Longa Bintu Kukwatañana na Milombelo ya Yesu ya Buswe
Longa Bintu Kukwatañana Na Milombelo Ya Yesu Ya Buswe
“Abe Tata, . . . tumbija mwanobe ntumbo, amba mwanobe akutumbije ntumbo.”—YOA. 17:1.
LE ULANGA’PO NAMANI?
Le ‘kuyuka’ Leza bya binebine kulomba bika ne bika?
Lelo milombelo ya Yesu isonekelwe mu Yoano shapita 17 yālondolwelwe namani mu myaka katwa kabajinji?
Le i muswelo’ka otubwanya kulonga bintu kukwatañana na milombelo ya Yesu dyalelo?
1, 2. Lombola bintu byālongēle Yesu batumibwa bandi ba kikōkeji pa kupwa kwa masobo a Pashika mu mwaka wa 33 K.K.
TUDI mu kyolwa kya mafuku 14 Kweji wa Nisane mu mwaka wa 33 K.K. Yesu ne bapwani-nandi basoba masobo a Pashika, mene ebavuluja muswelo wānyongolwele Leza bashabo mu bupika bwa mu Edipito. Inoko, bana ba bwanga bandi ba kikōkeji basa kwimwena “bukūdi bwa nyeke na nyeke.” Difuku dilonda’ko, Mwendeji wabo wampikwa bubi usa kwipaibwa na balwana nandi. Ino kino kilongwa kya mushikwa kikalamuka ke dyese. Kumwanga kwāmwangile Yesu mashi andi kwaādile kyalwilo kya kunyongolola muzo wa muntu ku bubi ne ku lufu.—Bah. 9:12-14.
2 Pa kusaka tuleke kwilwa ino mpangiko ya buswe, Yesu wātūdile’ko kivulukilo kya pa mwaka kya kupingakena pa Pashika. Wālongele kino na kutyumuna mukate wampikwa kiyujo ne kupa’o batumibwa 11 ba kikōkeji, ne kunena amba: “Uno i Mubidi wami wimupaninwa, mukaloñanga enka namino pa kumvuluka.” Wālonga monka namino ne na kitomeno kya vinyu ityila, wēbanena amba: “Kino kitomeno nakyo i kipwanino kipya kya mu mashi ami a kwimumwangikila.”—Luka 22:19, 20.
3. (a) Le i kushinta’ka kukatampe kwāikele’ko pa kupwa kwa Yesu kufwa? (b) Le i bipangujo byotufwaninwe kubandaula pa mwanda utala milombelo ya Yesu idi mu Yoano shapita 17?
3 Kipwanino kya kala kya Mukanda wa Bijila kyādi pa bukata bwa Leza ne bene Isalela ba ku ngitu kyādi kya kupwa lubilo lonka. Kyādi kya kupingakanibwa na kipwanino kipya kidi pa bukata bwa Yehova ne balondi ba Yesu bashingwe māni. Yesu wādi usaka uno muzo mupya wa ku mushipiditu wikale biyampe. Isalela wa ku ngitu kādipo utōta Leza mu bumo, ne kadi kino kyātukije dijina dijila dya Leza. (Yoa. 7:45-49; Bil. 23:6-9) Ino, Yesu wādi usakila balondi bandi bekale nyeke mu bumo mwa kubwaninya kwingidila pamo biyampe amba dijina dya Leza ditumbijibwe ntumbo. Penepa, Yesu wālongele namani? Wālombele milombelo milumbuluke mpata, kadi bantu bonso badi na dyese dya kwiitanga. (Yoa. 17:1-26; tala kifwatulo kidi ku ngalwilo.) Potubandaula ino milombelo, twiipangulei amba, “le Leza wālondolwele milombelo ya Yesu?” Kadi tufwaninwe kwibandaula ne kwiipangula’mba, “le noñanga bintu kukwatañana na ino milombelo?”
BINTU BYĀDI BITANGIDIJE YESU KUMESO
4, 5. (a) Le i ñeni’ka yotwaboila ku ntwelelo ya milombelo ya Yesu? (b) Le Yehova wālondolwele namani ku bintu byālombele Yesu bya mu mafuku andi a kumeso?
4 Yesu wāendelele kunena’nka ne bufuku, wāpa bandi bana ba bwanga buyuki bulēme butamba kudi Leza. Kupwa wābambila meso andi mūlu kalombela amba: “Abe Tata, mwaka uno ubafika, tumbija mwanobe ntumbo, amba mwanobe akutumbije ntumbo. Monka mo wamupelele lupusa lwa ku bantu bonso’mba, wibape būmi bwa nyeke na nyeke boba bonso bo wamupele. . . . Ami napu kala kukutumbija ntumbo pano panshi, ne mīngilo yo wampele kwingila, nayo napu’yo. Ino pano kadi, abe Tata, ntumbije ne abe mwine kumo, ne ntumbo yo nadi nayo monka mobe, ne panopantanda pēne kepapangilwepo mhm.”—Yoa. 17:1-5.
5 Tubamone bintu byādi bitangidije Yesu kumeso mu ntwelelo ya milombelo yandi. Wādi utele mutyima bininge ku kutumbija Shandi wa mūlu, kadi kino kikwatañene na kintu kibajinji kyaālombele mu milombelo ya kulondela’po amba: “Abe Tata wetu wa Mūlu dijina dyobe dijile kijila.” (Luka 11:2) Kadi Yesu wādi utele mutyima ku bisakibwa bya bandi bana ba bwanga’mba, ‘ebape būmi bwa nyeke.’ Kupwa Yesu wālomba pa mwanda wandi amba, “abe Tata, ntumbije ne abe mwine kumo, ne ntumbo yo nadi nayo monka mobe, ne panopantanda pēne kepapangilwepo mhm.” Yehova wāesele wandi Mwana wa kikōkeji kupita ne pa byaālombele na kupa Yesu “dijina dya kupita . . . kunengela” majina a bamwikeulu bonso.—Bah. 1:4.
‘YUKA LEZA UMO KETE WA BINE’
6. Le batumibwa bādi bafwaninwe kulonga bika pa kumona būmi bwa nyeke, ne twayukile namani amba bābwenye kwibilonga?
6 Kadi Yesu wālombele pangala pa byobya byotufwaninwe kulonga batwe babipya-mambo mwanda wa kutambula kyabuntu kya ku bitupu kya būmi bwa nyeke. (Tanga Yoano 17:3.) Unena’mba tufwaninwe nyeke ‘kuyuka’ Leza ne Kidishitu. Muswelo umo otubwanya kulonga namino i wa kwingidija meso ne matwi etu mwanda wa kwifunda bivule padi Yehova ne wandi Mwana. Muswelo mukwabo wa mvubu wa kuyuka Leza i wa kwimwena nsangaji itamba ku kwingidija byobya byotwifunda pādi. Batumibwa bālongele bino bintu bibidi bipāna būmi, mwanda Yesu wāendelele na kunena amba: “Binenwa bino nabyo byo wampele napu kwibapa’byo, nabo abēbitambula.” (Yoa. 17:8) Ino pa kukamona būmi bwa nyeke, bādi bafwaninwe kulangulukila nyeke pa binenwa bya Leza ne kwibingidija mu būmi bwabo bwa bukile bukya. Le batumibwa ba kikōkeji bābwenye kulonga namino kufika ne ku mfulo kwa būmi bwabo bwa pano panshi? Bine babwenye. Twayukile kino mwanda majina a abo bonso i malembwe kadi makomo kubula pa kyalwilo kya mabwe 12 kya Yelusalema mupya wa momwa mūlu.—Kus. 21:14.
7. Le ‘kuyuka’ Leza kushintulula bika, ne mwanda waka kudi na mvubu mikatampe?
7 Kukwatañana na bafundi ba ludimi lwa Kingidiki, kishima kya Kingidiki kyalamwinwe bu “bakuyuke” kibwanya ne kwalamunwa bu “bafwaninwe kuyuka nyeke” nansha “bafwaninwe kwendelela kuyuka.” Ino nshintulwilo ibidi iobanga, kadi yonso idi na mvubu. Binenwa bidi kunshi kwa dyani bya kayukeno kadi pa Yoano 17:3 mu Bible wa Reference byalamwinwe muswelo umo amba “bakakuyuka.” Nanshi, kishima “bakuyuke” kifunkila pa kilongwa kya endaenda kitwala ku dyese dya kushilula ‘kuyuka’ Leza. Inoko, pa kuyuka Muntu mukatakata wa diulu ne ntanda, bilomba kulonga bivule kupita’ko’tu kuyuka ngikadilo ne mpango yandi. Kuyuka Yehova kulomba kuningija kipwano kyotupwene nandi ne kyotupwene na banabetu mu lwitabijo. Bible unena’mba, “kadi yewa kaswele nankyo kayūkilepo Leza, mhm; mwanda aye Leza i lusa.” (1 Yoa. 4:8) Nanshi, kuyuka Leza i ne kumukōkela. (Tanga 1 Yoano 2:3-5.) Bine, dino i dyese dikatampe dya kumonwa bu muntu uyukile Yehova! Inoko, kino kipwano kilēme kibwanya kujimina’nka na mwājiminine kya Yudasa Isakadiota. Tulongei bukomo bwa kwikilama. Nabya tukabwanya bityetye bisakibwa bya kutambula kyabuntu kya ku bitupu kya būmi bwa nyeke.—Mat. 24:13.
“MU DIJINA DYOBE”
8, 9. Le Yesu wādi utele mutyima dibajinji ku bika mu mwingilo wandi wa pano pa ntanda, ne i lufundijo’ka lwa bipwilo lwaāpelele?
8 Pa kupwa kutanga milombelo ya Yesu isonekelwe mu Yoano shapita 17, le i ani ubwanya kutatana buswe bukatampe bwa Yesu bwādi usenswe batumibwa bandi baādi nabo ne bandi bana ba bwanga ba mu mafuku a kumeso? (Yoa. 17:20) Mu kitatyi kimo kyonka, tufwaninwe kuyuka’mba Yesu katelepo mutyima dibajinji enka ku lupandilo lwetu. Kitungo kyandi kinekine kya tamba ku ngalwilo kutūla ne ku mfulo kwa mwingilo wandi wa pano pa ntanda, kyādi kya kulonga bukomo bwa kuyukanya buujila bwa dijina dya Shandi ne kwiditumbija ntumbo. Kimfwa, kitatyi kyāesambile pa mwingilo wandi mu shinakoka ya mu Nazala, Yesu wātangile muvungo wa Isaya amba: “Mushipiditu wa Yehova wangikadilako, ke-muntu wanshingile mani ngikale wakusapwila myanda-miyampe ku balanda.” Ne kutatana kwine mpika, Yesu wātelele dijina dya Leza biyampe kitatyi kyaātangile bino binenwa.—Luka 4:16-21.
9 Mungya lufundijo lwa Bayudea, kumeso kwa Yesu kwiya pano pa ntanda, bendeji ba bipwilo bādi bapeleja bantu kwingidija dijina dya Leza. Tubwanya kukulupila’mba Yesu wāpelele na kusumininwa luno lufundijo lwampikwa kukwatañana na bisonekwa. Wānenene balwana nandi amba: “Amiwa naiya mu dijina dya Tata, bānwe ne kundubulapo mpika, shi ungi akētalule aye mwine, nankyo yeo ke mukalubulako.” (Yoa. 5:43) Ebiya, mafuku matyetye kumeso kwa lufu lwandi, Yesu walombola bintu byādi utele’ko mutyima mu būmi na kulombela amba: “Abe Tata, tumbija dijina dyobe ntumbo.” (Yoa. 12:28) Nanshi, ketufwaninwepo kutulumuka pa kutumbija kwātumbije Yesu dijina dya Shandi mu milombelo yotubandaula pano.
10, 11. (a) Le i bika byādi bifwaninwe kulonga Yesu pa kuyukanya dijina dya Shandi? (b) Le bana ba bwanga ba Yesu bafwaninwe kulonga bukomo bwa kufikila pa kitungo’ka?
10 Yesu wālombele amba: “Nasokwela dijina dyobe ku bano bantu bo watukwine panopantanda waumpa. Bādi bonka bobe, ino abe ubampe’bo, nabo mwanda ōbe abalama’o. Ino kubapu pano ami nkikidipo panopantanda, mhm, nanshi bano namino bakidi ponka panopantanda, ami yao ke ngiya kōdi. Abe Tata ukola, wibalamine mu dijina dyobe bano bo wampele’mba bēkale bamo bonka monka mo twikadile bātwe.”—Yoa. 17:6, 11.
11 Kuyukija bandi bana ba bwanga dijina dya Shandi kwāmulombele bivule kupita’ko kwiditela kukanwa bitupu. Kadi Yesu wēbakweshe bayuke mushintulwila dijina dya Leza, nakampata ngikadilo milumbuluke ya Leza ne muswelo waikele netu. (Div. 34:5-7) Pakwabo kadi, nansha byakadi na kyepelo kya ntumbo momwa mūlu, ukyendelelanga kukwasha bandi bana ba bwanga bayukanye dijina Yehova pano pa ntanda ponso. Na kitungo’ka? Na kitungo kya kunena’mba bana ba bwanga bavule bakongakanibwe kumeso kwa ino ngikadilo imbi ya bintu kufula. Bine, dino i dijina dya kutendelwa diinikile Yehova mwanda wa kunyongolola batumoni bandi ba dikōkeji!—Ezek. 36:23.
“BA PANO PANTANDA BĒTABIJE”
12. Le i bintu’ka bisatu bitusakilwa pa kwingila mwingilo wetu upandija būmi?
12 Yesu paādi pano pa ntanda, wālongele bukomo bwa kukwasha bandi bana ba bwanga banekenye bukōkekōke bwabo. Kino kyādi na mvubu kobadi mwanda wa kuvuija mwingilo waāshilwile. Yesu wālombele’mba, “monka mo wantumine abe panopantanda, nami mo monka nebatumununa panopantanda.” Abo pa kubwanya uno mwingilo upandija būmi, Yesu wākomeneje bintu bisatu bya kamweno. Kibajinji, wālombēle amba bana bandi ba bwanga baleke kwikala ba ino ntanda ya disubi. Kya bubidi, wālombele’mba bafwaninwe kwikala bajila nansha kwikala nyeke bakola, na kwingidija bubinebine bwa Kinenwa kya Leza. Kya busatu, Yesu wālombele kitatyi ne kitatyi amba bana bandi ba bwanga bekale mu kijimba kimo kya buswe budi pa bukata bwa Shandi ne aye. Kino kitulomba kwibandaula. Batwe bonso tufwaninwe kwiipangula’mba, ‘le noñanga bintu kukwatañana na bintu bisatu byālombele Yesu?’ Yesu byaādi utele mutyima ku bino bintu, wādi ukulupile’mba ‘ba pano pa ntanda bētabije’mba i mutumwe kudi aye.’—Tanga Yoano 17:15-21.
13. Le milombelo ya Yesu yālondolwelwe namani mu myaka katwa kabajinji K.K.?
13 Kitatyi kyotwifunda mukanda wa mu Bible wa Bilongwa bya Batumibwa ulondakene na Maevanjile aná, ukamona’mba milombelo ya Yesu yālondolwelwe. Langulukila pa kwiketaketa kwādi mu bukata mwa bene Kidishitu babajinji, bādi Bayuda ne Bajentaila, bampeta ne balanda, bapika ne bamfumu. Inoko, bonso bāikele mu bumo bwādi bukokeja kudingakanibwa na bipindi palapala bya ngitu ya muntu bikele Yesu bu mutwe wabyo. (Ef. 4:15, 16) Bine, kino kyādi kingelengele kyālongekele mu ntanda ya Satana mikalañane! Ntumbo yonso ifwaninwe kupebwa Yehova, mwine wālengeje kino kilongeke kupityila ku bukomo bwa mushipiditu sandu.—1 Kod. 3:5-7.
14. Le i muswelo’ka ulondolwelwe milombelo ya Yesu dyalelo?
14 Ino i kya bulanda, mwanda buno bumo bwa mu kingelengele kebwāendelelepo pa kupwa kufwa kwa batumibwa. Monka mokyālailwe, bupondo bukatampe bwātwela, bwine bwālengeje kwikale tutangotango twa kine Kidishitu. (Bil. 20:29, 30) Ino mu mwaka wa 1919, Yesu wānyongolola balondi bandi bashingwe māni mu bupika bwa mutōtelo wa bubela ne kwibakongakenya pamo mu “bumo.” (Kol. 3:14, DD) Le mwingilo wabo wa busapudi wāikele na lupusa’ka pa bantu bakwabo pa pano pa ntanda? “Mikōko mikwabo” ya bapwani midiyo isamba-ibidi ne kupita batambile ku “mizo yonso, ne mu bisaka byonso ne mu bantu, ne mu ndimi” yātutyikila mu luombe ludi mu bumo lwa bashingwe māni ba Leza. (Yoa. 10:16; Kus. 7:9) Ano i malondololo mamwekelele a milombelo ya Yesu ya amba, “bapanopantanda bayūke byo untumine abe [Yehova], ne kusanswa nako kadi wibasenswe monka mounsanshilwe ami”!—Yoa. 17:23.
MVUYO MIYAMPE
15. Le i kintu’ka kya pa bula kyālombele Yesu pangala pa bandi bana ba bwanga bashingwe māni?
15 Mu kyolwa kya mafuku 14 Kweji wa Nisane, Yesu wātumbije batumibwa bandi na kulonga nabo kipwano kya kubikala nabo mu Bulopwe bwandi. (Luka 22:28-30; Yoa. 17:22) Yesu wālombēle pangala pa bonso bādi ba kwikala balondi bandi bashingwe māni amba: “Abe Tata! Bo wampele bano nebasaka na’mba ngikale nabo ko ngikele ami, ne abo bekele konka na’mba, batale ne ntumbo yami mwine yo wampele, mwanda abe waunsanshilwe ne panopantanda pene kepapangilwepo.” (Yoa. 17:24) Kino kiletelanga mikōko mikwabo ya Yesu nsangaji ke kwabilapo, kadi kudi bukamoni bukwabo bulombola’mba bene Kidishitu ba bine bonso badi mu bumo pano pa ntanda dyalelo.
16, 17. (a) Le Yesu wālombwele kikulupiji’ka ku mvuyo ya milombelo yandi? (b) Le tufwaninwe kusuminwa kulonga bika?
16 Pa mwanda wa lupusa lwa bendeji babo ba bipwilo, bantu bavule mu ino ntanda bapelanga kwitabija bukamoni bwa amba Yehova udi na bantu badi mu bumo bamuyukile bya binebine. Ye mobyādi bikadile ne mu mafuku a Yesu. O mwanda wāfudile na bino binenwa biyampe amba: “Nanshi abe Tata moloke! Bapanopantanda kebakuyūkilepo, mhm, ino nakuyūkile ne bano abayūka byo untumine abe. Nami nebayūkija ne dijina dyobe, ne pano kadi nkediyūkija na’mba, lusa lōusenswe nalo lwikale monka mudi abo, ami nami monka mudi abo.”—Yoa. 17:25, 26.
17 Lelo i ani ubwanya kupatanya’mba Yesu kālongelepo bintu kukwatañana na milombelo yandi? Byadi mutwe wa kipwilo, wendelelanga na kwitukwasha tuyukanye dijina dya Shandi ne mpango yandi. Tukōkelelei nyeke ku bu-mutwe bwandi na kulonda na bupyasakane musoñanya wandi wa kusapula ne kulonga bana ba bwanga. (Mat. 28:19, 20; Bil. 10:42) Kadi tulongei bukomo bwa kulama bumo bwetu bulēme. Shi tulonge bino bintu, tukalonga bintu kukwatañana na milombelo ya Yesu ikalengeja tutumbije dijina Yehova ne kwikala na nsangaji ya nyeke ne nyeke.
[Bipangujo bya Kifundwa]
