‘Ingidilai Yehova Bu Bapika’

‘Mu mīngilo kemuso mulele; ingidilai Yehova bu bapika.’ ​—LOMA 12:11.

LE ULANGA’PO NAMANI?

Le kwingila bu bapika kutelelwe mu Loma 12:11 kulomba bika ne bika?

Le i muswelo’ka otubwanya kwepuka kwikala bapika ba Satana ne ntanda yandi?

Le Yehova upalanga bapika bandi mpalo’ka?

1. Kwishila na muswelo umona bantu bavule bupika, le Loma 12:11 ukankamika bika?

 BUPIKA bwa bwine Kidishitu i bwishile kulampe kwine na muswelo umonanga bantu bupika. Balañanga’mba kwikala umpika kuleta mulangwe wa kuludikwa na kasusu, kuningilwa ne kumonwa bibi. Inoko Kinenwa kya Leza kya ku bukomo bwa mushipiditu kisambila pa bupika bwa kwingidila Mfumwetu wa buswe na mutyima tō. Na bubine, mutumibwa Polo pa kusoñanya bene Kidishitu ba mu myaka katwa kabajinji ‘bengidile Yehova bu bapika,’ wēbakankamikile bapelakane kwingidila Leza wa buswe mwingilo ukola. (Loma 12:11) Le buno bupika bulomba bika ne bika? Le tukepuka namani kwikala bapika ba Satana ne ntanda yandi? Byotudi bapika ba Yehova, le i mpalo’ka yotukamwena mu mwingilo otumwingidila na kikōkeji?

“NSANSHILWE MFUMWAMI”

2. (a) Le i bika byādi bya kulengeja umpika mwine Isalela ajimije mukenga wa kwikala mwanapabo? (b) Lelo kusabwa kutwi kwa umpika wingila na mutyima tō kwādi na mvubu’ka?

² Kupityila ku Mukanda wa Bijila wāpelwe Isalela na Leza, tukayuka bupika bwine bwitusakila Yehova. Mupika Muhebelu wādi upebwa bwanapabo mu mwaka wa busamba-bubidi wa mwingilo wandi. (Div. 21:2) Inoko, Yehova wātūdile’ko mpangiko miyampe ku mupika wādi usenswe mfumwandi bya binebine ne wādi usaka kumwingidila nyeke. Mfumwandi wādi uleta umpika wandi ku kinjilo nansha ku lunji ne kumusaba kutwi na mutubulo. (Div. 21:5, 6) Uno mulongelo wa kumusaba kutwi wādi na mvubu. Mu ludimi lwa Kihebelu, mulangwe mwinemwine wa kikōkeji i mulombolwe na kishima kidi na mulangwe wa kwivwana nansha kuteja. Umpika wādi wingila na mutyima tō wādi na mutyima wa kwingidila mfumwandi na kikōkeji. Kino kitukwasha tusangele byobya byotufwaninwe kulonga mu kwipāna kotwipēne kudi Yehova​—ke kukōkela bya binebine mwanda wa buswe botuswele Leza kadi.

3. Le kwipāna kwetu kudi Leza kwimanine pa bika?

 ³ Kitatyi kyotwāendele kukabatyijibwa lubatyijo lwa bwine Kidishitu, twākwete kala butyibi bwa kwingidila Yehova ne kwikala bapika bandi. Kwipāna kwetu kwāshilukile ku mutyima wetu wa kusaka kukōkela Yehova ne kulonga kiswa-mutyima kyandi. Kekudipo muntu wētuningile twipāne. Na bubine, enka ne banuke babatyijibwanga pa kupwa’tu kwipāna abo bene kudi Yehova, ke mwanda’po’tu wa kusangaja bambutwile babo. Kwipāna kwa bwine Kidishitu kwimanine pa buswe botusenswe Yehova Mfumwetu wa momwa mūlu. Mutumibwa Yoano wāsonekele amba: “Luno namino lo lusa lwa Leza, lwa’mba tulame bijila byandi.”​—1 Yoa. 5:3.

BANAPABO ABO’KO BAPIKA

4. Le i bika byotufwaninwe kulonga pa kwikala “bapika ba boloke”?

⁴ Bine, tufwijanga’ko Yehova pa kwitupa mukenga wa kwikala bapika bandi! Lwitabijo lotwitabije mu kitapwa kya kikūlwa kya Kidishitu lwitukwashanga twinyongolole mu lupungu lwa bubi. Nanshi byotukidi bampikwa kubwaninina, twitabije kuludikwa na Yehova ne Yesu. Polo wāshintulwile kino patōkelela mu mukanda wandi umo wa ku bukomo bwa mushipiditu amba: “Mwikale kwitela’mba, twi bafwe ku bubi, nanshi twi bōmi kudi Leza mudi Kidishitu Yesu Mfumwetu.” Kupwa wādyumuna amba: “Le kemuyūkilepo’mba, yewa o mwakēpanako bānwe bene bubapika bakukōkela, nankyo mwi bapika ba yewa enka o mwakōkela; shi bubi bwa lufu, shi kikōkeji kya boloke? Nanshi Leza afwijibweko, byo mwakidi kala bapika ba bubi, ino pano byo mwakōkela ne ku mityima kwine ku uno muswelo wa kufundija o bemufikijije; pa kulekelwa ku bubi umbālamuka ke mudi bapika ba boloke.” (Loma 6:11, 16-18) Yuka’mba mutumibwa wisambila pa ‘kukōkela kutamba ku mutyima.’ Na bubine, kwipāna kwetu kudi Yehova kwitwikadijanga bu “bapika ba boloke.”

5. Le i bulwi’ka bwa nyeke botudi nabo batwe bonso, ne mwanda waka?

⁵ Inoko, kudi bikoleja bya kunekenya pa kwiendeja mungya kwipāna kwetu. Tulwanga bulwi bwa miswelo ibidi. Mubajinji, kudi bulwi bwālwile Polo. Wāsonekele amba: “Mwanda ndoelelwe mu mukanda-wabijila wa Leza monka mwendele mu muntu udi munda mwami. Ino namone mukanda, ungi nao, wa mu byangitu byami, ke balu ne mukanda wa ku mutyima wami, unkokele monka mu bupika bwa mu mukanda wa bubi o udi mu byangitu byami.” (Loma 7:22, 23) Tulwanga nyeke na kubulwa kubwaninina kotupyene. Kadi, twendelelanga kulwa na milangwe yetu ya bu muntu. Mutumibwa Petelo witusoñanya amba: “Mwikale bwa bāna-pabo; ino kemukalonga bu-mwana-pabo bwenu kekintu kya kufyamo bubi, mhm, nanshi bwa bapika ba Leza.”​—1 Pet. 2:16.

6, 7. Le Satana ulengejanga muswelo’ka ino ntanda imweke bu isangaja?

⁶ Tudi na bulwi bwa bubidi bwa kulwa na ntanda idi mu lupusa lwa bademona. Satana, mulopwe wa ino ntanda, witwasanga byabulwi byandi na kitungo kya kutyumuna dikōkeji dyetu kudi Yehova ne Yesu. Ukimbanga kwitumuna bupika na kwitutompa twitabije lupusa lwandi lubi. (Tanga Efisesa 6:11, 12.) Muswelo umo bidi ulonga Satana kino i na kulengeja yandi ntanda ikale bu ikoka, ne kwitongola. Mutumibwa Polo wādyumwine amba, “shi muntu usenswe panopantanda, nankyo lusa lwa Tata keludipo mudi aye, mhm. Ke-bintu byonsololo bidi panopantanda, kilokoloko kya ngitu, ne kilokoloko kya meso, ne ntumbo ya kwitatula ya būmi, kebidipo bya Tata, mhm, i bya panopantanda.”​—1 Yoa. 2:15, 16.

⁷ Mutyima wa kusaka kwikala na bintu bivule bya ku ngitu umwekejanga ino ntanda. Satana ukankamikanga kukulupila  amba lupeto lo luleta nsangaji. Bīkwe bya lupoto i bivule pano pa ntanda. Mwingilo wa kupotoloja bintu utononanga bantu bapote bintu bivule mu būmi ne kwipwija mukose. Makomponi mavule a myanda ya ñendo alombolanga divule bifuko biyampe kwine kuvudile kwikala bantu badi na mumweno wa ino ntanda. Na bubine bantu bonso betujokolokele betulombolanga ‘tulumbulule’ būmi bwetu​—ino mungya misoñanya ya ntanda.

8, 9. Le i kyaka’ka kya binebine kidi’ko, ne mwanda waka?

⁸ Pa kwisambila pa boba ba mu kipwilo kya mu myaka katwa kabajinji bādi na mumweno wa ino ntanda, Petelo wēbadyumwine amba: “Kuzaila mwinya ko kuloelelwa kwetu; i bīko ne byabulema, bizaila mu byabubelabubela po bikidya nenu. Ke-pantu, pa kwisamba myanda mikatampe ya kwitatula ya bitupubitupu, bōngwele monka mu bilokoloko bya ngitu ku byakulondalonda bya mutyima umbi, boba basaka kupanda kudi boba bakwikala monka mukutūpatūpa. Bebatandila kwibapa bu-mwana-pabo, abo nabo bakidi bapika ba bubole; ke-kuntu konka kudi yewa ko wanekenībwa, e konka ko waletwa umbupika.”​—2 Pet. 2:13, 18, 19.

⁹ Kupwija “kilokoloko kya meso” kekupengapo muntu bwanapabo. Ino wikalanga ke umpika wa Satana Dyabola, mfumu wampikwa kumweka wa ino ntanda. (1 Yoa. 5:19) Kudi kyaka kikatampe kya kumunwa bupika na kuswa bya bupeta​—bupika bukomo kwepuka.

MWINGILO USANGAJA

10, 11. Le Satana upwilanga mpumpu bāni dyalelo, ne masomo a ino ntanda ebalēmenejanga kiselwa namani?

¹⁰ Monka mwaālongele mu Edena, Satana nandi upwilanga mpumpu babilumbilumbi dyalelo. Uvudile kutamba bankasampe. Satana kasangalangapo kitatyi kituma nkasampe nansha muntu yense mwanda wa kwingidila Yehova bu umpika. Walwana na Leza usakanga bonso bapēne būmi bwabo kudi Yehova bakomenwe mu kwipāna ne dikōkeji dyabo.

¹¹ Tujokelei bidi ku kimfwa kya umpika wāitabije kusabwa kutwi. Uno umpika wāivwene misanshi mu kitatyi kityetye; ino yapwa bukidi bonka, washala na kayukeno ka lonso ka bu mwingidi. Kutonga butongi bwa kwikala na būmi bwishile na bwa bakwabo kubwanya kwikala kukomo, kadi kusansa kudi nkasampe. Satana ukankamikanga mulangwe wa amba kwikala na kaji mu ino ntanda kukaletela muntu nsangaji, ino bene Kidishitu bafwaninwe kuta mutyima ku kamweno kadi mu kuvuija bisakibwa  byabo bya ku mushipiditu. Yesu wāfundije’mba, “dyese dyo dyabo bakulandapala pa mutyima.” (Mat. 5:3) Bene Kidishitu bepāne beendejanga mungya kiswa-mutyima kya Leza, ke kya Satanapo. Baloelelwe mu mukanda wa bijila wa Yehova, kadi balangulukila’mo dyuba ne bufuku. (Tanga Mitōto 1:1-3.) Inoko, masomo mavule dyalelo keapengapo mwingidi wa Yehova kitatyi kya kulanguluka ne kuvuija bisakibwa byandi bya ku mushipiditu.

12. Le i butongi’ka bunenwe kutonga bankasampe bavule dyalelo?

¹² Mfumu wa ino ntanda ubwanya kukomeja būmi bwa bupika bwa bwine Kidishitu. Polo wāipangwile mu mukanda wandi umbajinji ku bene Kidishitu amba: “Lelo abe umpika waityilwe’ni, a?” Kupwa webadingila amba: “Kokyakamwa; nanshi ubamone mwakwalamukila bu-mwana-pabo, eyo, e nabyako bidi.” (1 Kod. 7:21) Wādi usaka banyongololwe mu bupika. Mu matanda mavule dyalelo, i batunge myaka ifwaninwe mwana kwenda ku masomo. Bana ba masomo badi na bwanapabo bwa kutonga. Kwendelela kufunda masomo mwanda wa kusokola kaji kubwanya kulengeja muntu akomenwe kwikala na bwanapabo bwa kulondalonda mwingilo wa kitatyi kyonso.​—Tanga 1 Kodinda 7:23.

MASOMO​—MALAMALA’NI NANSHA MALUMBULUKE?

13. Le bengidi ba Yehova bakamwena bininge mu masomo’ka?

¹³ Polo wādyumwine bene Kidishitu ba mu Kolose amba: “Dyumukai kadi, mwanda wa kunena’mba wakemukwata bu-misungi ku byamanwa byandi, ne kyongo kyampikwa kwendelamo, monka mwikadile bisela bya bantu, ne bya bunkasampe bya panopantanda, kemwikadilepo bya Kidishitu nabya, mhm.” (Kol. 2:8) “Byamanwa byandi, ne kyongo kyampikwa kwendelamo, monka mwikadile bisela bya bantu” bidi’ko dyalelo mu milangwe ya ino ntanda bitambanga ku bantu bavule ba ñeni. Masomo malamala, mwine mubadilwa ne inivelesite apanga divule boba bapwa’o bwino butyetye nansha kuleka kwibapa bwino bwa binebine, ebalengeja baleke kwiteakanya ku myanda ya mu būmi. Ino bengidi ba Yehova abo batoñanga masomo ebakwasha batamije bwino bwa kamweno mwa kwikadila nyeke na būmi bupēla mu mwingilo wa Leza. Batele mutyima ku madingi a Polo kudi Temote a amba: “Kwakoko, shako, eyo! umbwine-Leza utūkije ne mutyima monka, kyo kimoni kīne kikata. Ino byo tudi ne bidibwa, ne bivwalwa, e nabyako bidi, tuloelelwe monka.” (1 Tem. 6:6, 8) Pa kyaba kya  kukimba kwikala na mapolome ne bitenta mu ino ntanda, bene Kidishitu batele mutyima ku kutambula “mikanda ya kwiyukanya nayo” na kutambila ne pa mfulo mu mwingilo wa busapudi.​—Tanga 2 Kodinda 3:1-3.

14. Kukwatañana na Fidipai 3:8, le Polo wādi umwene dyese dyandi dya kwikala umpika wa Leza ne Kidishitu namani?

¹⁴ Tubandaulei bidi kimfwa kya mutumibwa Polo. Wāfundijibwe na Ngamadyela mufundiji wa Bijila Muyuda. Masomo āfundile Polo abwanya kudingakanibwa na masomo a inivelesite dyalelo. Ino, le Polo wēamwene namani pa kwiadingakanya na dyese dyandi dya kwikala umpika wa Leza ne Kidishitu? Wāsonekele amba: “I binebine, byo ntela bintu byonso ke byakubudidilwamo bitupu, mwanda wa buya bwine bulumbuluke bwa ñeni ya Kidishitu Yesu Mfumwami.” Kupwa wābweja’ko amba: “Yewa nabudidilwamo bintu byonsololo’tu fututu, ne kwibitela bu-bintya na’mba: Nkamwenamo Kidishitu.” (Fid. 3:8) Bino binenwa bikwasha bene Kidishitu ne bambutwile bakaminwe Leza batonge butongi na tunangu pa mwanda utala masomo. (Tala bifwatulo.)

MWENA MU MASOMO MALUMBULUKE

15, 16. Le bulongolodi bwa Yehova bufundijanga bufundiji’ka, ne budi na kitungo’ka?

¹⁵ Le i bika bipitanga ku masomo malamala mavule a ino ntanda? Lelo bantu kebekujangapo kyaba kimo mu politike ne kukalabela baludiki ba ntanda? (Ef. 2:2) Inoko, bulongolodi bwa Yehova bwitufundijanga masomo malumbuluke mu kifuko kya ndoe, ko kunena’mba kipwilo kya bwine Kidishitu. Batwe bonso tudi na mukenga wa kumwena mu Masomo a Mwingilo wa Kiteokratike a yenga ne yenga. Kadi kudi masomo a pa bula a batutu bapania bankungulume (Masomo a Bible a Batutu Bankungulume) ne a bapania besonge (Masomo a Bible a Bene Kidishitu Besonge). Ano masomo a Kiteokratike etukwashanga tukōkele Yehova, Mfumwetu wa momwa mūlu.

¹⁶ Tubwanya kukola byabupeta bya ku mushipiditu mu dibuku Index des publications Watch Tower nansha dishike dya Watchtower Library pa CD-ROM. Kitungo kikatampe kya bufundiji bwetu i kutōta Yehova. Bwitufundijanga muswelo otubwanya kukwasha bakwetu bapwane na Leza. (2 Kod. 5:20) Kino nakyo kikebakwasha bafundije bakwabo.​—2 Tem. 2:2.

MPALO YA UMPIKA

17. Le kutonga masomo malumbuluke kuletanga mpalo’ka?

¹⁷ Mu lukindi lwa Yesu lwa talenta, bapika babidi ba kikōkeji bafwijibwe’ko ne kusangelwa na mfumwabo, webapa mingilo mivule. (Tanga Mateo 25:21, 23.) Kutonga masomo malumbuluke dyalelo kuletanga nsangaji ne mpalo. Tulangulukilei bidi pa kimfwa kya Michael. Wāingile biyampe mu masomo, ebiya badimu bandi bamwita kwisambila nandi pa kyepelo kyandi kya kukafunda inivelesite. Batulumuka pa kwitabija kwaitabije Michael kufunda masomo a mu kitatyi kityetye mwanda wa abwanye kwikwatakanya mu mwingilo wandi wa bu pania wa lonso. Lelo umona’mba watongele butongi bubi? Unena’mba, “masomo a kiteokratike onafundijibwe mu bu pania​—ne pano bu mukulumpe mu kipwilo​—keadipo na oadingakene nao. Madyese ondi nao i matabuke kulampe lupeto lonadi mbwanya kumona. Ngidi na nsangaji mikatampe ya kutonga kuleka kufunda masomo malamala.”

18. Le i kika kyakulengeje utonge masomo malumbuluke?

¹⁸ Masomo malumbuluke etufundijanga kiswa-mutyima kya Leza ne kwitukwasha twingidile Yehova bu bapika. Etupanga kyepelo kya kwikala ‘bakūlwe ku bupika bwa kubola’ ne kukamona mwenda mafuku “ntumbo bwa bāna ba Leza.” (Loma 8:21) Ne kadi, twifundanga muswelo mulumbuluke wa kulombola’mba tusenswe bine Yehova, Mfumwetu wa momwa mūlu.​—Div. 21:5.

[Bipangujo bya Kifundwa]