Leka Bivulujo Bya Yehova Bikale Bu Nsangaji Ya Mutyima Obe

‘Bivulujo byobe nayata’byo ke bupyane bwa nyeke na nyeke.’​—MIT. 119:111.

USA KULONDOLOLA NAMANI?

Le i bubinga’ka botudi nabo bwa kusangela mu bivulujo bya Yehova?

Le i muswelo’ka otubwanya kutamija kikulupiji mudi Yehova?

Mwanda waka i biyampe kuvudilwa bya kulonga mu mingilo ya Bulopwe?

1. (a) Le bantu betabanga ku bivulujo miswelo’ka, ne mwanda waka? (b) Le mitatulo ibwanya kona muswelo umona muntu madingi namani?

 BANTU betabanga ku buludiki mu miswelo mishileshile. Kivulujo kya muntu wa lupusa kibwanya kwitabijibwa na nsangaji, ino madingi a mulunda nansha muntu udi na lupusa lutyetye abwanya kupelwa patōkelela. Muswelo wiivwananganga bantu ku mutyima ku bulemununi ne ku kidyumu nao i mwishile bininge. Bamo bevwananga bulanda, kutyumukwa mutyima ne bumvu kitatyi kyobebalemununa nansha kwibadingila, ino bakwabo nabo babwanya kukankamikwa, kwikala na kikulupiji ne kusaka kwilumbulula. Mwanda waka kudi kuno kwishila? Mwanda umo bidi i mitatulo. Na bubine, mushipiditu wa kwizunzula ubwanya kona mumweno wa muntu, kumulengeja apele madingi ne kuleka kumwena bufundiji bwa kamweno.​—Nk. 16:18.

2. Mwanda waka bene Kidishitu ba bine basangelanga madingi atamba mu Kinenwa kya Leza?

² Pakwabo kadi, bene Kidishitu ba bine basangelanga madingi a kamweno, nakampata shi emanine pa Kinenwa kya Leza. Bivulujo bya Yehova biletanga bujinguludi bwa kamweno, bitufundija ne kwitukwasha twepuke makinga pamo bwa kusanswa bya bupeta, busekese ne kutoma bintu bikolwañana nansha kukolwa malwa. (Nk. 20:1; 2 Kod. 7:1; 1 Tes. 4:3-5; 1 Tem. 6:6-11) Kadi, tusangelanga ne pa kwikala na “tusepo ku mutyima” tutamba ku kukōkela ku bivulujo bya Leza.​—Is. 65:14.

3. Le i milangwe’ka yādi na mulembi wa mitōto yotufwaninwe kwiula?

³ Pa kulama kipwano kilēme kyotupwene na Tata wetu wa mūlu, tufwaninwe kwingidija nyeke bufundiji bwa Yehova bwa tunangu mu būmi bwetu. I biyampe’po kashā twikale na milangwe na yādi na mulembi wa mitōto wāsonekele amba: “Byabukamoni byobe nayata’byo ke bupyane  bwa nyeke na nyeke; ke-bintu abyo to tusepo twa wami mutyima”! (Mit. 119:111) Lelo netu tusangelanga misoñanya ya Yehova’ni nansha twiimonanga kyaba kimo bu kiselwa kilēma? Nansha shi kyaba kimo tukalabalanga pa madingi amo otupebwa, ketufwaninwepo kutyumukwa mutyima. Tubwanya kutamija kikulupiji kya binebine mu tunangu tukatampe twa Leza! Tubandaulei’ko bidi miswelo isatu.

TAMIJA KIKULUPIJI KUPITYILA KU MILOMBELO

4. Lelo i kintu’ka kekyāshintyilepo mu būmi bwa Davida?

⁴ Mulopwe Davida wātenwe mu bitatyi biyampe ne bibi mu būmi bwandi, ino kudi kintu ke kyāshintyilepo​—ke kikulupiji kyandi mudi Umpangi wandi kadi. Wānene amba: “Abe Yehova ntalwile muya wami kudi abe. Abe Leza wami, i mudi abe mo nkulupile.” (Mit. 25:1, 2) Le i bika byākweshe Davida atamije kino kikulupiji mudi Shandi wa mūlu?

5, 6. Le Kinenwa kya Leza kitulombola bika pa kipwano kyādi kipwene Davida na Yehova?

⁵ Bantu bavule balombelanga kudi Leza enka mu bitatyi bya makambakano makomo. Le bikekala namani shi mulunda nobe nansha mubutule wakulombe lupeto nansha kumulongela kintu kampanda? Kyaba kimo, ubwanya kushilula kutatana kukanina kwandi kwa mutyima pa kukulomba. Inoko, Davida kādipo uno muswelo. Kipwano kyandi na Yehova kyālombwele lwitabijo lwandi ne buswe bwaādi uswele Leza mu bula bwa būmi bwandi​—mu bitatyi biyampe ne bibi bine.​—Mit. 40:8.

⁶ Tala’po bidi binenwa bya Davida bya kutendela ne kufwija’ko Yehova bya amba: “Abe Yehova, Mfumwetu, e bonka buya ne buya bwa dijina dyobe ditabukilemo panopantanda ponsololo! Wabīkile ntumbo yobe peulu!” (Mit. 8:1) Lelo kumwenepo kipwano kya mpwaninine kyādi kipwene Davida na Shandi wa mūlu? Kusangela kwādi kusangedile Davida bukatampe ne ntumbo ya Leza, kwāmupele bukomo bwa kutumbija Yehova “dyuba dyonso ne bukata.”​—Mit. 35:28.

7. Le tumwenanga namani mu kufwena kudi Leza mu milombelo?

⁷ Pamo bwa Davida, tusakilwa kwisamba na Yehova kitatyi ne kitatyi mwanda wa kutamija kikulupiji mwadi. Bible unena amba: “Fwenai kudi Leza, nandi ukemufwena.” (Yak. 4:8) Kufwena kudi Leza mu milombelo i muswelo wa mvubu mpata wa kutambwila’mo mushipiditu sandu.​—Tanga 1 Yoano 3:22.

8. Mwanda waka tufwaninwe kwepuka kupituluka mu bishima bimo mu milombelo?

⁸ Kitatyi kyolombela, le upitulukanga mu misemwa nansha kwingidija bishima bimo byonka kitatyi ne kitatyi? Shi i amo, nabya langulukila mu kitatyi kityetye pa byosa kunena kumeso kwa kulombela. Le mulunda nansha mubutule kampanda ukasangala shi tupituluka mu bishima bimo kyaba ne kyaba kitatyi kyotwisamba nandi? Ubwanya kushilula kuleka kwitwivwana. Na bubine, Yehova kakapelepo nansha dimo milombelo yampikwa budimbidimbi ya bengidi bandi ba kikōkeji. Inoko, i biyampe twepuke kwikala na kino kibidiji kitatyi kyotwisamba nandi.

9, 10. (a) Le i bintu’ka byotubwanya kulomba mu milombelo yetu? (b) Le i bika bibwanya kwitukwasha tulombele milombelo itamba ku mutyima?

⁹ I bimweke patōka’mba, milombelo yetu keifwaninwepo kwikala ya kūlukūlu shi tusaka kufwena kudi Leza. Kitatyi kyotupungulwila mityima yetu kudi Yehova, tukamufwena ne kumukulupila bininge. Ino, le i bika byotufwaninwe kulomba mu milombelo yetu? Kinenwa kya Leza kinena amba: “Byonso byo musaka muyūkije’byo kudi Leza monka mu kulombela, ne mu kumwisashilapo, ne kumufwija ponka.” (Fid. 4:6) Bubine i buno amba, kintu kyo-kyonso kibwanya kwitukwasha mu kipwano kyotupwene na Leza nansha mu būmi bwetu bwa bu bengidi bandi i kiyampe kulomba mu milombelo.

¹⁰ I biyampe kulangulukila pa binenwa bya bana-balume ne bana-bakaji ba kikōkeji bālombele milombelo isonekelwe mu Bible.  (1 Sam. 1:10, 11; Bil. 4:24-31) Mu Mitōto i mukongakanibwe milombelo itamba ku mutyima yālombelwe kudi Yehova ne ñimbo yāmwimbilwe. Ino milombelo ne ñimbo ilombola milangwe yādi na bantu, ya bulanda ne ya binebine. Kubandaula bino binenwa byānene bantu ba kikōkeji, kubwanya kwitukwasha tulombele milombelo ya kamweno kudi Yehova.

LANGULUKILA PA BIVULUJO BYA LEZA

11. Mwanda waka tufwaninwe kulangulukila pa bidyumu bitamba kudi Leza?

¹¹ Davida wānene amba: ‘Bivulujo bya Yehova i bikulupilwa, bidyumuna bendalale ke badyumuke.’ (Mit. 19:7) Bine, nansha shi ketudipo na bwino, tubwanya kwikala na tunangu shi tukōkele ku misoñanya ya Leza. Inoko, bidyumu bimo bya mu Bisonekwa bilomba kulanguluka shi tukimba kumwena’mo ne pa mfulo. Tubwanya kunena uno muswelo ne pa mwanda utala kulama bululame bwetu ku masomo nansha ku ketu kaji, lulamato ku musoñanya wa Leza utala pa mashi, kuleka kwikuja mu myanda ya ntanda kwa bwine Kidishitu, ne kwingidija misoñanya ya mu Bible itala pa muvwadilo ne mwidyangwilo. Kuyuka milangwe ya Leza mu ino myanda, kuketukwasha twiteakanye ku makambakano. Kupwa, tubwanya kukwata butyibi mu mityima yetu pa bya kulonga shi tubatanwa na mwanda. Kuno kubadikila kulangulukila pa mwanda nansha kwiteakanya kumeso kwa kitatyi, kubwanya kwitukinga ku kulonga bilubo bisansa mutyima.​—Nk. 15:28.

12. Le i kulangukila pa bika kubwanya kwitukwasha tulame bivulujo bya Leza?

¹² Pano potutengele kufikidila kwa byobya bilaile Leza, le mwiendelejo wa mu bwetu būmi ulombolanga’mba twibalanguke nyeke ku mushipiditu? Kimfwa, le tukulupile na bubine amba Babiloni Mukatakata usa konakanibwa panopano? Le madyese etutengele kumeso, kimfwa būmi bwa nyeke mu paladisa pano panshi, tukiamwene bu adi’ko na motwēfundile dibajinji? Le tukidi bapyasakane mu mwingilo pa kyaba kya kuleka twaji twetu twikale pa kifuko kibajinji mu bwetu būmi? Le tunena bika pa lukulupilo lwa lusangukilo, buujila bwa dijina dya Yehova ne pa kubingija bubikadi bwandi? Le bikidi bu bintu bya mvubu kotudi? Kulangulukila pa bino bipangujo kubwanya kwitukwasha tulonge bintu na mwānenene mulembi wa mitōto’mba, lama bivulujo bya Leza “ke bupyane bwa nyeke na nyeke.”​—Mit. 119:111.

13. Mwanda waka bene Kidishitu ba mu myaka katwa kabajinji bākomenwe kwivwanija bintu bimo? Leta kimfwa.

¹³ Ketubwanyapo pano kwivwanija ne pa mfulo bintu bimo bitelelwe mu Bible, mwanda ke kyaikele kitatyi kitungwe kya Yehova kya kwibisokola. Yesu wādi ulombola batumibwa bandi kitatyi ne kitatyi amba, wādi unenwe kususuka ne kufwa. (Tanga Mateo 12:40; 16:21.) Ino batumibwa kebāivwanijepo byaādi ukimba kunena. Bāivwanije’nka pa kupwa kwa aye kufwa ne kusanguka kitatyi kyaāvwele ngitu ya bu muntu, wamwekela bana ba bwanga bavule ne kwibapa “ñeni ya kwivwanija Bisonekwa.” (Luka 24:44-46; Bil. 1:3) Mu muswelo umo onka, balondi ba Kidishitu kebāivwanijepo amba Bulopwe bwa Leza bwādi bwa kushimikwa momwa mūlu kufika ne byēbapungulwidilwe mushipiditu sandu pa Pentekosa 33 K.K.​—Bil. 1:6-8.

14. Ku ngalwilo’tu kwa myaka katwa ka 20, le i bimfwa’ka biyampe byashile banabetu bavule nansha byokebadipo bevwanije myanda itala mafuku a mfulo?

¹⁴ Mu muswelo umo onka, ku ngalwilo kwa myaka katwa ka 20, bene Kidishitu ba bine bādi batengēle bintu bivule bitupe pa mwanda utala “myaka ya malwa.” (2 Tem. 3:1) Kimfwa, mu mwaka wa 1914, bamo badi balanga’mba kitatyi kyabo kya kwenda mūlu kibafwena. Kitatyi kekyafikidilepo nkulupilo yabo, babandaula monka na kininga Bisonekwa byebatwele ku kuta mutyima ku kampanye ka busapudi kādi kebatengele kumeso. (Mako 13:10) Ino, mu 1922, tutu Joseph Rutherford, mwine wādi utangidile mwingilo wa busapudi, walombola boba bātenwe ku kitango  kya ntanda yonso kya mu Cedar Point, Ohio, États-Unis amba: “Bandilai Mulopwe wabikala! Banwe bo bandi bedi ba lubila. Shi ke pano, sapulai, sapulai, sapulai Mulopwe ne bulopwe bwandi.” Kushilwila pene’pa ne kwenda kumeso, kusapula ‘myanda miyampe ya bulopwe’ kwaikele bu kiyukeno kya kuyukila’po bengidi ba Yehova ba mu ano etu mafuku.​—Mat. 4:23; 24:14.

15. Le tumwenanga namani mu kulangulukila pa muswelo wikele Leza na bantu bandi?

¹⁵ Kitatyi kyotulangulukila pa muswelo wakutendelwa wādi wikele Yehova na bandi bantu ba pa kala ne ba dyalelo, twikalanga na kikulupiji kikatampe kya amba udi na bukomo bwa kuvuija kiswa-mutyima kyandi ne mpango yandi ya mu mafuku āya kumeso. Kadi, bivulujo bya Leza bitukwashanga tulame mu ñeni ne mu mityima yetu bupolofeto bwandi busa kufikidila. Tubwanya kukulupila amba, kulonga namino kuketukwasha tutamije kikulupiji mu milao yandi.

TAMIJA KIKULUPIJI KUPITYILA KU BILONGWA BYA BUTŌTYI

16. Lelo i madyese’ka atambanga ku kuvudilwa nyeke bya kulonga mu mwingilo?

¹⁶ Yehova Leza wetu i mukomo mu bya kulonga. Mulembi wa mitōto wāipangwile’mba, “lelo i ani mukatampe na abe, abe Ya?” Wābweja’ko amba: “Dikasa dyobe i dya bukomo ne dikasa dyobe dya lundyo i dilampe.” (Mit. 89:8, 13) Kukwatañana na bino binenwa, Yehova usangelanga ne kwesela bukomo botulonga bwa kwendeleja dibajinji kumeso tumweno twa Bulopwe. Umwene’mba bengidi bandi​—bekale bana-balume nansha bana-bakaji, bankasampe nansha batame​—kebashiketepo ne kudya “bidībwa bya mulēle.” (Nk. 31:27) Pa kwiula Umpangi wetu, tuvudilwanga nyeke bya kulonga mu mingilo ya Leza. Kwingidila Leza ne mutyima umo i dyese kotudi, kadi kulengejanga Yehova aloelelwe bininge kwesela mwingilo wetu.​—Tanga Mitōto 62:12.

17, 18. Mwanda waka tubwanya kunena’mba, bilongwa bya lwitabijo bitukwashanga tutamije kikulupiji kyotukulupile mu madingi a Yehova? Leta kimfwa.

 ¹⁷ Le bilongwa bya lwitabijo bitukwashanga tutamije kikulupiji mudi Yehova muswelo’ka? Langulukila pa nsekununi ya mu Bisonekwa ya kutwela kwa Isalela mu Ntanda ya Mulao. Yehova wāpele bapidishitu bulombodi bwa kusela dikumbo dya kipwano pa kutūkila mu Munonga wa Yodano. Inoko, kitatyi kyāfwenene’ko bantu, bāmwene mvula mukatampe wālengeje munonga uyule bininge. Le bene Isalela bādi bakulonga bika? Le bādi ba kutūla kitūlo ku mukunkujo wa munonga ne kwilaija mu bula bwa mayenga nansha kitatyi kilampe mwanda wa kwilaija mema a dilobe ōme? Mhm, bādi bakulupile ne pa mfulo mudi Yehova ne kulonda buludiki bwandi. Byāfula namani? Tutanga nsekununi amba: ‘Abo bapidishitu banyata’tu binyantyilo byabo mu mema, lui lwakalañana, . . . kadi bapidishitu baimana’nka pa bukata bwa lui panshi pōmu kubwipi na Yediko, kufikija’nka ne byaābukile bantu bonso bukila.’ (Yos. 3:12-17, Dibuku Dijila) Langa’po bidi mwātengelwe bantu bāmwene ano mema adi enda lubilo aimana! Na bubine, lwitabijo lwa bene Isalela mudi Yehova lwākomejibwe mwanda bādi bakulupile mu buludiki bwandi.

¹⁸ Bine, Yehova kalongelangapo bantu bandi bino bingelengele dyalelo, ino weselanga bilongwa byabo bya lwitabijo. Bukomo bwa Leza bwingila bwibapanga bukomo bwa kuvuija mwingilo wa kusapula musapu wa Bulopwe ntanda yonso. Kadi Kidishitu Yesu musanguke, kamoni mubajinji wa Yehova wākulupije bandi bana ba bwanga amba, ukekala nabo mu uno mwingilo mukatampe na kunena amba: “Endai mukafundije mizo yonso ya bantu, bekale ke bana ba bwanga . . . Ami mwine, ngidi nenu mafuku onso nyeke, kufika’nka ne ku mfulo kwa pano pa ntanda.” (Mat. 28:19, 20) Batumoni bavule bādi padi bevwana bumvu nansha moyo, bakokeja kubingija amba mushipiditu sandu wa Leza webapele bukankamane bwa kwisamba na bantu bokebayukilepo mu mwingilo wa busapudi.​—Tanga Mitōto 119:46; 2 Kodinda 4:7.

19. Nansha byobwanya kwikala na mikalo kampanda, le i kikulupiji’ka kyotudi nakyo?

¹⁹ Batutu ne bakaka bamo badi na mikalo pa kusapula mwanda wa misongo nansha bununu. Inoko, bakokeja kukulupila amba, “Shandya byalusa, Leza wa kanye ka kusenga konso” uyukile ngikadilo idi’mo mwine Kidishitu wa bine yense. (2 Kod. 1:3) Usangelanga byonso byotulonga mwanda wa kwendeleja tumweno twa Bulopwe kumeso. Batwe bonso tufwaninwe kuvuluka’mba, lupandilo lwetu lwimanine dibajinji pa kikūlwa kya Kidishitu nansha byotulonga byonso byotubwanya mungya ngikadilo yotudi’mo.​—Bah. 10:39.

20, 21. Le tulombolanga kikulupiji mudi Yehova mu miswelo’ka?

²⁰ Butōtyi bwetu bulombanga kupāna bininge kitatyi, bukomo ne tumweno twetu mu ludingo lwa peulu. Bine, tusakanga ne mutyima wetu onso ‘kwingila mwingilo wa busapudi.’ (2 Tem. 4:5) Bubine i buno amba, tudi na nsangaji ya kwingila uno mwingilo, mwine ukwasha bantu bakwabo “bafike ne pa kuyūkidija kwa binebine.” (1 Tem. 2:4) Na bubine, kulēmeka ne kutumbija Yehova, kwitupetejanga ku mushipiditu. (Nk. 10:22) Kadi kwitukwashanga tutamije kikulupiji kya binebine kyotwikulupile na Umpangi.​—Loma 8:35-39.

²¹ Monka motwesambila, kukulupila mudi Yehova pa buludiki bwa tunangu kekwiilangapo ako kwine; tufwaninwe kulonga bukomo pa kwikala na kino kikulupiji. Shi ke pano, kulupila mudi Yehova kupityila ku milombelo. Langulukila pa muswelo wāvuije Yehova kiswa-mutyima kyandi pa kala ne wasa kuvuija’kyo mu mafuku āya kumeso. Kadi endelela kutamija kikulupiji mudi Yehova kupityila ku bilongwa bya butōtyi. Bine, bivulujo bya Yehova bikaladila nyeke. Nanshi ubwanya kwikala na būmi bwa nyeke shi ute mutyima ku bino bivulujo!

[Bipangujo bya Kifundwa]

[Kifwatulo pa paje 12]

[Kifwatulo pa paje 15]

Le ukalombola kikulupiji na kyālombwele bantu ba Yehova ba mu mafuku a Yoshua? (Tala musango 17, 18)