Lelo Ukapāna Bitapwa Pa Mwanda Wa Bulopwe?

“Leza usenswe yewa upāna na nsangaji.”​—2 KOD. 9:7.

BISONEKWA BYA KULANGULUKILA’PO

Le bino Bisonekwa bitukwasha namani tulangulukile pa bitapwa byotwela pa mwanda wa Bulopwe?

1 Bilongwa 29:9

1 Kodinda 16:1, 2

2 Kodinda 8:12

1. Le i kwipāna kwa muswelo’ka kwipānanga bantu bavule, ne mwanda waka?

 BANTU bepāninanga na mutyima tō bintu byobamona bu bya mvubu kobadi. Bambutwile bapānanga kitatyi kyabo, lupeto ne bukomo mwanda wa kamweno ka babo bana. Nansha shi bakwabo bebazawila nansha kwibafutulula, bakayi bankasampe bakimba kwimanina yabo ntanda mu makayo a kunyema lubilo bapityijanga mansá mavule difuku ne difuku mu kwifunda ne kufundijibwa. Yesu nandi wēpēne mwanda wa bintu bya mvubu kwadi. Kākimbilepo bintu bya katutu kadi kābutwilepo bana. Ino, wātongele kutangidija tumweno twa Bulopwe kumeso. (Mat. 4:17; Luka 9:58) Balondi bandi nabo bāshile bintu bivule mwanda wa kukwatakanya Bulopwe bwa Leza. Bēpēne mu kukwatakanya ne pa mfulo Bulopwe, mwanda kwendeleja buno Bulopwe kwādi na mvubu kobadi. (Mat. 4:18-22; 19:27) O mwanda netu tufwaninwe kwiipangula amba, ‘le i bika bidi na mvubu mu būmi bwami?’

2. (a) Le i bitapwa’ka bya kamweno ku bene Kidishitu bonso ba bine? (b) Le i bitapwa’ka bya ntentekelo bibwanya kwela bantu bamo?

² Kudi bitapwa bimo bidi na kamweno ku bene Kidishitu bonso ba bine kadi bidi na mvubu pa kutamija ne kulama kipwano kyetu kilumbuluke na Yehova. Mu bino bitapwa mubadilwa kupāna kitatyi ne bukomo mu milombelo, kutanga Bible, butōtyi bwa kisaka, kupwila ne kusapula. * (Yos. 1:8; Mat. 28:19, 20; Bah. 10:24, 25) Mfulo mfulō Yehova nandi waesela bukomo bwetu, mwingilo wa busapudi waendelela lubilo kadi bantu bavule nabo batūtyikila ku “lūlu lwa njibo ya Yehova.” (Is. 2:2) Pa kukwatakanya mingilo ya Bulopwe, bantu bavule  bepānanga mwanda wa kwingila ku Betele, kukwasha mu mwingilo wa kūbaka mobo a Bulopwe ne a Bitango, kuteakanya bitango, nansha mwingilo wa kukwasha bantu baponenwa na bimpengele bya kipangila. Uno mwingilo wa ntentekelo udi na mvubu pa kukwatakanya tumweno twa Bulopwe, inoko ke aopo uketulengeja tukamone būmi.

3. (a) Le tumwenanga namani mu kupāna bitapwa pa mwanda wa Bulopwe? (b) Le i bipangujo’ka byotufwaninwe kubandaula?

³ Pano po pene pasakilwa kukwatakanya Bulopwe bininge. I kya nsangaji’po kashā kumona bantu bavule bela bitapwa na mutyima tō kudi Yehova. (Tanga Mitōto 54:6.) Uno mushipiditu wa buntu wituletelanga nsangaji mivule pano potutengele Bulopwe bwa Leza bufike. (Kup. 16:15; Bil. 20:35) Inoko, batwe bonso tufwaninwe kwibandaula bya binebine. Lelo kudi miswelo yotukokeja kupāna bitapwa bya ntentekelo pa mwanda wa Bulopwe? Le twingidijanga kitatyi kyetu, lupeto, bukomo ne bwino bwetu namani? Le i bidyumu’ka byotufwaninwe kubandaula? Tubandaulei kimfwa kyotubwanya kwiula mwa kwelela bino bitapwa bya kwipāna, bine bivudijanga nsangaji yetu.

BITAPWA BYA MU ISALELA WA KALA

4. Le bene Isalela bādi bamwena namani mu kwela bitapwa?

⁴ Bantu ba mu Isalela wa kala bādi banenwe kwela bitapwa mwanda wa kulekelwa bubi bwabo. Bitapwa byādi na mvubu pa kusaka bantu betabijibwe na Yehova. Bitapwa bimo byādi bilombwa; bikwabo nabyo byakwilanga. (Levi 23:37, 38) Byakwela bisokwe byonso byādi byelwa kudi Yehova bu byakwela bya kwilanga nansha bu byabuntu. Kimfwa kimo kya bino byakwela, kyāelelwe pa kitatyi kyāēlelwe tempelo ya mu mafuku a Solomone lubila.​—2 Bil. 7:4-6.

5. Le Yehova wātūdile’ko mpangiko’ka pangala pa bantu ba misokwe mityetye?

⁵ Yehova wādi uyukile na buswe amba, bantu bonso kebādipo babwanya kwela bitapwa bya muswelo umo, kadi wādi usaka muntu yense ele bitapwa mwendele bukomo bwandi. Kijila kya Yehova kyādi kilomba kumwanga mashi a nyama, mene ādi bu “munjiñininya wa bintu bya kwiya” kupityila kudi Yesu wandi Mwana. (Bah. 10:1-4) Inoko, Yehova kādipo na kaninga-mpo pa kwingidija kino kijila. kimfwa, Leza wādi witabija kwela bitapwa bya tukutyikutyi shi muntu kādipo na luombe lwa banyema bakwela. Mu uno muswelo, enka ne balanda bādi babwanya  kwela na nsangaji bitapwa kudi Yehova. (Levi 1:3, 10, 14; 5:7) Nansha bitapwa bya banyema byobyādi bibwanya kwishila, kwādi bintu bibidi byādi bilombwa ku muntu yense wādi wela bitapwa bya kwilanga.

6. Le i bika byādi bilombwa muntu yense wādi wela bitapwa, ne mwanda waka kulonda ino misoñanya kwādi na mvubu?

⁶ Dibajinji, muntu wādi unenwe kupāna kintu kilumbuluke kyaādi nakyo. Yehova wālombwele muzo amba, kyakwela kyonso pa ‘kutambulwa’ kyādi kifwaninwe kwikala kiyampe. (Levi 22:18-20) Nyema wa bulema kādipo umonwa bu kyakwela kitabijibwe na Yehova. Dya bubidi, muntu wādi wela kitapwa wādi unenwe kwikala wampikwa kiko nansha disubi. Shi i muntu wa disubi, wādi unenwe kwela kyakwela kya bubi nansha kya kujilula mwanda wa kwaluja kipwano kyandi na Yehova kumeso kwa kwela kitapwa kya kwilanga. (Levi 5:5, 6, 15) Uno wādi mwanda musumininwe. Yehova wānene amba, shi muntu wa disubi wadi kitapwa kya kipwanyo, mwine mwādi mubadilwa byakwela bya kwilanga, wādi wa kufundulwa mu bantu ba Leza. (Levi 7:20, 21) Pa kwabo kadi, shi muntu wela kitapwa udi mu kipwano kiyampe na Yehova ne kitapwa kyandi kwikala na bulema mpika, uno muntu wādi utana nsangaji.​—Tanga 1 Bilongwa 29:9.

KWELA BITAPWA DYALELO

7, 8. (a) Le i nsangaji’ka imwenanga bantu bavule mwanda wa kwela bitapwa pa mwanda wa Bulopwe? (b) Le i bituntwa’ka byotudi nabyo?

⁷ Dyalelo nadyo, bavule bepānanga ne mutyima tō mu mwingilo wa Yehova, kadi Yehova nandi usangelanga kwipāna kwabo. Kwingidila banabetu kudi na mpalo. Tutu umo waingile mu mwingilo wa kūbaka Mobo a Bulopwe ne kukwasha bantu baponenwe na bimpengele bya kipangila unena’mba, kabwanyapo kushintulula nsangaji yaemwenine mu kukwasha mu ino mingilo. Unena amba, “kumona nsangaji ne kusepelela kwa batutu ne bakaka pobemene mu yabo Njibo ya Bulopwe, nansha kitatyi kyobatambula bukwashi pa kupwa kuponenwa na bimpengele bya kipangila, kulengejanga uno mwingilo onso umweke bu wa mvubu mpata.”

⁸ Bulongolodi bwa Yehova bwa mu ano etu mafuku bukimbanga nyeke mikenga ya kukwatakanya mwingilo wa Yehova. Mu 1904, Tutu Charles Taze Russell wasonekele amba: “Muntu yense unenwe kwimona bu mutongwe na Mfumwetu bu kalama wa kitatyi kya aye mwine, lupusa, lupeto, ne bikwabokwabo, kadi muntu ne muntu unenwe kukimba kwingidija ano manwa  mwendele bukomo bwandi, mwanda wa ntumbo ya Mfumwetu.” Nansha byotwangulanga madyese mavule, bitulombanga kyaba kimo kwela bitapwa kudi Yehova. (2 Sam. 24:21-24) Le tubwanya kwingidija biyampe bituntwa byotudi nabyo?

9. Le i musoñanya’ka udi mu bulombodi bwa Yesu budi mu Luka 10:2-4 otukokeja kulonda pa mwanda utala kwingidija kitatyi kyetu?

⁹ Kitatyi kyetu. Bilomba kitatyi ne bukomo buvule pa kwalamuna ne kutampa mabuku etu, kūbaka bifuko bya kutōtela’mo, kuteakanya bitango, kukwasha bantu baponenwa na bimpengele, ne kwingila mingilo mikwabo mivule ya kamweno. Tudi’tu na kibalwa kya mansá kitungilwe pa difuku. Yesu wāletele musoñanya ubwanya kwitukwasha. Kitatyi kyaātumine bandi bana ba bwanga mu busapudi, Yesu wēbasapwidile amba, “kemwakipambai muntu bīpa pa kwiimuna mwishinda.” (Luka 10:2-4) Mwanda waka Yesu wēbapele buno bulombodi? Mufundi umo wa Bible unena amba: “Bantu ba kutunduka kebādipo beimuna na motwiimwinanga na kubandika mutwe, kwisambija ku makasa, ino [bādi] bepamba bīpa misunsa mivule, kubandama, enka ne kufukama panshi. Bino byonso byādi bilomba kitatyi kivule.” Yesu kadipo ukankamika balondi bandi bekale na kipuni. Ino, wādi wibakwasha bamone amba bādi na kitatyi kityetye ne amba bādi basakilwa kulonga bukomo bwa kulonga bintu bya mvubu mpata. (Ef. 5:16) Le tubwanya kwingidija uno musoñanya mwanda wa kumona kitatyi kivule kya kukwasha mu mwingilo wa Bulopwe?

10, 11. (a) Le twingidijanga byabuntu byetu bya mwingilo wa ntanda yonso mu miswelo’ka imoimo? (b) Le i musoñanya’ka udi mu 1 Kodinda 16:1, 2 ubwanya kwitukwasha?

¹⁰ Lupeto lwetu. Tusakilwa lupeto luvule pa kukwatakanya mingilo ya Bulopwe. Tujimijanga midiyo makumi na makumi mwaka ne mwaka mwanda wa kukwatakanya batadi bendakana, bapania ba pa bula ne bamishonele. Tamba mu 1999, twaūbakile Mobo a Bulopwe 24500 mu matanda a misokwe mityetye. Ino, kukisakilwa kūbaka Mobo a Bulopwe makwabo kubwipi kwa 6400. Kweji ne Kweji kutampwanga kintu kya mapepala midiyo 100 a Kiteba kya Mulami ne Réveillez-vous ! Ino mingilo yonso ikwatakanibwanga na byabuntu byenu bya kwilanga.

¹¹ Mutumibwa Polo wāletele musoñanya wa kulonda kitatyi kyotukimba kutūla byabuntu. (Tanga 1 Kodinda 16:1, 2.) Wākankamikile ku bukomo bwa mushipiditu banababo ba mu Kodinda baleke kwilaija ku mfulo kwa yenga mwanda wa kuyuka byobakashala nabyo, ino bebikile’ko lupeto kuñanjilo kwa yenga kukwatañana na byobya byobabwanya kulonga. Pamo bwa mu myaka katwa kabajinji, batutu ne bakaka ba mu kino kyetu kitatyi bateakanyanga kumeso kwa kitatyi mwa kutūdila na buntu mwendele ngikadilo yobadi’mo. (Luka 21:1-4; Bil. 4:32-35) Yehova usangelanga uno mushipiditu wa kupāna.

12, 13. Le i bika bibwanya kulengeja bantu bamo baleke kupāna bukomo ne bwino bwabo, ino Yehova ukebakwasha namani?

¹² Bukomo ne bwino bwetu. Yehova witukwatakanyanga kitatyi kyotwingidija bukomo ne bwino bwetu mwanda wa Bulopwe. I mulaye kwitukwasha kitatyi kyotupungila. (Is. 40:29-31) Le tulañanga’mba bwino bwetu kebufikilepo pa kukwasha mu mwingilo? Le tulañanga’mba kudi bantu bakwabo babwenye bisakibwa senene? Tuvulukei amba, Yehova ubwanya kuvudija bwino bwetu bwa kibutwila, na mwaāvudijije bwa Bezalela ne Ohodiaba.​—Div. 31:1-6; tala kifwatulo kidi ku ngalwilo

¹³ Yehova witukankamikanga tumupe biyampe byetu kadi pampikwa kukankajibwa. (Nk. 3:27) Mu kitatyi kyādi kyūbakululwa tempelo, Yehova wāsapwidile Bayuda ba mu Yelusalema balangulukile pa byobādi ba  kulonga mwanda wa mwingilo wa lūbako. (Hak. 1:2-5) Bālabikilwe ne kuleka kukwatakanya mwingilo wa Yehova. I biyampe netu twibandaule shi tukitangidije kiswa-mutyima kya Yehova kumeso. Le tubulwe’po ‘kulanga mashinda etu’ mwanda wa kutambila bininge mu mwingilo wa Bulopwe mu ano mafuku a mfulo?

BITAPWA BIKWATAÑENE NA BYOTUDI NABYO

14, 15. (a) Le kimfwa kya banabetu ba misokwe mityetye kitukankamika namani? (b) Le tukasaka kulonga bika?

¹⁴ Bantu bavule badi mu bifuko muvudile masusu ne bulanda. Bulongolodi bwetu buloñanga bukomo bwa ‘kubwanya’ bibudilwe banabetu badi mu matanda a uno muswelo. (2 Kod. 8:14) Inoko, enka ne banabetu badi na misokwe mityetye bamwene dyese dya kupāna na mvubu. Yehova usangalanga kitatyi kyamona balanda bamupa na nsangaji byobya byobadi nabyo.​—2 Kod. 9:7.

¹⁵ Mu ntanda imo milanda ya mu Afrika, banabetu bamo baketanga’ko kipindi kityetye kya madimi abo ne kwingidija lupeto lobakapoteja bikunanwa bidi’mo mwanda wa kukwatakanya mwingilo wa Bulopwe. Kadi, kwatandikilwe mpangiko ya kūbaka Mobo a Bulopwe mavule mu ano matanda. Batutu ne bakaka ba mu ano matanda badi basaka kukwasha ku uno mwingilo. Inoko, mwingilo wadi wa kwingilwa mu kitatyi kyobadi bakuna nkunwa. Byobadi basumininwe’nka kwingila, badi benda bakōbaka Njibo ya Bulopwe dyuba, kupwa baenda kukakuna nkunwa ku kyolwa. Bine, uno i mushipiditu wa kwipāna! Kino kituvuluja banabetu bene Masedonya ba mu myaka katwa kabajinji. Bādi mu ‘bulanda bukatampe,’ ino bālombele dyese dya kukwasha ku mwingilo. (2 Kod. 8:1-4) Bavule mu bukata mwetu nabo ‘bapānanga monka mobekadile nabyo, mwendele dyese ditupele Yehova Leza.’​—Tanga Kupituluka 16:17.

16. Le tubwanya kuyuka namani shi bitapwa byetu i bitabijibwe kudi Yehova?

¹⁶ Inoko, tufwaninwe kudyumuka. Monka mwālongele bene Isalela wa kala, tufwaninwe kujingulula shi kwitapwa byetu bya kwilanga ibitabijibwe na Leza. Le i bika bibwanya kulengeja Leza ebipele? Tufwaninwe kwikala na bujalale mwanda wa kuvuija bisakibwa bibajinji bya kisaka kyetu ne bya butōtyi bwetu kudi Yehova. Kupāna kotupāna kitatyi ne bituntwa byetu pa mwanda wa bakwetu, kekufwaninwepo kwitulengeja tulengwe būmi bwa ku mushipiditu ne bwa ku ngitu bwa kyetu kisaka. Kadi ketubwanyapo na bu bine kupāna bintu byoketudipo nabyo. (Tanga 2 Kodinda 8:12.) Ne kadi tufwaninwe kulama kipwano kyetu na Leza. (1 Kod. 9: 26, 27) Ino, tukulupile’mba shi tulonda misoñanya ya mu Bible, bitapwa byetu biketuletela nsangaji ne maloa, kadi ‘biketabijibwa nakampata’ kudi Yehova.

BITAPWA BYETU BIDI NA MVUBU MIKATAMPE

17, 18. Le tukamona namani boba bonso bapāna bitapwa pa mwanda wa Bulopwe, ne i bika byotufwaninwe kulangulukila’po batwe bonso?

¹⁷ Batutu ne bakaka bavule ‘bepungululanga bwa byamulambu bya bitomibwa’ kupityila ku mwingilo wabo wa kukwatakanya mingilo ya Bulopwe ya kamweno. (Fid. 2:17) Tufwijanga’ko bya binebine boba balombola uno mushipiditu wa kupāna. Bakaji ne bana ba batutu batangidile mu mwingilo wa Bulopwe nabo bafwaninwe kufwijibwa’ko mwanda wa mushipiditu wabo wa buntu ne wa kwipāna.

¹⁸ Bilomba kulonga bukomo mwanda wa kukwatakanya tumweno twa Bulopwe. Nanshi batwe bonso tulangulukilei ne milombelo ponka pa muswelo otukokeja kutandabula mwingilo wetu bininge. Shi tulonge namino, tukeselwa madyese mavule tamba’nka pano ne madyese mavule mene “mu ngikadilo ya bintu ikāya’ko.”​—Mako 10:28-30.

[Kunshi kwa dyani]

[Bipangujo bya Kifundwa]

[Kifwatulo pa paje 11]

[Kifwatulo pa paje 12, 13]

Byakwela bivule byādi bya kwilanga, biifwane na bitapwa byotwela dyalelo (Tala musango 7-13)

[Kifwatulo pa paje 12]

Basapudi ba Bulopwe badi ku Njibo ya Bulopwe mu Kenya, Afrika

[Kifwatulo pa paje 12, 13]

Mwingidi wa kwituma mu Komite wa Lūbako lwa mu Mwaba mu Tuxedo, New York, États-Unis

[Kifwatulo pa paje 13]

Banabetu ba ku Betele ya mu Ostrali