Nadi’tu na myaka dikumi mu 1985 kitatyi kyafikile bankasampe ba mu Cambodge ku etu masomo mu Colombus, Ohio, mu États-Unis. Umo mu bano bankasampe wadi uyukile bishima bityetye mu Angele. Na bukwashi bwa bifwatulo, washilula kuñanina ñano ya nkuvu, butapani, ne kwipandija. Ponadi mvuluka bano banuke bufuku nadi ndila. Nadi nsaka kwibasapwila lukulupilo lwa Paladisa ne lusangukilo, ino kebadipo bemvwana lwami ludimi. Nansha byonadi nkasampe bininge, nakwete butyibi bwa kwifunda Kikambodi mwanda wa kusapwila bakwetu ba ku masomo myanda ya Yehova. Nkyadipo ndyukile biyampe muswelo ukalumbulula buno butongi būmi bwami bwa kumeso.

Kwifunda Kikambodi kwadi kukomo. Nakwete butyibi bwa kuleka’byo misunsa ibidi mituntulu, ino Yehova waunkankamika kupityila ku bambutwile bami. Kyaba kimo, badimu ba ku masomo ne bakwetu baanza kuntonona nondelonde kaji ka kusokola lupeto. Ino, ami nadi nsaka kwikala pania, penepa natonga kufunda masomo a sekondele a kunkwasha mwa kusokwela kaji ka kitatyi kityetye mwa kufikidila pa kitungo kyami. Ami pa kupwa masomo, nadi na kibidiji kya kwitana na bapania ne kusapula nabo. Kadi natongele ami mwine kufundija bana ba masomo ba ku inivelesite badi befunda Angele bu ludimi lwabo lwa bubidi—butongi bonamwenine’mo mwenda mafuku.

Ponabwenye myaka 16, naivwana’mba mu Long Beach, Kaliforni, mu États-Unis, mudi kisumpi kya Kikambodi. Naenda’mo ne kwifunda kutanga Kikambodi. Ami pa kutambula’tu dipolome, naikala bu pania ne kwendelela na kusapwila bene Cambodge badi kubwipi na kwetu. Ponabwenye myaka 18, nashilwile kulangulukila pa mwa kuvilukila ku Cambodge. Kyadi kikidi kifuko kya byaka, inoko nadi ndyukile amba bantu batyetye’tu mu bantu midiyo dikumi ba mu Cambodge baivwene myanda miyampe ya Bulopwe. Mu kine kitatyi’kya, mwadi’tu kipwilo kimo kya basapudi 13 mu ntanda ya Cambodge. Naendele musunsa mubajinji mu Cambodge ponadi na myaka 19. Myaka ibidi pa kupita’po, naenda kukashikata’mo. Nasokola mwingilo wa kitatyi kityetye wa kushintulula ne kufundija Angele mwa kwikwatakenya mu busapudi. Kitatyi kityetye pa kupita’po, nasokola mukaji wadi na bitungo na byami. Batwe bonso pamo, twasangedile kukwasha bene Cambodge bavule bapāne būmi bwabo kudi Leza.

Yehova wampele “bisakasaka mutyima” wami. (Ñim. 37:4) Kulonga bana ba bwanga i mwingilo usangaja kutabuka mingilo yonso. Mu bula bwa myaka 16 yonadi mu Cambodge, kipwilo kya bengidi 13 ba Yehova kyatamine ke bipwilo 12 ne bisumpi 4 bya mufula!—I Jason Blackwell unena.