Lelo utañanga na katentekeji manimelo a panopano a Kiteba kya Mulami? Nankyo, tala shi ubwanya kulondolola ku bino bipangujo:

Le i kitatyi’ka kyādi kitapibwa kana ka mukōko ka Pashika mu mafuku 14 Kweji wa Nisane?

Malamuni amo a Bible anena’mba kādi katapibwa “pa bukata bwa byolwa bibidi, ko kunena amba ku mbulu ikupila nansha mu meso ke mufīta—kupwa kwa kupona kwa dyuba ino kumeso kwa mu meso kufīta bininge. (Div. 12:6) —15/12, paje 18-19.

Le Bankasampe bakokeja kwingidija misoñanya’ka ya mu Bible pa kutonga butongi bwa tunangu?

Isatu bidi i ino (1) Kimba bidi nyeke Bulopwe ne boloke bwandi. (Mat. 6:19-34) (2) Tana nsangaji idi mu kwingidila bakwenu. (Bil. 20:35) (3) Sangela kwingidila Leza mu bunkasampe bobe. (Mus. 12:1) —15/1, paje 19-20.

Le i bika byalongele bantu baná batentamine pa tubalwe tamba mu 1914?

Yesu mwine utentamine pa kabalwe katōka, wapangile Satana ne bandemona bandi momwa mūlu. Yewa utentamine pa kabalwe katyila pyā bwa mudilo, welekeja mavita asusula muzo wa muntu. Yewa utentamine pa kabalwe kafīta fututu welekeja kipupo kya nzala. Yewa utentamine pa kabalwe katōkoloka uleta lufu kupityila ku kipupo, ne kwipaya midiyo ne midiyo ya bantu. (Kus. 6:2-8) —1/2, paje 6-7.

Le “butundaile bwa Kana ka Mukōko” bukekala’ko kitatyi’ka? (Kus. 19:7)

“Butundaile bwa Kana ka Mukōko” bukekala’ko pa kupwa Mulopwe, Yesu Kidishitu kuvuija bushindañani bwandi, ko kunena’mba, kupwa kwa Babiloni Mukatakata konakanibwa ne kwa bulwi bwa divita dya Amakedona. —15/2, paje 10.

Mwanda waka Bayuda ba mu mafuku a Yesu bādi “batengele” Meshiasa? (Luka 3:15)

Ketubwanyapo kubingija’mba Bayuda ba mu myaka katwa kabajinji bāivwanije bupolofeto bwa Danyele butala padi Meshiasa na motwibwivwanije. (Dan. 9:24-27) Inoko, padi bāivwene musapu wāsapwile mwikeulu ku bakumbi bamobamo, nansha byobya byānene Ana mupolofeto mukaji pa kumona Yesu mwana wa lukeke ku tempelo. Kadi babuká na ñenyenye bāile kukimba “yewa wabutwilwe mulopwe wa Bayuda.” (Mat. 2:1, 2) Mwenda mafuku, Yoano mubatyiji wālombola’mba Kidishitu kakejepo kumweka. —15/2, paje 26-27.

Le tukepuka namani kushinta Eyo wetu ke Aa? (2 Ko. 1:18)

Na bubine, kintu kitutabukile bukomo kibwanya kyaba kimo kwitulengeja tuleke kufikidija byotunena. Inoko shi tubalaya nansha kwiivwana na muntu, tufwaninwe kulonga bukomo bwetu bonso bwa kulongela monka. —15/3, paje 32.

Le tubwanya kukomena ditompo dya kutala bifwatulo bya bantu bandi mutaka namani?

Matabula asatu a kamweno i ano (1) Kutala kungi bukidibukidi shi tubamone kino kifwatulo. (2) Kulama milangwe yetu na kwimanina pa bintu biyampe ne kulombela kudi Leza. (3) Kulama ditabula dyetu na kwepuka mafilime ne mateba a Entelenete a bifwatulo bya bantu badi mutaka. —1/4, paje 10-12.

Le i bipa’ka bibi bya mu kitulumukila bibwanya kulupuka shi mwine Kidishitu washiye kyandi kisaka mwanda wa kukakimba lupeto ku ntanda ingi?

Shi bambutwile abakwata butyibi bwa kuleka kushikatyila pamo mu kisaka, bana babwanya kususuka mu ñeni ne mu mwikadilo. Bakokeja kushikwa bambutwile. Kadi bantu batame badi kulampe na benē pabo babwanya kwikala pa ditompo dya kulonga busekese. —15/4, paje 19-20.

Mwanda waka maulu a bantapani bāipailwe ku mutyi ātyumwinwe?

Bene Loma bādi bepaya bantapani bamo ku mutyi. Bayuda bālombele amba maulu a bantapani bāipailwe pamo na Yesu atyumunwe. Kino kyādi kya kulengeja bano bantu bakomenwe kwesa, ne kufwa bukidibukidi. O mwanda kebadipo bafwaninwe kushikilwa bufuku bonso ku mutyi. (Kup. 21:22, 23) —1/5, paje 11.

Le i bipangujo’ka biná byotufwaninwe kulama mu ñeni kitatyi kyotufwena bantu mu mwingilo wetu?

Le i bāni? Le nebasapwilanga kwepi? Le nebasapwilanga kitatyi’ka? Le mfwaninwe kwibasapwila namani? —15/5, paje 12-15.

Lelo kutoma mfwanka kwipayanga bantu namani?

Mu myaka katwa kabajinji, kwaipaile bantu 100000000. Dyalelo kwipayanga kintu kya bantu 6000000 pa mwaka. —1/6, paje 3.