Bakulumpe, Le Mutūkijanga Mutyima wa “Mūya Mukōkekōke”?

Angela, * kaka kunga-kaji wa myaka 30 ne musubu, i mufitwe. Ukungile bakulumpe. Le basa kumusapwila bika? Bine, walekele’byo kupwila mu kitatyi kityetye, ino wadi mukōke pa kupwa kushikilwa difuku dyonso na mingilo ya kukwasha banunu. Kutentekela pa yandi mingilo ya difuku ne difuku, wādi uzumbija mutyima bininge pa mwanda wa misongo ya inandi.

Shi wadi amba i abe wa kukapempula Angela, le wadi wa kukankamika mutyima wa uno “mūya mukōkekōke” namani? (Yel. 31:25) Dibajinji bidi, le ukateakanya namani bupempudi bwa bukumbi amba bwikale butūkija mutyima?

LANGULUKILA PA NGIKADILO IDI’MO BANABENU

Kyaba kimo, batwe bonso tukōkanga mwanda wa kaji ketu nansha biselwa byetu bya kiteokratike. Kimfwa, mupolofeto Danyele ‘wāpungile’ kitatyi kyaāmwene kimonwa kyakāivwanijepo. (Dan. 8:27) Wākwashibwe kitatyi kyāmumwekele mwikeulu Ngabudyele. Mukendi wa Leza wāpele Danyele kwivwanija, wamukulupija’mba Yehova waivwene milombelo yandi, ne kumulombola’mba ukidi “muswedibwe nakampata.” (Dan. 9:21-23) Binenwa bitonge biyampe byānene mwikeulu mukwabo mwenda mafuku byākomeje mupolofeto mupungile.—Dan. 10:19.

Mu muswelo umo onka, kumeso kwa kukapempula mwanetu mu lwitabijo umweka  bu mukōke nansha mutyumukwe mutyima, witūdile’ko kitatyi kya kulangulukila pa ngikadilo yadi’mo. Le ulwanga na makambakano’ka? Le ano makambakano atyepejanga bukomo bwandi namani? Le ulombolanga ngikadilo’ka miyampe? Richard, wingile bu mukulumpe myaka 20 ne kupita unena’mba, “ntele mutyima bininge ku bukomo bwa banabetu.” Ubweja’ko amba, “Byonangulukilanga na katentekeji pa ngikadilo yobadi’mo kumeso kwa bupempudi, bimpelelanga kutana muswelo wa kwibakankamika kukwatañana na bisakibwa byabo.” Shi mukulumpe mukwabo usa kukakutūla mu bupempudi, le mubulwe’po kubandawila pamo ngikadilo idi’mo mwanenu?

PĀ BANABENU BWANAPABO

Uketabija padi amba kulombola muntu milangwe yobe kubwanya kumuvutakanya. Tulete kimfwa: Mwanenu ubwanya kukomenwa kwisamba pamupempula bakulumpe. Penepa ukapwa ano makambakano namani? Kumungamunga kobe kwampikwa budimbidimbi ne binenwa bityetye bikulupija bibwanya kwikala na lupusa luyampe. Michael, mukulumpe wingile myaka 40 ne kupita ushilulanga divule bupempudi bwandi na binenwa bya amba: “Uyukile, dyese dimo dikatampe didi na mukulumpe i kupempula banababo ku mobo abo ne kwibayuka biyampe. O mwanda nadi ntengele difuku dya dyalelo mwanda wa ngiye kukumona.”

Ubwanya kulombela milombelo itamba ku mutyima ku ngalwilo kwa bupempudi. Mutumibwa Polo watelele patōkelela mu milombelo yandi lwitabijo lwa banababo, buswe ne kūminina kwabo. (1 Tes. 1:2, 3) Kitatyi kyolombola muswelo ukutenga ngikadilo miyampe ya mwanenu, uteakanyanga mutyima obe ne wandi mwanda wa kwisamba mīsambo yūbaka. Binenwa byobe bibwanya ne kutalaja mutyima. Ray mukulumpe wa bwino unena’mba, “kyaba kimo batwe bonso twilwanga biyampe byotuloñanga. O mwanda kitatyi kituvuluja’byo muntu, kino kitūkijanga mutyima wetu.”

PĀNA KYABUNTU KYA KU MUSHIPIDITU

Pamo bwa Polo, nobe ubwanya kupāna ‘kyabuntu kya ku mushipiditu’ na kupāna  mulangwe wa mu Bisonekwa, nansha’tu wa mu vese umo. (Loma 1:11) Kimfwa, mwanetu upepwa mutyima ubwanya kwimona bu wampikwa mvubu, pamo bwa kaimba wa mitōto wēdingakenye na “luvungu ludi mu mwishi” lūmu tē. (Mit. 119:83, 176) Pa kupwa kuleta shintulwilo mīpi ya kishima kampanda, ubwanya kulombola kikulupiji kyodi nakyo kya amba mwanenu ‘kavulaminwepo’ misoñanya ya Leza.

Mu muswelo umo onka, le kyelekejo kya ndalama yājimine kikakwasha kaka upalukile ku kipwilo nansha mutalale? (Luka 15:8-10) Ndalama yājimine yādi padi ya malungo malēme mapungwe na nsahabu mivule. Pomwisambila pa kino kyelekejo, kaka ubwanya kukwashibwa amone amba udi na mvubu mu kipwilo kya bwine Kidishitu. Pa kupwa kwisambila pa kino kyelekejo, ubwanya kukomeneja muswelo umutele Yehova mutyima pamo bwa muntu ubadilwa mu mikōko yandi.

Divule dine banabetu mu lwitabijo basangelanga kulombola milangwe yabo kukwatañana na binena Bible. O mwanda kokesamba’nka abe mwine! Pa kupwa kutanga vese ukwatañene na ngikadilo yadi’mo, ubwanya kutonga’mo kishima kikatampe nansha musemwa ne kumunena ashintulule’o. Kimfwa, pa kupwa kutanga 2 Kodinda 4:16, mukulumpe ubwanya kwipangula’mba, “le kodi mwimwene miswelo ikulumbulwile Yehova?” Kulonga namino kubwanya kutwala ku “kwikankamika” kwa bine.​—Loma 1:12.

Ubwanya kadi kutūkija mutyima wa mwanenu mu lwitabijo na kwisambila pa muntu utelelwe mu Bible ukwatañene na ngikadilo yadi’mo. Muntu wimona bu mutyumukwe mutyima ukakwatañana padi na bantu pamo bwa Hana nansha Epafolodetusa, bātyumukilwe mutyima kyaba kimo ino bādi nyeke balēme ku meso a Leza. (1 Sam. 1:9-11, 20; Fid. 2:25-30) Ubulwe’po kwisambila pa bimfwa bimo biyampe bya mu Bible shi bikulomba kulonga namino?

EDELELA KUMUPEMPULA

Ubwanya kulombola’mba utele batutu ne bakaka mutyima bya binebine na kwendelela kwibapempula. (Bil. 15:36) Shi bupempudi bubafika ku mfulo, ubwanya kumona’mba i biyampe kutūla’ko mpangiko ya kusapula nandi pamo. Bernard mukulumpe wa bwino paaketene monka na tutu nansha kaka waapempwile panopano, wamuvulwije padi na bunwa madingi amupelwe na kumwipangula amba, “nsapwile bidi, lelo adi biyampe?” Shi umute mutyima uno muswelo, ukabwanya kujingulula shi usakilwa bukwashi bukwabo.

Pano po pene pasakilwa batutu ne bakaka kutebwa mutyima, kutejibwa, ne kuswedibwa. (1 Tes. 5:11) Nanshi, kumeso kwa kulonga bupempudi bwa bukumbi, witūdile’ko kitatyi kya kulangulukila pa ngikadilo idi’mo mwanenu. Tūla uno mwanda mu milombelo. Tonga bisonekwa bifwaninwe. Nabya ukatana bishima biyampe bya kutūkija mutyima wa “mūya mukōkekōke”!

[Kunshi kwa dyani]