KITATYI kyātambile bantu ba Leza mu Babiloni mu 537 K.K.K., Yehova wādi wibatele mutyima mu lwendo lwabo lwa ku Yelusalema. Wēbasapwidile amba: “Longololai dishinda dya bantu’ba; kalwilai, kalwilai musebo mukata’wa; ololai mabwe’a.” (Isa. 62:10) Fwatakanya’po bidi mwādi mwa kulongela Bayuda uno muswelo. Bādi bakulongela padi mafetyi mu dishinda, padi na kuyula mu misanza ne mu dishinda dya byaka. Kulonga namino kwādi kwa kukwasha banababo bādi bebalonda kunyuma mu dishinda pa kwitolela mu yabo ntanda.

Tubwanya kwelekeja kino na kashinda katwala ku bitungo bya ku mushipiditu. Yehova usakanga bengidi bandi bonso bende mu kano kashinda pa kubulwa byaka bya bituputupu. Kinenwa kyandi kitusoñanya amba: “Dingakanya biyampe dishinda dya maulu obe, ino mashinda obe onso ololwe biyampe shē.” (Nki. 4:26) Ekale shi wi nkasampe nansha shi kudipo nkasampe bininge, ukokeja kumona tunangu tudi mu ano madingi a Leza.

Padi kodi mwivwane bantu banena nkasampe bintu pamo bwa bino amba: ‘Wendanga bininge’ nansha amba, ‘i munange bifuko bivule.’ Divule dine bankasampe bekalanga na bukomo bwa ngitu buyampe, na lūku lupēla ne kusaka kwikala na būmi buyampe. Bible unena patōkelela amba: “Ntumbo ya bansongwalume i bukomo bwabo.” (Nki. 20:29) Nkasampe wingidija bwino ne bukomo bwandi mwanda wa kwingidila Yehova, ubwanya kufikila pa bitungo bya ku mushipiditu ne kwikala na nsangaji ya binebine.

Inoko, monka moyukile, bukomo bwa bankasampe budi na kamweno kakatampe pano pa ntanda. Shi Kamoni nkasampe waingila biyampe ku masomo, mudingidi mukwashi, mwadimu nansha bakwabo ba ku masomo babwanya kumuningila alondelonde masomo malamala bu ye ditabula ditwala ku būmi buyampe mu ino ngikadilo ya bintu. Tutu  nansha kaka nkasampe udi na bwino mu makayo, ukokeja kumona’mba bantu bakwabo ba ku masomo baloñanga bukomo bwa kumunekenya amone makayo bu mwingilo wandi. Lelo nobe kodi mutanwe na mwanda wa uno muswelo, nansha kuyuka muntu uningilwa uno muswelo? Lelo i bika bikakwasha mwine Kidishitu atonge butongi na tunangu?

Kwifunda Bible kukokeja kukwasha muntu eteakanye mwa kwendela mu dishinda dilumbuluke dya mu būmi. Musapudi 12:1 unena amba: “Vuluka Umpangi obe mu mafuku obe pokidi nkasampe.” Lelo abe nansha nkasampe omwiyukile nandi, mubwanya namani ‘kuvuluka Umpangi wenu’?

Langulukila bidi pa bintu byatene Eric * mu Afrika wa Kushika. Wadi usenswe kukaya makayo a futu. Eric paabwenye myaka 15, watongwa kukatela mu ekipe mikatampe ya yabo ntanda. Ko kunena’mba, kitatyi kilampe kumeso, wadi ubwanya kutengela kukafundijibwa makayo a futu mu Bulaya, padi kwadi kwa kumutwala ku kwikala mukayi mukatampe wa bwino. Ino le madingi a ‘kuvuluka Umpangi obe’ adi atala uno mwanda namani? Ne i ñeni’ka idi mu ano madingi yokokeja kuboila’ko abe ne bankasampe bakwenu bamobamo?

Eric washilwile kwifunda Bible na Batumoni ba Yehova mu bula bwa myaka yaadi ufunda masomo. Washilwile kuyuka amba, Umpangi wandi ukapwija lonso makambakano a bantu. Eric wafudile ku kumona kamweno kadi mu kwingidija kitatyi ne bukomo bwandi mwanda wa kulonga kiswa-mutyima kya Leza. Pa mwanda wa kino kintu kya tunangu, Eric kalongelepo bukomo bwa kwikala mukayi mukatampe wa bwino. Ino, wabatyijibwa ne kwipānina bintu bya ku mushipiditu. Mwenda mafuku, waikala ke mwingidi wa mingilo, kupwa waitwa ku Masomo a Bible a Batutu Bankungulume.

Shi waendelele na makayo a kuta futu, Eric wadi ubwanya kwikala na ntumbo ne bupeta. Inoko, wajingulwile bubinebine bwa uno musoñanya wa mu Bible wa amba: “Bupeta bwa mpeta kyo kibundi kyandi kikomo, bidi pamo bwa nsakwa milampe mu kufwatakanya kwandi.” (Nki. 18:11) Bine, mutyima-ntenke ubwanya kumwena muntu ku bupeta i kilotwa’tu bitupu. Kadi, divule dine boba balondalonda bupeta na lwiso ‘betapatapanga na misanshi mivule mine.’—1 Tm. 6:9, 10.

Na bya dyese, bankasampe bavule i batane nsangaji ne mutyima-ntenke wa nyeke na kwingila mwingilo wa kitatyi kyonso. Eric unena amba: “Ndi mutwele mu ‘ekipe’ mikatampe ya bengidi ba Yehova ba kitatyi kyonso. Ino yo ekipe miyampe ya ami kwikala’mo, kadi mfwijanga’ko Yehova pa kunombola dishinda dimo kete ditwala ku nsangaji ya bine ne ku būmi buyampe.”

Lelo abe nobe? Pa kyaba kya kulondalonda bitungo bya ino ntanda, ubulwe’po kuseba ‘dishinda dyobe’ kumeso a Yehova na kwingila mwingilo wa bupania?—Tala kapango kanena’mba, “ Mona Madyese Keamonwepo ku Inivelesite.”

Ba mulume ne mukaji bamo pobakapempwile bilo ya musambo ya mu États-Unis, bemwenine nsangaji ya banabetu ba ku Betele bengidila’ko Yehova. Kaka wasoneka mwenda mafuku amba: “Twasengelwe bininge mu bibidiji byetu.” Bano ba mulume ne mukaji bakwete butyibi bwa kukūla kitatyi ne bukomo mwanda wa kwikala na madyese makatampe a mwingilo.

Kyaba kimo, kushinta kwadi kusaka kushinta bano ba mulume ne mukaji, kwamwekele bu kiselwa kilema. Ino, balangulukila difuku dimo pa Kisonekwa kya difuku. Kyadi kisonekwa kya Yoano 8:31, motutanga binenwa bya Yesu bya amba: “Shi mwikale mu mwanda wami, nabya mwi bami bana ba bwanga binebine.” Na bino binenwa mu ñeni, ke balanga’mba: “Kintu kyotufwaninwe kulonga pa kupēleja būmi i kwipāna.” Bapoteja yabo njibo mikatampe, kutyepeja’ko biselwa bimo ne kuvilukila ku kipwilo kisakilwa bukwashi. Pano bengilanga bu pania, koku kadi bakwasha ku lūbako lwa Mobo a Bulopwe ne kwituma ku mingilo ya ku bitango bya distrike. Lelo beivwene namani? Banena amba: “Twi batulumuke pa kwikala na nsangaji mu būmi bwetu bupēla, tulonga’nka byobya bitukankamika bulongolodi bwa Yehova kulonga.”

Solomone wāsonekele amba: “Meso obe abambile so-o, kadi bikopelo byobe bitadidile kumeso so-o.” (Nki. 4:25) Pamo bwa shofele utalanga kumeso kwa dishinda, tufwaninwe kwepuka bilabi bikokeja kulengeja tukomenwe kwitungila bitungo bya ku mushipiditu ne kufikidija’byo.

Le i bitungo’ka bya ku mushipiditu byobwanya kwitungila ne kufikidija’byo? Kwingila mwingilo wa kitatyi kyonso i kitungo kiyampe. Bitungo bikwabo  bibwanya kwikala bya kwingidila ku kipwilo kya pabwipi kisakilwa basapudi ba bwino, mwanda wa kusambakanya mwaba mukatampe. Nansha padi kipwilo kidi na basapudi bavule basapula biyampe, ino kekidipo na bakulumpe ne bengidi ba mingilo bavule. Lelo ubulwe’po kukakwasha’ko mu uno muswelo? Ubulwe’po kwipangula mutadi wa kipindi mwanda wa kuyuka shi ubwanya kukakwasha’ko? Shi usangedile kwenda ku bifuko bya kulampe, ubwanya kwipangula mwanda wa kuyuka bipwilo bya kulampe bisakilwa bukwashi. *

Tujokelei bidi mu mwanda ulombwelwe mu Isaya 62:10. Bayuda bamo bādi padi bengila bininge pa kulongolola dishinda dya kujokela ku yabo ntanda mwanda wa bantu ba Leza bakafike kobenda. Shi usangedile kufikidija bitungo byobe mu mwingilo ukola, kokazoza. Nobe ubwanya kufikila pa bino bitungo na bukwashi bwa Leza. Lomba nyeke Yehova akupe tunangu polonga bukomo bwa kutalula bijika bidi kumeso obe. Mwenda mafuku, ukemwena muswelo wakokeja kukukwasha ‘udingakanye biyampe dishinda dya maulu obe.’—Nki. 4:26.