Mu lwimbo lwaāimbile Umpangi, Davida Mulopwe wa Isalela wa kala wāimbile amba: “Ndoelelwe monka mu kulonga kiswa-mutyima obe, abe Leza wami; eyo i binebine, mukanda-obe-wabijila udi umutyima wami.” (Ñim. 40:8) Nansha Davida byaādi ususuka ne kutyinibwa mu būmi, wādi bine uloelelwe kulonga kiswa-mutyima kya Leza. Na bubine, Davida kādipo mutōtyi wa Yehova umo kete wāsangedile kwingidila Leza wa bine.

Mutumibwa Polo pa kwingidija binenwa bidi mu Mitōto 40:8 padi Meshiasa nansha Kidishitu, wāsonekele amba: “Aye [Yesu] pa kwiya mu ino ntanda unena’mba: ‘“Kitapwa ne kyamulambu kusakile’byopo, ino abe waunongolwedile umbidi. Kwaloelelwepo byamulambu bisōkwe ne kyamulambu kya bubi.’ Penepo nanena’mba, “Tala! Naiya (mu muvungo wa mukanda i kinembelwe ami) kulonga kiswa-mutyima kyobe, abe Leza.”’”​—Bah. 10:5-7.

Yesu paādi pano pa ntanda, wāsangedile kubandila bupangi, kwikala na balunda, ne kudya nabo bidibwa. (Mat. 6:26-29; Yoa. 2:1, 2; 12:1, 2) Inoko, wādi usangedile ne kuloelelwa bininge kulonga kiswa-mutyima kya Shandi wa mūlu. O mwanda, Yesu wānenene amba: “Byami byakudya i kulonga kiswa-mutyima kya yewa wantumine ne kupwa mwingilo wandi.” (Yoa. 4:34; 6:38) Bana ba bwanga ba Yesu bēfundīle kudi Mfumwabo kintu kileta nsangaji ya binebine. Na nsangaji mikatampe, bāitabije ne kupēlakana kusapwila bakwabo musapu wa Bulopwe.​—Luka 10:1, 8, 9, 17.

Yesu wāsoñenye balondi bandi amba: “Endai mukalonge bana ba bwanga mu bantu ba ku mizo yonso, mwibabatyijei mu dijina dya Tata ne dya Mwana ne dya mushipiditu ujila, mwibafundijei kulama byonso byonemusoñenye. Kadi talaipo! Ami ngidi nenu mafuku onso kufika ne ku mvuyo ya ino ngikadilo ya bintu.” (Mat. 28:19, 20) Kuvuija uno mwingilo kulombanga kupempula bantu konso kobatanwa, kujokela boba basangela,  ne kwifunda nabo Bible. Kwingila uno mwingilo kubwanya kwikala bu nsulo ya nsangaji mikatampe.

Nansha shi bantu basangele musapu wetu nansha kwiusangela mpika, mumweno wetu udi na mvubu mikatampe pa kutana nsangaji mu mwingilo. Mwanda waka twendelelanga kusapula myanda miyampe nansha byotubwanya kutana bantu ba bujundu ne bapela musapu? Mwanda tuyukile’mba kusapula Bulopwe ne kwingila mwingilo wa kulonga bana ba bwanga i kilomboji kya buswe botuswele Leza ne bakwetu. Na bubine, būmi bwa bantu budi mu kyaka—bwetu ne bwa bakwetu. (Ezk. 3:17-21; 1 Tm. 4:16) Tulangulukilei’ko bidi pa bintu bimo byakweshe bengidi-netu bavule balame nansha kwaluja bupyasakane bwabo bwa kupyasakena mwingilo mu myaba mikomo.

Kwingidija bipangujo biyampe mu mwingilo wetu kulupulanga nyeke bipa biyampe. Difuku dimo, Amalia wamwene muntu umo utanga julunale mu kiwanza kya mityi. Wamufwena ne kumwipangula shi watange’mo myanda miyampe. Aye pa kulondolola’mba aa, Amalia wamunena amba, “ne mukuselele myanda miyampe ya Bulopwe bwa Leza.” Kino kyalengeja uno muntu asangele musapu ne kwitabija kwifunda Bible. Na bubine, Amalia wabwenye kushilula bifundwa bisatu bya Bible mu kino kiwanza kya mityi.

Janice waalamwine kifuko kwaingilanga’ko ke mwaba wandi wa busapudi. Kitatyi kyasangedile nzamu umo ne muntu obengilanga nadi kishinte kimo kidi mu Kiteba kya Mulami, Janice webanena kwibaselela mapepala kyaba ne kyaba. Walonga muswelo umo onka ne na mwingidi-nandi mukwabo, mwine watengelwe na myanda palapala isambilwe mu Kiteba kya Mulami ne Réveillez-vous ! Kino kyalengeje mwingidi-nandi mukwabo alombe mapepala. Janice unena’mba, “bine dino i dyese ditamba kudi Yehova!” Waikele mwenda mafuku na bantu 11 bapanga mapepala ku kaji.

Mutadi umo wendakana wanene’mba, mu busapudi bwa ku njibo ne njibo, basapudi kebafwaninwepo kufudija mwisambo na mwine njibo na kunena amba, bakaya monka difuku dikwabo. Ino, babwanya kumwipangula amba: “Le ukasangela ngiye nkulombole mwifundilwanga Bible?” nansha’mba, “le i difuku’ka ne nsá’ka yonkokeja kwiya monka mwanda wa twendeleje mīsambo yetu?” Uno mutadi wendakana wanenene amba, na kwingidija uno musapwilo, batutu ne bakaka ba mu kipwilo kimo kyaadi ukwasha, bashilwile bifundwa bya Bible 44 mu yenga umo.

Kujokela muntu bukidibukidi​—nansha mafuku matyetye pa kupwa kwa kwitana kubajinji—​kubwanya kupa bipa biyampe. Mwanda waka? Mwanda kulonga namino, kulombolanga’mba tutele mutyima ku kukwasha bantu ba mityima myoloke bevwanije Bible. Kitatyi kyobaipangwile mwana-mukaji umo kine kyaatabijije kwifunda Bible na Batumoni ba Yehova, wanenene amba, “nashilwile kwifunda mwanda badi bantele mutyima ne kunombola buswe bwa binebine.”

 Kitatyi’tu kityetye pa kupwa kutanwa ku Masomo a Bapania, Madaí wadi wifunda Bible na bantu 15, kadi wapele basapudi bakwabo bifundwa bikwabo 5. Bantu bavule baadi wifunda nabo Bible bashilula kupwila kyaba ne kyaba. Le i bika byakweshe Madaí ashilule bifundwa bivule nenki? Masomo amupele mutyima wa kujokelajokela bantu kufika ne byasokola boba balombwele kusangela dibajinji. Kamoni mukwabo wakweshe bantu bavule befunde bubinebine bwa mu Bible unena amba, “nayukile’mba kulonga nyeke kujokela’mo o muswelo wa kukwasha bantu basaka kuyuka Yehova.”

Kulonga kujokela’mo ne kwendeja bifundwa bya Bible, kulombanga kulonga bukomo na kininga. Inoko, madyese alupuka’ko i mapite ne pa bukomo bulombwa. Shi twipānina mu mwingilo wa kusapula Bulopwe, tubwanya kukwasha bakwetu bekale “na buyuki bwinebwine bwa bubine,” ne kadi kino kibwanya kwibaletela lupandilo. (1 Tm. 2:3, 4) Kulonga namino kubwanya kwituletela netu nsangaji ne kuloelelwa kekudingakanibwapo.