“Tá Mutyima ku Bwingidi bo Watambula Mudi Mfumwetu”

“Tá mutyima ku bwingidi bo watambula mudi Mfumwetu ne kufikijija’bo.”—KOL. 4:17.

1, 2. Le i kiselwa’ka kitwikilwe Bene Kidishitu pangala pa bantu?

 TUDI na kiselwa kikatampe pangala pa bantu betujokolokele. Butyibi bobatyiba pano bukebatwala ku būmi nansha ku lufu mu kitatyi kya “malwa makatakata.” (Kus. 7:14) Mulembi umo wālembele mukanda wa Nkindi ku bukomo bwa mushipiditu, wānene amba: “Nyongolola boba baselwa ku lufu, ino boba basaka kwipaibwa kokaleka’bo.” Bino i bishima bitenga mutyima mpata! Kuleka kuvuija kiselwa kyetu kya kudyumuna bantu pa mwanda utala butongi bwibatengele kumeso kuketulambikija mashi. O mwanda kisonekwa kimo kyonka kyendelela’mba: “Shi unena’mba: Talapo bidi, ketwikiyukilepo: Lelo yewa utompekeja mutyima kekilangilepo’ni? Kadi ulamine mūya obe le kayukile’kyopo’ni? Ino kakalubwilapo ku muntu ense mwendele mwingilo wandi?” Na bubine, bengidi ba Yehova kebabwanyapo kunena’mba ‘ketuyukilepo’ kyaka kitengele bantu.—Nk. 24:11, 12.

² Yehova umwene būmi na mvubu. Ukankamikanga bengidi bandi balonge buninge bwabo bonso mwa kupandijija būmi bwa bantu bavule bene. Mwingidi ne mwingidi wa Leza ufwaninwe kuyuka musapu upāna būmi utanwa mu Kinenwa kya Leza. Mwingilo wetu wiifwene pamo na wa kalama wela lubila lwa kidyumu ponso pamona’mba kudi bulwi bwiya. Ketusakilepo kutwikwa kiselwa kya mashi a boba badi mu kyaka kya konakanibwa. (Ezek. 33:1-7) Nanshi i kipite buya tulonge buninge bwa ‘kusapula mwanda’!—Tanga 2 Temote 4:1, 2, 5.

3. I myanda’ka ikabandaulwa mu kino kishinte ne bikwabo bibidi bilonda’po?

³ Kino kishinte kisa kubandaula mwa kunekenenya bijika bya mu mwingilo obe wa kukūla bantu ne mokokeja kukwashisha bantu bavule. Kishinte kilonda’ko kikabandaula muswelo okokeja kutamija bwino bwa kufundija bubinebine bupāna būmi. Kishinte kya busatu kya kwifunda kikaleta lapolo wa bipa bimobimo bikankamika bimonwa na basapudi ba Bulopwe pano pa ntanda ponso. Ino kumeso kwa kubandaula ino myanda, i biyampe tutale bidi kine kibipile bino bitatyi byotudi’mo.

Kine Kekikadilepo Bavule na Lukulupilo

4, 5. Lelo muzo wa muntu wimwenanga bika, ne bantu bavule baloñangapo namani?

⁴ Myanda ya ntanda ilombola’mba tudi mu kitatyi kya “pamfulo ya panopantanda” ne amba mfulo ke mifwene bininge. Muzo wa muntu wimwenanga myanda ne ngikadilo yānenwe na Yesu ne bandi bana ba bwanga amba ikamweka mu “mafuku a kumfulo.” “Misongo,” mubadilwa mavita, bipupo bya nzala, kutenkana kwa ntanda, ne binzengele bikwabo, bibamwesha bantu malwa. Kujilula bijila, kwisakila, ne kubulwa bwine Leza bibavula mpata. Bine ino i “myaka ya malwa” nansha ke ku bantu bene balonga buninge bwa kulonda misoñanya ya mu Bible.—Mat. 24:3, 6-8, 12; 2 Tem. 3:1-5.

⁵ Ino bantu bavule bene kebayukilepo kine kilongekela ino myanda ya ntanda. O mwanda baselele mityima kūlu, balanga’nka mutyima-ntenke wabo ne wa bisaka byabo. Kufwa kwa baswe babo nansha binkumbulu bikwabo kebyo kwibasanshija mutyima. Bantu kebakekalapo na lukulupilo shi kebayukidijepo kine kifikila bino bintu ne mwine mobikapwila.—Ef. 2:12.

6. Mwanda waka “Babiloni mukatakata” kabwenyepo kukwasha balondi bandi?

⁶ “Babiloni mukatakata,” umbikalo wa ntanda  yonso wa bipwilo bya bubela, kaseñangapo bantu bininge. Ino aye ye mwine wela bantu bavule mu kavutakanya ku mushipiditu pa kwibatomeja “vinyu yandi ya busekese.” Ne kadi, bipwilo bya bubela byobikwete’ko na bwitwa, byongolanga “balopwe ba panopantanda” ne kwibatādila na kufundija mfundijo ya bubela ne kulonga bilongwa bya majende mwanda wa bantu banze kulonda bupofu bamfumwabo ba mu politike. O mwanda bipwilo bya bubela bidi na bukomo ne lupusa, ino koku nako i bipele pelēe kulonda bubinebine bwa Leza.—Kus. 17:1, 2, 5; 18:23.

7. I bika bitengele bantu bavule kumeso, ino bamo bakokeja kukwashibwa namani?

⁷ Yesu wāfundije amba bantu bavule bendanga mu dishinda dikatampe ditwala ku koneka. (Mat. 7:13, 14) Bantu bamo bendanga mu dine dishinda dikatampe’di mwanda i batonge ku kusaka kwabo kupela kulonda byobya bifundija Bible, ino bavule bendanga’mo mwanda baongwelwe, nansha kudibwa kavudi, bakomenwa kuyuka byobya bine bisaka Yehova kobadi. Kekubulwe bamo bakokeja kushinta mwikadilo wabo shi balombolwe bubinga buluji bwa kushintyila. Ino boba bakashala mu Babiloni Mukatakata, bendelela kupela kulonda misoñanya ya mu Bible, kebakapandepo mu kitatyi kya “malwa makatakata.”—Kus. 7:14.

Endelela na Kusapula ‘Kuleka’byo Mpika’

8, 9. Le Bene Kidishitu ba mu myaka katwa kabajinji bālongele namani kitatyi kya kulondwalondwa, ne mwanda waka?

⁸ Yesu wānene amba bandi bana ba bwanga bakasapula myanda miyampe ya Bulopwe ne kulonga bana ba bwanga. (Mat. 28:19, 20) Nanshi Bene Kidishitu ba bine bamonanga’mba kwingila mwingilo wa busapudi i kulombola dikōkeji ku meso a Leza ne i kintu kikatampe kisakwa pa kulombola lwitabijo lwabo. O mwanda balondi babajinji ba Yesu bāuminine nansha ke pobādi balondwalondwa pene. Bādi beubija mudi Yehova wa kwibapa bukomo, bamulomba mwanda wa ebape muswelo wa bendelele na ‘kunena mwanda wandi kwakubulwa moyo.’ Yehova wēbetabile, wēbayuja mushipiditu sandu, nabo bānena mwanda wa Leza kwakubulwa moyo.—Bil. 4:18, 29, 31.

⁹ Kitatyi kyānanine kulondwalondwa, lelo balondi ba Yesu bāzozeje mutyima wabo wa kusumininwa kusapula myanda miyampe? Mhm, nansha dimo. Bendeji ba bipwilo bākalabele pa kwivwana busapudi bwa batumibwa, penepo bākuta batumibwa, bēbatuyula, kupwa bēbakupila nsonde. Ino batumibwa “kuleka’byo kufundija mpika, ne kusapula bya Yesu.” Bāmwene’tu amba bafwaninwe ‘kukōkela Leza, bantu kunyuma.’—Bil. 5:28, 29, 40-42.

10. Le i bikoleja’ka bitananga Bene Kidishitu dyalelo, ino mwiendelejo wabo muyampe ukokeja kulupula bipa’ka?

¹⁰ Bengidi bavule ba Leza ba dyalelo kebaikele kutyumwina umanwi bikupilwa ne kukutwa  pangala pa mingilo yabo ya busapudi. Inoko Bene Kidishitu bonso ba bine batanwanga na matompo a muswelo kampanda. Kimfwa, mutyima obe wa mundamunda ukokeja kukutononwena ku kulonda mwiendelejo mwishile na wa bantu bonso nansha wa kukushiyañanya na bakwenu. Bakwenu, balunda ba ku masomo, nansha balondakani bakokeja kukumona’mba udi bingi mwanda utyibanga mbila na kulonda misoñanya ya mu Bible. Inoko, kukalala kwabo kekufwaninwepo kukuzozeja. Ntanda idi mu mfindi ku mushipiditu, ino Bene Kidishitu abo bafwaninwe ‘kumweka tō bwa bimuni.’ (Fid. 2:15) Padi bantu bamo bakutala bakamona ne kutendela bilongwa byobe biyampe penepo kebatumbija Yehova.—Tanga Mateo 5:16.

11. (a) Le bamo bakokeja kulonga bika pa kumona mwingilo wa busapudi? (b) Le mutumibwa Polo wālondelwelondelwe muswelo’ka, ne wālongele’po namani?

¹¹ Tusakilwa kininga pa kusaka kwendelela na kusapula musapu wa Bulopwe. Bantu bamo, nansha ke bobutulwa nabo, bakokeja kukufutulula ne kukutyumuna mutyima mu muswelo kampanda. (Mat. 10:36) Mutumibwa Polo wākupilwe bikupilwa misunsa mivule mwanda wa kwingila kwaādi wingila mwingilo wandi na kikōkeji. Tala mwaālongele pa kuno kulondwalondwa; unena’mba: “Pa kupwa kumonamona byamalwa, ne kulongwa bibibibi bya bumvu, . . . twakankamene ne kukankamana mudi Leza wetu kwisamba nenu myanda-miyampe ya Leza, mu bulwi bwa ntanda ne ntanda.” (1 Tes. 2:2) Bine, kwendelela kunena myanda miyampe bwādi i bulwi kudi Polo; ke-muntu wākwetwe, wāvūlwa bivwalwa, wākupilwa nsonde, ne kwelwa mu kifungo. (Bil. 16:19-24) Ino i bika byāmutalwile moyo wa kwendelela? I mutyima wandi utunta wa kusaka kuvuija mwingilo wāmupele Leza.—1 Kod. 9:16.

12, 13. I bikoleja’ka bitananga bamo, ne batompanga kwibinekenya namani?

¹² Kadi bikokeja kwikala bulwi pa kulama bupyasakane bwetu mu myaba kemutanwapo bantu divule ku mobo nansha mwitaba bantu batyetye kete ku musapu wa Bulopwe. Le penepo tukokeja kulonga namani? Tukokeja kumona’mba i biyampe kubweja’ko kininga kya kwisamba na bantu bya kiponka na ponka. Kadi padi tukashinta mpangiko yetu nansha kulonga bukomo bwa kusapula bininge mu byaba motukokeja kutana bantu bavule.—Dingakanya na Yoano 4:7-15; Bilongwa 16:13; 17:17.

¹³ Makambakano makwabo alwanga na bavule i bununu nansha misongo, bintu bikokeja kutyepeja mingilo yobabwanya kwingila mu mwingilo wa busapudi. Shi ye byodi, kokazozeja mutyima. Yehova uyukile biyampe byobya byokubwanyapo kulonga kadi utendelanga byobya byolonga. (Tanga 2 Kodinda 8:12.) Nansha shi ubatanwa na bikoleja’ka—shi kulondwalondwa, shi buñumauma, nansha misongosongo—longa mungya ngikadilo yodi’mo byobya byobwanya kulonga mu kusapwila bantu myanda miyampe.—Nk. 3:27; dingakanya na Mako 12:41-44.

 “Tá Mutyima ku Bwingidi” Bobe

14. Le i kimfwa’ka kyāshidile Polo bakwabo Bene Kidishitu, ne i madingi’ka awāletele?

¹⁴ Mutumibwa Polo wādi ukwete mwingilo wandi makasa abidi, kadi wākankamikile bakwabo betabije balongele monka. (Bil. 20:20, 21; 1 Kod. 11:1) Muntu umo bidi wātongelwe na Polo bu wa kukankamika kupita i Mwine Kidishitu wa mu myaka katwa kabajinji witwa bu Akipusa. Pa kutumina Bene Kolose mukanda, Polo wālembele amba: “Munene Akipusa nandi’mba: Tá mutyima ku bwingidi bo watambula mudi Mfumwetu ne kufikijija’bo.” (Kol. 4:17) Ketuyukilepo shi Akipusa wādi ani, ino bimweka’mba wāitabije mwingilo. Shi wi Mwine Kidishitu mwipāne, nobe wi mwitabije mwingilo. Lelo nobe utanga mutyima ku mwingilo obe mwa kuvuijija’o?

15. Le kwipāna kudi Yehova i kulonga bika, ne kino i kilupule bipangujo’ka?

¹⁵ Kumeso kwa kubatyijibwa, twaikele bidi kupāna būmi bwetu kudi Yehova mu milombelo ya na mutyima umo. Kino kilombola’mba twādi basumininwe kulonga kiswa-mutyima kyandi. O mwanda i biyampe twiipangule pano amba, ‘Lelo binebine kulonga kiswa-mutyima kya Leza kyo kintu kya mvubu mpata mu būmi bwami?’ Eyo, tukokeja kwikala na biselwa palapala bitusakila Yehova kuvuija—kimfwa kusasaketa kisaka kyetu. (1 Tem. 5:8) Ino le twingidijanga namani kitatyi ne bukomo bitushadila’ko? Le i bika byotutangidije mu būmi bwetu?—Tanga 2 Kodinda 5:14, 15.

16, 17. Le i bika bikokeja kulonga Bene Kidishitu bankasampe nansha boba bakidi na biselwa bityetye?

¹⁶ Le wi nkasampe Mwine Kidishitu mwipāne wāikele kupwija masomo mabwanine nansha udi kubwipi na kupwija’o? Mobimwekela kwaikele na biselwa bilēma mu kisaka. Le penepo i bika byolanga kulonga na būmi bobe? Le i butyibi’ka botyiba bukakupa muswelo wa kufikidija mulao owalaile kulonga kiswa-mutyima kya Yehova? Bavule bapañanga myanda senene mwa kwingidila bupania, ne bamwenanga’mo nsangaji mikatampe ne kuloelelwa.—Mit. 110:3; Mus. 12:1.

¹⁷ Padi wi kitumbafumu. Wingilanga kaji ka nshikije-dyuba ino abe na biselwa bityetye, kimfwa kya kwisasaketa abe mwine kete. Na bubine, usepelelanga kwingila mingilo ya kipwilo ponso pomona mukenga. Ubulwe’po kusaka kutuntwila’ko nsangaji yobe? Le kodi ne mulange kutandabwila’ko mwingilo obe? (Mit. 34:8; Nk. 10:22) Mu myaba imo, mukilomba mwingilo mukatampe wa kwingila pa kufikila bonso na musapu wa bubinebine upāna būmi. Ubulwe’po kujadika bintu mu būmi bobe, na kukengidila padi kokwa kusakibwa basapudi bavule ba Bulopwe?—Tanga 1 Temote 6:6-8.

18. Le i bintu’ka byashintyile ba mulume ne mukaji bankasampe, ne i bipa’ka byobamwenine’mo?

¹⁸ Tala bidi kimfwa kya Kevin ne Elena, ba mu États-Unis. * Badi bidi balanga kupota njibo pamo na mulangilanga bankasampe bavule bakitamba mu kwisonga. Pa kino bonso badi bengila kaji ka nshikije-dyuba ne kwikala baikala na būmi bulumbuluke. Ino mpangiko ya kaji kabo, ne mingilo ya ku njibo byebadila kitatyi kya kusapula. Kupwa bamona’mba abapāna kubwipi kwa kitatyi ne bukomo bwabo bonso enka ku bituntwa byabo. Ino abo pa kumona būmi bupēla bwa ba mulume ne mukaji bamo badi bapania ba nsangaji, ba Kevin ne Elena batyiba mbila ya kushinta bintu bya kutangidija kumeso mu būmi bwabo. Bakimba bidi bukwashi bwa Yehova mu milombelo, kupwa bapoteja njibo yabo ne kuvilukila mu njibo mityetye. Elena watyepeja’ko nsaa ya kaji ka  ku ngitu penepo waikala pania. Kevin pa kukankamikwa na myanda yadi īmwena mukajandi, nandi waleka kaji kandi ka nshikije-dyuba, washilula kwingila bupania. Kitatyi kityetye kupita’po, bavilukila mu ntanda ya mu Amerika wa Kunshi musakilwa basapudi bavule ba bulopwe. Kevin unena’mba: “Twikalanga nyeke na nsangaji mu busongi, ino potwalongele bukomo bwa kufikila pa bitungo bya ku mushipiditu po pene, nsangaji i mivudile’ko kashā.”—Tanga Mateo 6:19-22.

19, 20. Mwanda waka kusapula myanda miyampe o mwingilo wa mvubu kupita yonso ingilwa dyalelo?

¹⁹ Kusapula myanda miyampe o mwingilo wa mvubu kupita yonso ingilwa dyalelo pano pa ntanda. (Kus. 14:6, 7) Utuntwilanga ku kulombola buujila bwa dijina dya Yehova. (Mat. 6:9) Musapu wa mu Bible ulumbululanga būmi bwa tununu ne tununu twa bantu batambula’o mwaka ne mwaka, ne ukokeja kwibafikija ku kupanda. Ino “Le bakevwana namani, musapudi mpika?” ye mwāipangwidile mutumibwa Polo. (Loma 10:14, 15) I amo, le bakevwana namani? Ubulwe’po kusumininwa kulonga byonso byobwanya kulonga mwa kuvuijija mwingilo obe?

²⁰ Muswelo mukwabo okokeja kukwasha bantu bajingulule mvubu ya bino bitatyi bya malwa byotudi’mo ne bipa bikokeja kulupuka ku mbila yobatyiba i kulumbulula bwino bobe bwa kufundija. Muswelo wa kulumbulula’bo ukesambilwa’po mu kishinte kilonda’ko.

[Kunshi kwa dyani]

Usa Kulondolola Namani?

• I kiselwa’ka kitwikilwe Bene Kidishitu pangala pa bantu?

• I muswelo’ka otubwanya kunekenya bijika byotutana mu mwingilo wa busapudi?

• I muswelo’ka otubwanya kuvuija mwingilo otwaitabije?

[Bipangujo bya Kifundwa]

[Kifwatulo pa paje 9]

Bilomba kininga pa kusapula koku ulondwalondwa

[Kifwatulo pa paje 10]

Le ukalonga namani shi usapula mu myaba kemutanwapo divule bantu ku mobo?