Lelo Bulopwe bwa Leza I Bika?

LELO mutwe wa mwanda wa busapudi bwa Yesu wādi mutwe wa mwanda’ka? Mungya Yesu mwine, i Bulopwe bwa Leza. (Luka 4:43) Bantu bādi bamwivwana utela buno Bulopwe misunsa mivule. Lelo byādi bibakoleja kwivwana ne kwibakutakanya? Le bāmwipangwile mwanda wa kuyuka’mba Bulopwe’bo bwine i bika? Mhm, kebāmwipangwilepo. Maevanjile kealombwelepo bipangujo bya uno muswelo. Lelo nanshi bantu’ba bādi kala bayukile Bulopwe bwa Leza?

I amo, Bisonekwa bya pa kala byādi bilēmekelwe na Bayuda byādi kala bishintulula buno Bulopwe ne bine byobukalonga mu bishima bipotoloke ne bivwanikwa. Dyalelo, tukokeja netu kuyuka bivule bine pa bitala Bulopwe pamo’nka bwa Bayuda—shi tutanga Bible. Tubandaulei’ko bidi nanshi bubinebine busamba-bubidi bufundija Bible pangala pa Bulopwe. Busatu bubajinji bwādi kala buyukene ku Bayuda ba mu myaka ya Yesu ne ba pa kala. Busatu bukwabo i busokolwe na Kidishitu ne bandi batumibwa mu myaka katwa kabajinji. Bwa mfulo i bumweke mu ano etu mafuku.

1. Bulopwe bwa Leza i umbikalo udi’ko bine, ukalādila’ko nyeke ne nyeke. Bupolofeto bubajinji bwa mu Bible bulombola amba Leza ukatuma mupandiji wa kupandija bantu ba kikōkeji. Uno mupandiji utelwa bu “lukunwa,” ukapwa makambakano onso aletelwe na butomboki bwa Adama, Eva, ne Satana. (Ngalwilo 3:15, New World Translation) Mwenda myaka, Mulopwe Davida, muntu wa kikōkeji wālombolwa mwanda usangaja amba luno “lukunwa,” i Meshiasa. Wadi ukabikala Bulopwe. Uno umbikalo ukeshila na imbikalo yonsololo. Mwanda ao ukekala’ko nyeke ne nyeke.—2 Samwele 7:12-14.

2. Bulopwe bwa Leza bukafudija imbikalo yonsololo ya bantu. Mupolofeto Danyele wāpelwe kimonwa kyaāmwene’mo kwipingakena kwa imbikalo itādile ntanda, mu bula bwa mānga yonso kutūla ne ku ano etu mafuku. Ivwana mufudila kino kimonwa na nsangaji, amba: “Mu mafuku a boba balopwe [bantu bakabikala ku mfulo] Leza wa mūlu ukemika bulopwe kebukōnakanibwapo nansha patyetye, nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.” Nanshi malopwe onso nansha imbikalo ya ino ntanda—ne mavita ao, kasusu, ne koneka kwao kwine—bikatukila lonso. Monka mulombwela bupolofeto bwa Danyele, Bulopwe bwa Leza busa kubikadila ntanda yonso panopano ponka. (Danyele 2:44, 45) Uno i umbikalo udi’ko bine, ukemananga nyeke ne nyeke. *

3. Bulopwe bwa Leza bukapwija mavita, mbá, nzala, ne lufu lwine kumo. Bupolofeto busangaja bwa mu Bible bulombola bikalonga Bulopwe bwa Leza pano panshi. Uno umbikalo ukalonga byobya bikomenwe malongolodi a bantu ne byokebakabwanyapo kashā. Langa’po bidi—bya bulwi byonso bikonakanibwa lonso fututu! “Watukija mavita ne ku mfulo ya ntanda.” (Mitōto 46:9) Ke kutupu badokitele, mpitalo, ne mbá mine. “Mwikadi kakanenapo’mba: Nabela.” (Isaya 33:24) Bipupo bya nzala, kubulwa kudya biyampe, nansha kufwa nzala kwine ne kobyaya jimejime. “Kukēkalanga bungibungi bwa mebele panopantanda.” (Mitōto 72:16) Mfwani, madilo, bibundu, lamolo, ne bumonya-malwa bulupuka’ko bikatukila. Lufu, walwana netu wambulwa kafuku, ukanekenibwa lonso. Leza “wapu kumininina lufu nyeke ne nyeke; ino Mfumwetu Leza ukapampula mipolo ku mapala onso.”—Isaya 25:8.

4. Bulopwe bwa Leza budi na Mulopwe mutongwe na Leza. Meshiasa kemwibikikepo aye mwine, nansha kutongwa na bantu bampikwa kubwaninina. I Yehova Leza mwine umutongele. Kitenta kine kya bu Meshiasa ne kya  bu Kidishitu kilombola’mba i mutongwe na Leza. Bino bishima bishintulula amba, “Mushingwe māni.” Nanshi uno Mulopwe i mushingwe māni nansha mutongwe na Yehova mwanda wa kwingila mwingilo wa pa bula wamupele. Leza unenena padi aye amba: “Talapo bidi, mwingidi wami o nakwatyijija, mutongwe wami o ntōkelwe ku mutyima; natūla mushipiditu wami pādi, ukemukija kidye ku baJentaila.” (Isaya 42:1; Mateo 12:17, 18) Le i ani mukwabo wadi ubwanya kuyuka senene kupita Umpangi wetu Mulopwe, mwine ufwaninwe kwitubikela?

5. Mulopwe wa Bulopwe bwa Leza wēlombwele bu mufwaninwe ku meso a bantu bonso. Yesu wa Nazala ye wāikele Meshiasa wālailwe. Wābutwidilwe mu kisaka kya musuku wālaile Leza. (Ngalwilo 22:18; 1 Bilongwa 17:11; Mateo 1:1) Paādi pano panshi, wāfikidije bupolofeto buvule bwine butala padi Meshiasa bwāsonekelwe tutwa twa myaka kunyuma. Wāyukijibwe kutamba mūlu amba ye Meshiasa. Namani? Leza mwine wēsambile aye mūlu na kumuyukanya amba i wandi Mwana; kadi bamwikeulu bāmutelele amba ye aye Meshiasa wālailwe; ne Yesu mwine wālongele bingelengele—bivule byāmwenwe na tutwa twa bantu, pakwabo tununu—kino kyālombwele patōkelela amba udi na bukomo bwa kwa Leza. * Yesu wālombwele misunsa mivule bintu bimuyukanya amba i Mulopwe wa muswelo’ka. Kādipo enka na bukomo bwa kukwasha bantu kete, ino wādi ne na mutyima wa kwibakwasha. (Mateo 8:1-3) Wādi wambulwa mwino, wa lusa, wa kininga, kadi mwityepeje. Nsekununi ya būmi bwandi pano panshi itanwa mu Bible mwanda wa bantu bonso bekale kwiitanga.

6. Bulopwe bwa Leza budi na bantu 144000 bakabikala pamo na Kidishitu. Yesu wānene amba bantu bakwabo, kubadila’mo ne batumibwa bandi, bakabikala pamo nandi momwa mūlu. Wātelele kino kisumpi bu “kaluombe katyetye.” (Luka 12:32) Kupwa, mutumibwa Yoano wālombwelwe bungi bonso bwa kano kaluombe katyetye amba i bantu 144000. Bakengila mwingilo wa mvubu momwa mūlu, kubikala bu balopwe ne kwingila bu bapidishitu pamo na Kidishitu.—Kusokwelwa 5:9, 10; 14:1, 3.

7. Bulopwe bwa Leza, bubikele kala mūlu pano, busa kutandabula buludiki bwabo pano panshi ponso. Buno bubinebine bwa busamba-bubidi bo bwine busangaja kutabuka botufwaninwe kuyuka. Bible uleta bukamoni buvule bulombola amba Yesu i mupebwe kala lupusa bu Mulopwe momwa mūlu. Panenwa pano i mubikale kala, kadi panopano ponka usa kutandabwila bulopwe bwandi pano panshi ne kufikidija bupolofeto bulumbuluke kashā botwadi tubatela kala. Ino tukokeja kuyuka namani amba bine Bulopwe bwa Leza ke bubikale kala? Ne bukashilula kwendeja ntanda kitatyi’ka?

[Kunshi kwa dyani]