1. Byotupangilwe mu kyelekejo kya Leza, le tudi na bukomo’ka?

 BINENWA bya amba, “mwana nyema, kapale nyema,” bivudile kunenwa na bantu. Na bubine, bana bavule befwananga babo bambutwile bininge. Kadi, ba shabana ne inabana bapyanikanga wabo mwana nsange yabo. Yehova Tata wetu wa mūlu ye Upānanga būmi. (Ñim. 36:9) Batwe netu bandi bana ba pano panshi, tumwifwene mu muswelo kampanda. Byotupangilwe mu kyelekejo kyandi, tudi na bukomo bwa kulanga, bwa kuleta mvuyo mu mwanda kampanda ne bwa kutamija kipwano ne kwikilama.​—Ngo. 1:26.

2. Le kipwano kipwananga netu Yehova kimaninanga pa bika?

² Yehova ubwanya kwikala mulunda netu muyampe. Kino kipwano kimaninanga pa buswe bwituswele Leza ne pa lwitabijo lotumwitabije aye ne wandi Mwana. Yesu wānene amba: “Leza byaasenswe ino ntanda bikatampe mpata, wapēne wandi Mwana mubutulwe bunka, amba ense ulombola lwitabijo mudi aye kakyonakanibwa, ino amone būmi bwa nyeke.” (Yoa. 3:16) Kudi bimfwa bivule bya bantu bāpwene kipwano kya mpwaninine na Yehova. Twisambilei’ko bidi pa babidi.

3, 4. Lombola kwishila kwādi pa bukata bwa Abalahama ne lutundu lwandi mu mwanda utala kipwano.

³ Yehova wātelele mukulutuba ne nkambo wa bene Isalela bu  “Abalahama mulunda nami.” (Isa. 41:8) Kisonekwa kya 2 Bilongwa 20:7 nakyo kitēla Abalahama bu mulunda na Leza. Le kipwano kya nyeke kya uno muntu wa kikōkeji na Umpangi wandi kyādi kimanine pa bika? I pa lwitabijo lwa Abalahama.​—Ngo. 15:6; tanga Yakoba 2:21-23.

⁴ Yehova wāikele dibajinji bu Mulunda ne Shandya lutundu lwa Abalahama lwāikele bu muzo wa Isalela wa kala. Ino i kya bulanda, mwanda bājimije kipwano kyobādi bapwene na Leza. Mwanda waka? Mwanda bākomenwe kulombola nyeke lwitabijo mu milao ya Yehova.

5, 6. (a) Le Yehova waikele bu Mulunda nobe namani? (b) Le i bipangujo’ka byotufwaninwe kwiipangula?

⁵ Shi wifunda bininge myanda ya Yehova, lwitabijo lobe mwadi lukakoma, kadi buswe bomuswele bukavula. Langulukila bidi pa kitatyi kya kunyuma kyowayukile amba Leza i Muntu udi’ko bine, muntu obwanya kupwana nandi. Wefundile kadi amba batwe bonso twābutwilwe mu bubi mwanda wa kubulwa kikōkeji kwa Adama. Wafudile ku kuyuka’mba, bantu bonso bāsāsukile kudi Leza. (Kol. 1:21) Kupwa wafula ku kujingulula’mba, Tata wetu wa buswe udi mūlu ke muntupo udi kulampe ketutelepo mutyima. Kitatyi kyotwefundile myanda itala mpango yandi ya kitapwa kya kinkūlwa kya Yesu ne kwitabija mu ino mpangiko, twashilwile kutamija kipwano kyotupwene nandi.

⁶ Dyalelo, tubwanya kwiipangula amba: ‘Le kipwano kyompwene na Leza kyendanga kitama? Le kikulupiji kyomukulupile i kikomo, ne buswe bonswele Yehova Mulunda nami muswe butamanga difuku ne difuku?’ Muntu mukwabo wa pa kala wādi upwene kipwano kya mpwaninine na Yehova i Ngideoni. Shi ke pano, tulangulukilei bidi pa kimfwa kyandi kilumbuluke ne pa muswelo otubwanya kwikilonda.

7-9. (a) Le i bintu’ka bya kutendelwa byēmwenine Ngideoni, ne kwālupukile bipa’ka? (Tala kifwatulo kidi ku ngalwilo.) (b) Le i muswelo’ka otubwanya kupwana na Yehova?

⁷ Mutyibi Ngideoni wāingidile Yehova mu bitatyi bikomo mu mānga ya Isalela pa kupwa kwa muzo kutwela mu Ntanda ya Mulao. Batyibi shapita wa 6 ulombola’mba, mwikeulu wa Yehova wāpempwile Ngideoni ku Ofela. Mu kine kitatyi’kya, bene Midyana balondakani nabo bādi bu kyaka kya binebine ku Isalela. Pa buno bubinga, Ngideoni wādi pamo bwa ñano mipūle, ke mu budimipo, ino mu kyengelo kya mañanza moyādi ikokeja kufya bukidibukidi miseke ya mvubu. Mwikeulu pa kumumwekela mu kitulumukila ne kumwita bu “mukomokomo kalāla,” Ngideoni wēipangwile shi Yehova, wānyongolwele bene Isalela mu Edipito, wādi bine wa kumukwasha mu kino kitatyi. Mwikeulu pa kwisamba pa kyaba kya Umpangi, wākulupije Ngideoni amba Yehova wādi nandi bine.

⁸ Ngideoni wādi wiipangula muswelo waādi wa kubwanya ‘kupandija Isalela ku makasa a bene Midyana.’ Yehova wāmulondolwele aye mwine amba: “Binebine nkekalanga nobe, kadi ukatyumuna bene Midyana bwa muntu umo.” (Bat. 6:11-16) Na bubine, Ngideoni pa kukimba kuyuka mobyādi bya kwikadila, wākimbile kiyukeno. Yuka’mba mu ino mīsambo, Ngideoni kādipo wiipangula shi Yehova i Muntu udi’ko bine.

⁹ Bintu bikwabo byālongekele byākomeje lwitabijo lwa Ngideoni ne kumufwenya pabwipi na Leza. Ngideoni wātekele bidibwa ne kupa’byo mwikeulu. Kitatyi kyātēmene bidibwa pa kutenga’byo ku mukombo wa mwikeulu, Ngideoni wājingulula amba uno mwikeulu i ntunguluji wa Yehova binebine. Pa kuzakala, Ngideoni wānena amba: “A! A! Abe Mfumwami Leza! ino namone nanshi mwikeulu wa Yehova mpala na mpala!”  (Bat. 6:17-22) Ino, le bino byāmutene byātūdile mukalo pa bukata bwa Ngideoni ne Leza wandi? Mhm! Ke byatūdile’popo mukalo. Ngideoni wāfudile ku kuyuka Yehova kufika ne byāeivwene bu udi mu ndoe na Leza. Tuyukile kino kupityila ku dijina dyāinikilwe madabahu āshimikile Ngideoni pa kino kifuko​—ke bu “Yehova-shalome” kadi. Dino dijina dishintulula’mba, “Yehova I Ndoe.” (Tanga Batyibi 6:23, 24.) Kitatyi kyotulangulukila pa bintu bitulongela Yehova difuku ne difuku, tufulanga ku kumumona’mba i Mulunda wa binebine. Kulombela kudi Leza kitatyi ne kitatyi kuvudijanga ndoe yetu ne kuningija kipwano kyotupwene nandi.

10. Kukwatañana na Mitōto 15:3, 5, le Yehova usakanga tulonge bika shi tukimba kupwana nandi?

¹⁰ Ino, pa kusaka Yehova ekale Mulunda netu, tufwaninwe kubwanya bisakibwa kampanda. Monka mobisonekelwe mu Mitōto 15, Davida wāimbile pa mwanda utala byofwaninwe kulonga pa ‘kukapempula mu kipema kya Yehova,’ ko kunena’mba, kwikala mulunda na Leza. (Ñim. 15:1) Twisambilei bidi pa bino bisakibwa bibidi​—kwepuka bubela ne kulonga bintu pampikwa budimbidimbi mu bintu byonso. Mu ino myanda, Davida wēsambīle pa mweni mu kipema kya Yehova amba: “Wakubulwa kubēpa ne ludimi lwandi, . . . nansha kwitabijya lubabo lwa kubaba mukwabo.”​—Ñim. 15:3, 5.

11. Mwanda waka tufwaninwe kwepuka bubela bo-bonso?

¹¹ Mu mutōto mukwabo, Davida wādyumwine amba: “Jila ludimi lobe ku bubi.” (Ñim. 34:13) Kukomenwa kwivwana madingi a ku bukomo bwa mushipiditu kukona kipwano kyotupwene na Tata wetu wa mūlu moloke. Na bubine, bubela i kayukeno ka Satana walwana mukatampe wa Yehova. Kishima “Dyabola” i kitambe ku kishima kya Kingidiki kishintulula’mba, “mbepai.” Kubandaula byotunena pa bakwetu kwitukwashanga tulame kipwano na Yehova. Nakampata tufwaninwe kuta mutyima ku byotusapwila bana-balume batongwe mu kipwilo.​—Tanga Bahebelu 13:17; Yude 8.

12, 13. (a) Mwanda waka tufwaninwe kwikala bampikwa budimbidimbi mu bintu byonso? (b) Le kubulwa budimbidimbi kwetu kubwanya kwikala na lupusa’ka pa bakwetu?

¹² Bengidi ba Yehova ibayukane bu bantu bampikwa budimbidimbi. Mutumibwa Polo wāsonekele amba: “Mwitulombelelai’ko nyeke, mwanda tukulupile amba tudi na mutyima wa mundamunda wampikwa budimbidimbi, byotusaka kwiendeja kwampikwa budimbidimbi mu byonso.” (Bah. 13:18) Byotusumininwe “kwiendeja kwampikwa budimbidimbi mu byonso,” twepukanga kumwena banabetu bene Kidishitu. Kimfwa, shi bengilanga ketu kaji, tufwaninwe kwibamona biyampe ne kwibafuta mungya motwiivwanine nabo. Batwe bene Kidishitu, twikalanga na botwingila nabo ne bantu bakwabo bonso pampikwa budimbidimbi. Kadi shi twingilanga na mwanetu mwine Kidishitu, tutanga mutyima ku kuleka kumumwena na kumunena etumone mu muswelo wa pa bula.

¹³ Bine, twivwananga nyeke binenwa bya kutendela binena bantu ba ino ntanda bengilanga na Batumoni ba Yehova! Kimfwa, mwimaniji wa bulongolodi bukatampe bwa mingilo ya lūbako wamwene’mba, Batumoni ba Yehova bafikidijanga binenwa byabo. Wanenene’mba, “mulamatanga nyeke ku bintu byomwitabije kulonga.” (Ñim. 15:4) Uno mwiendelejo witukwashanga tulame kipwano kyotupwene na Yehova. Kadi, utumbijanga Tata wetu wa buswe udi mūlu.

14, 15. Le i muswelo’ka otubwanya kukwasha bakwetu mu busapudi bekale balunda na Yehova?

¹⁴ Nansha bantu bavule botutananga mu busapudi byobabwanya kukulupila amba Leza udi’ko, kebamumwenepo bu Mulunda  nabo muyampe. Le tubwanya kwibakwasha namani? Tulangulukilei pa bulombodi bwāpele Yesu bandi bana ba bwanga 70, kitatyi kyāebatumine babidi-babidi mwanda wa kusapula. Wēbanene amba: “Konso komutwela mu njibo, nenai bidi amba: ‘Ndoe ikale mu ino njibo.’ Kadi shi mwine’mwa mudi mulunda na ndoe, nankyo ndoe yenu ikekala pādi. Ino shi i mutupu’ye, nankyo ikemujokela.” (Luka 10:5, 6) Tubwanya kukokela bantu ku bubinebine shi twibasapwila bya bulunda. Pa mwanda utala balwana, kino kibwanya kwitukwasha tupwe lwana ne kusaula dishinda dya kwitutambula biyampe difuku dikwabo.

¹⁵ Shi tubatana bantu balamete ku mutōtelo wa bubela nansha balonda bisela kebikwatañenepo na bisonekwa, twendelelanga kulombola ngikadilo ya bulunda ne ndoe. Tulubulanga na nsangaji ku kupwila kwetu bantu bazumbija mutyima mu ntanda ya dyalelo ne basaka kwifunda bivule padi Leza otutōta. Bishinte binena’mba, “Bible Ushintanga Būmi” bitupa bimfwa bivule bilumbuluke.

16. Le i muswelo’ka otubwanya kumonwa bu balunda na Yehova ne bu ‘bengidi bengila nandi pamo’?

¹⁶ Divule dine, bantu bengidila pamo bapwananga bininge. Bantu bonso bepēne kudi Yehova badi na dyese dya kumonwa bu balunda nandi ne bu ‘bengidi bengila nandi pamo.’ (Tanga 1 Kodinda 3:9.) Na bubine, kitatyi kyotusapula ne kwingila mwingilo wa kulonga bana ba bwanga, tujingululanga bininge ngikadilo ya kutendelwa ya Tata wetu wa mūlu. Tumonanga muswelo witukwashanga mushipiditu tukumbanye mwa kuvuijija mwingilo wetu wa kusapula myanda miyampe.

17. Le bidibwa bya ku mushipiditu biletwanga ku bitango ne ku kubungakana kwetu bilombola namani amba Yehova i Mulunda netu?

¹⁷ Shi tutambila bininge mu mwingilo wa kulonga bana ba bwanga, tukafwena bininge kudi Yehova. Kimfwa, tumonanga muswelo ukankajanga Yehova balwana netu. Tujokelei bidi myaka mityetye kunyuma. Lelo ketumwenepo patōkelela muswelo wituludika Leza? Tutulumukanga pa muswelo waendelela kwitupa bidibwa bivule bya ku mushipiditu. Mpangiko ya bitango ne kubungakana kwetu bilombola’mba, Tata wetu uyukile na buswe makambakano etu ne byotusakilwa. Kisaka kimo kyasonekele mu mukanda wa kufwija’ko pangala pa kitango amba: “Mpangiko yatengele mityima yetu bya binebine. Twamwene muswelo witusenswe Yehova umo ne umo ne kwitusakila twikale biyampe.” Pa kupwa kutanwa ku kitango kya pa bula mu Irlande, ba mulume ne mukaji ba ku Alemanye balombwele kufwija’ko kwabo pa muswelo obebalubwile ne kwibata mutyima amba: “Inoko tufwijanga’ko bininge ba Yehova ne Yesu Kidishitu Mulopwe wandi. Betwityile tubadilwe mu uno muzo mwikutyile mu bumo bya binebine. Ketwisambilangapo enka pa  buno bumo, ino tudi’mo difuku ne difuku. Myanda yotwemwenine ku kitango kya pa bula mu Dublin iketuvuluja nyeke dyese dya pa bula dyotudi nadyo dya kwingidila Leza wetu mukatakata pamo na banwe bonso.”

18. Le i bika byotukokeja kwiipangula pa mwanda utala kwisamba na Yehova?

¹⁸ Bulunda butyitanga shi bantu besamba biyampe. Bantu bavule bengidijanga diteba dya kyungwija ne kwitumina misapu mu ino myaka idi’ko Entelenete ne busendwe bwa kwisambulwila mawi. Ino, le bino bibwanya kudingakana na mīsambo yotwisambanga na Yehova Mulunda netu muyampe? Bine, aye i “Wivwananga kulombela.” (Ñim. 65:2) Ino, twitūdilanga’ko nyeke kitatyi kya kwisamba nandi?

19. Le i bika bibwanya kwitukwasha shi tubakomenwa kulombola Tata wetu wa mūlu milangwe idi mu mutyima wetu?

¹⁹ Bengidi ba Leza bamo bakomenwanga kulombola milangwe idi mu wabo mutyima. Kadi, kino kyo kitusakilanga Yehova kitatyi kyotulombela. (Ñim. 119:145; Mad. 3:41) Nansha shi tubakomenwa kunena mu bishima ino myanda ya ku mutyima, ketubulwangapo kukwashibwa. Polo wāsonekēle bene Kidishitu ba mu Loma amba: “Ketuyukangapo mwanda mwine otufwaninwe kulomba mobifwaninwe, ino mushipiditu ao mwine witusengelanga na imbinzo yampikwa kunenwa. Inoko yewa ubandaulanga mityima uyukile mwikadile mushipiditu, mwanda ao usengelanga bajila monka musakila Leza.” (Loma 8:26, 27) Kulangulukila pa binenwa bisonekelwe mu mikanda ya mu Bible pamo bwa Yoba, Mitōto, ne Nkindi kuketukwasha tulombole Yehova milangwe yetu idi mu mutyima.

20, 21. Le i busengi’ka budi mu binenwa bya Polo bidi mu Fidipai 4:6, 7?

²⁰ Shi tubatanwa na myanda mikomo, tutejei madingi a Polo a ku bukomo bwa mushipiditu aādingile bene Fidipai amba: “Kemwakikambakanyai mityima pa kintu nansha kimo, inoko umbyonso yukijai Leza byomulomba mu milombelo ne kwabija pamo ne kufwija’ko.” Kwisamba patōkelela na Mulunda netu muyampe uno muswelo, kuketusenga bya binebine mwanda Polo ubweja’ko amba: “Ndoe ya Leza itabukile milangwe yonso ikalama mityima yenu ne ñeni yenu padi Kidishitu Yesu.” (Fid. 4:6, 7) Nanshi, tusanswei nyeke “ndoe ya Leza” keidi yoidingakene nayo, mine ilamanga mityima yetu ne bukomo bwetu bwa kulanga bya binebine.

²¹ Milombelo itukwashanga tutamije kipwano na Yehova. O mwanda, ‘tulombelei kitatyi kyonso.’ (1 Te. 5:17) Kino kishinte kyotwefunda kiningishe kipwano kilēme kyotupwene na Leza ne kusumininwa kotusumininwe kulonda misoñanya yandi myoloke. Kadi twitūdilei’ko kitatyi kya kulangulukila pa madyese otudi nao pa mwanda wa kwikala kwikele Yehova bu Tata wetu, Leza wetu, ne Mulunda netu.