Lusa mu Ntanda ya Bukalabale

MUNTU umo mu Burundi wabela malaria. Ufwaninwe kutwalwa bukidibukidi ku lupitalo. Pano le wenda’ko namani? Motoka wa kumusela kutupu’o. Balunda bandi ba pa mutyima babidi abaiya kumukwasha. Abamukandija ku nkinga kebamutonona bapita mu dishinda dya ngulu kintu kya mansaa apungijana atano matuntulu. Ebiya abamukandija mu motoka nao ubakamutūla pabwipi na lupitalo. Kupwa’tu kwa mafuku matyetye, waimvwana’ko biyampe.

Ku mutamba mukwabo wa ntanda, kimpumpu kikatampe kya Katrina kyasadile byamalwa kipindi kimo kya mu États-Unis kidi ku nkula ya mema mu Kweji 8, 2005, kisumpi kya bantu ba kwituma batulukile njibo imo mifikilwe na mityi. Bano bantu ba kwituma, bonso kebabutulwapo na mwine njibo, bajikije dyuba dyonso batalula mityi ne bityakuku na mashini ateta mityi. Mwine njibo unena’mba: “Bano [bantu] ne mwa kwibafwijija mubampumbwe.”

Bisanji bivule bisambilanga bininge pa bilongwa bya bukalabale ne bya buñumauma. Bilongwa bya lusa ne kanye kebinenwanga’kopo divule. Nansha namino, kekudipo kishintyile, konso konso bantu bakisakilwa buswe, kisanso, ne kwimvwaninwa lusa. Twabilanga lusa! Tumonanga kino mu bantu kitatyi kya Noele, mobekalanga banena ne kwimba myanda itala ‘ndoe ne kwitōkelwa mu bantu.’—Luka 2:14.

 Kulombola lusa ke kupēlapo mu ino ntanda idi na mwikadila wampikwa bulunda ne kizaji. Mwikadila utumbile’mo i uno amba kimpuma ne mutyima mūmu ko kubwina ne kunekenya. Bavule bamweka amba balondanga mu būmi bwabo milangwe ya amba muntu wa ñeni ufwaninwe kwikala na bukalabale kupita’ko kwikala na lusa. Lwiso ne kwisakila bibaipaya lusa.

O mwanda, bantu bavule bebadikijanga enka abo, miimvwanino ne tumweno twa bakwabo kebidipo na mwanda. Babingwa mu makayo ne mu kwipwija mukose, bampikwa kisanso (babikandangobo) batelwanga divule bu bo “bantu bene.” Bendeji bamo ba kipolitike nabo badi’nka nenki.

Penepo i biyampe twiipangule amba: Le twimvwaninanga bantu lusa? Lelo lusa bo bukomo buleta bintu biyampe? I bika biketukwasha twikale na lusa? Kishinte kilonda’ko kisa kulondolola bino bipangujo.

[Kapango pa paje 3]

• Lelo kulombola lusa i buzoze?

• Lelo lusa ludi na bukomo?

• I mu miswelo’ka mipotoloke motukokeja kwimvwanina bakwetu lusa?