Ngikadilo mibi ibwanya kwikala na lupusa lubi potudi. Ibwanya kona milangwe yetu, bukomo bwetu, ne kwikala na lupusa pa muswelo otumona būmi. Davida Mulopwe wa Isalela wātengelwe ku mutyima bininge na bibi bivule. Le wēbinekenye namani? Davida ulondolola mu mutōto utenga mutyima amba: “Ngitanga Yehova na diwi dyami, ne diwi dyami kudi Yehova nēsasa. Mwangile mwanda wami mu kifuko kyandi; nombolanga tusua twami mu kifuko kyandi. Papungile mushipiditu wami munda, wayūkile kashinda kami; mu dishinda mo nanga abantémo kidiba.” Bine, Davida wālombele na kwityepeja Leza amukwashe.​—Ñim. 142:1-3.

Davida wāimbile mu mutōto mukwabo amba: “I kimo kyonka kyo nalomba kudi Yehova, e kyonka kyo nkalondalonda; na’mba ngikale mu njibo ya Yehova mafuku onso a būmi bwami, mandila buya bwa Yehova, ne kulanga mu njibo īkola.” (Ñim. 27:4) Davida kādipo mwine Levi, ino mumone’po bidi wimene panja pa kipango kijila kubwipi na kité kine kya mutōtelo wa bine. Mutyima wa Davida muyule kufwija’ko kufika ne ku kukimba kupityija’mo mafuku āmushadile’ko ne “kwikala mu njibo ya Yehova.”

Kishima “buya” i kikwatañane na ngikadilo ya kwikala “biyampe nansha bisangaja mu ñeni, mu milangwe nansha mu mwiivwanino.” Davida wādi usangedile nyeke mpangiko ya Leza ya butōtyi. I biyampe twiipangule’mba, ‘le neivwananga na mwādi mwiivwanina Davida?’

Mu ano etu mafuku, mpangiko ya Yehova ya kumufwena keimaninepo pa bintu bimweka na meso. Ino, mubadilwa ne tempelo mikatampe ya Leza ya ku mushipiditu​—mpangiko ikola ya butōtyi bwa bine. * Shi ‘tulanga’ pa ino mpangiko, netu tubwanya ‘kubandila buya bwa Yehova.’

Langulukila pa madabahu a mukuba a byakwela bisokwe ādi kumeso kwa kutwela mu tabenakulo. (Div. 38:1, 2; 40:6) Ano madabahu ādi elekeja mutyima wa Leza wa kwitabija būmi bwa bu muntu bwa Yesu bu kitapwa. (Bah. 10:5-10) Langulukila ne pa mobishintulwila kotudi! Mutumibwa Polo wāsonekele amba: “Shi, potwadi balwana, twapwanijibwe na Leza pa lufu lwa wandi Mwana.” (Loma 5:10) Shi tulombole lwitabijo mu mashi āmwangile Yesu, tubwanya kwitabijibwa na Leza ne kukulupilwa nandi pamo bwa balunda nandi. Mfulo mfulō, ‘tukapwana na Yehova’ kipwano kya mpwaninine.​—Ñim. 25:14.

‘Byajimankanyanga bubi’ bwetu, twimwenanga ‘bitatyi bya kutūja bitamba kudi Yehova.’ (Bil. 3:19) Ngikadilo yotudi’mo idi pamo bwa ya muntu mukutwe mu kifungo wialakanya pa bilongwa bya kala ne kushinta bya binebine kitatyi kyakungila kwipaibwa. Mutyibi wa kwituma pa kumona kino, watengwa ne kukimba kupwa mambo a uno muntu​—watalula mfuto yandi ya lufu. Bine, uno mukutwa ukasengibwa ne kusangala bininge! Pamo bwa uno mutyibi, Yehova ulombolanga buntu bwandi ku bantu besāsa ne kutalula mfuto ya lufu.

Mu bintu bya mu mutōtelo wa bine byāmwene Davida mu njibo ya Yehova mubadilwa ne bibumbo bya banababo bene Isalela bādi babungakene, kutanga ne kushintululwa kwa Mukanda wa Bijila kumeso a bantu bonso, kusōka ensense, mingilo ikola ingilwa na bapidishitu ne bene Levi. (Div. 30:34-38; Umb. 3:5-8; Kup. 31:9-12) Kudi bintu  bya mu ano etu mafuku biifwene na bya mu mutōtelo wa bine mu Isalela wa kala.

“Talaipo bidi, mo kyanengelela ne kulumbulula’kyo, bāna na bāna kwikala pamo mutyima umo onka, senene, shē!” mu ano etu mafuku’nka na mobyādi bikadile pa kala. (Ñim. 133:1) Kudi kwendelela kukatampe mu ‘kwisanswa kwa kisaka kyonso kya banabetu’ ba ntanda yonso. (1 Pe. 2:17) Kinenwa kya Leza kitañwanga ne kushintululwa kumeso a bantu bonso ku kupwila kwetu. Yehova witupanga mpangiko ya bufundiji buvule kupityila ku bulongolodi bwandi. Kadi kudi bidibwa bivule bya ku mushipiditu bitampwa mwanda wa twingidije’byo mu kifundwa kya kasuku ne kya kisaka. Tutu umo wa mu Kitango Kyendeji wanene amba: “Kulangulukila pa Kinenwa kya Yehova, pa mvubu yakyo, ne kukimba bujinguludi ne kwivwanija kumpanga bupeta buvule bwa ku mushipiditu ne kuloelelwa bitatyi byami byombukanga.” Bine, ‘kuyukidija kubwanya kwikala biyampe ku muya wetu.’​—Nki. 2:10.

Dyalelo, milombelo mitabijibwe ya bantu ba Leza ikandanga kudi Yehova difuku ne difuku. Kudi Yehova, ino milombelo idi pamo bwa ensense ya luvumba luyampe. (Ñim. 141:2) I biyampe’po kashā muya wetu uyuke’mba, Yehova Leza witusangelanga bininge kitatyi kyotumufwena mu milombelo ya kwityepeja!

Mosesa wālombele amba: “Buya bwa Yehova Leza wetu bwikale padi bātwe; ne kukankamika ukankamike mīngilo ya makasa etu.” (Ñim. 90:17) Kitatyi kyotuvuija mwingilo wetu na bupyasakane, Yehova weselanga’o. (Nki. 10:22) Ketudi padi bakwashe bantu kampanda befunde bubinebine. Padi ketudi beje mu mwingilo myaka mivule nansha byokudi bujundu, misongo, mutyima kupepa, nansha kupangwapangwa. (1 Te. 2:2) Ino, le ketwamwene “buya bwa Yehova” ne kuyuka’mba Tata wetu wa mūlu usangelanga bininge bukomo bwetu?

Davida wāimbile’mba, “Yehova i kingabile kya bupyane kyami ne kya kitomeno kyami . . . Bingabile byami bibamponena palumbuluke payampe; eyo, eyo, ngidi ne bupyane bulumbuluke.” (Ñim. 16:5, 6) Davida wāfwijije’ko pa mwanda wa ‘kyobāmwabile,’ ko kunena’mba, kwitabijibwa kupwana na Yehova ne dyese dya kumwingidila. Pamo bwa Davida, tubwanya kususuka, ino tudi na madyese mavule a ku mushipiditu! Nanshi twendelelei kuloelelwa mu mutōtelo wa bine ne ‘kulanga’ nyeke pa tempelo ya ku mushipiditu ya Yehova.