‘Longai Namino Ke Pa Kumvulukila’

“Pa kupwa kufwija’ko, weutyumuna kanena’mba: ‘Uno welekeja umbidi wami usa kupānwa pa mwanda wenu. Longai nyeke namino ke pa kumvulukila.’”​—1 KOD. 11:24.

USA KULONDOLOLA NAMANI?

Le difuku dya kulonga Kivulukilo ditoñwanga namani?

Lelo mukate ne mvinyu ya pa Bidibwa bya Kyolwa bya Mfumwetu byelekeja bika?

Nansha shi tudi na lukulupilo’ka, mwanda waka i biyampe kutanwa ku Kivulukilo?

1, 2. Le i milangwe’ka yāile mu ñeni ya batumibwa pa mwanda utala kitatyi kya kwenda ku Yelusalema?

 ‘KŪLU kubatōka tō, tubwanya kumona kweji mupya watentama. Kyolwa kya dya kesha, balami ba mu Yelusalema nabo bamumwene. Sanedrine pa kuyuka kino wanena’mba kweji mupya, wa Nisane washilula. Kupwa, biyukeno bya mudilo ne basedi ba myanda bazambalaja uno mwanda bukidibukidi, kadi bantu bevwananga ino myanda dyalelo. Na bubine, Yesu ukasaka kubadikila kwenda ku Yelusalema mwanda wa kufika kumeso kwa Pashika.’

² Tubwanya kufwatakanya ino milangwe yāile mu ñeni ya bantu bamo bādi na Yesu mu Pelea (bukila bwa Yodano) mu lwendo lwandi lwa mfulo lwa ku Yelusalema. (Mat. 19:1; 20:17, 29; Mako 10:1, 32, 46) Kitatyi kyādi kiyukana difuku dibajinji dya Nisane kweji wa Bayuda, Pashika yādi ilongwa mafuku 13 pa kupita’po, mu mafuku 14 kweji wa Nisane pa kupwa kupona kwa dyuba.

3. Mwanda waka bene Kidishitu bādi batele mutyima ku difuku dya Pashika?

³ Difuku dya kudya Bidibwa bya Kyolwa bya Mfumwetu, dine dikwatañene na difuku dya Pashika, dikekala mu mafuku 14 Kweji 4, 2014 pa kupwa kupona kwa dyuba. Dino dikekala difuku dya pa bula ku bene Kidishitu ba bine ne bantu basangela musapu. Mwanda waka? Mwanda tutanga mu 1 Kodinda 11:23-25 amba: “Yesu mu bufuku bobamwabile, watekwine mukate kadi, pa kupwa kufwija’ko, weutyumuna kanena’mba: ‘Uno welekeja umbidi wami usa kupānwa pa mwanda wenu. Longai nyeke namino ke pa kumvulukila.’ Ne kitomeno nakyo monka na monka.”

4. (a) Le i bipangujo’ka byotubwanya kwiipangula pa Kivulukilo? (b) Le tuyukanga difuku dya kivulukilo mwaka ne mwaka namani? (Tala kapango kanena’mba “Kivulukilo kya mu 2014.”)

⁴ Na bubine, usa kukatanwa ku kinkumenkume kyānene Yesu balondi bandi kuvuluka ku mwaka ne mwaka. Wiipangule dibajinji amba: ‘Le mfwaninwe kwiteakanya ku kino kinkumenkume namani? Le i bintu’ka  bya pa bula bikengidijibwa’ko? Le kino kinkumenkume kikekala kya muswelo’ka? Le kino kinkumenkume ne byelekejo bidi na mvubu’ka kondi?’

BYELEKEJO

5. Le Yesu wānene batumibwa bakateakanye bika mwanda wa Pashika ya mfulo?

⁵ Kitatyi kyānene Yesu bandi bana ba bwanga kukateakanya kyumba mwa kudila Pashika, kēsambīlepo pa kuneñenya; ino, wādi usaka njibo ikale miyampe, mikundulwe kadi mikatampe senene mubwana kibumbo kya betwa. (Tanga Mako 14:12-16.) Bādi bakuteakanya bintu bimo mwanda wa bidibwa, kimfwa mukate wampikwa kiyujo ne mvinyu ityila. Pa kupwa bidibwa bya Pashika, Yesu wēsambīle pa bino byelekejo bibidi.

6. (a) Le Yesu wānene bika pa mwanda utala mukate pa kupwa kwa bidibwa bya Pashika? (b) Le i mukate wa muswelo’ka wingidijibwanga pa Kivulukilo?

⁶ Mutumibwa Mateo wātenwe’po, wāsonekele mwenda mafuku amba: “Yesu watekuna mukate, pa kupwa kwesela dyese, weutyumuna, wapa’o bana ba bwanga, kanena’mba: ‘Atai, mudyei.’” (Mat. 26:26) “Mukate” wādi wampikwa kiyujo, enka na wādi wingidijibwa pa Pashika. (Div. 12:8; Kup. 16:3) Mukate wādi ulongwa na bukula bwa ñano ne mema, pampikwa kiyujo ne kwelwa’ko mwepo. Byowādi wampikwa kiyujo, kewādipo utatuka. Wādi mupapalale, mūmu tē, mukomokomo, upēla kutyumuna tubesetubese. Dyalelo nadyo, bakulumpe pa kipwilo babwanya kunena kumeso kwa Kivulukilo muntu wa kulonga uno mukate na bukula bwa ñano ne mema, kwiukanga mu mpanu. (shi bukula bwa ñano kebudi’kopo, ubwanya kulongwa na bukula bwa mutyele, mebele a buluba, nansha miseke idi pamo bwa ino.) Nansha mikate ya Bayuda yampikwa kiyujo ibwanya kwingidijibwa, mikate yambulwa bisombelwa pamo bwa malt, mai, nansha bitungulu.

7. Le Yesu wēsambile pa mvinyu’ka, ne i mvinyu ya muswelo’ka ibwanya kwingidijibwa dyalelo pa kivulukilo?

⁷ Mateo ubweja’ko amba: “[Yesu] watekuna kitomeno nakyo, wafwija’ko, webapa’kyo, kanena’mba: ‘Tomai’mo, banwe bonso.’” (Mat. 26:27, 28) Kino kyātekwine Yesu ku kuboko i kitomeno kya mvinyu ityila. (Ke bwādipo busuku butobala bwa mañanza,  mwanda mwangulo wa mañanza wādi kemupite tamba kala.) Mvinyu keyāingidijibwepo pa bidibwa bibajinji bya mu Edipito, ino Yesu kāpelejepo kutoma mvinyu pa Pashika. Wāingidije’yo’nka ne kwingidija mu kitatyi kya Bidibwa bya Kyolwa bya Mfumwetu. O mwanda bene Kidishitu nabo bengidijanga mvinyu dyalelo pa Kivulukilo. Mashi a Yesu byokeādipo asakilwa kubwejibwa’ko mvubu, mvinyu ingidijibwa keifwaninwepo kukomejibwa na nkuja ne ntobolo. Mvinyu ityila ifwaninwe kwingidijibwa i mvinyu yengwa mu yenu ntanda, nansha yoya ipoteja bansunga kimfwa Beaujolais, Bourgogne nansha Chianti.

BYELEKEJO BYA MVUBU

8. Mwanda waka bene Kidishitu batele mutyima ku kamweno kadi na mukate ne mvinyu?

⁸ Mutumibwa Polo wālombwele patōkelela’mba, kutentekela pa batumibwa, bene Kidishitu bakwabo banenwe kuvuluka nyeke Bidibwa bya Kyolwa bya Mfumwetu. Wāsonekēle banababo mu lwitabijo ba mu Kodinda amba: “Natambwile kudi Mfumwetu kino kyonemushidile ne banwe, amba Mfumwetu Yesu . . . watekwine mukate kadi, pa kupwa kufwija’ko, weutyumuna kanena’mba: ‘Uno welekeja umbidi wami usa kupānwa pa mwanda wenu. Longai nyeke namino ke pa kumvulukila.’” (1 Kod. 11:23, 24) Mu muswelo umo onka, dyalelo nadyo bene Kidishitu baloñanga kino kivulukilo kya pa mwaka kadi batele mutyima ku kamweno kadi na mukate ne mvinyu.

9. Le bantu bamo badi na mumweno’ka mubi pa mukate wāingidije Yesu?

⁹ Bantu bamo bendanga ku bipwilo banenanga’mba, Yesu wānene pa bute pa bute amba: ‘Uno i umbidi wami,’ o mwanda balañanga’mba mukate wāikele ke ngitu yandi mu kingelengele. Inoko, bino ke bya binepo. * Umbidi wa Yesu wādi mu kine kitatyi’kya kumeso a batumibwa ba kikōkeji, pamo ne mukate wampikwa kiyujo obādi ba  kudya. Na bubine, Yesu wādi wisamba mu muswelo wa kyelekejo, monka mwaālongele misunsa mikwabo mivule.​—Yoa. 2:19-21; 4:13, 14; 10:7; 15:1.

10. Le mukate wāingidijibwe pa Bidibwa bya Kyolwa bya Mfumwetu welekeja bika?

¹⁰ Mukate wādi umwene batumibwa ne obādi ba kudya wādi ushintulula umbidi wa Yesu. Umbidi’ka? Kyaba kimo, bengidi ba Leza bādi balanga’mba, Yesu byaātyumwine mukate ino mukupa wandi nansha umo kutyumuka mpika, mukate ushintulula “umbidi wa Kidishitu,” ke kipwilo kya bashingwe māni kadi. (Ef. 4:12; Loma 12:4, 5; 1 Kod. 10:16, 17; 12:27) Inoko, mu kine kitatyi’kya, bajingulwile amba bubinga bonso bubidi ne Bisonekwa bilombola’mba mukate welekeja umbidi wa Yesu wa bu muntu, mwine wāteakanibwe pa mwanda wabo. Yesu ‘wasusukile mu ngitu,’ ne kupopwa ku mutyi. Mu uno muswelo, pa Bidibwa bya Kyolwa bya Mfumwetu, mukate welekeja umbidi wa misunya mwine ‘wāselele’mo Yesu bubi bwetu.’​—1 Pet. 2:21-24; 4:1; Yoa. 19:33-36; Bah. 10:5-7.

11, 12. (a) Le Yesu wānene bika pa mwanda utala mvinyu? (b) Le mvinyu yāingidijibwe pa Bidibwa bya Kyolwa bya Mfumwetu yelekeja bika?

¹¹ Kino kitukwasha twivwanije byānene Yesu pa mvinyu. Tutanga amba: “Ne kitomeno nakyo monka na monka, aye pa kupwa kudya bidibwa bya kyolwa, wanena’mba: ‘Kino kitomeno kyelekeja kipwano kipya kya pa mashi ami.’” (1 Kod. 11:25) Mabible mavule esamba binenwa bimo na bidi mu bwalamuni bwa Robert Young bya amba: “Kino kitomeno i kipwanino kipya kya mu mashi ami.” Le bine kitomeno kyādi kikwete Yesu kyādi kipwanino kipya? Mhm. Kishima “kitomeno” kyādi kifunkila pa byādi’mo​—ke mvinyu kadi. Le Yesu wānene amba mvinyu yādi ishintulula nansha kwelekeja bika? I mashi andi āmwangikile.

¹² Tutana mu Evanjile ya Mako binenwa bya Yesu bya amba: “Kino kyelekeja ami ‘mashi a kipwano,’ asa kumwangwa pa mwanda wa bavule.” (Mako 14:24) Bine, mashi ādi a “kumwangwa pa mwanda wa bavule, mwanda wa kulekelwa bubi.” (Mat. 26:28) Nanshi, mvinyu ityila yelekeja mashi menemene a Yesu. Kupityila ku ano mashi, tubwanya kunyongololwa na kikūlwa, ke ‘kulekelwa bilubo byetu’ kadi.​—Tanga Efisesa 1:7.

KUVULUKA LUFU LWA KIDISHITU

13. Lombola muswelo uloñwanga Kivulukilo kya pa mwaka kya lufu lwa Kidishitu?

¹³ Shi usa kukatanwa ku Kivulukilo na Batumoni ba Yehova musunsa obe mubajinji, le i bika byokokeja kukulupila? Bakabungakena mu kifuko kiyampe kadi kikundulwe mukokeja bantu bonso kusangela kino Kivulukilo. Mwine mukokeja kutūlwa maluba mayampe, ino kukalabikwapo na bintu byobadyangwile nabyo nansha na bintu biloñwanga ku fetyi. Mukulumpe wa bwino ukabandaula mu muswelo muyampe kadi wa bulēme byobya binena Bible pa kino Kivulukilo. Ukakwasha bonso basangele byobya byētulongēle Kidishitu. Wāfwile bu kikūlwa mwanda wa tukamone būmi. (Tanga Loma 5:8-10.) Muneni ukashintulula nkulupilo ibidi mishile idi na bene Kidishitu ilombwelwe mu Bible.

14. Le i nkulupilo’ka ikesambilwa’po mu kitatyi kya Kivulukilo?

¹⁴ Lukulupilo lumo bidi i lwa kukabikala na Kidishitu momwa mūlu, lwine ludi na balondi batyetye ba Kidishitu, kimfwa batumibwa ba kikōkeji. (Luka 12:32; 22:19, 20; Kus. 14:1) Lukulupilo lukwabo i lolwa ludi na bene Kidishitu bavule bengidila Leza na kikōkeji mu kino kyetu kitatyi. Badi na dyese dya kwikala nyeke pano pa ntanda ikalamunwa ke paladisa. Kupwa, kiswa-mutyima kya Leza kikalongeka pano panshi na mokilongekela momwa mūlu, kintu kine kilombanga bene Kidishitu tamba kala. (Mat. 6:10) Kadi Bisonekwa bilombola biyampe ngikadilo ya kutendelwa yobakemwena nyeke ne nyeke.​—Is. 11:6-9; 35:5, 6; 65:21-23.

15, 16. Le i bika biloñwanga na mukate mu kitatyi kya Bidibwa bya Kyolwa bya Mfumwetu?

 ¹⁵ Dya ku mfulo kwa uno mwisambo, muneni ukanena’mba kitatyi kibabwana kya kulonga byobya byānene Yesu bandi batumibwa kulonga. Monka mokilombwedilwe kūlu, byelekejo bibidi bikengidijibwa, mukate wampikwa kiyujo ne mvinyu ityila. Bino byelekejo bikatūlwa pa meza kubwipi na muneni. Ukesambila pa nsekununi ya mu Bible ilombola byānene Yesu ne byaālongele kitatyi kyaāshilwile kino kinkumenkume. Kimfwa, tutanga mu nsekununi ya Mateo amba: “Yesu watekuna mukate, pa kupwa kwesela dyese, weutyumuna, wapa’o bana ba bwanga, kanena’mba: ‘Atai, mudyei. Uno welekeja umbidi wami.’” (Mat. 26:26) Yesu wātyumwine mukate wampikwa kiyujo mwanda wa kupityija’o mu batumibwa baādi nabo. Ukamona ku kupwila kwa mu mafuku 14 Kweji 4, bipindi bya mukate wampikwa kiyujo bitūle mu masani.

¹⁶ Kukengidijibwa masani mavule mwanda wa bino byelekejo bipityijibwe ku bonso ba katanwa’ko mu kitatyi kitungwe. Kekukalongwapo kisela nansha kimo. Kukalombelwa milombelo mīpi, kupwa masani akapityijibwa mu ndudi, na momulongelanga mu kyenu kibundi. Batyetye (padi nansha umo) bakadya ku mukate, monka mobyaikadile mu bipwilo bivule kitatyi kyapityijibwe mukate ku Kivulukilo kya mu 2013.

17. Le tulondanga bulombodi bwa Yesu mu mwanda utala mvinyu namani pa Kivulukilo?

¹⁷ Muneni ukatanga byobya byānene Mateo amba: “[Yesu] watekuna kitomeno nakyo, wafwija’ko, webapa’kyo, kanena’mba: ‘Tomai’mo, banwe bonso, kino kyelekeja ami “mashi a kipwano,” asa kumwangwa pa mwanda wa bavule, mwanda wa kulekelwa bubi.’” (Mat. 26:27, 28) Pa kulonda kino kimfwa, kukalombelwa milombelo mikwabo kupwa ke kupityija ‘bitomeno’ bya mvinyu ityila ku bonso batenwe’ko.

18. Ekale shi kudi bantu batyetye nansha shi kutupu muntu nansha umo wa kudya ku byelekejo, mwanda waka bifwaninwe’nka kwikala’ko?

¹⁸ Bantu bavule batanwanga’ko bapelanga na bulēme kudya ku byelekejo pobipita mwanda Yesu wālombwele’mba, i enka boba bakabikala mu Bulopwe bwandi bwa mūlu bo bakadya’ko. (Tanga Luka 22:28-30; 2 Tem. 4:18) Bakwabo bonso bakatanwa’ko bakatala na bulēme. Inoko, kutanwa ku Bidibwa bya Kyolwa bya Mfumwetu kudi na mvubu, mwanda kulombola’mba tumwene kitapwa kya Yesu na mvubu. Mu kitatyi kya Kivulukilo, babwanya kulangulukila pa madyese obakamwena mu kitapwa kya kikūlwa kya Yesu. Badi na dyese dya kubadilwa mu “kibumbo kikatampe” kikapanda kitatyi kikafika “kyamalwa kikatampe.” Batōtyi ba Yehova bakakenda “minkukumba yabo ne kwiitōkeja mu mashi a Kana ka Mukōko.”​—Kus. 7:9, 14-17.

19. Le ukalonga bika pa kwiteakanya ne kumwena mu Bidibwa bya Kyolwa bya Mfumwetu?

¹⁹ Batumoni ba Yehova kujokoloka ntanda yonso beteakanyanga ku kuno kupwila kwa pa bula. Tuketa bantu bavule kumeso kwa mayenga mavule mwanda wa baye batanwe’ko. Pakwabo kadi, mu mafuku a kubwipi na Kivulukilo, bavule mubukata mwetu bakatanga nsekununi ya byālongele Yesu ne bintu byālongekele mu difuku dikwatañene nakyo mu 33 K.K. Tukateakanya mingilo yetu mwanda wa kutanwa’ko. I biyampe kufika kumeso kwa lwimbo ne milombelo mibajinji mwanda wa kutundaila baya ne kulonda mpangiko yonso. Batwe bonso ba mu kipwilo ne beni, tukamwena’mo bya binebine shi tulonda mu ma Bible etu myanda ibandaulwa. Kintu kya mvubu mpata i kino, kutanwa kotukatanwa ku kivulukilo kukalombola’mba tufwijanga’ko na mutyima umo pangala pa kitapwa kya Yesu, kadi kukalombola’mba tukōkele musoñanya wandi wa amba: “Longai nyeke namino ke pa kumvulukila.”​—1 Kod. 11:24.

[Kunshi kwa dyani]

[Bipangujo bya Kifundwa]

[Kifwatulo pa paje 22]

[Kapango pa paje 23]

KIVULUKILO KYA MU 2014

Kweji ujokolokanga ntanda kweji ne kweji. Kitatyi kimo mu bula bwa kweji, kweji wikalanga pa bukata bwa ntanda ne dyuba. Shi kweji watentama witwanga bu “kweji mupya.” Mu kino kitatyi, kweji kabwanyapo kumonwa pano pa ntanda’nka ne bipwa mansá 18 kutūla ku 30.

Mu 2014, kweji mupya wa kubwipi na muketeko wa mvula ukatentama mu mafuku 30 Kweji 3, na nsá 8:45 kyolwa, mu Yelusalema. Dyuba dikapona mu Yelusalema mu difuku dilonda’ko, ko kunena’mba mafuku 31 Kweji 3, kintu kya mansá 21 pa kupita’po. Ketwitabijepo’mba kitōkeji kya kweji kikamweka mu kino kitatyi. Kadi, dyuba dikapona musunsa mubajinji kitatyi kikamweka kweji mubajinji lubese mu difuku 1 Kweji 4 mu Yelusalema. Shi twingidije manwa ādi engidija Bayuda ba kala, tubwanya kunena’mba difuku 1 dya Kweji wa Nisane dikashilula mu difuku dibajinji Kweji 4 pa kupona kwa dyuba.

O mwanda, bipwilo bya Batumoni ba Yehova kujokoloka ntanda yonso byalombwelwe amba, mafuku 14 Kweji wa Nisane akashilula mu Dya Mwanzo mafuku 14 Kweji 4, 2014 pa kupona kwa dyuba. Kino i kitatyi kikekala kweji mutuntulu.​—Shi usaka kuyukila’ko bivule mwa kupikwila utane dino difuku, tala Kiteba kya Mulami kya Falanse kya 15 Kweji 9, 1977, paje 575-576.

[Kifwatulo pa paje 24]

Batumibwa bātomene ku mvinyu yādi yelekeja mashi a Yesu a kipwano (Tala musango 11, 12)