Iulai Mishonele Mukatampe

“Mwikale kunonda ami monka mo nondela ami Kidishitu.”—1 KOD. 11:1.

1. Mwanda waka tufwaninwe kwiula Yesu Kidishitu?

 MUTUMIBWA POLO wāiwile Yesu Kidishitu, Mishonele mukatampe. Polo nandi wāsoñenye banababo Bene Kidishitu amba: “Mwikale kunonda ami monka mo nondela ami Kidishitu.” (1 Kod. 11:1) Yesu wāpele batumibwa bandi kimfwa kya kwityepeja na kwiboija ku maulu, ne kwibanena’mba: “Napu kwimushīla kala mwakulondela’mba, monka mo nemulongela nenu mukalongele monka.” (Yoa. 13:12-15) Batwe Bene Kidishitu ba mu ano mafuku netu, tufwaninwe kwiula Yesu Kidishitu mu binenwa byetu, mu bilongwa, ne mu ngikadilo yotulombola.—1 Pet. 2:21.

2. Nansha shi kwatongelwe na Kitango Kyendeji bu mishonele, ino i ngikadilo’ka yofwaninwe kwikala nayo?

² Mu kishinte kyabadikile, twefundile’mo amba mishonele i muntu utumwa mwanda wa kukasapula—yewa uselela bantu myanda miyampe. Pa kino, Polo wāipangwile bipangujo bimo bya mvubu. (Tanga Loma 10:11-15.) Yuka amba mutumibwa wāipangwile amba: “Lelo bakevwana namani, musapudi mpika?” Kupwa wātela binenwa bya mu bupolofeto bwa Isaya, amba: “E! E! E! buya’o oa maulu ā baleta myanda-miyampe ya bintu bilumbuluke!” (Is. 52:7) Nansha shi kwaikele kutongwa ne kutumwa kukengidila mu ntanda-bene bu mishonele, ukokeja kwikala na mushipiditu wa busapudi, kwiula Yesu na kwikala musapudi mupyasakane wa myanda miyampe. Mwaka mupite’u, basapudi ba Bulopwe 6957852 baingile ‘mīngilo yabo ya busapudi’ mu matanda 236.—2 Tem. 4:5.

“Twashīle Byonso ke Tukulonda”

3, 4. I bika byāshile Yesu mūlu, netu tufwaninwe kulonga bika pa kwikala balondi bandi?

³ Yesu wāshile būmi bwandi bwa momwa  mūlu ne ntumbo, “wēbudija aye mwine, pa kwalamuka mu ludingo lwa bupika.” (Fid. 2:7) Byonso byotulonga mu kwiula Kidishitu kebibwanyapo kudingakanibwa na byobya byālongele Yesu paāile pano pa ntanda. Inoko, tubwanya kushadidila bu balondi bandi, na kuleka kujokela ku bintu byotwadi nabyo mu ntanda ya Satana.—1 Yoa. 5:19.

⁴ Difuku dimo, mutumibwa Petelo wālombwele Yesu amba: “Monapo bidi, bātwe byo twashīle byonso ke tukulonda.” (Mat. 19:27) Yesu paāityile ba Petelo, Andele, Yakoba, ne Yoano bāshile makonde abo ponka na ponka kebamulonda. Bāshile mwingilo wabo wa buluwe bēelelela mu busapudi bu wabo mwingilo. Mungya nsekununi ya Evanjile ya Luka, Petelo wānenene amba: “Tala bidi, batwe twashile bintu byetu byonso ke tukulonda.” (Luka 18:28, MB) Batwe bavule ketushilepo “bintu byetu byonso” pa kulonda Yesu. Inoko, twi ‘bepele batwe bene’ mwanda wa kwikala balondi ba Kidishitu kadi bengidi bepāne ba Yehova. (Mat. 16:24) Kino kituletelanga madyese a ntanda ne miseke. (Tanga Mateo 19:29.) Kwikala na mushipiditu wa busapudi na wādi na Kidishitu kuletanga nsangaji ku mutyima, nakampata shi ketudi kala bakwashe muntu nansha’tu bityetye afwene kudi Leza ne wandi Mwana muswe.

5. Sekununa byobya bibwanya kulonga muntu uvilukile kungi pa kupwa kwifunda bubinebine bwa mu Bible.

⁵ Valmir, mwana-mulume mwine Brezile wadi ushikatanga mu Siriname kunja, wadi ukola olo. Wadi nkolwankolwa kadi kisekese. Pa kwenda mu kizungu, Batumoni ba Yehova bashilula kwifunda nandi Bible. Wadi ufunda difuku ne difuku, washinta mu bintu bivule, ne kubatyijibwa wabatyijibwa. Paamwene amba mwingilo wandi keukwatañenepo na lwitabijo lwandi, wapotoloja bya busunga byandi ne kuvilukila mu Brezile kukakwasha ba kisaka kyandi nabo basokole bupeta bwa ku mushipiditu. Bantu bavule bavilukile kungi, pa kupwa kwifunda bubinebine bwa mu Bible, balekanga twaji twabo mu matanda a bupeta ne kujokela kwabo mwanda wa kukakwasha balongo ne bantu bakwabo ku mushipiditu. Bano basapudi ba Bulopwe balombolanga mushipiditu wa busapudi binebine.

6. Le tukalonga namani shi ketubwanyapo kuvilukila kokwa kusakilwa basapudi ba Bulopwe bavule?

⁶ Batumoni bavule bavilukilanga kokwa kusakilwa basapudi ba Bulopwe bavule. Bamobamo bakengidilanga ne mu ntanda-bene. Shako,  ke batwe bonsopo babwanya kuviluka, inoko, tubwanya kwiula Yesu na kwingila bininge mu busapudi.

Yehova Witufundijanga Senene

7. Lelo i masomo’ka afundanga boba basaka kutamija bwino bwabo bwa bu basapudi ba Bulopwe?

⁷ Monka mwāfundijibwe Yesu na Shandi, netu tubwanya kumwena mu bufundiji bwitufundija Yehova. Yesu mwine wānene amba: “Kyasonekelwe mu bapolofeto’mba: Bonso bakalombolwanga kudi Leza.” (Yoa. 6:45; Is. 54:13) Dyalelo nadyo, kudi masomo atūdilwe’ko mwanda wa kwitukumbanya mu mwingilo wetu wa bu basapudi ba Bulopwe. I kya bine, batwe bonso tumwenanga mu muswelo kampanda mu Masomo a Mwingilo wa Kiteokratike mu bipwilo byetu. Bapania badi na dyese dya kufunda Masomo a Bapania. Bapania bavule ke beje basangedile kufunda musunsa mukwabo ano masomo. Bakulumpe ne bengidi ba mingilo bafundanga Masomo a Mwingilo wa Bulopwe mwa kutamijija bwino bwabo bwa kufundija ne mwingilo obengidila banababo mu lwitabijo. Bakulumpe ne bengidi ba mingilo bamo bankungulume bekalanga bakafunda Masomo a Bufundiji bwa Mingilo, ebakumbanya mwa kukwashija bakwabo mu mwingilo wa busapudi. Batutu ne bakaka bavule batumwanga mu matanda a bweni bu ba mishonele, bafundanga bidi Masomo a Ngileade a Bwifundi bwa Bible a Sosiete Watchtower.

8. Lelo batutu bamo basangelanga bufundiji bwa Yehova namani?

⁸ Batumoni ba Yehova bavule bashintanga mpangiko yabo mwa kukafundila ano masomo. Yugu paādi usaka kukafunda Masomo a Bufundiji bwa Mingilo mu Kanada, walekele kaji kandi mwanda bamupelele kumupa mafuku a konje ku kaji. Yugu unena’mba: “Nkialakenyepo pa kino. Mwanda shi baumpele konje’wa ku buntu, longa badi bakunsakila kushala nyeke mu kompani. Ino pano ndi na kyaba kya kwenda konso kunsakila Yehova kuntuma.” Pa kusaka kumwena mu bufundiji bwa Leza, bavule i besuminwe byobya byobadi bamona bu bya mvubu mikatampe.—Luka 5:28.

9. Leta kimfwa kilombola amba bufundiji bwa mu Bisonekwa ne kininga bikwashanga bantu.

⁹ Bufundiji bwa mu Bisonekwa ne kininga bikwashanga bantu mpata. (2 Tem. 3:16, 17) Tala kimfwa kya Saulo wa mu Guatemala. Wabutwilwe na ñeni mipatuke, ne mwadimu wandi wanena inandi amba ke biyampepo kuningila uno nkasampe amba’nka ayuke kutanga, mhm, kutyina kumukambakanya bitupu. Ebiya Saulo waleka masomo kuyuka kutanga mpika. Inoko, Kamoni umo wafundija Saulo kutanga mu boloshile Wiibidije Kutanga ne Kulemba. Ebiya Saulo waendelela kumeso, wafika ne pa kunena mashikulu ku Masomo a Mwingilo wa Kiteokratike. Difuku dimo, inandya Saulo wetana na mwadimu mu busapudi bwa ku njibo ne njibo. Mwadimu pa kwivwana amba pano Saulo katañanga, wamunena amba iya nandi yenga wiya’ko. Yenga ulonda’ko, mwadimu waipangula Saulo amba: “Le i bika byosa kunfundija?” Saulo washilula kutanga musango umo mu dibuku Lelo I Bika Bine Bifundija Bible? Mwadimu wamunena’mba: “Nkyadipo nanga’mba bine ubwanya kumfundija.” Mwadimu wapambe Saulo bipa, ne impolo ya nsangaji mu meso.

Bufundiji Bukunka Mutyima

10. Lelo i kingidilwa’ka kiyampe kyotwingidijanga pa kufundija bubinebine bwa mu Bible?

¹⁰ Bufundiji bwa Yesu bwādi bwimanine pa byobya byāmufundije Yehova Leza ne pa bulombodi butanwa mu Kinenwa kyandi. (Luka 4:16-21; Yoa. 8:28) Twiulanga Yesu na kulonda madingi andi ne kulamata ku binena Bisonekwa. Batwe bonso tufwaninwe kulanga ne kwisamba kyakanwa kimo, nabya kino kiketubambakanya pamo. (1 Kod. 1:10) Tufwijanga’ko bininge “umpika wa binebine, udi ne manwa” pa kwitulupwila mabuku esambila pa Bible a kwitukwasha tulame bumo mu bufundiji bwetu ne kuvuija mwingilo wetu wa kusapula! (Mat. 24:45; 28:19, 20) Mu ano mabuku mudi ne dibuku Bifundija Bible, ditanwa pano mu ndimi 179.

11. Kaka umo wa mu Efiopya wakomene lwana na kwingidija dibuku Bifundija Bible namani?

 ¹¹ Kwifunda Bisonekwa mu dibuku Bifundija Bible kubwanya kushinta ne mityima ya balwana. Difuku dimo Lula, kaka pania wa mu Efiopya, wadi wifunda Bible na muntu umo, penepa mubutule wa uno mwifundi watwela na bulobo amba ketusakilepo kino kifundwa. Lula wesambila nandi na mutyima mutūke pa kyelekejo kidi mu dibuku Bifundija Bible, shapita 15 kitala pa lupeto lwa bubela. Lolo’wa wetūkija ne kwibaleka befunde. Ebiya, pa kwifunda musunsa mukwabo nandi watanwa’ko, walomba nandi kyandi kifundwa, ne kulomba ashilule kufuta pangala pa kino kifundwa! Kepejije, washilula kwifunda misunsa isatu ku yenga ne kwendelela kumeso ku mushipiditu.

12. Leta kimfwa kilombola muswelo ukokeja bankasampe kufundija senene bubinebine bwa mu Bible.

¹² Bankasampe bakokeja kukwasha bakwabo na kwingidija dibuku Bifundija Bible. Keanu wa mu Hawaii paafikije myaka 11 wadi utanga dino dibuku ku masomo, mukwabo wa ku masomo wamwipangwile amba: “Mwanda waka kufetangapo mafetyi?” Keanu watangididila malondololo mu mbwejo pa mutwe wa mwanda unena’mba: “Lelo Tufwaninwe Kusoba Mafuku a Mafetyi?” Kupwa wajokela ku kifunka kaipangula mukwabo i mutwe wa mwanda’ka wamusangaja mpata. Kifundwa kya Bible kyashilwididila. Mwaka wadi’mo, Batumoni ba Yehova baendeje bifundwa bya Bible 6561426, bivule byaendejibwe mu dibuku Bifundija Bible. Lelo wingidijanga kino kingidilwa poendeja bifundwa bya Bible?

13. Lelo kwifunda Bible na bantu kubwanya kwikala na lupusa lukata pobadi muswelo’ka?

¹³ Kwifunda Bisonekwa mu dibuku Bifundija Bible kudi na lupusa lukatampe pa boba basaka kulonga kiswa-mutyima kya Leza. Ba mulume ne mukaji bapania ba pa bula ba mu Norveje bashilwile kwifunda Bible na kisaka kimo kyatambile mu Zambia. Bano ba mulume ne mukaji Bene Zambia badi na bana basatu bana-bakaji kadi kebadipo basaka kubutwila’po mukwabo. Ino mukaji pa kwimita, batyiba mbila ya kupulumuna’dyo. Ino mafuku’tu matyetye kumeso kwa kukemona na dokitele, befundile shapita unena’mba “Mona Būmi Mwibumwena Leza.” Kifwatulo kya mwana udi mu dimi kidi mu uno shapita kyatengele bano ba mulume ne mukaji bininge baleka kupulumuna dimi. Baendelela ku mushipiditu biyampe, kadi pa kubutula mwana mwana-mulume bamwinika dijina dya tutu obadi befunda nandi’wa.

14. Leta kimfwa kilombola bipa biyampe bilupuka ku kwikala na būmi bukwatañane na byotufundija.

¹⁴ Kintu kya mvubu mu mufundijijo wa  Yesu i kwikala kwaādi na būmi bukwatañane na byaādi ufundija. Bantu bavule batendelanga mwiendelejo muyampe wa Batumoni ba Yehova, mwanda abo beulanga Yesu. Nsunga umo wa mu Nuvele-Zelande bamupomwenine motoka ne kumwiba’mo sakoshi. Wakamona bampulushi, nabo bamulombola’mba: “Ukekala na dyese dya kutana sakoshi obe poso enka shi i muboibwe na Kamoni wa Yehova.” Kamoni umo wadi upāna mapepala waboya sakoshi’wa. Mwine sakoshi pa kulombolwa amba wamweka, waenda ku njibo ya uno kaka. Wasangala mpata pa kumona’mba ne mikanda ya bulēme yakulupile yadi monka. Kaka wamulombola’mba: “Bubinga bwinebwine bonamwenine amba i biyampe’nka njokeje bino bintu, i pa mwanda ne Kamoni wa Yehova.” Uno nsunga watulumuka, ne kuvuluka byobadi abamulombola lubanga. Bine, Bene Kidishitu badi na būmi bukwatañane na bufundiji bwa mu Bible kadi beulanga Yesu.—Bah. 13:18.

Iulai Mwādi Mwikadile Yesu na Bantu

15, 16. I muswelo’ka otukokeja kukoka bantu na musapu otusapula?

¹⁵ Mwikadilo wādi na Yesu na bantu wādi wibakokela ku musapu wandi. Kimfwa, buswe ne kwityepeja kwandi byādi bikokela bafudile kwadi. Wādi ufwila lusa boba bādi bāya kwadi ne kwibasenga na binenwa bya kanye, wibondapa ne mbá mivulevule. (Tanga Mako 2:1-5.) Ketukokejapo kulonga bingelengele, inoko tubwanya kwikala na buswe, kwityepeja, ne lusa—ngikadilo itukwasha tukokele bantu ku bubinebine.

¹⁶ Lusa lwakweshe bininge Tariua pania umo wa pa bula wakapempwile mununu umo witwa bu Beere, wadi ushikatanga mu kisanga kya kulampe kya Kiribati mu Pasifike ya Kunshi. Nansha byamwekele amba uno mwana-mulume kasakilepo kuteja, ino kaka Tariua wamwivwanine lusa mwanda wamwene amba wadi na bulebe mutamba umo. “Lelo kodi mwivwane milao ilaile Leza babela ne banunu?” Kupwa wamutangila kisonekwa kya bupolofeto bwa Isaya. (Tanga Isaya 35:5, 6.) Uno mwana-mulume pa kutengwa na ino myanda wanena’mba: “Nkendi mutange Bible myaka mivule kadi bamishonele ba mu kyetu kipwilo bampempulanga pano ke myaka mivule, ino kashā kyamwene kino mu Bible.” Beere washilula kwifunda Bible kadi waendelela biyampe ku mushipiditu. Eyo, nansha byaadi wikoka na bulebe, ino wabatyijibwe ne pano utangidile kisumpi kya kulampe, ne ubwanya kusapula myanda miyampe mu kisanga monso.

Endelelai Kwiula Kidishitu

17, 18. (a) I muswelo’ka okokeja kwikala musapudi ulupula bipa? (b) Le i bika bikamona boba bonso bengila mwingilo wabo na kusumininwa?

¹⁷ Monka mulombwelanga myanda isangaja yotutananga mu busapudi, tukokeja kwikala basapudi bapa bipa shi tutamija ne kulombola ngikadilo yādi na Yesu. Bine, i kyendele’mo nanshi twiule Kidishitu bu basapudi bapyasakane!

¹⁸ Bavule byobāikele bana-babwanga ba Yesu mu myaka katwa kabajinji, Petelo wāipangwile amba: “Lelo byo tusa kukamona bātwe i bika le?” Yesu wāmulondolola amba: “Bonso banshīdile ne mōbo, nansha bāna babo, shi bāna-balume shi bāna-bakaji, nansha bashabo ne bainabo, nansha bāna bo babutwile, nansha madimi, pa mwanda wa dyami dijina, ebiya bakamwenamo byakufika bukatwa, ne kupyana bakapyana muya wa kulādila nyeke na nyeke.” (Mat. 19:27-29) E byotukamona shi twendelela kwiula Yesu Kidishitu, Mishonele mukatampe.

Le Ukalondolola Namani?

• Le i muswelo’ka witufundijanga Yehova twikale basapudi?

• Mwanda waka dibuku Bifundija Bible ditukwashanga mu mwingilo wetu?

• I muswelo’ka otukokeja kwiula mwādi mwikadile Yesu na bantu?

[Bipangujo bya Kifundwa]

[Kifwatulo pa paje 21]

Yesu paāityile ba Petelo, Andele, Yakoba, ne Yoano bamulondele ponka na ponka

[Kifwatulo pa paje 23]

Mabuku pamo bwa “Bifundija Bible” etukwashanga tulame bumo mu bufundiji bwetu