TUDI mu kitatyi kikomo bininge mu mānga yonso ya muzo wa muntu. (2 Tm. 3:1-5) Buswe botuswele Yehova ne kusumininwa kotusumininwe kwiendeja mungya misoñanya yandi myoloke, bitompibwanga difuku ne difuku. Yesu wābadikile kumona kino kitatyi kikomo, ebiya wākulupija balondi bandi amba bakapebwa bukankamane bobasakilwa mwanda wa kūminina kufika ne ku mfulo. (Mat. 24:3, 13; 28:20) Pa kusaka kwibakankamika, wātongele umpika mukōkele mwanda wa kwibapa byakudya bya ku mushipiditu “pa kitatyi kifwaninwe.”—Mat. 24:45, 46.

Tamba kutongwa kwa umpika mukōkele mu 1919, midiyo ne midiyo ya ‘bengidi ba mu njibo’ batambile mu ndimi yonso bakongakanibwanga mu bulongolodi bwa Leza ne kudishibwa ku mushipiditu. (Mat. 24:14; Kus. 22:17) Inoko, ndimi yonso keidipo na buvule bumo bonka bwa myanda ya kwifunda, kadi bantu bonso kebabwanyapo kusokola myanda ya mu mabuku etu idi ku bisanji. Kimfwa, bavule kebadipo na mavideo ne bishinte bilupulwanga’nka pa jw.org. Lelo kino kishintulula’mba, bamo kebatambulangapo bidibwa byobasakilwa mwanda wa kwikala nyeke bakomo ku mushipiditu? Pa kuleta mvuyo miyampe, tulangulukilei bidi pa malondololo a bino bipangujo biná bikatampe.

Satana paātompele Yesu alamune mabwe ke mikate, Yesu wālondolwele amba: “Muntu kakokejapo kwikala mūmi na mikate yonka kete mhm, ino i na kinenwa kyonso kitamba mu kyakanwa kya Yehova.” (Mat. 4:3, 4) Binenwa bya Yehova i bilembwe mu Bible. (2 Pe. 1:20, 21) Nanshi, Bible i kisombelwa kibajinji mu byakudya byetu bya ku mushipiditu.—2 Tm. 3:16, 17.

Bulongolodi bwa Yehova i bulupule Bible wa Bushintuludi bwa Ntanda Impya bwa Bisonekwa Bijila mutuntulu nansha kipindi mu ndimi 120 ne kupita, kadi kwilundilanga ndimi mivule mwaka ne mwaka. Kutentekela pa buno bwalamuni, kudi midiyo ne midiyo ya malamuni a Bible makwabo matuntulu nansha kipindi mu ndimi tununu na tununu. Uno mwingilo utulumukwa i mukwatañane na kiswa-mutyima kya Yehova kya amba, “bantu ba miswelo yonso bapande ne kwikala na buyuki bwinebwine bwa bubine.” (1 Tm. 2:3, 4) Kadi, byokekudipo “kipangwa nansha kimo kifyame ku meso [a Yehova],” tubwanya kukulupila’mba ukakokela boba bonso “bayukile amba bafwaninwe kwifunda myanda ya Leza” ku bulongolodi bwandi ne kwibapa bidibwa bya ku mushipiditu.—Bah. 4:13; Mat. 5:3, 6; Yoa. 6:44; 10:14.

Muntu pa kutamija lwitabijo lukomo, ufwaninwe kulonga bivule kupita’ko’tu kutanga Bible. Ufwaninwe kwivwana byatanga ne kwingidija byaefunda. (Yak. 1:22-25) Ntungu mwine Efiopya wa mu myaka katwa kabajinji wāyukile buno bubinebine. Wādi utanga mu Kinenwa kya Leza kitatyi kyāmwipangwile musapudi Fidipa amba: “Le bine uyukile byotanga’byo?” Ntungu wāmulondolola amba: “Lelo binebine ndyuka’byo namani shi kekudipo muntu wa kunombola?” (Bil. 8:26-31) Fidipa Wālondolola na kukwasha uno ntungu ekale na buyuki bwa binebine bwa Kinenwa kya Leza. Ntungu wātengelwe na bintu byaēfundile ne kubatyijibwa wabatyijibwa. (Bil. 8:32-38) Mo monka ne mabuku etu esambila pa Bible nao etukwashanga twikale na buyuki bwa bine bwa bubinebine. Ateñanga malango etu ne kwitukankamika twingidije byobya byotwifunda.—Kol. 1:9, 10.

Bengidi ba Yehova bapebwanga bintu bivule bya ku mushipiditu bya kudya ne kutoma kupityila ku mabuku. (Isa. 65:13) Kimfwa, Kiteba kya Mulami kidi mu ndimi 210 ne kupita, kishintululanga bupolofeto bwa mu Bible, kuvudija kwivwanija kwetu kwa bubinebine bwa mushike bwa ku mushipiditu ne kwitukankamika twiendeje kukwatañana na misoñanya ya mu Bible. Réveillez-vous! nandi ulupulwanga mu kintu kya ndimi 100, witukwashanga tuyuke bivule mu mingilo ya bupangi ya Yehova ne kwitulombola muswelo wa kwingidija madingi mayampe a mu Bible. (Nki. 3:21-23; Loma 1:20) Umpika mukōkele ulupulanga myanda isambila pa Bible mu ndimi 680 ne kupita! Lelo wilamijanga’ko difuku ne difuku kitatyi kya kutanga Bible? Lelo utañanga dipepala dyonso dipya ne mabuku mapya atambanga mu lwenu ludimi mwaka ne mwaka?

Kutentekela pa kulupula mabuku, bulongolodi bwa Yehova buteakanyanga myadijo ya mashikulu esambila pa Bible anenwanga ku kupwila kwetu, ne ku bitango. Lelo usangelanga mashikulu, madrame, bya kumwena’ko ne bwipangudi biloñwanga ku kuno kwibunga? Bine, Yehova witusobelanga masobo a ku mushipiditu!—Isa. 25:6.

Malondololo i mhm. Kadi ketufwaninwepo kutulumuka shi bengidi ba Yehova bamo babwanya kyaba kimo kwikala na byakudya bivule bya ku mushipiditu kupita bakwabo. Mwanda waka? Tulangulukilei bidi pa kimfwa kya Batumibwa. Bāpelwe bulombodi buvule kupita bana ba bwanga bakwabo bavule ba mu myaka katwa kabajinji. (Mako 4:10; 9:35-37) Nansha nabya, bana ba bwanga bakwabo bādi badya biyampe ku mushipiditu; bādi bapebwa byobādi basakilwa.—Ef. 4:20-24; 1 Pe. 1:8.

Kadi, i biyampe kuyuka’mba bintu bivule byānenene Yesu ne byaālongele paādi pano pa ntanda, kebilembelwepo mu nsekununi ya Evanjile. Mutumibwa Yoano wāsonekele amba: “Kudi bintu bikwabo bivule byalongele Yesu, shi byadi amba i bilembwe kamo ne kamo, nanga’mba, ne ino ntanda mine keyadipo ya kumona kyaba kya kubwana mivungo ya mikanda milembe.” (Yoa. 21:25) Nansha balondi ba Yesu ba mu myaka katwa kabajinji byobādi bayukile myanda mivule padi Yesu muntu mubwaninine kwitupita, ketubudidilwepo. Yehova witukwashanga tuyuke bivule padi Yesu mwanda wa twikale balondi ba kulonda mu mayo andi.—1 Pe. 2:21.

Kadi langulukila pa mikanda yātumine batumibwa ku bipwilo bya mu myaka katwa kabajinji. Dibajinji, mukanda umo wāsonekelwe na Polo kewālaminwepo mu Bible. (Kol. 4:16) Lelo byakudya byetu bya ku mushipiditu ke biyampepo mwanda ketudipo na uno mukanda? Mhm. Yehova uyukile byotusakilwa, kadi i mwitupe bintu bivule mwa kwikadila bakomo ku mushipiditu.—Mat. 6:8.

Dyalelo, bisumpi bimo bya bengidi ba Yehova bidi na byakudya bivule bya ku mushipiditu kupita bakwabo. Lelo wisambanga ludimi mulupwilwe mabuku matyetye kete? Shi i amo, yuka’mba Yehova ukutele mutyima. Wifunde myanda idi mu mabuku odi nao, kadi shi bibwanika, tanwa ku kupwila kwa mu ludimi loivwana. Kadi kulupila’mba Yehova ukakukomeja ku mushipiditu.—Ñim. 1:2; Bah. 10:24, 25.

Tulupulanga mapepala etu ne mabuku makwabo a kwifunda nao Bible pa diteba dyetu dya Entelenete. Kadi pa diteba dya Entelenete padi myanda ikwashanga balume ne bakaji, bankasampe ne boba badi ne bana bankasampe. Bisaka bimwenanga mu kubandaula ino myanda mu Butōtyi bwabo bwa Kisaka. Kadi, pa diteba dyetu dya Entelenete padi mpangiko ya pa bula, kimfwa ya kupwija kwa masomo a Ngileade, kupwila kwa pa mwaka, kadi dilombolanga bana na bana ba ntanda yonso myanda itala bimpengele bya kipangila ne myanda ya bijila itala bantu ba Yehova. (1 Pe. 5:8, 9) Kadi diteba dyetu dya Entelenete i kingidilwa kya busapudi kya bukomo, kifikija’nka ne myanda miyampe mu matanda obapeleje’mo nansha kukankaja mwingilo wetu.

Inoko, ekale shi utwelanga pa diteba dyetu dya Entelenete nansha kutwela’po mpika, ukokeja kwikala nyeke mukomo ku mushipiditu. Umpika uloñanga bukomo bwa kuleta myanda mivule mitampwe mwanda wa mwingidi yense wa mu njibo adishibwe biyampe ku mushipiditu. Nanshi, kufwaninwepo kulanga’mba unenwe kupota bingidilwa mwanda’tu wa kutwela pa jw.org. Bamo bakokeja padi kwitūdila’ko abo bene mpangiko ya kutampa myanda mityetye ilupwilwe pa diteba dyetu dya Entelenete ne kupa’yo boba kebabwanyapo kutwela pa Entelenete, inoko bipwilo kebinenwepo kulonga uno muswelo.

Tufwijanga’ko Yesu pa kufikidija mulao wandi wa kuvuija bisakibwa byetu bya ku mushipiditu. Pano penda pafwena bukidibukidi ano mafuku a mfulo ku mfulo yao, tukokeja kukulupila amba Yehova ukendelela kwitupa byakudya bya ku mushipiditu “pa kitatyi kifwaninwe.”