Yehova ‘Unselele Kiselwa Mafuku Onso’

Maretha du Raan

Nansha byonādi mbela misongo ya mu kitulumukila yādi imweka bu keibwanyapo kukoma, nēmwenine bukwashi bwa Tata wetu muswe wa mūlu mu būmi bwami. Kadi mu myaka 20 ne kupita, nātene nsangaji ya pa bula mu kwingidila Yehova bu pania.

Nābutwilwe mu 1956 na misongo itwa bu spina-bifida. Mwanda tujilojilo twa mu muongo twadi tujike. Koneka kwa mijilo kwalengeje nkomenwe kwenda ne kukolomona misongo mikwabo mikomo.

Kyaba kimo kumeso kwa ami kubutulwa, ba mulume ne mukaji Batumoni ba Yehova bamishonele bashilwile kwifunda Bible na bambutwile bami. Ponādi nakidi mwanuke, kwādi’tu basapudi batyetye bādi bashikete mu kyetu kibundi kya Usakos mu Namibi. Byokēkwadipo kipwilo, twādi tubandaula myanda yādi ku mpangiko ya ku kupwila mu kisaka. Ami pa kubwanya myaka isamba-ibidi, bampasula mpamvu mwanda wa kushitula dishinda mu ngitu yami mwakumwena muswelo wa kusukula. Pa kubwanya myaka 14, nashilula kupona kifwafwa. Nkyābwenyepo kupwa masomo ami mwanda masomo a Inivelesite ādi kulampe kadi nādi nsakilwa kutebwa mutyima bininge na bambutwile bami.

Inoko, nākwete butyibi bwa kuningisha kipwano kyami na Yehova. Mabuku etu mavule a bwine Kidishitu keādipo mu Afrikaans, ludimi lwami lwa kibutwila. O mwanda nēfundile kutanga Angele mwanda wa kwifunda mabuku etu mavule. Naikala musapudi wa Bulopwe ne kubatyijibwa na myaka 19. Mu bula bwa myaka iná yalondele’po, nākambakanibwa na misongo mivule ne bikoleja bya mu ñeni. Kadi, mu kyetu kibundi byomwādi bantu bekute mu bumo, kityino kya bantu kyādi kinengeja nkomenwe kupyasakena mu mwingilo.

Ami pa kubwanya myaka 20 ne musubu, twaviluka mu Namibi twaenda mu Afrika wa Kunshi, kadi nābwanya kwenda ku kipwilo musunsa mubajinji. Bine kino kyādi kintu kya kutendelwa’po kashā! Inoko, nāenda kukapasulwa monka​—pano ke lupasulo lwa kupingakanibwa mujondo.

Mafuku matyetye pa kupita’po, naivwana mutadi wa kipindi wisambila pa mutwe wa mwanda wimanine pa kwingila bupania. Binenwa byandi byantenga ku mutyima. Nādi ndyukile amba ne kabole wabelabela, ino nēmwenine muswelo wāunkwatakenye Yehova mu makambakano mavule. O mwanda nālombele kwingila bu pania wa lonso. Inoko, pa mwanda wa misongo yami, bakulumpe beshisa kwitabija kulomba kwami.

Ino nakwata butyibi bwa kulonga bukomo bwa kusapula Bulopwe. Na bukwashi bwa mama ne bwa bantu bakwabo, nalonga bukomo bwa kutūla mu bula bwa myeji isamba ne kupita nsá itūlanga bapania. Kino kyālombwele kusumininwa konādi nsumininwe kwingila bu pania ne kulombola’mba, nādi mbwanya kwikankila’ko mu misongo yami. Na dinga monka fomu, ebiya bakulumpe baitabija kulomba kwami. Mu difuku 1 Kweji 9, 1988, nāikala pania wa lonso.

Ponādi bu pania, nādi nemwena nyeke bukwashi bwa Yehova. Kufundija bapya bubinebine pa kyaba kya kubanga ngikadilo yami kwāunkingile, kwaundisha, ne kunkwasha ntame ku mushipiditu. Nēmwenine nsangaji mikatampe ya kukwasha bantu bavule bepāne ne kubatyijibwa.

Ndi’nka kabole wabelabela. Inoko Yehova ‘unselele kiselwa mafuku onso.’ (Mit. 68:19) Uloñanga bivule kupita ne pa kunkwasha ngikale na būmi butadika’ko; unkwashanga ngikale’ko na nsangaji!

[Kifwatulo pa paje 9]