Lelo Ubavuluka?

Lelo utañanga manimelo a Kiteba kya Mulami a panopano? Eyo, tala bidi shi ubwanya kulondolola bino bipangujo:

Le kwibidila Bible i bika, ne bene Kidishitu bafwaninwe kwikumona namani?

Kwibidila Bible i kibidiji kya kumupūtula’tu bitupu na kikulupiji kya amba ponso po wakapūtula, vese mubajinji ukakwasha muntu usakilwa bukwashi. Bene Kidishitu ba bine kebengidijangapo ino miloto. Ino, befundanga Bible mwanda wa kwikala na buyuki bwa bine ne kuyuka bulombodi bwa Leza.​—15/12, paje 3 (Falanse).

Lelo “ntanda” ikapita i bika?

“Ntanda” ikapita i ntanda ya bantu badi na būmi bwampikwa kukwatañana na kiswa-mutyima kya Yehova. (1 Yoa 2:17) Nshi ne bantu ba kikōkeji bakapandanga.​—1/1, paje 5-7.

Le Abele ukinena kotudi namani nansha i mufwe? (Bah. 11:4)

Ukinena kupityila ku lwitabijo. Tubwanya kuboila ñeni ku lwitabijo lwandi ne kwilwiula. Kimfwa kyandi kikidi kyūmi.​—1/1, paje 12.

Le i mu bintu’ka motufwaninwe kuta mutyima kutyina twakasonsoloka kudi Leza?

Bintu bimo bidi i bino: Yetu mingilo nansha kaji, kwisangaja ne kwipwija mukose kotutonga, kupwana na babutule bapangwe, kwingidija bya busendwe bya dyalelo, myanda itala bukomo bwetu bwa ngitu, mumweno mubi wa lupeto, kumona mumweno wetu ne kyepelo kyetu na mvubu mipitepite.​—15/1, paje 12-21.

Le i ñeni’ka yotubwanya kuboila ku kwityepeja kwa Mosesa?

Pa kyaba kya kwitatwila lupusa lwandi, Mosesa wadi ukulupile mudi Leza, ke aye mwinepo. Ketusakangapo nansha dimo kwitatwila bukomo, lupusa nansha bwino bwetu bwa kibutwila; ino tusakanga kukulupila mudi Yehova. (Nk. 3:5, 6)​—1/2, paje 5.

Le bantu bakasangulwa bakekala kwepi?

Kibalwa kityetye kya bantu​—144000—​bakekala momwa mūlu. Ino, bantu bavule bakasangulwa bakalujibwa ku būmi pano pa ntanda, wna kyepelo kya kwikala bōmi nyeke.​—1/3, paje 6.

Le bene Isalela ‘bātwejibwe kwisao kwa ku mutyima’ mu buluji’ka? (Yel. 9:26)

Bātombokele kadi bādi basakilwa kutalula bintu byālengeje mityima yabo ipumpunye​—milangwe, malangatyima, nansha kukanina kwa mutyima kebyādipo mikwatañene na milangwe ya Leza. (Yel. 5:23, 24)​—15/3, paje 9-10.

Le Yesu wādi kimfwa kya muntu udi na būmi bwa kitungo namani?

Wādi na kituno kya kulonga kiswa-mutyima kya Leza mu būmi. Wādi usenswe Shandi bininge, kadi wādi usenswe bantu. Mu uno muswelo, Yesu wādi uyukile amba Shandi umusenswe ne kumwitabija. Bino byo byāmukweshe ekale na būmi budi na kitungo.​—1/4, paje 4-5.

Le i bika bibadilwa mu kipindi kya pano panshi kya bulongolodi bwa Leza?

Mubadilwa Kitango Kyendeji, komite ya musambo, batadi bendakana, bitango bya bakulumpe, bipwilo, ne busapudi bwa muntu mwine.​—15/4, paje 29.

Mwanda waka tubwanya kunena’mba Leza kādipo ntapani pa kuleta butyibi bwandi?

Yehova kaloelelwangapo mu lufu lwa mupupakane. (Ezek. 33:11) Bilongwa byandi bya pa kala bilombola’mba wādyumwine bantu na buswe kumeso kwa kuleta butyibi. Kino kibwanya kwitupa lukulupilo lwa kupanda ku butyibi bwiya’ko.​—1/5, paje 5-6.

Le bene Isalela bādi bepaya bantapani na kwibayeyeka ku mityi?

Mhm. I mizo mikwabo ya kala yālongele namino, ke bene Isalelapo. Dibajinji mu kitatyi kya Bisonekwa bya Kihebelu, banonga-bibi bādi bepaibwa dibajinji, kimfwa na kwaswa mabwe. (Levi 20:2, 27) Kupwa umbidi wa muntu mufwa wādi uyeyekwa ku mutyi bu pa kudyumukila bakwabo.​—15/5, paje 13.

Mwanda waka ndoe ya ntanda i mikomo?

Nansha bantu byobaloñanga bintu bivule, kebadipo na bukomo bwa kōlola matabula abo. (Yel. 10:23) Satana byaludika ntanda, bantu kebakabwanyapo kuleta ndoe. (1 Yoa 5:19)​—1/6, paje 16.