1. Lelo bantu basakilwanga bika ne i ani ukokeja kuvuija kino kisakibwa?

BANTU basakilwanga bininge kwimona bu badi pabwipi na bantu bakwabo. Banenanga’mba bantu i “befwene umo ku mukwabo shi besenswe bininge ne kwiyuka biyampe abo bene na bene.” Tutamijanga nyeke kipwano kyotupwene na kisaka ne balunda betusenswe, betusangela ne betwivwana biyampe. Inoko, muntu otufwaninwe nakampata kupwana nandi i Umpangi wetu Mukatampe.—Mus. 12:1.

2. Le Yehova i mwitulaye bika, ino mwanda waka bantu bavule kebakulupilepo uno mulao?

² Yehova witusoñanya mu Kinenwa kyandi ‘tumufwene,’ kadi i mwitulaye amba shi tumufwene nandi ‘uketufwena.’ (Yak. 4:8) Uno i mulangwe usangaja’po kashā! Inoko, bantu bavule balañanga amba ke biyampepo kukulupila amba Leza usakanga kwibafwena; balanga amba kebafwaninwepo kumufwena nansha amba udi kulampe bininge kokebabwanyapo kumufwena. Lelo bibwanika bine kufwena kudi Yehova?

3. Le i bubinebine’ka botufwaninwe kuyuka padi Yehova?

³ Bubinebine i buno amba, Yehova kadipo “bine kulampe na batwe bonso,” basaka kumusokola; bibwanika kumuyuka. (Tanga  Bilongwa 17:26, 27; Ñimbo 145:18.) Mpango ya Leza wetu i ya amba enka ne bantu bampikwa kubwaninina bafwaninwe kumufwena, kadi utengele ne mutyima tō kwibatambula na buntu bwandi bu balunda nandi. (Isa. 41:8; 55:6) Kukwatañana na myanda yaēmwenine, mulembi wa mitōto wāsonekele pangala pa Yehova amba: “Ē! abe wivwananga kulombela, kudi abe ko kukāya bantu bonso. Keye wa katōkwe kandi, shandi! yewa muntu o watonga, umufwenya kōdi.” (Ñim. 65:2, 4) Nsekununi ya mu Bible itala padi Asa Mulopwe wa Yuda, ileta kimfwa kya muntu umo wāfwenene kudi Leza, kadi ilombola muswelo wālongele’po Yehova. *

4. Lelo Mulopwe Asa wāshidile bantu ba Yuda kimfwa’ka?

⁴ Mulopwe Asa wālombwele bupyasakane bwa kutendelwa pa kupyasakena mutōtelo utōka, na kufundula busekese ne butōtyi bwa bankishi mu tempelo, bine byādi bivudile mu ntanda. (1 Ba. 15:9-13) Byaādi na bwanapabo bwa kunena, wāsoñenye bantu bakimbe “Yehova Leza wa bashabo’wa, ne kulonga mukanda-wabijila, ne kijila kine kumo.” Yehova wāesela myaka dikumi mibajinji ya umbikalo wa Asa wāikala wa ndoe. Lelo Asa wātumbije ani pa uno mutyima-ntenke? Wāsapwidile bantu amba: “Ntanda po ikidi ku meso etu; ke-twi-bantu tubakimbe Yehova Leza wetu; tubamukimbemo, aye nandi wetupe kutalaja nyā mitamba yonso konsokonso.” (2 Bi. 14:1-7) Tutalei bintu bikwabo byālongekele.

5. Le i mwanda’ka wātūdile kikulupiji kyādi na Asa mudi Yehova pa ditompo, ne byāfula namani?

⁵ Witūle’po bidi mu ngikadilo yādi’mo Asa. Zela mwine Efiopya wāile na bana-balume 1000000 ne makalo 300 kulwa na Yuda. (2 Bi. 14:8-10) Le wādi wa kulonga namani shi wādi’mba i abe wādi ku meso a kino kibumbo kikatampe kyenda kisala mu bulopwe bobe? Abo papo basola bobe bonso i 580000 kete! Basola benu byobatwela mu babo kintu kya misusa ibidi, le wādi wa kwiipangula’mba mwanda waka Leza wāleka buno bulwi bwikale’ko? Pa kulonga kintu pa uno mwanda wa bukidibukidi, le wādi wa kutompa kupwa uno mwanda na tunangu twa abe mwine? Bintu byālongele Asa, byālombwele kipwano kikulupilwa kyaādi upwene na Yehova. Waābije na kininga amba: “Witukwashe a Yehova Leza wetu; mwanda tukukulupīle abe, i mu dijina dyobe mo twaiya pa kibumbo kino’ki. A Yehova wi Leza wetu; kokalekapo bidi muntu bitupu kukunekeneya.” Lelo Leza wālondolwele namani ku kwabija kwa Asa kwa ku mutyima? “Yehova wakupila bene Efiopya.” Kekudipo walwana nansha umo wāpandile ku divita!—2 Bi. 14:11-13.

6. Lelo i bika byotufwaninwe kwiula kudi Asa?

⁶ Lelo i bika byākweshe Asa akulupile ne pa mfulo mu bwendeji ne bulami bwa Leza? Bible unena amba: “Asa walonga byobya byoloke mu meso a Yehova” ne amba, ‘mutyima wandi wādi mubwaninine kudi Yehova.’ (1 Ba. 15:11, 14) Batwe netu tufwaninwe kwingidila Leza na mutyima mubwaninine. I biyampe kulonga namino shi tusaka kupwana nadi dyalelo ne mu mafuku āya kumeso. Bine, tufwijanga’ko Yehova pa kukwata’ko mpangiko ya kwitufwenya kwadi ne kwitukwasha tusambe nandi kipwano ne kwikilama! Tulangulukilei bidi pa miswelo ibidi iloñanga Leza uno muswelo.

7. (a) Le i bika byālongele Yehova bitufwenyanga kwadi? (b) Le i muswelo’ka mubajinji witufwenyanga Leza kwadi?

⁷ Yehova wālombwele buswe bwaswele muzo wa muntu na kupanga kīkalo kyetu kya ntanda milumbuluke.  Ukitulombolanga buswe na kukwatakanya būmi bwetu kupityila ku bidibwa bya ku ngitu bilumbuluke byaetupa. (Bil. 17:28; Kus. 4:11) Kintu kya mvubu mpata i kino, Yehova uvuijanga bisakibwa byetu bya ku mushipiditu. (Luka 12:42) Kadi witukulupija’mba, wivwananga aye mwine kitatyi kyotumulomba. (1 Yo. 5:14) Inoko, muswelo mubajinji witufwenanga Leza ne otumufwenanga i wa buswe bwaālombwele kupityila ku kinkūlwa. (Tanga 1 Yoano 4:9, 10, 19.) Yehova wātumine wandi “Mwana mubutulwe bunka” pano pa ntanda, mwanda wa tunyongololwe ku bubi ne lufu.—Yoa. 3:16.

8, 9. Lelo i mwingilo’ka wingila Yesu mu mpango ya Yehova?

⁸ Yehova i mupe’nka ne bantu bāikele’ko kumeso kwa Kidishitu muswelo wa kumwena mu kinkūlwa. Kitatyi kyālaile Yehova myanda itala Mupandiji wa bantu wa mu mafuku a kumeso, kinkūlwa kyādi’tu kala ke kifutwe mu mumweno wandi, mwanda wādi uyukile amba mpango yandi keikakankalwapo. (Ngo. 3:15) Myaka tutwa na tutwa pa kupita’po, mutumibwa Polo wafwija’ko Leza pa “kinkūlwa kyafutyile Kidishitu Yesu.” Polo wābwejeje’ko amba: “Leza wadi utūkije mutyima ne kulekela bubi bwālongelwe pa kala.” (Loma 3:21-26) Bine, uno i mwingilo wa kamweno wingila Yesu mwanda wa tufwene ku Leza!

⁹ Bantu betyepeje babwanya kuyuka Yehova, kumufwena ne kupwana nandi enka kupityila kudi Yesu. Lelo Bisonekwa bilombola buno bubinebine namani? Polo wāsonekele amba: “Leza wetulombola buswe bwandi mu uno muswelo amba, potwadi tukidi babipya-mambo, Kidishitu wetufwidile.” (Loma 5:6-8) Kitapwa kya kinkūlwa kya Yesu kyāelelwe, ke pa mwandapo wa kufwaninwa kotufwaninwe’kyo, ino i pa mwanda twi basanshibwe. Yesu wānene amba: “I kutupu muntu ukokeja kwiya kondi, poso Tata untumine amukoke.” Wānene difuku dikwabo amba: “I kutupu wiya kudi Tata poso upityila padi ami.” (Yoa. 6:44; 14:6) Yehova ukokelanga bantu kwadi kupityila ku mushipiditu ujila ne kudi Yesu, ne kwibakwasha bekale nyeke mu buswe Bwandi na lukulupilo lwa kukamona būmi bwa nyeke. (Tanga Yude 20, 21.) Tubandaulei muswelo mukwabo witufwenyanga Yehova kwadi.

10. Lelo Bible witufundija bika biketukwasha tufwene kudi Leza?

¹⁰ Mu kino kishinte, twibapituluke nansha kutela bisonekwa bya mikanda palapala 14 ya mu Bible. Le twadi ba kuyuka namani amba tubwanya kufwena Umpangi wetu pakubulwa Bible? Le twadi ba kubwanya kwifunda myanda itala kinkūlwa ne kufwena Yehova kupityila kudi Yesu namani pa kubulwa Bible? Kupityila ku mushipiditu wandi ujila, Yehova wālembeje Bible, mwine witusokwela ngikadilo yandi isangaja ne mpango yandi mikatampe. Kimfwa, mu Divilu 34:6, 7 Yehova witela aye mwine kudi Mosesa bu “Leza ! muyule lusa ne buntu, wija pakufuna bulobo, kadi i wa kanye ka ntanda ne ntanda, ne binebinepo; ulamine kanye ka tununu ne tununu, ulekela bukondame ne kujilula.” Le i ani kakasakepo kufwena muntu pamo bwa uno? Yehova uyukile’mba shi twifunda yandi myanda kupityila ku Bible, tukamumona bu udi’ko bine ne kadi tukemona bu tudi nandi pabwipi.

11. Mwanda waka tufwaninwe kulonga bukomo bwa kwifunda myanda itala ngikadilo ya Leza ne mashinda andi? (Tala kifwatulo kidi ku ngalwilo.)

¹¹ Pa kushintulula muswelo otukokeja kubwanya bisakibwa bya kupwana na Leza, binenwa bya ntwelelo bya dibuku Fwena Kudi Yehova binena amba: “Bulunda bo-bonso bushilulanga na kuyuka muntu, na kusangela ne kutendela ngikadilo yandi imushiyañanya na bakwabo. Nanshi kwifunda ngikadilo ya Leza, ne bilongwa byandi, mungya moilombwedilwe mu Bible kudi na mvubu.” O mwanda tufwijanga’ko bininge pa kusoneka kusonekeje Yehova Kinenwa kyandi mu muswelo ubwanya bantu kwivwanija’kyo!

12. Mwanda waka Yehova wāingidije bantu pa kulemba Bible?

 ¹² Yehova wādi ukokeja kwingidija bamwikeulu pa kulemba Bisonekwa. Ne kadi bidi, betutele mutyima bininge pamo ne mwingilo wetu. (1 Pe. 1:12) Na bubine, bamwikeulu bādi babwanya kulembela bantu musapu wa Leza. Ino le bādi ba kumona bintu na mwibimwena bantu? Lelo bādi ba kulonga bintu kukwatañana na bisakibwa byetu, bukōkekōke bwetu ne kulonda bintu byotusaka? Mhm, Yehova wādi uyukile mikalo yabo mu uno mwanda. Yehova pa kulembeja Bible na bantu, i mumulengeje tumumone bu wetu-wetū. Tukokeja kwivwanija milangwe ne malangatyima a balembi ba Bible ne bantu bakwabo batelelwe mu Bisonekwa. Tubwanya kuyuka kwabo kutyumukwa mutyima, kutatana, moyo, kubulwa kubwaninina, kusangala ne kunekenya pamo nabo. Pamo bwa mupolofeto Ediya, balembi bonso ba Bible bādi na ‘milangwe pamo na yetu.’—Yak. 5:17.

¹³ Kimfwa, tutalei shi mwikeulu wādi ukokeja kumwekeja ne pa mfulo malangatyima a Yona kitatyi kyānyemene uno mupolofeto mwingilo wāmupele Leza. Bine, byādi biyampe Yehova engidije Yona asoneke nsekununi ya aye mwine, kubadila’mo ne milombelo ya kininga yaālombele mu mushike wa kalunga ka mema! Yona wānene amba: “Mūya wami po wapungila munda mwami, navuluka Yehova.”—Yona 1:3, 10; 2:1-9.

14. Mwanda waka ukokeja kuyuka bintu byāsonekele Isaya padi aye mwine?

¹⁴ Tulangulukilei ne pa bintu byānenenwe Isaya na Yehova kusoneka padi aye mwine. Pa kupwa kumona kimonwa kya ntumbo ya Leza, watonwenwe esambe myanda ya bubi bwandi amba: “Yo-o! malwa ami! Nafu; ke-ne-muntu ami ne muntu wa milomo ya disubi, kabidi ngikalanga ami  umbukata mwa bantu ba milomo ya disubi; mwanda meso ami abamone Mulopwe, Yehova wa bibumbo.” (Isa. 6:5) Lelo i mwikeulu’ka wādi ubwanya kutēla bino bishima? Ino Isaya wābwenye, kadi netu tukokeja kuyuka muswelo wāeivwene.

15, 16. (a) Mwanda waka tubwanya kuyuka mwiivwanina bakwetu? Leta kimfwa. (b) Lelo i bika biketukwasha tufwene kudi Yehova?

¹⁵ Lelo bamwikeulu bādi ba kubwanya kunena’mba ‘kebafwaninwepo’ na mwānenene Yakoba, nansha kunena’mba i ba “bubi” na mwānenene Petelo? (Ngo. 32:10; Luka 5:8) Lelo bādi bakukwatwa “moyo,” na wākwetwe bana ba bwanga ba Yesu, nansha kadi le bādi basakilwa ‘kutakamana’ mu kupangwapangwa mwanda wa kusapula myanda miyampe, na mwālongele Polo ne bantu bakwabo? (Yoa. 6:19; 1 Tes. 2:2) Mhm, Bamwikeulu i babwaninine mu miswelo yonso kadi badi na bukomo bupityile bwa bantu. Inoko, kitatyi kilombolanga bantu bakubulwa kubwaninina ano malangatyima, tuyukanga kiponka na ponka mobeivwanina mwanda netu twi bantu bitupu. Kitatyi kyotutanga Kinenwa kya Leza, tubwanya bine ‘kusangala na boba basangala; kudila na boba badila.’—Loma 12:15.

¹⁶ Shi tulangulukila pa bintu binena Bible, byālongēle Yehova bengidi bandi ba kikōkeji ba pa kala, tukayuka bintu bya kutendelwa kebibadika padi Leza wetu, mwine ufwenanga bantu bampikwa kubwaninina na kitūkijetyima ne na buswe. Mu uno muswelo, tukayuka Yehova biyampe ne kumusanswa bya binebine. Mfulo mfulō, tukabwanya kumufwena.—Tanga Ñimbo 25:14.

17. (a) Lelo Azadia wāpele Asa madingi’ka mayampe? (b) Lelo Asa wāpumpwinye madingi a Azadia namani, ne byafula kwepi?

¹⁷ Mulopwe Asa pa kupwa kutambula bushindañani bwa nkuo pa kibumbo kya basola bene Efiopya, Azadia mupolofeto wa Leza wānene binenwa bya tunangu padi aye mwine ne pa bantu bandi. Azadia wānene amba: “Yehova udi nenu byo mudi nandi banwe; kabidi shi mumukimba aye ukatanwa ko mudi, ino shi mumulekelele, aye nandi ukemulekelela banwe.” (2 Bi. 15:1, 2) Ino mwenda mafuku mu būmi bwandi, Asa wākomenwa kwivwana ano madingi mayampe. Pa kuzakajibwa na Bulopwe bwa ku ngala bwa Isalela bwa lwana nandi, Asa wākalombele bukwashi ku bene Shidea. Pa kyaba kya kukimba monka bukwashi bwa Yehova, wākelunga na bajentaila mu bumo. Asa wālombwelwe mobyendele amba: “Ubalonga kilembakane, ino pano ne kumeso kwine malwi akekala kodi.” Myaka yāshadile’ko umbikalo wa Asa yādi ya mavita a endaenda. (2 Bi. 16:1-9) Le i ñeni’ka yotuboila’ko?

18, 19. (a) Le tufwaninwe kulonga bika shi tubashīla Leza kyaba? (b) Le tukafwena kudi Yehova namani?

¹⁸ Ketufwaninwepo nansha dimo kupaluka kudi Yehova. Shi ketudi bamushīle kyaba, tufwaninwe kulonga bintu mungya Hosea 12:6, unena amba: “Vundamukila kudi Leza obe; lama kanye ne mu ndudi, kabidi kungila Leza obe nyeke.” Nanshi tufwenei pabwipi na Yehova na kulangulukila na mutyima wa kufwija’ko pa kinkūlwa ne na kwifunda Bible Kinenwa kyandi na kusumininwa.—Tanga Kupituluka 13:4.

¹⁹ Mulembi wa mitōto wālembele amba, “i kinengelele ami kufwena kudi Leza.” (Ñim. 73:28) Shi ke pano, twendelelei batwe bonso kwifunda bintu bipya bitala padi Yehova ne kusangela bininge bubinga buvule botudi nabo bwa kumuswila. Yehova nandi uketufwena tamba’nka pano ne nyeke ne nyekeke!