe kumwena ne pa mfulo mu bidibwa bya ku mushipiditu bitupa Yehova?

¹¹ Yehova i mwitupe bidibwa bya ku mushipiditu mu bilembwa ku buntu bitupu mwanda wa kwitukomeja. Ne kutatana kwine mpika, kyaba kimo pa kupwa kutanga dibuku, padi kodi mulange kitatyi kimo nenki, wamona amba: ‘Bine ino yo myanda yonadi nsakilwa! Yehova i munsonekele’yo’tu ami kete!’ Kino ke kitaninapo bitupu. Yehova ye witufundijanga ne kwituludika kupityila ku ino mpangiko. Wanene’mba: “Nkakulombolanga ñeni, ne kukufundija mu dishinda dyōkendanga.” (Mit. 32:8) Le tuloñanga bukomo bwa kudya bidibwa bya ku mushipiditu byotupebwa ne kulangulukila’po mobifwaninwe? Kulonga namino kwitukwashanga tupe bipa ne kuleka kupungila ku mushipiditu mu ano mafuku a mfulo a byamalwa.—Tanga Mitōto 1:1-3; 35:28; 119:97.

12. Le i bika biketukwasha tuleke kubulwa nansha dimo bidibwa bya ku mushipiditu byotupebwa?

¹² I biyampe tulangulukile pa mwingilo mwine utala kwabanya bino bidibwa bya ku mushipiditu’mba bitufikile kitatyi ne kitatyi. Komite wa Balembi wa Kitango Kyendeji utalanga na katentekeji, myanda ya bukimbi, bilembwa, bubandaudi, byelekejo, ne bwalamuni bwa mabuku etu matampwe ne onso atūlwa pa Diteba dyetu dya Entelenete. Misambo itampilwa’mo mabuku itumanga mabuku mu bipwilo bya pepi ne bya kulampe kwine. Le kine kingidilwa uno mwingilo mukatampe nenki i kika? I mwanda wa bantu ba Yehova badishibwe biyampe ku mushipiditu. (Is. 65:13) Bine, tumwenei ne pa mfulo mu bidibwa bya ku mushipiditu byonso byotutambula kupityila ku bulongolodi bwa Yehova.—Mit. 119:27.

KUKWATAKANYA MPANGIKO YA BULONGOLODI

13, 14. Le i bāni bakwatakanyanga mpangiko itūdile’ko Yehova mūlu, ne tukokeja kukwatakanya namani ino mpangiko pano pa ntanda?

¹³ Mu kimonwa kyāmwene mutumibwa Yoano, Yesu i mulombolwe’mo utentamine pa kabalwe katōka tō mwanda wa kutamba balwana na Yehova bonso bulwi. (Kus. 19:11-15) Bine, kino kikankamika’po lwitabijo kashā pa kuyuka’mba Yesu ulondwanga na bamwikeulu ba kikōkeji, pamo ne bashingwe māni bakudilwe pano panshi ke batambule kala mpalo yabo momwa mūlu! (Kus. 2:26, 27) Kino i kimfwa kya kutendelwa kotudi kitala kukwatakanya mpangiko itudile’ko Leza!

¹⁴ Muswelo umo onka, ne kibumbo kikatampe nakyo kikwatakanyanga ne pa mfulo mwingilo wingila banabetu bashingwe māni bakidi pano pa ntanda bemanine bulongolodi mu ano etu mafuku. (Tanga Zekadia 8:23.) Le umo ne umo umbukata mwetu ubwanya namani kukwatakanya mpangiko itudile’ko Yehova? Muswelo umo bidi i na kukōkela boba betūlelele. (Bah. 13:7, 17) Tukashilula kulonga namino bidi ku boba badi mu kyetu kipwilo. Le myanda yotunenena bakulumpe ilombola bine’mba twibalēmekele ne kifuko kyobadi’po? Le tukankamikanga betu bana balēmeke bano bana-balume ba kikōkeji ne kwibalomba madingi a mu Bisonekwa? Le ke tudi besambile’po mu kisaka pa mwanda utala kulea’ko lupeto lwa kukwatakanya nalo mwingilo wingilwa ntanda yonso kupityila ku byabuntu? (Nk. 3:9; 1 Kod. 16:2; 2 Kod. 8:12) Lelo kwingila ku bukundwe bwa Njibo ya Bulopwe twikumonga bu kyepelo? Mushipiditu wa Yehova umwangalanga bikomo pa kifuko padi bulēme ne bumo bwa uno muswelo. Uno mushipiditu, witukwashanga kitatyi ne kitatyi tuleke kupungila mu ano mafuku a mfulo.—Is. 40:29-31.

 MWIENDELEJO UKWATAÑENE NA MUSAPU WETU

15. Mwanda waka tufwaninwe kulwa bulwi pa kusaka’mba mwiendelejo wetu ukwatañane na kiswa-mutyima kya Yehova?

¹⁵ Kya mfulo, pa kusaka kūminina ne kutabwila pamo na bulongolodi bwa Yehova, tufwaninwe kwikala na mwiendelejo ukwatañene na musapu otusapula ne “kutompa kyokya kyakusangaja Mfumwetu.” (Ef. 5:10, 11) Pa mwanda wa kubulwa kubwaninina kwetu ne bukomo bwa Satana ne ino ntanda mibi, tudi na bulwi bukatampe botulwa kyaba ne kyaba na byabubi. Batutu ne bakaka bavule momudi mudi na bulwi bukomo difuku ne difuku pa kulama kipwano kyenu na Yehova. Kino kilengejanga Yehova emusanswe kutabuka. Kemwakakōkai! Kwikala na mwiendelejo ukwatañene na kiswa-mutyima kya Leza kuketuletela nsangaji keidi mpwilo kadi kitukulupija’mba butōtyi bwetu ke bwa bitupu bitupupo.—1 Kod. 9:24-27.

16, 17. (a) Le tufwaninwe kulonga bika shi tubalonga bubi bukatampe? (b) Tukokeja kumwena namani mu kimfwa kya Anne?

¹⁶ Ino shi tubalonga bubi bukatampe, le i bika byotufwaninwe kulonga? Ketwakījai kukimba bukwashi. Kufya bubi i kwivudijija myanda bitupu. Vulukai, byanene Davida kitatyi kyāubile talala pa bubi bwandi’mba, ‘bikupa byandi ke byenda binunupa mwanda wa kubinza kwandi dyuba dyonso ne bukata.’ (Mit. 32:3) I bine, kufya bubi bwetu kwitupungijanga mu ñeni ne ku mushipiditu, ino “yewa usaba ne kwijiba’ko ukafwilwa lusa.”—Nk. 28:13.

¹⁷ Tutalei kimfwa kya Anne. * Anne waingile bu pania wa lonso ku bunkasampe bwandi. Ino washilwile bya kulu mwishinda kulu mu biyombo. Kino kyamususwile bikomo. Unena’mba: “Nashele na mutyima wa mundamunda untopekatopeka. Nabudilwe nsangaji kadi mutyumukwe mutyima kitatyi ne kitatyi.” Ino le i bika byamukweshe? Unena’mba: difuku dimo ku kupwila kwadi mīsambo imanine pa Yakoba 5:14, 15. Anne waivwanije’mba bine usakilwa bukwashi, waenda kulomba bukwashi ku bakulumpe. Pa kuvuluka byamufikile, unena’mba: “Bino bisonekwa i bulombodi bulembwe na Yehova mwanda wa tundapwe ku mushipiditu. Binini bikalanga nyeke bikomo kutoma, ino abyo byundapanga. Naingidije madingi atanwa mu bino bisonekwa, yeaunkweshe.” Myaka pa kupita’po, Anne wajokeja bukomo, pano wingidilanga Yehova na mutyima wa mundamunda muyampe kadi na bupyasakane.

18. Le usumininwe kulonga bika?

¹⁸ Bine i dyese’po kashā kubadilwa mu bantu badi mu bulongolodi bwa Yehova bwa kutendelwa mu ano mafuku a mfulo! Tusumininwei kuleka kusebula byobya bitupebwa. Inoko, tulongei bukomo mu kisaka bwa kutanwa ku kupwila mu kibundi kyetu kitatyi ne kitatyi, kukimba ba mityima myoloke mu wenu mwaba, ne kuswa bidibwa bya ku mushipiditu byotupebwa kitatyi ne kitatyi. Ne kadi twendelelei na kukōkela boba betulelele ne kwikala na mwiendelejo ukwatañene na musapu otusapula. Shi tulonge namino, tukemona bu tutabwilanga pamo na bulongolodi bwa Yehova, kadi ketukapungilapo nansha dimo na kulonga bilumbuluke!

[Kunshi kwa dyani]

[Bipangujo bya Kifundwa]

[Kifwatulo pa paje 27]

[Kifwatulo pa paje 29]

[Kapango pa paje 29]

KIPINDI KYA BULONGOLODI BWA YEHOVA KYA PANO PANSHI I KIBUNDWE NA:

[Caption on page 29]

1. Kitango Kyendeji

2. Makomite a Misambo

3. Batadi bendakana

4. Bitango bya bakulumpe

5. Bipwilo

6. Basapudi bonso umo ne umo

[Kifwatulo]

[Kifwatulo pa paje 31]

Kwashai na bupyasakane bakwabo nabo basangele ne kutwela mu bulongolodi bukatakata bwa Yehova