LELO UBAVULUKA?

Le utañanga na katentekeji manimelo a panopano a Kiteba kya Mulami? Nabya, tala shi ubwanya kulondolola ku bino bipangujo:

Le Yesu ‘wāsapwidile bashipiditu ba mu kifungo’ kitatyi’ka? (1 Pet. 3:19)

Bimweka’mba kyaba kimo Yesu pa kupwa kusanguka, wāsapwidile mishipiditu mibi amba ikapebwa mfuto.​—15/6, paje 23.

Le i bikoleja’ka bisatu bilengejanga muntu akomenwe kulumbulula busongi bwa bubidi?

I bino: kulwa na kupingakanya busongi bobe bwa dyalelo pa busongi bobe bubajinji; kulwa pa kwisamba na balunda nobe ba kala kebayukilepo mwinē pobe mupya; kulwa pa kukulupila mwinē pobe mupya mwanda wa mwinē pobe mubajinji kādipo na kikōkeji.​—1/7, paje 9-10.

Lelo Yesu ukasansanya mikōko ne bambuji kitatyi’ka? (Mat. 25:32)

Yesu ukeisansanya kitatyi kyakaya kutyibila bantu mambo pa kyamalwa kibuke, pa kupwa konakanibwa kwa mutōtelo wa bubela.​—15/7, paje 6.

Le bantu ba kujilula bijila batelelwe mu lukindi lwa ñano ne bityani bakadila ne kwishenkenya meno kitatyi’ka? (Mat. 13:36, 41, 42)

Bakadila ne kwishenkenya meno pa kyamalwa kibuke kitatyi kyobakayuka amba kebadipo mwa kunyemena bonakani.​—15/7, paje 13.

Le binenwa bya Yesu bitala padi umpika wa binebine, udi na manwa byāfikidile kitatyi’ka? (Mat. 24:45-47)

Ke byāshilwilepo kufikidila pa Pentekosa 33 K.K., ino i pa kupwa kwa mwaka wa 1914. Mu 1919, umpika wapelwe kipango, mwine mubadilwa bene Kidishitu bonso badishibwa ku mushipiditu.​—15/7, paje 21-23.

Le Yesu wābikile umpika wa binebine pa bintu byandi byonso kitatyi’ka?

Kikekala kitatyi kya kumeso, pa kyamalwa kibuke kitatyi kikapebwa umpika wa binebine mpalo ya momwa mūlu.​—15/7, paje 25.

Le bantu bamo ba mu Bible kebatelelwepo majina mwanda bādi babi nansha bakubulwa kwikala na mvubu?

Ketufwaninwepo kufula ku kunena namino. Bible katelelepo majina a bantu bamo bādi bayampe ne bakwabo bādi babi. (Luta 4:1-3; Mat. 26:18) I betutelele majina a bamwikeulu babidi kete ba kikōkeji.​—8/1, paje 10.

Kutentekela pa bukomo butamba kudi Leza, le i bika byākweshe Batumoni 230 bapande mu lwendo lulampe lwa ku kakutwa mu komponi ka masusu ka Sachsenhausen?

Nansha byobāpungile mwanda wa nzala ne misongo, bādi nyeke bekankamika mwanda wa bende’nka kwenda.​—15/8, paje 18.

Mwanda waka nsekununi ya kwabuka kwaābukile Isalela Munonga wa Yodano pa kutwela mu Ntanda ya Mulao itukankamika?

Nansha munonga byowādi muyule mema a dilobe, Yehova wāimikile mema mwanda wa bantu babuke. Kino kyākomeje lwitabijo ne kikulupiji kyabo mudi Yehova, kadi netu tubwanya kukunkwa ku mutyima na ino nsekununi.​—15/9, paje 16.

Le i bika bilombola’mba Bible wisambilanga kitatyi ne kitatyi pa musombelo?

Bible wingidije musombelo mwanda wa kulombola’mba, Leza uyukile amba musombelo ubwanya kukoka malango a bantu ne amba musombelo ubwanya kwitukwasha tuvuluke bintu.​—1/10, paje 14-15.

Le bupolofeto bwa Mika 5:5 butala pa bamfumu ne bakumbi bufikidilanga namani dyalelo?

Tubaivwanija’mba ‘bakumbi basamba-babidi ne bamfumu mwanda’ batelelwe mu Mika 5:5 i bakulumpe batongelwe mu kipwilo, bene bakankamikanga bantu ba Leza mwanda wa bulwi bwālailwe bwibatengele kumeso.​—15/11, paje 20.

Le tusakilwa Leza pa bubinga’ka bumobumo?

Tusakilwa buludiki buyampe ne kupwa makambakano a mu būmi, bine bitamba kudi Leza. Witukwashanga twikale biyampe kadi na nsangaji, ne kadi ukafikidija milao yandi idi mu Kinenwa kyandi mwanda wa twikale biyampe ne na nsangaji.​—12/1, paje 4-6.