Lekai ‘Kutenkanibwa Bukidi Bonka Mu Milangwe Yenu’!

“Banwe banabetu, . . . kemwakatenkanibwai bukidi bonka mu milangwe yenu.”​—2 TES. 2:1, 2.

MYANDA YA KUBANDAULA

Le i bidyumu’ka bya pa kitatyi bidi mu mikanda yātumine Polo ku bene Tesalonika?

Le i bika bibwanya kwitukwasha tuleke kongolwa?

Le kusapula Bulopwe na bupyasakane kwitukiñanga namani?

1, 2. Mwanda waka bongojani i buvule dyalelo, ne bubwanya kwikala bwa muswelo’ka? (Tala kifwatulo kidi ku ngalwilo.)

 BUDIMBIDIMBI, bubela ne bongojani bivudile kumweka mu ngikadilo ya bintu ya dyalelo. Kino kekifwaninwepo kwitutulumuja. Bible ulombola patōkelela’mba, Satana Dyabola i ñongojani kadi i mulopwe wa ino ntanda. (1 Tem. 2:14; 1 Yoa. 5:19) Pano potwenda tulumba ku mfulo ya ngikadilo mibi, bukalabale bwa Satana bwenda bwilundila’ko mwanda kubamushadila’tu “kakitatyi katyetye.” (Kus. 12:12) O mwanda tubwanya kukulupila’mba buzazangi bukavula mu bantu baludikwa na Dyabola, nakampata bobalongela boba bakwatakanya mutōtelo wa bine.

² Binenwa bya kyongo ne bubela bwampikwa kwendela’mo bubepelwa bengidi ba Yehova ne nkulupilo yabo bulombolwanga kyaba kimo ku bisanji. Mitwe ya myanda ya majulunale, bintu bilombolwa ku televijo, ne ku Entelenete bingidijibwanga mwanda wa kuzambalaja mānga ya bubela. Mfulo mfulō, bantu bamo bafula ku kupuakanibwa, ne kukulupila buno bubela.

3. Le i bika bibwanya kwitukwasha tunekenye bongojani?

³ Pa kwitukwasha tunekenye bunwa bwa walwana netu, tufwijanga’ko pa kwikala na Kinenwa kya Leza, kine “kya kamweno . . . pa kolola.” (2 Tem. 3:16) I biyampe tuboile ñeni ku bilembwa bya mutumibwa Polo byalekele kulonda bene Kidishitu ba mu Tesalonika ba mu myaka katwa kabajinji, ino bāitabija’ko bya bubela. Wēbasoñenye amba, “kemukatelententa bukidi-bukidi mu mityima yenu.” (2 Tes. 2:1, 2) Lelo i ñeni’ka yotukokeja kuboila ku kidyumu kya buswe kya Polo, ne tubwanya kwikingidija mu myanda yetu namani?

 BIDYUMU BYA PA KITATYI

4. Le i muswelo’ka wādyumwinwe bene Kidishitu ba mu Tesalonika pa kwiya kwa “difuku dya Yehova,” ne netu tudyumunwanga namani?

⁴ Mu mukanda wandi mubajinji waātumine kipwilo kya mu Tesalonika, Polo wēsambīle pa kwiya kwa “difuku dya Yehova.” Kādipo usaka banababo bekale mu fukutu kadi bampikwa kwiteakanya. Ino, wēbasoñenye pamo bwa “bana ba kitōkeji” ‘batale’nka kutala ne kulama ñeni yabo mibwane.’ (Tanga 1 Tesalonika 5:1-6.) Dyalelo, tutengele bonakani bwa Babiloni Mukatakata, umbikalo wa ntanda wa mutōtelo wa bubela. Buno bonakani bukekala bu kiyukeno kya ngalwilo ya difuku dikatakata dya Yehova. Tufwijanga’ko, mwanda twivwanije biyampe kufikidila kwa mpango ya Yehova. Kadi, tutambulanga nyeke kupityila ku kipwilo bivulujo bya pa kitatyi bitukwasha tulame ñeni yetu mibwane. Kuteja na katentekeji bino bidyumu biletwa kitatyi ne kitatyi kubwanya kwitukomeja tusumininwe kwingidila Leza ‘mingilo ikola na malango etu.’​—Loma 12:1.

5, 6. (a) Le Polo wānene bika mu mukanda wandi wa bubidi waātumīne bene Tesalonika? (b) Le i bika bisa kulonga Leza panopano kupityila kudi Yesu, ne i bipangujo’ka byotufwaninwe kwiipangula?

⁵ Kitatyi kityetye pa kupwa kutumina bene Kidishitu ba mu Tesalonika mukanda wandi mubajinji, Polo wēbatumine mukanda wa bubidi. Mu uno mukanda wēsambīle pa kwiya kwa kyamalwa kibūke kitatyi kikaleta Mfumwetu Yesu butyibi bwa Leza pa “boba kebayukilepo Leza ne boba kebakōkelepo myanda miyampe.” (2 Tes. 1:6-8) Mu shapita 2 wa uno mukanda ulombola’mo amba bantu bamo ba mu kino kipwilo bāikele ‘kutenkanibwa’ pa difuku dya Yehova kufika ne pa kukulupila’mba kufika kwadyo kubafwena. (Tanga 2 Tesalonika 2:1, 2.) Bano bene Kidishitu babajinji bādi’tu na buyuki butyetye pa kufikidila kwa mpango ya Yehova, nansha byādi binena mukanda wa Polo pa bupolofeto amba: “Tudi na buyuki bwa kipindi kadi tunenanga bupolofeto bwa kipindi; ino pasa kufika kyokya kituntulu, kino kya kipindi kikatalulwa’ko.” (1 Kod. 13:9, 10) Inoko, bidyumu bya ku bukomo bwa mushipiditu byāsonekele Polo, mutumibwa Petelo, ne banabetu bakwabo bashingwe māni ba kikōkeji byādi bibwanya kwibakwasha balame lwitabijo lwabo.

⁶ Pa kolola myanda, Polo wāshintulwile ku bukomo bwa mushipiditu amba, bupondo bukatampe ne “muntu wa kujilula bijila” byādi bya kusokoka kumeso kwa difuku  dya Yehova. * O mwanda, mu kitatyi kyandi kitungwe, Mfumwetu Yesu wādi ‘wa kutukija’ bonso bāongwelwe. Mutumibwa wāshintulwile bubinga bwine bobādi bakutyibilwa buno butyibi amba, “kebaitabijepo buswe bwa bubine.” (2 Tes. 2:3, 8-10) I biyampe twiipangule amba: ‘Lelo nsenswe bubinebine namani? Lelo nondanga kwivwanija kwa panopano kuletwa mu dino dipepala ne mu mabuku makwabo esambila pa Bible atuminwa bipwilo bya ntanda yonso bya bantu ba Leza?’

TONGA BALUNDA NOBE NA TUNANGU

7, 8. (a) Lelo bene Kidishitu babajinji bādi mu kyaka’ka? (b) Le bene Kidishitu dyalelo nabo badi mu kyaka’ka?

⁷ Shako, bene Kidishitu bakatanwa mu byaka kutabuka byātenwe’mo batumibwa ne bufundiji bwabo. Polo wāsonekēle Temote amba, “kusanswa lupeto i kitako kya bintu bibibibi bya miswelo yonso.” Mutumibwa wālombwele patōkelela amba, “pa kwipāna’mo bamo ke bongolwe mu lwitabijo kadi ke betapetape na misanshi mivule mine.” (1 Tem. 6:10) “Mingilo ya ngitu” nayo ikendelela kuleta byaka.​—Ngat. 5:19-21.

⁸ Inoko, ubwanya kusangela kine kyādyumwinine Polo na kusumininwa bene Tesalonika ku kyaka kikatampe kyāletele bantu baātelele bu “batumibwa ba bubela.” Mu bukata mwabo mwādi bantu bādi besamba “bintu binyengakane bya kukokela bana ba bwanga kobadi amba bebalonde.” (2 Kod. 11:4, 13; Bil. 20:30) Yesu wāfwijije’ko mwenda mafuku kipwilo kya mu Efisesa mwanda kebātadilepo ‘babi kilomonyeka.’ Bano bene Efisesa ‘bātūdile pa ditompo’ bantu bādi bine batumibwa ba bubela, ko kunena’mba bambepai. (Kus. 2:2) Kintu kisangaja i kino, Polo wāletele uno musoñanya mu mukanda wandi wa bubidi ku bene Tesalonika amba: “Pano tubemupe bulombodi, banwe banabetu, mu dijina dya Mfumwetu Yesu Kidishitu, sonsolokai mwanetu ense unanga bya kavutakanya.” Ebiya wātela pa bute pa bute bene Kidishitu kebādipo basaka “kwingila.” (2 Tes. 3:6, 10) Ino shi bano bantu bamwenwe bu bakavutakanya, lelo bantu bādi na milangwe ya bupondo ke pepi! Bine, kusamba kipwano kya mpwaninine na bano bantu kyādi kyaka kikatampe ne kyobādi bafwaninwe kwepuka​—kadi kino kyaka kikidi’ko ne dyalelo.​—Nk. 13:20.

9. Mwanda waka tufwaninwe kwibeja shi muntu washilula kwisambila pa myanda keishintulwilwepo mu Bible nansha bya kafutululo?

⁹ Tubafwena bininge ku kyamalwa kibūke ne ku mfulo ya ino ngikadilo mibi, o mwanda bidyumu bya ku bukomo bwa mushipiditu byāletelwe mu myaka katwa kabajinji bidi na mvubu mikatampe. Ketusakangapo nansha dimo ‘kujimija kitungo’ kya kanye ka Yehova ne kujimija mulao wa būmi bwa nyeke, bwikale bwa momwa mūlu nansha bwa pano pa ntanda. (2 Kod. 6:1) Shi muntu utanwanga ku kupwila kwetu kwa pa kipwilo ukimba twisambile pa myanda keishintulwilwepo mu Bible nansha kufutulula bakwetu, tufwaninwe kwibeja.​—2 Tes. 3:13-15.

“KWATYIJAI NYEKE BISHI BYOMWAFUNDIJIBWE”

10. Le bene Kidishitu ba mu Tesalonika bāsoñanibwe kwitabija bishi’ka?

¹⁰ Polo wāsoñenye banababo bene Tesalonika ‘bemanije pototo’ ne kulamata ku byobya byobāfundile. (Tanga 2 Tesalonika 2:15.) Le “bishi” byobāfundijibwe i bishi’ka? Na bubine, ke byobyapo byādi bifundija mutōtelo wa bubela ne byobādi bakwatakenye pamo bwa bintu bya mvubu na motutanina’byo  mu Bisonekwa. Ino, Polo wādi wisambila pa bufundiji bwaātambwile aye ne bakwabo kudi Yesu ne byobya byātonwenwe mutumibwa na Leza afundije, bivule bine bitanwa mu Bisonekwa bya ku bukomo bwa ku mushipiditu. Polo wāfwijije’ko banababo ba mu kipwilo kya Kodinda pa kusoneka amba, “mumvulukanga mu bintu byonso kadi mulamine bishi monka monemushidile’byo.” (1 Kod. 11:2) Buno bufundiji bwātambile ku nsulo miyampe kadi bwādi bukokeja kukulupilwa.

11. Bantu bamo babwanya kongolwa muswelo’ka?

¹¹ Polo pa kusonekela Bahebelu, wēsambīle pa miswelo ibidi ibwanya mwine Kidishitu kujimija lwitabija ne kukomenwa kwimanija pototo. (Tanga Bahebelu 2:1; 3:12.) Wēsambīle pa ‘kweja’ ne pa “kubomboka.” Bwato bushunuka mu nkula bubwanya kushunuka pampikwa kumonwa. Bityebitye, bukasonsoloka kulampe na mbadi. Pakwabo kadi, muntu ushununa bwandi bwato mu nkula, wibusonsolwelanga kulampe na mbadi aye mwine. Bino bimfwa bibidi byelekeja biyampe bintu bibwanya kufikila muntu uponena mu kyongo, ne uleka kikulupiji kyakulupile mu bubinebine kyenda kizoza.

12. Le i bintu’ka bya mu ano etu mafuku bibwanya kona būmi bwetu bwa ku mushipiditu?

¹² Bantu bamo ba mu Tesalonika bāongwelwe. Le dyalelo nadyo? Mingilo mivule ibwanya kwitudīla kitatyi. Langulukila pa mansá mavule ajiminanga mu kwilembela pa mateba a kyungwija, kutanga ne kulondolola misapu, kulondalonda kwipwija mukose, ne kukimba’nka lowakimbile myanda itala makayo. Bino byonso bibwanya kulabika mwine Kidishitu ne kutyepeja bupyasakane bwandi. Le bikafula namani? Muntu ubwanya kukomenwa kulombela na mutyima umo, kwifunda Kinenwa kya Leza, kutanwa ku kupwila, ne kusapula myanda miyampe. Le i bika byotubwanya kulonga pa kuleka kutenkanibwa bukidi bonka mu milangwe yetu?

MWA KWIKINGILA KU KUTENKANIBWA

13. Le i ngikadilo’ka idi na bantu bavule monka mokyālailwe, ne i bika bikalengeja lwitabijo lwetu luleke koneka?

¹³ Kintu kimo kyotufwaninwe kulonga i kuyuka nyeke kitatyi kyotudi’mo ne lupusa lukatampe lubwanya kwikala na boba bapela kwitabija’mba ano i “mafuku a mfulo.” Mutumibwa Petelo wālembele pangala pa kino kitatyi amba: “Bantu basepañana na kibengo bakāyanga ne kibengo kyabo, balonga mwendele bya kusakasaka byabo kebanena’mba: ‘Lelo kitatyi kya kwikala’po kwandi kyalailwe kidi pi? Mwanda tamba difuku dyālēle bakulutuba betu mu tulo twa lufu, bintu byonso byendanga muswelo umo onka na mobyādi bikadile tamba ku ngalwilo ya bupangi.’” (2 Pet. 3:3, 4) Kutanga kotutanga difuku ne difuku ne kwifunda Kinenwa kya Leza kitatyi ne kitatyi, biketukwasha tuyuke poketudi mu kwendelela kwa bitatyi​—kwitukwasha tuyuke’mba tudi mu “mafuku a mfulo.” Bupondo bwālailwe bwāmwekele tamba kala kadi bukidi’ko ne dyalelo. “Muntu wa kujilula bijila” ukidi’ko kadi ukyendelela kulwa na bengidi ba Leza. Pa kino, tufwaninwe kutengela nyeke pano pafwena difuku dya Yehova.​—Zef. 1:7.

14. Le kuputumina mu mwingilo wa Leza kwitukiñanga namani?

¹⁴ Muswelo mukwabo wa kwikala nyeke batengele ne kuleka kutenkanibwa mu ñeni i wa kusapula kitatyi ne kitatyi myanda miyampe ya Bulopwe. O mwanda Kidishitu Yesu, Mutwe wa kipwilo pa kusoñanya balondi bandi balonge bantu ba mizo yonso ke bana ba bwanga, ne kwibafundija balame bintu byaēbafundije, wāletele madingi ādi a kukinga balondi bandi. (Mat. 28:19, 20) Kulonga bintu mungya buludiki kwitulomba kwikala bapyasakane mu mwingilo wa busapudi. Lelo ubwanya kufwatakanya’mba banabenu ba mu Tesalonika bāsangedile kusapula ne kufundija mu muswelo wa kajilwilo mwanda’tu bānenwe’nka kwingila’o?  Vuluka binenwa byēbanene Polo amba: “Kemwakibulai mudilo wa mushipiditu. Kemwakifutululai bupolofeto.” (1 Tes. 5:19, 20) Bine, buno shabo i bupolofeto busangaja botwefunda ne botufwaninwe kusapwila bantu bakwabo!

15. Le i bintu’ka bya kamweno byotukokeja kubandaula mu butōtyi bwa kisaka?

¹⁵ Na bubine, tusakanga kukwasha bisaka byetu bitamije bwino bwabyo mu mwingilo wa busapudi. Batutu ne bakaka bavule bamwene amba, muswelo umo wa kwiwingila i kwifunda mwa kusapwila mu butōtyi bwabo bwa kisaka. Ubwanya kumona’mba i biyampe kwisambila pa muswelo ubwanya bantu ba mu kisaka kujokela ku bantu basangela bobatana. Le i bika byobakesamba pobakajoka? Le i myanda’ka ikankamika ikendelela kusangela boba botupempula? Le i kitatyi’ka kiyampe kujokela bantu? Bantu bavule nabo bateakanyanga kupwila mu kitatyi kya butōtyi bwa kisaka mwanda wa kuyuka bintu bikabandaulwa ku kuno kupwila. Le ubwanya kulonga bukomo bwa kwiteakanya mwa kulondolwela’ko? Kulondolola’ko kukakomeja lwitabijo lobe ne kukukwasha uleke kutenkanibwa mu ñeni. (Mit. 35:18) Bine, kulonga butōtyi bwa kisaka kukakukinga ku kulangulukila pa bintu kebishintulwilwepo mu Bible ne ku kutatana.

16. Le i bika bitononanga bene Kidishitu bashingwe māni balame bukomo bwa malango abo?

¹⁶ Shi tulangulukile pa muswelo ukweshe Yehova bantu bandi batamije kwivwanija kwa bupolofeto bwa Bible, tubwanya kusangela madyese a kutendelwa etutengele kumeso. Bashingwe māni badi na dyese dya kwikala na Kidishitu momwa mūlu. Bine, kino kyo kibatononanga balame bukomo bwa malango abo! Tubwanya kwingidija binenwa bya mutumibwa Polo byaāsonekēle bene Tesalonika amba: “Tufwaninwe kufwija’ko Leza mafuku onso pa mwanda wenu, banwe banabetu bobasenswe kudi Yehova, mwanda Leza wemutongele . . . mwanda wa lupandilo pa kwimupandula na mushipiditu wandi ne pa lwitabijo lwenu mu bubine.”​—2 Tes. 2:13.

17. Le i binenwa’ka bikankamika bidi mu 2 Tesalonika 3:1-5?

¹⁷ Ne boba batengēle kwikala na būmi bwa nyeke pano pa ntanda nabo bafwaninwe kulonga bukomo bwa kuleka kutenkanibwa bukidi bonka mu ñeni yabo. Shi udi na lukulupilo lwa kwikala pano pa ntanda, ta mutyima ku binenwa bya Polo bya buswe bikankamika byaāsonekēle banababo bashingwe māni ba mu Tesalonika (Tanga 2 Tesalonika 3:1-5.) Batwe bonso tufwaninwe kusangela bininge bino binenwa bya buswe. Bine, mikanda yātumīnwe bene Tesalonika ileta bidyumu pa kulangulukila pa bintu kebishintulwilwepo mu Bible ne pa milangwe ya kutatana. Byotwafwena ku mfulo, bene Kidishitu bafwijanga’ko bininge dyalelo pangala pa bino bidyumu.

[Kunshi kwa dyani]

[Bipangujo bya Kifundwa]

[Kifwatulo pa paje 6]

[Kifwatulo pa paje 7]

Mikanda yātumine Polo ku bene Tesalonika yāpele bene Kidishitu bidyumu pa kitatyi (Tala musango 4, 5)

[Kifwatulo pa paje 10]

Kwiteakanya biyampe ne kutambila mu busapudi kubwanya kwitukwasha tuleke kutenkanibwa bukidi bonka mu milangwe yetu (Tala musango 14, 15)