KATHERINE watamine mu États-Unis ne kubatyijibwa bu Kamoni wa Yehova na myaka 16. Wadi usapula bininge, ino i enka bantu batyetye kete baitabije musapu wa Bulopwe mu kifuko kyaadi usapula’mo. Unena amba: “Natangile myanda mimweke ya bantu badi balombela kudi Leza ebatumine muntu wa kwibakwasha bamuyuke. Nadi nanga nyeke’mba mbwanya kusokola muntu wa uno muswelo, ino kumusokola mpika.”

Pa kupwa kusapula mu bula bwa myaka mu kino kifuko kimo kyonka, Katherine wāshilula kulangulukila pa kuvilukila ku kifuko kuketabija bantu bavule musapu wa Bulopwe. Ino wadi wiipangula shi bikamukomena. Musunsa’tu umo waaendele kulampe na kisaka kyandi mu būmi bwandi—kadi mu mayenga’tu abidi—wadi ulanga kisaka difuku ne difuku. Inoko, mutyima wandi wa kusaka kwimwena nsangaji ya kukwasha boba bakimba Yehova wamutūka. Pa kupwa kulangulukila pa bifuko palapala kwakokeja kuvilukila, wasonekela musambo wa Guame ne kupebwa myanda mikwabo yaadi usakilwa. Katherine pa kubwanya myaka 26 mu Kweji 7, 2007, wavilukila ku Saipana, kisanga kidi pa Kalunga ka Pasifike, ku kintu kya makilometele 10000 na kwabo. Le kuviluka kwandi kwamuletele bika?

Katherine pa kupwa’tu kuvilukila mu kipwilo kipya, wetene na Doris mwana-mukaji wa myaka 45, mwine waitabije kwifunda Bible. Abo pa kupwa kwifunda mashapita asatu mabajinji a dibuku Bifundija Bible, Katherine watengwa bininge. Unena’mba, “Doris wadi mwifundi muyampe wa Bible, kadi nkyadipo nsaka kuleka kwimona nandi. Nadi kashā kyaendeje kifundwa kya Bible kitatyi ne kitatyi, kadi nadi nanga’mba Doris usakilwa kaka wa bwino buvule wa kwifunda nandi, padi muntu wa yandi myaka.” Katherine walomba Yehova amukwashe asokole kaka muyampe waadi ubwanya kupa kifundwa kyandi kya Bible. Ebiya wakwata butyibi bwa kulombola Doris amba usa kumupa muntu mukwabo wa kwifunda nandi.

Katherine unena amba: “Kumeso kwa kumulombola uno mwanda, Doris wanombwele amba usaka kwisambila nami pa mwanda kampanda. Pa kupwa kumwivwana, namulombola muswelo waunkweshe Yehova nekenye mu būmi mwanda pamo na wandi. Ebiya waumfwija’ko.” Kupwa Doris wanena Katherine amba: “Yehova wakwingidija mwanda wa kunkwasha. Difuku dibajinji dyowaile ku yami njibo, natangile Bible wami mu mansá mavule. Nadi ndila, nomba Leza antumine muntu wa kunkwasha  ngivwanije Bible. Ebiya nobe wakokola ku mulango wami. Bine, Yehova walondolwele milombelo yami!” Impolo papo keiyengayenga mu meso a Katherine pamulombola ino myanda itenga mutyima. Unena amba: “Binenwa bya Doris byadi bu malondololo ku milombelo yami. Yehova waunombwele amba mbwanya kwendeleja kifundwa.”

Doris wabatyijibwe mu 2010, kadi wendejanga dyalelo bifundwa bivule bya Bible. Katherine unena amba: “Mfwijanga’ko bininge pa kufikidila kwa mutyima wami wa kukwasha bantu bampikwa budimbidimbi bekale bengidi ba Yehova!” Dyalelo, Katherine wingilanga bu pania wa pa bula pa kisanga kya Pasifike kidi mu Kosrae.

Batutu ne bakaka kanunu kamo ne kupita batambile ku matanda makwabo (ba myaka 19 kutūla ku 79), baingile kokwa kusakilwa basapudi bavule mu Mikronezi. Milangwe ya bano bengidi bapyasakane i milombolwe na Erica wavilukīle ku Guame mu 2006 na myaka 19. Unena amba: “Kwingila bu pania mu kifuko kya bantu badi na kyumwa kya bubinebine i makayo’tu. Mfwijanga’ko Yehova pa kunkwasha ñingile uno mwingilo. I būmi bwa muswelo muyampe!” Dyalelo, Erica udi na nsangaji ya kwingila bu pania wa pa bula mu Ebeye pa bisanga bya Marshall. Na bubine, kwingidila mu ntanda ya bweni nako kudi na bikoleja. Tulangulukilei’ko bidi pa bikoleja bisatu ne kumona muswelo webinekenye boba bavilukīle ku Mikronezi.

Būmi. Simon wa myaka 22 pa kupwa kufika pa kisanga kya Palau mu 2007, wajingulwile ne kwija mpika’mba ubwanya kusokola’tu bintu bityetye kudingakana na byaadi usokola mu yabo ntanda ya Angeletele. “Nadi nenwe kwifunda kuleka kupota kintu kyo-kyonso kyonsaka. Pano ntoñanga na katentekeji bya kudya byomfwaninwe kupota, kadi njokolokanga nkimba kintu kiyampe kya kupota. Shi kintu kibatyumuka, nkimbanga kingidijibwe kala ne kulonga bukomo bwa sokola muntu wa kunkwasha nongolole’kyo.” Lelo mutyima wa kwikala na būmi bupēla wamukweshe namani? Simon unena amba: “Waunkweshe ndyuke bintu bine byonsakilwa mu būmi ne muswelo wa kutukanya na bityetyetyetye. Kuboko kwa Yehova kwa kilelo kwaunkweshe mu bitatyi bivule. Mu myaka isamba-ibidi yoñingile kuno, ngidi nyeke na kintu kya kudya ne kifuko pa kulāla.” Na bubine, Yehova ukwatakanyanga boba bapēleja būmi mwanda wa kusaka kobasa bidi kukimba Bulopwe.—Mat. 6:32, 33.

Kulanga kisaka. Erica unena amba: “Ne mulamate kisaka kyami bininge, kadi nadi zumbija mutyima amba kulanga kisaka kukekala na lupusa lubi pa mwingilo wami.” Le walongele namani pa kwiteakanya? “Kumeso kwa kuviluka, natangile bishinte bya Kiteba kya Mulami bisambila pa kulanga kisaka. Bino bishinte byateakenye bine mutyima wami mwa kunekenenya kino kikoleja. Mu kishinte kimo, inabana umo ukulupija wandi mwana mwana-mukaji mutyima umutele Yehova na kunena’mba ‘Yehova ubwanya kukulela biyampe kumpita.’ Kino kikulupiji kyankomeje byabinebine. Hannah ne Patrick wandi  mulume, bengilanga mu Majuro pa bisanga bya Marshall. Hannah wanekenye milangwe ya kulanga kisaka na kuta mutyima bininge kudi batutu ne bakaka ba mu kyabo kipwilo. Unena amba: “Mfwijanga’ko nyeke Yehova pa bubana na bana bwa ntanda yonso mwanda abo nabo i kyami kisaka. Shi kebadipo bankwatakenye na buswe, nkyadipo wa kubwanya kwingila kokwa kusakilwa basapudi bavule.”

Kusamba bulunda. Simon unena’mba “shi ubafika mu ntanda ya bweni, kubwipi kwa bintu byonso bishintanga. Mbulwanga kyaba kimo kuzaula ne kwivwanija bintu ne pa mfulo.” Erica unena amba: “Ku ngalwilo nadi neivwana bu mwelwe, ino kino kyaunkweshe mandaule kukanina kwami kwa mutyima mwa kuvilukila. Nkyavilukilepo pa mwanda wa tumweno twami, ino mwanda wa kulongela Yehova bivule.” Ubweja’ko amba: “Kyaba kimo nadi mpwana na balunda bayampe bonadi nsenswe.” Simon wadi ulonga bukomo bwa kwifunda ludimi lwa Palauan, lwine lwamukweshe ‘apūtule mutyima wandi bikatampe’ kudi batutu ne bakaka ba mu kibundi. (2 Ko. 6:13) Bukomo bwaalongele bwa kwifunda ludimi bwalengeje banabetu bamusanswe. Bine, shi mwanetu mweni wafika ne kwingila na banabetu ba mu kibundi kakasa-kakasa, abo bonso bekalanga na dyese dya kwikala mu kipwano kya mpwaninine mu kipwilo. Le i madyese’ka makwabo ekalanga na boba bepāna abo bene ne mutyima tō mwanda wa kwingila kokwa kusakilwa basapudi bavule?

Mutumibwa Polo wānenene amba: “Yewa ukusa bingibingi nandi ukangulanga bingibingi.” (2 Ko. 9:6) Musoñanya udi mu bino binenwa wingidijibwanga bine ku boba batandabula mwingilo wabo. Le i bipa’ka “bingibingi” byobangula mu Mikronezi?

Mu Mikronezi, mukidi mikenga mivule ya kushilula bifundwa bya Bible ne ya kwimwena muswelo wendelela ku mushipiditu bantu befunda ne kwingidija bubinebine bwa mu Kinenwa kya Leza. Kadi ba Patrick ne Hannah basapwile pa Angaur, kakisanga katyetye kadi na bantu 320. Pa kupwa kusapula’po myeji ibidi, betana na inabana ulelele bana kasuku. Waitabija kwifunda Bible kiponka na ponka, waitabija bubinebine ne kushinta bininge mu būmi bwandi. Hannah unena amba: “Potwadi tutaluka ku yandi njibo na yetu nkinga pa kupwa kifundwa ne kifundwa, twadi twitala batwe bonso ne kunena amba: ‘Wafwa’ko Yehova!’” Hannah ubweja’ko amba: “Ndyukile’mba Yehova ukakokela uno mwana-mukaji kwadi mu muswelo kampanda, inoko byotwadi twingidila kokwa kusakilwa basapudi bavule, twadi na bukomo bwa kutana ne kukwasha uno muntu udi pamo bwa mukōko ayuke Yehova. Dino i dyese dimo dya mu madyese otwimwenine mu būmi bwetu bonso!” Monka mwanenena Erica, “kitatyi kyokwasha muntu ayuke Yehova, wimwenanga nsangaji keineneka!”

Mu matanda mavule, musakilwanga basapudi bavule ba Bulopwe. Lelo nobe ubwanya kubadilwa mu bantu bavilukila ku bifuko kusakilwa bukwashi? Lomba Yehova aningishe mutyima obe wa kusaka kutandabula mwingilo obe. Wisambe uno mwanda na bakulumpe mu kipwilo, na mutadi wa kipindi nansha na boba baikele na dyese dya kwingila mu ntanda musakilwa bukwashi. Shi wi mukwate mpangiko ya kwenda’ko, lembela musambo utala mwaba kosaka kukengidila ne kulombela’ko myanda mikwabo. * Padi nobe ubwanya kubadilwa mu batutu ne bakaka tununu na tununu—bankasampe ne banunu, bankunga ne badi na benē pabo—bepēne abo bene ne mutyima tō ne kwimwena nsangaji ya ‘kwangula bingibingi.’