“Muyuke Kutonga Kyokya Kitabukile Kunengela”
“Muyuke Kutonga Kyokya Kitabukile Kunengela”
“Muyuke kutonga kyokya kitabukile kunengela.”—FID. 1:10, Myanda Miyampe ku Bonso.
BIPANGUJO BYA KIFUNDWA
Le bimonwa bya Isaya, Ezekyele, ne Danyele bitupanga kikulupiji’ka?
Le i ñeni’ka yotuboila ku byobya bilonga kipindi kya bulongolodi bwa Yehova kya pano panshi?
Le kino kishinte kibakukwasha usumininwe kulonga bika?
1, 2. Bana ba bwanga ba Yesu bādi basaka kuyuka bupolofeto’ka bwa mafuku a mfulo, ne mwanda waka?
PETELO, Yakoba, Yoano ne Andele bādi pa bunka na Mfumwabo. Pākidi’tu kyaba kityetye na pēbalombwele Yesu myanda itala konakanibwa kwa tempelo yobādi besumbidile bikomo. (Mako 13:1-4) Pene nabo bāmwipangula’mba: “Betusapwilepo bidi pakafikanga bino’bi? Lelo kadi ne kyo tukayūkilapo pa kwiya kobe pano ne pamfulo ya panopantanda i kika le?” (Mat. 24:1-3) Yesu wāshilwile kwibalombola binkumenkume nansha ngikadilo, ilombola kushinta kukatampe kwa umbūmi, kadi ilombola mafuku a mfulo ya ino ngikadilo mibi ya bintu ya Satana. Mu bino binkumenkume mudi kimo kyātengele mpata bana ba bwanga ba Yesu. Pa kupwa kwibasapwila myanda ipuñanya pamo bwa, mavita, bipupo bya nzala ne kuvudila’ko kwa kujilula kwa bijila, wātobele amba, kudi ne bintu biyampe bikalongeka mu mafuku a mfulo. Wānene’mba: “Kadi īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.”—Mat. 24:7-14.
2 Bana ba bwanga ba Yesu bādi kala basapula myanda miyampe ya Bulopwe pamo na Kidishitu. (Luka 8:1; 9:1, 2) Kepabulwe padi kino kyēbavulwije byāebalombwele’mba: “Budimi bwa kwangula i bukata, nanshi bakwangula bo batyetye, ino nanshi mwikale kwisashilapo mwine wakwangwila atalule bakwangula bāye kwangula budimi bwandi.” (Luka 10:2) Ino le bādi bakubwanya’tu namani kusapula “panopantanda ponso” ne “kusapwila’yo ku mizo yonso”? Le bene bakwangula badi bakulupuka kwepi? Shi badi’mba bādi na muswelo umona bya kumeso kitatyi kyobādi bashikete na Yesu, na bubine bādi bakutulumuka pa kumona mufikidila bino binenwa bityetye bya Yesu bidi mu Mateo 24:14.
3. Luka 21:34 ufikidilanga namani dyalelo, ne i bipangujo’ka byotukokeja kwiipangula?
3 Tudi mu kitatyi kifikidila bupolofeto bwa Yesu. Midiyo ne midiyo ya bantu i bekutyile umbumo mwanda wa kusapula myanda miyampe ya Bulopwe ntanda yonso. (Is. 60:22) Ino Yesu wālombwele amba bamobamo bakakolelwa kushala bemanije mu ano mafuku a mfulo. Bakapuakanibwa ne “kulemenenwa.” (Tanga Luka 21:34.) Twimwenanga kufikidila kwa bino binenwa. Nansha ke mu bantu ba Leza namo, bamobamo badi mu kilabi. Kino kimwekanga mu butyibi bobakwata mu myanda itala twaji twa ntanda, masomo malamala, kulondalonda bya bupeta ne kitatyi kyobapityija mu makayo ne mu kwipwija mukose. Bakwabo nabo bapungilanga pa mwanda wa masusu ne kuzumbijazumbija mutyima mu būmi. Wiipangule’mba: ‘Le ami noñanga namani? Le butyibi bonkwatanga bulombolanga’mba mbadikije bika mu būmi?’
4. (a) Polo wālombele bika pa bene Kidishitu ba mu Fidipai, ne mwanda waka? (b) Le mu kino kishinte, ne mu kilonda’ko’ki tusa kubandaula’mo myanda’ka ne na kitungo’ka?
4 Bene Kidishitu mu myaka katwa kabajinji badi bafwaninwe kulonga buninge bwa kulama kipwano kyabo na Leza pa kifuko kibajinji. Mutumibwa Polo wāmwene’mba bine kilomba kulombela mwanda wa bene Fidipai ‘batompe byobya bintu bisansene’ ke byobya bitabukile kunengela kadi. (Tanga Fidipai 1:9-11.) Ino bavule, kubadila’mo ne mutumibwa Polo, “[bātabukamo] kuningija na kusapula mwanda wa Leza, ne moyo mwine mpika.” (Fid. 1:12-14) Muswelo umo onka ne dyalelo, bavule umbukata mwetu basapulanga Kinenwa kya Leza pambulwa moyo. Ino le kubandaula byobya bilongwa pano mu bulongolodi bwa Yehova, kukokeja kwitukwasha tute mutyima ku mwingilo wa mvubu mpata wa busapudi? I bine, kukokeja! Mu kino kishinte tusaka kulangulukila pa mpangiko itūdile’ko Yehova ikwasha kufikidila kwa Mateo 24:14. Le bulongolodi bwandi budi na kitungo’ka, ne kuyuka kino kitungo kuketukwasha batwe ne bisaka byetu namani? Potukabandaula kishinte kilonda’ko, tukayuka i bika biketukwasha tūminine ne kutabwila pamo na bulongolodi bwa Yehova.
KIPINDI KYA MŪLU KYA BULONGOLODI BWA YEHOVA KYENDELELANGA
5, 6. (a) Mwanda waka kupityila ku bimonwa Yehova witulombola mwikadile kipindi kya mūlu kya bulongolodi bwandi? (b) I bika byāmwene Ezekyele mu kimonwa?
5 Kudi kadi ne myanda mivule, Yehova yakālembejepo mu Kinenwa kyandi kisonekwe. Kimfwa, mwingidilo wa bongolo, nansha mwingidila diulu ne ntanda kebilombwelwepo kamo ne kamo, nansha kuyuka bino bintu byo kwadi kukokeja kwitusangaja! Ino Yehova i mwitulombole myanda yonso yotusakilwa pa kwivwanija mpango yandi ne kwikala na būmi bukwatañene na ino mpango. (2 Tim. 3:16, 17) Bine, kitusangaja’po kashā pa kuyuka’mba Bible witulombolanga myanda imoimo ya mwikadile kipindi kya bulongolodi bwa Yehova kebumweka na meso! Tusangalanga mpata potutanga mulombwedilwe kipindi kya mūlu kya bulongolodi bwa Yehova bulombwelwe mu Isaya, Ezekyele, Danyele ne mu mānga ya kusokwelwa kwa Yoano. (Is. 6:1-4; Ezek. 1:4-14, 22-24; Dan. 7:9-14; Kus. 4:1-11) Kidi pamo bwa Yehova wajikula makumbi mwanda wa tumone mwikadile mūlu. Mwanda waka witulombola ino myanda?
6 Yehova usakanga tuvuluke nyeke’mba tudi munda mwa bulongolodi bwandi bwa mūlu ne panshi. Kutentekela pa byotumona, kudi bivule byotukokeja kulonga mwanda wa kukwatakanya mpango ya Yehova. Kimfwa, Ezekyele wāmwene kipindi kya bulongolodi bwa Yehova kebumweka bwelekejibwe na dikalo dikatampe dya mūlu. Dino dikalo dyadi dikokeja kwenda ku mitamba yonso. (Ezek. 1:15-21) Dino dikalo dyadi dibwanya kwenda kulampe, konso kutadidila matonto. Kadi Ezekyele wāmwene mu kimonwa, mwikadile utentamine pa kabalwe ka dino dikalo. Wānene’mba: “Namona pamo’nka bwa kumweka kwa mukuba mukundule, pamo’nka bwa kumweka kwa mudilo munda mwakyo . . . kwine kuno’ku ko kwadi kumweka kwa kīfwa kya ntumbo ya Yehova.” (Ezek. 1:25-28) Masenda amululukile Ezekyele mu ngitu pa kumona kino kimonwa! Wāmwene Yehova aye mwine uludika bulongolodi bwandi, konso kobufwaninwe kutadidila na mushipiditu sandu wandi. Bine, i mwanda wa kutendelwa kashā pa kuyuka muludikilwa kipindi kya mūlu kya bulongolodi bwa Yehova!
7. Kimonwa kya Danyele kitukulupijanga namani?
7 Bintu byāmwene Danyele mu kimonwa nabyo bitupa kikulupiji. Wāmwene Yehova ulombwelwe bu “Kafulamoba” ushikete pa kipona ne lubimbi lwa mudilo. Kino kipona kyādi na matonto. (Dan. 7:9) Yehova wāsakile Danyele ayuke’mba bulongolodi bwandi bwendelelanga, kadi bufikidijanga mpango yandi. Danyele wāmwene kadi ne “umo wifwene’nka na mwana muntu,” ke Yesu kadi, wāpebwa lupusa lwa kutala kipindi kya bulongolodi bwa Yehova kya pano panshi. Bufumu boloke bwa Kidishitu ke bwa myaka mityetyepo’tu kete. Ino i “bufumu bwa kulādilamo nyeke, kebukapitepo, ne bulopwe bwandi i bwampikwa kukōnakanibwa.” (Dan. 7:13, 14) Twi bakunkwe ku mutyima kukulupila mudi Yehova ne kwitabija byaetulongela. Wāpene “bufumu ne ntumbo ne bulopwe” kudi wandi Mwana Yesu wānekenye matompo. Yehova ukulupile mpata wandi Mwana. O mwanda netu tufwaninwe kumukulupila Yesu mfumu wetu.
8. Bimonwa bitamba kudi Yehova byātonwene ba Ezekyele ne Isaya balonge bika, netu bino bimonwa bitutononanga tulonge bika?
8 Le bino byotwayuka pa kipindi kya bulongolodi bwakubulwa kumweka bwa Yehova bidi na lupusa’ka potudi? Pamo bwa Ezekyele, tukekala na mutyima wa kwityepeja ne wa bulēme pa bilonga Yehova. (Ezek. 1:28) Kulangulukila pa bulongolodi bwa Yehova kuketutonona tulonge’po kintu, ’nka na mwālongele Isaya. Kitatyi kyāmwene mukenga wa kusapwila bakwabo byobya bilonga Yehova, wakwatakenye uno mukenga pambulwa kulejaleja. (Tanga Isaya 6:5, 8.) Isaya wādi ukulupile’mba, na bukwashi bwa Yehova, wādi wa kunekenya bikoleja bya miswelo yonso. Ne batwe netu, ino myanda mityetye yotuyukile itala kipindi kya bulongolodi bwa Yehova bwa kubulwa kumweka kuketupa kityino kikatampe kwadi ne kwitutonona tulonge’po kintu. Kino kitukankamika’po kashā pa kumona bulongolodi bwendelela nyeke kumeso, kadi na kitungo kya kufikidija mpango ya Yehova!
KIPINDI KYA BULONGOLODI BWA YEHOVA KYA PANO PA NTANDA
9, 10. Mwanda waka kwadi kusakibwa kipindi kya bulongolodi bumweka na meso?
9 Yehova, kupityila kudi wandi Mwana i mutūle’ko mpangiko pano pa ntanda ingidila pamo na kipindi kya bulongolodi bwa momwa mūlu bwampikwa kumweka. Mwanda waka byadi bilomba kwikale bulongolodi bumweka na meso pa kufikidija mwingilo ulailwe mu Mateo 24:14? Tutalei bubinga busatu.
10 Dibajinji, Yesu wānene’mba uno mwingilo wa kusapula wadi wa kufikija bandi bana ba bwanga “ne kulampe kwine kumfulo kwa ntanda.” (Bil. 1:8) Dya bubidi, kwadi kukimbwa bulongolodi bwa kupāna bidibwa bya ku mushipiditu ne kukwatakanya bonso bengila uno mwingilo. (Yoa. 21:15-17) Dya busatu, kwadi kufwaninwe kukwatwa mpangiko mwanda wa boba basapula myanda miyampe bekale bebungila pamo mwanda wa kutōta Yehova ne kufundijibwa mwa kwingidila uno mwingilo. (Bah. 10:24, 25) Kufikidija bino bitungo ke mitembwepo. Balondi ba Kidishitu pa kubwanya uno mwingilo, badi basakilwa bulongolodi.
11. I muswelo’ka otukalunga kuboko ku kipindi kya bulongolodi bwa Yehova bumweka na meso?
11 I muswelo’ka otukokeja kulunga kuboko ku mpangiko itutūdile’ko bulongolodi bwa Yehova? Muswelo umo bidi i na kukulupila mu boba batongelwe na Yehova ne Yesu bu bakwitutangidila mu mwingilo wetu wa kusapula. Kudi mingilo mivule ne bintu palapala mu ino ntanda bikokeja kulongwa na boba bapelwe kwituludika. Ino, le mwingilo mwinemwine wa kipindi kya bulongolodi bwa Yehova bumweka na meso i mwingilo’ka?
KWIPĀNINA “KYOKYA KITABUKILE KUNENGELA”
12, 13. Le bakulumpe bene Kidishitu bavuijanga namani biselwa byabo ne mwanda waka kino kitukankamika?
12 Bakulumpe bene Kidishitu ba bwino i batongwe kujokoloka ntanda yonso mwanda wa kwendeleja busapudi bwa myanda miyampe mu matanda abo. Shi bano banabetu basaka kukwata butyibi kampanda bakimbanga bidi bwendeji mu Kinenwa kya Leza kidi pamo bwa ‘kinanu kya ku maulu abo ne kitōkeji kya mu dishinda dyabo’ ne kulomba bukwashi bwa Yehova.—Mit. 119:105; Mat. 7:7, 8.
13 Pamo’nka na boba bādi bemanine mwingilo mu myaka katwa kabajinji, bakulumpe bene Kidishitu bemanine mwingilo wa busapudi dyalelo i bepāne “ku kufundija kwa myanda.” (Bil. 6:4) Basangelanga bikomo kwendelela kwa uno mwingilo wa kusapula myanda miyampe mu bibundi byabo ne kujokoloka ntanda yonso. (Bil. 21:19, 20) Kebaletangapo bijila ne mbila keidi mpwilo ya abo bene. Ino balondanga Bisonekwa ne buludiki bwa mushipiditu sandu kitatyi kyobakwata mpangiko ya kukwasha mwingilo wa busapudi wendelele kumeso. (Tanga Bilongwa 15:28.) Na kulonga namino bano banabetu betulelele baletanga kimfwa kiyampe ku bonso mu bipwilo bya kwabo.—Ef. 4:11, 12.
14, 15. (a) I mpangiko’ka itūdilwe’ko mwanda wa kukwatakanya mwingilo wa busapudi ntanda yonso? (b) Le umonanga namani kiselwa kyobe kya kukwatakanya mwingilo wa kusapula Bulopwe?
14 Kuteakanya bidibwa bya ku mushipiditu mu mabuku etu, kupwila ne bitango kyaba ne kyaba, i mwingilo keumonwangapo na bavule. Tununu ne tununu twa banabetu bepāne balamunanga ne kukōka mpikila bidibwa bya ku mushipiditu mu ndimi kintu kya 600 mwanda wa bantu bavule bayuke “myanda ya bintu bikatampe bya Leza” mu ndimi yabo. (Bil. 2:7-11) Banabetu bansongwalume ne bansongwakaji bengila bikomo mwanda wa kulupula mabuku etu kupityila ku bitampilo bitampa lubilolubilo ne kwiakuta bivwebivwe. Ano mabuku atumwanga mu bipwilo palapala kufika ne mu bibundi bya kunja.
15 Kudi mpangiko mivule ikwatwanga mwanda wa twipāne mu mwingilo wa kusapula myanda miyampe pamo na kipwilo kya penu. Kimfwa kudi banabetu tununu ne tununu bepāna mu mwingilo wa lūbako lwa Mobo a Bulopwe, ne Mobo a Bitango, mu mwingilo wa kukwasha banabetu baponenwe na bimpengele nansha boba babela, kuteakanya bitango bikatampe ne bityetye, ne kufundija ku masomo palapala a bu Leza, ino i mingilo ibala inga’tu mu mivule ingilwa batwe kuyuka mpika. Le ino mingilo yonso idi na kitungo’ka? I kupēleja mwa kusapwila myanda miyampe, kukwatakanya būmi bwa ku mushipiditu bwa boba basapula myanda miyampe ne kusalaja butōtyi bwa bine. Le kipindi kya bulongolodi bwa Yehova kya pano panshi, bine i kipānine mu byobya bitabukile kunengela? Ne kutatana kwine mpika, i kipānine’mo!
IULA KIMFWA KYA BULONGOLODI BWA YEHOVA
16. I myanda’ka ikokeja kulangulukilwa’mo mu kifundwa kyobe kya Bible, kya pa kasuku nansha kya mu kisaka?
16 Le twitūdilanga’ko kitatyi kya kulangulukila pa mingilo ingilwa na bulongolodi bwa Yehova? Bamobamo mu butōtyi bwa kisaka nansha mu kifundwa kya kasuku betūdilanga’ko kitatyi kya kulonga bukimbi pa ino myanda ne kulangulukila’po. Bimonwa byāmwene ba Isaya, Ezekyele, Danyele ne Yoano bisangaja kwifunda. Dibuku Les Témoins de Jéhovah — Prédicateurs du Royaume de Dieu ne mabuku makwabo ne ma DVD adi mu ludimi lwenu, bituyukijanga bintu bisangaja bilongwa na bulongolodi.
17, 18. (a) Le i bika byowamwena mu kwifunda kino kishinte? (b) Le i bipangujo’ka byotufwaninwe kwiipangula?
17 Kulangulukila pa bitulongela Yehova kupityila ku bulongolodi bwandi kudi na kamweno kotudi. Tusumininwei na kwingidila pamo na buno bulongolodi bwa kutendelwa, mu kulonga byobya bitabukile kunengela. Kulonga namino kuketukomeja’mba twikale basumininwe pamo bwa Polo, wālembele’mba: “Penepo kadi byo tudi ne buno bwingidi, mo twafwilwako lusa, ketupungilapo, ehe.” (2 Kod. 4:1) Kadi wakankamikile bengidi nandi’mba: “Ketukikōkai mu kulonga bilumbuluke; ke-twi-bantu tukāngulanga mwaka pa kufikila ponka, wivwane ne kupungila mpika.”—Ngat. 6:9.
18 Wikale kasuku, nansha mu kisaka, le ubamone’mba kudi mu mwanda kampanda mosakilwa kwilemununa’mba wikale na kibidiji kya kulonga byobya bitabukile kunengela? Tubulwe’po kupēleja būmi bwetu ne kutyepeja’ko kitatyi kya kwipwija mukose, mwanda wa twipānine mu mwingilo utabukile yonso wa busapudi? Mu kishinte kilonda’ko tukabandaula myanda itano iketukwasha tutabwile pamo na bulongolodi bwa Yehova.
[Bipangujo bya Kifundwa]
[Kifwatulo pa paje 22]
[Kifwatulo pa paje 24]
