1, 2. Lelo Yesu wākankamikile bandi bana ba bwanga namani mu difuku dyaāsangwilwe?

DYĀDI difuku dyonka dyāsangwilwe Yesu. Bana babwanga babidi bādi batamba ku Yelusalema benda ku kibundi kikwabo kyādi ku kintu kya makilometele 11 ne musubu. Bādi bakilēmenenwe na milangwe ya lufu lwa Yesu, mwanda kebādipo bayukile amba i musanguke. Na mu kitulumukila, Yesu wēbamwekela kaenda nabo lumo. Wāikele kukankamika bandi bana ba bwanga. Namani? “Webashintulwila myanda imutala ya mu Bisonekwa byonso kushilwila ku Mosesa ne Bapolofeto bonso.” (Luka 24:13-15, 27) Pa kino, mityima munda keibatema mwanda wādi ‘wibashintulwila ne pa mfulo’ Bisonekwa.—Luka 24:32.

² Mu kyolwa kimo kyonka, bano bana ba bwanga babidi bājokela ku Yelusalema. Bātana batumibwa kebebasekunwina byobēmwenine. Pobādi bakīsamba Yesu wēbamwekela. Inoko, batumibwa bandi bākwatwa moyo. Bāshilula kutatana. Lelo Yesu wēbakankamikile namani? Monka motwanenenanga: “Webapūtula ñeni yabo ne pa mfulo ya kwivwanija buluji bwa Bisonekwa.”—Luka 24:45.

³ Pamo’nka na bano bana ba bwanga, netu tukokeja kulēmenenwa na milangwe.  Pakwabo i mwanda tuvudilwe bya kulonga mudi Mfumwetu, ino twatyumukwa mutyima mwanda wa kubulwa kumona bipa. (1 Ko. 15:58) Pakwabo napo bimwekanga bu boba botwifunda nabo Bible kebendelelapo. Pakwabo bantu bakwabo botukwasha, bavundamina Yehova. Lelo i bika byotubwanya kulonga pa kusaka amba twikale na mumweno mufwaninwe pa mwingilo wetu? Kintu kimo bidi kibwanya kwitukwasha i kwivwanija buluji bwa byelekejo bya Yesu bidi mu Bisonekwa Bijila. Shi ke pano tubandaulei bimfwa bisatu ne kumona ñeni yotubwanya kuboila’ko.

⁴ Tanga Mako 4:26-29. Lelo kyelekejo kya Yesu kya mukushi ulēle kishintulula bika? Muntu wa mu kino kyelekejo ufunkila pa basapudi ba Bulopwe. Nkunwa i musapu wa Bulopwe usapulwa ku bantu ba mityima myoloke. Monka mokikadilanga mu bibidiji bya mu būmi, mukushi “walāla bufuku kupwa wabūka dyuba.” Kutama kulombanga bula bwa kitatyi kampanda, tamba ku kukunwa kutūla ku mwangulo. Mu bula bwa kino kitatyi ‘nkunwa nayo imenanga ne kutama.’ Kuno kutama kwiyanga ‘ako kwine,’ kadi bityebitye. Mu muswelo umo onka, kutama kwa ku mushipiditu kwendanga nako bityetye. Shi muntu wendelela mwanda wa afikile pa kumwingidila Leza, ulupulanga bipa na kupāna būmi bwandi kudi Yehova ne kubatyijibwa.

⁵ Mwanda waka Yesu wāletele kino kyelekejo? Yesu witukwasha tuyuke amba Yehova ye utamijanga bubine mu mityima ‘miyampe’. (Bil. 13:48; 1 Ko. 3:7) Batwe tukunanga ne kusangila, ino ketwibitamijangapo. Ketubwanyapo kwibitamija ku bukomo nansha lubilolubilo. Monka mwikadile muntu wa mu kino kyelekejo, batwe netu ketuyukangapo muswelo obitama. Divule dine mu mingilo yetu ya difuku ne difuku ketumonengapo mutamina nkunwa. Kitatyi kimo nkunwa ya Bulopwe ikokeja kulupula bipa. Mwana wa bwanga mupya ubwanya kwilunga netu mu uno mwingilo wa mwangulo, ne kumwena mu bukwashi bwandi.—Yoa. 4:36-38.

⁶ Le i ñeni’ka yotuboila ku kino kyelekejo? Kintu kibajinji bidi, tufwaninwe kwitabija amba ketubwanyapo kumona muswelo utama ku mushipiditu muntu wifunda netu Bible. Butūkanye buketukwasha twepuke kuningila nansha kutonona muntu otwifunda nandi kubatyijibwa. Tuloñanga byonso byotubwanya mwanda wa kukwasha muntu, ino twitabijanga na kwityepeja amba butyibi bwa kubatyijibwa butala muntu aye mwine. Kwipāna i kintu kifwaninwe kutamba ku mutyima na kutononwa na buswe bwa kuswa Leza. Yehova kabwanyapo kwitwitabija shi ketutonwenwepo na buswe.—Ñim. 51:12; 54:6; 110:3.

⁷ Kya bubidi, kwivwanija ñeni ifyeme mu kyelekejo kya Yesu kuketukwasha tuleke kuzoza shi ketumwenepo bukidibukidi bipa bilupuka ku mwingilo wetu. Bitulomba kwikala na kitūkijetyima. (Yak. 5:7, 8) Nansha shi nkunwa keilupwilepo bipa, ino shi tulonge bukomo bwetu bonso mwanda wa kukwasha muntu otwifunda nandi, nabya tukamona’mba bilupukile’ko’bya ke kilubopo kyetu. Yehova utamijanga nkunwa ya bubine enka mu mutyima wa muntu mwityepeje usaka kushinta. (Mat. 13:23) Nanshi ketufwaninwepo kutyiba nsambu pa  mwikadile mwingilo pa bipa bilupuka’ko. Kudi Yehova, kubwanya mwingilo wetu kekwimaninepo pa muswelo witaba boba botufundija. Ino, aye weselanga bukomo bwetu bwa kikōkeji nansha shi bipa bikele namani.—Tanga Luka 10:17-20; 1 Kodinda 3:8.

⁸ Kya busatu, nyeke ketuyukangapo kala kushinta kudi’ko mu mutyima wa muntu. Kimfwa, ba mulume ne mukaji bamo badi befunda na mishonele bamulombele bekale basapudi bampikwa kubatyijibwa. Nandi wavuluja bano ba mulume ne mukaji amba pa kusaka kubwanya bisakibwa, bilomba bidi kuleka kutoma mfwanka. Na bya kutulumuka, nabo bamusapwila amba ke baleke kala kutoma mfwanka pano ke padi myeji mivule. Mwanda waka balekele’yo? Mwanda bajingulwile amba Yehova ubwanya kwibamona pobatoma ne kadi ushikilwe buzazangi. O mwanda mityima yabo yebatonwene bakwate butyibi—bwa kuleka kutoma mfwanka, ke enkapo ku meso a mishonele ino i kulekelela lekē. Buswe bobatamije padi Yehova bwebakweshe bakwate butyibi buyampe. Batamine ku mushipiditu, nansha shi mishonele kadipo ulanga amba babwanya kushinta nabya.

⁹ Tanga Mateo 13:47-50. Lelo kyelekejo kya Yesu kya bukonde bwa nkokwa kishintulula bika? Yesu wādingakenye kusapulwa kwa musapu wa Bulopwe ku bantu bonso na kuta bukonde bukatampe bwa nkokwa pa dijiba. Monka mukwatyilanga bukonde “bukongakanya mwita wa miswelo ne miswelo” muvule, mwingilo wetu wa busapudi nao ukwatanga midiyo ne midiyo ya bantu ba miswelo yonso. (Isa. 60:5) Kutanwa kutanwa bantu bavule ku bitango byetu ne ku Kivulukilo mwaka ne mwaka kubingija uno mwanda. Bamo mu bukata bwa bano bantu belekejibwe na mwita “muyampe” bakongakanibwanga mu kipwilo kya bwine Kidishitu. Bakwabo nabo badi bwa mwita “wampikwa kufwaninwa”; ke bonsopo bakongakanibwa betabijibwe na Yehova.

¹⁰ Mwanda waka Yesu wāletele kino kyelekejo? Kusansanya kwa kyelekejo kwa mwita kekufunkilapo pa butyibi bwa mfulo bwa pa kyamalwa kikatampe. Ino, kufunkilanga pa mwanda wadi wa kulongeka mu mafuku a mfulo a ino ngikadilo ya bintu. Yesu wālombwele amba ke bonsopo baketabija bubine bakemanija ku meso a Yehova. Bavule batanwanga netu ku kupwila. Bakwabo bekalanga na mutyima wa kwifunda netu Bible, inoko kwalamuka kebaso. (1 Ba. 18:21) Bakwabo nabo kebaijije mu kutanwa mu kipwilo kya bwine Kidishitu. Bankasampe bamo batamijibwe na bambutwile bene Kidishitu, ino kebatamijepo buswe bwa kuswa misoñanya ya Yehova. Nansha shi bidi namani, Yesu wānene amba muntu yense ufwaninwe kukwata butyibi. Bonso wibamonanga bu bintu “bisaka mityima,” nansha ‘bilēme’ “bya mizo yonso.”—Hak. 2:7.

¹¹ Lelo i muswelo’ka otukamwena mu kyelekejo kya bukonde bwa nkokwa? Kwivwanija ñeni yotuboila ku kino kyelekejo kwitukwasha tuleke kuzumbija nansha kutyumukwa mutyima shi muntu otwifunda nandi Bible nansha wetu mwana kakwetepo bubinebine na mutyika. Kino kibwanya kulongeka nansha shi tulonga bukomo bwetu bonso namani. Kwitabija kwifunda Bible nansha kutamina mu bubinebine kekushintululapo’tu amba muntu ubwanya kukomeja kipwano kyandi na Yehova. Mfulo mfulō boba  kebasakepo kupwana na Yehova, bakatalulwa mu bantu ba Leza.

¹² Lelo kino kishintulula amba boba bapaluka mu bubinebine kebabwanyapo kujokela monka mu kipwilo? Nansha amba shi muntu wakomenwa kupāna būmi bwandi kudi Yehova, ko kunena’mba yao ke “wampikwa kufwaninwa” nyeke? Mhm. Bano bantu bakidi na mukenga wa kushinta kumeso kwa kyamalwa kikatampe kushilula. Bidi pamo’nka na Yehova wibeta amba: “Jokelai ko ndi, nami nkajokela ko mudi.” (Mal. 3:7) Uno mwanda i mukomenejibwe na kyelekejo kikwabo kyāletele Yesu kya mwana mujimine.—Tanga Luka 15:11-32.

¹³ Lelo kyelekejo kya Yesu kya mwana mujimine kishintulula bika? Shabana wa buswe utelelwe mu kino kyelekejo welekeja mwikadile Tata wetu wa mūlu wa buswe, Yehova. Mwana walomba bya bupyani byandi kupwa kadi wasupakanya’byo welekeja boba bapalukile mu kipwilo. Kutamba kwabo, kudi’nka na abo bendele “kulampe ku bula bwa ntanda,” ya Satana mipaluke kudi Yehova. (Ef. 4:18; Kol. 1:21) Inoko bamo mwenda mafuku, babwanya kwijokeja ne kulonga bukomo bwa kujokela ku bulongolodi bwa Yehova. Bano bantu betyepeje kadi ba kwisāsa batundailwanga monka na Tata wetu wa lulekelo.—Isa. 44:22; 1 Pe. 2:25.

¹⁴ Mwanda waka Yesu wāletele kino kyelekejo? Yesu wāelekeje mu muswelo usangaja amba Yehova usaka boba bonso bapalukile bajokele Kwadi. Shabana utelelwe mu kyelekejo wādi ukulupile nyeke amba wandi mwana ukajoka. Kitatyi kyaāmwene wandi mwana wajoka, aye “ukidi dya kulampe mwishinda,” shandi wākamutundaila bukidibukidi. Bine, kino i kimfwa kiyampe ku boba bapalukile mu bubine bajokele kudi Yehova pampikwa kulejaleja! Babwanya kuzoza ku mushipiditu ne kumona amba kujoka i mwanda mukomo kadi uleta bumvu. Inoko, kino kyo kintu kya mvubu—enka ne madiulu akasangala kitatyi kyobajoka.—Luka 15:7.

¹⁵ Lelo i muswelo’ka otumwena mu kyelekejo  kya mwana mujimine? Tufwaninwe kwiula kimfwa kya Yehova. Ketufwaninwepo ‘kutabuka pa boloke’ ne kupela kutambula babipya-mambo besāsa ne kujoka. Mwanda kino kitwala ku ‘kwionakanya’ bitupu. (Mus. 7:16) Tukokeja kuboila ñeni mikwabo ku uno mwanda. Muntu wapaluka ku kipwilo ufwaninwe kumonwa bu “mukōko mujimine,” ke bu walwanapo. (Ñim. 119:176) Shi tubetana na muntu usāsukile ku kipwilo, le tukamukwasha na buswe ne kumulombola mwa kujokela? Lelo tukasapwila bakulumpe mwanda wa bakamupe bukwashi bufwaninwe? Bine, tukalonga namino enka shi tubalonda na kikōkeji ñeni yotwaboila ku kyelekejo kya Yesu kya mwana mujimine.

¹⁶ Tala bana bajimine ba mu ano mafuku mobafwijija’ko Yehova pa lusa ne buswe bwandi ne pa kukwashibwa na kipwilo. Tutu umo wapangilwe panja ke mulāle myaka 25 unena amba: “Tamba njokejibwa nsangaji yami i mivudile’ko pano pontambwile ‘bitatyi bya kutūja kudi Yehova.’ (Bil. 3:19) Muntu ense unkwatakenye ne kunsanswa! Pano ngidi na kisaka kya ku mushipiditu kitendelwa.” Kaka umo nkasampe wapalukile kudi Yehova ne kulonga myaka itano panja unena paajokejibwe amba: “Nakomenwa ne kushintulula moneivwanine pa kumona patōkelela pondi buswe bwēsambile’po Yesu. Bine, kubadilwa mu bulongolodi bwa Yehova i dyese’po kashā!”

¹⁷ Lelo i myanda’ka yotwefunda mu bino byelekejo bisatu? Dibajinji, tufwaninwe kuyuka amba ketubwanyapo kuludika kutama kwa ku mushipiditu. I Yehova ye uludika’ko. Kya bubidi, ketubwanyapo kukulupila’mba boba bonso bapwila ne befunda netu bakakwata bubinebine na makasa abidi. Kya mfulo, nansha shi bamo abapaluka mu bubinebine ne kuvundamina Yehova ketwakatyimukwai mutyima amba kubapu kebakijokapo.

¹⁸ Batwe bonso twendelelei kukimba buyuki, kwivwanija ne tunangu. Shi ke tutange byelekejo bya Yesu, twiipangulei mobishintulwila, kyobyālembelwe mu Bible, mwa kwingidijija ñeni yotuboila’ko ne byotwifunda’ko padi Yehova ne Yesu. Shi tulonge namino, bine tubalombola’mba tubaivwanija mushintulwila binenwa bya Yesu.