Ikalai na Kikōkeji ne Bujalale Ponka
Ikalai na Kikōkeji ne Bujalale Ponka
“Kadi wikale kwibavulula . . . bēkale . . . ba kyonka kikōkeji.”—TET. 3:1, 2.
1, 2. Lelo Bisonekwa binena bika pa bitala kikōkeji, ne mwanda waka i kyendele’mo kukōkela?
YEHOVA, Tata wetu wa buswe udi mūlu, udi na tunangu twa mfulo ne ngalwilo. Batwe bipangwa byandi netu, tusakanga etwendeje mu būmi bwetu. (Mit. 48:14) Yakoba, mwanā bwanga Mwine Kidishitu, witulombola amba “ñeni mitūke mūlu ayo kibajinji i kutōka tō, ebiya ke talala, nyā, ne kikōkeji, kukolelwa pa kwisasa mpika, kuyūla kanye ne bipa bilumbuluke, kwakubulwa lupata, ne buzazangi bwine mpika.”—Yak. 3:17.
2 Mutumibwa Polo usoñanya amba: “Kikōkeji kyenu kiyūkibwe ku bantu bonso.” * (Fid. 4:5) Kidishitu Yesu ye Mfumwetu kadi ye Mutwe wa kipwilo kya Bwine Kidishitu. (Ef. 5:23) Bine, kukōkela bwendeji bwa Kidishitu ne kwikala na mutyima unekena ku bantu bakwabo i kintu kya mvubu mpata!
3, 4. (a) Leta kimfwa kilombola bipa bibwanya kulupuka ku kikōkeji. (b) Lelo i bika byotusa kubandaula?
3 Kwikala na bujalale na kukōkela bya bakwetu kulupulanga bipa biyampe. Tulete kimfwa: Payukene mpango yadi na batumbula mu Beletanye, bantu bavule pa kwenda mu amviyo badi pano kebakōkela ku bijila bya kuleka kusela bintu byobadi baselanga dibajinji. Kitatyi kyotwendeja motoka, tumonanga’mba i biyampe kukōkela bisaka bendeji bakwabo, kimfwa pa kwipita, kutyina kwilopola amba kwipityija konso kwikale kuyampe.
4 Bavule umbukata mwetu bamonanga’mba i bikomo kukōkela. Tubandaulei pano ngikadila isatu iketukwasha twikale ba kikōkeji, i kukanina kwetu kwa mutyima, muswelo otumona lupusa, ne shi tufwaninwe kukōkela kufikila pa ludingo’ka.
Mwanda Waka Tufwaninwe Kukōkela?
5. Munshi mwa Mukanda wa Bijila, i bika byādi bitonona mupika atonge kushala na mfumwandi?
5 Kudi kimfwa kya kumeso kwa Bwine Kidishitu kimanine pa kine kyotufwaninwe kwikadila ba kikōkeji. Munshi mwa Mukanda wa Bijila, Bahebelu bādi bamuninwe bupika bādi banenwe kulekelelwa mu mwaka wa busamba-bubidi wa bupika bwabo, ko kunena’mba mu mwaka wa Yubile ikafika dibajinji. Inoko mupika wādi kadi ukokeja kutonga kushala bu mupika. (Tanga Divilu 21:5, 6.) Lelo i bika byādi bitonona mupika kulonga namino? Buswe bo bwādi butonona mupika kushala mu ino ngikadilo, na kulonda lupusa lwa mfumwandi.
6. Lelo buswe bwitukwashanga namani twikale ba kikōkeji?
6 Mo monka, netu buswe botuswele Yehova bo bwitutononanga twipāne kwadi ne kwiendeja kukwatañana na kwipāna kwetu. (Loma 14:7, 8) Mutumibwa Yoano wāsonekele amba: “Mwanda kusanswa Leza i kulama binenwa byandi. Binenwa byandi kebyakwitulemenapo.” (1 Yoa. 5:3, MB) Buno buswe kebukimbangapo kamweno ka abo bwine. (1 Kod. 13:4, 5) Potudi na bantu bakwabo, kuswa mukwetu kuketutonona twikale ba kikōkeji ne kwibatangidija kumeso. Tukata mutyima ku tumweno twa bakwetu, pa kyaba kya kwisakila enka batwe bene.—Fid. 2:2, 3.
7. Kukōkela bya bakwetu kudi na mvubu’ka mu mwingilo wetu wa busapudi?
7 Binenwa ne bilongwa byetu kebifwaninwepo kukukaja bakwetu. (Ef. 4:29) Na bubine, buswe buketukwasha twepuke kulonga kintu kyo-kyonso kibwanya kujikakanya bantu ba misaka ingi ne bibidiji bishile baleke kwingidila Yehova. Kino kitulomba kukōkela bya bakwetu. Kimfwa, bakaka bamishonele bebidile kwipenta ne kuvwala tusandi twibalamate kebendelelangapo kuvwala’to mu bibundi mobamona’to bibi kutyina kukukaja bakwabo.—1 Kod. 10:31-33.
8. Lelo buswe botuswele Leza buketukwasha namani twikale ‘batyetyetyetye’?
8 Buswe botuswele Yehova bwitukwashanga tuleke mitatulo. Bana ba bwanga pa kupwa kwipatanya pa mwanda wa kuyuka mukatampe umbukata mwabo, Yesu wāimikile kana katyetye umbukata mwabo. Wāshintulwile amba: “Yewa ukatambula kano kāna mu dijina dyami, nankyo wantambula ne ami. Kadi yewa ukantambula ami, nabya umutambula wantumine, ke-muntu yewa wakwikala mutyetyetyetye wa mo mudi bānwe bonso, nankyo enka aye ukēkalanga mukatampe.” (Luka 9:48; Mako 9:36) Padi umo ne umo wetu ukamona’mba i bikomo kwikala bu “mutyetyetyetye.” Kubulwa kubwaninina kotupyene ne mutyima wa kwizunzula bibwanya kwitutonona kukimba ntumbo, ino kwityepeja kuketukwasha tukōkele bya bakwetu.—Loma 12:10.
9. Kwikala na kikōkeji kwitulomba ne kulēmeka bāni?
9 Kwikala na kikōkeji kwitulomba ne kulēmeka boba bapelwe lupusa na Leza. Bene Kidishitu bonso bayukile mvubu ya uno musoñanya wa bumutwe. Mutumibwa Polo wālombwele Bene Kodinda kino patōkelela, amba: “Nanshi nemusakila’mba, muyūke, mutwe wa mwana-mulume i Kidishitu; ino mutwe wa mwana-mukaji, i mulume, kadi mutwe wa Kidishitu nao, i Leza.”—1 Kod. 11:3.
10. Lelo kukōkela lupusa lwa Yehova kushintulula bika?
10 Kulēmeka lupusa lwa Leza kulombola’mba tukulupile uno Tata wetu wa buswe. Umonanga byonso bitufikila ne kwitupadila monka. Kulama kino mu ñeni kudi na mvubu kitatyi kitupēleka bantu nansha kyobakalala ne kukalabala. Polo wāsonekele amba: “Shi kyendelemo, nankyo mwikale ne ndoe ne bantu bonso ku wenu mutamba.” Polo wāletele ano madingi ukoma na kulombola’mba: “Kekwikwatyilwa kinongo, ehe, kōkelai bukalabale; ke-kintu i kisonekwe’mba: Kinongo i kyāmi mwine, nkamulubwila; mo munenena Yehova namino.”—Loma 12:18, 19.
11. Lelo tukalombola namani amba tukōkele bumutwe bwa Kidishitu?
11 Kadi tufwaninwe kwikala na kikōkeji ku lupusa lwa Leza mu kipwilo kya Bwine Kidishitu. Kusokwelwa shapita 1 ulombola Kidishitu Yesu ukwete “ñenyenye” ya kipwilo mu kuboko kwandi kwa lundyo. (Kus. 1:16, 20) Pavule pene, ino “ñenyenye” yelekejanga bitango bya bakulumpe nansha batadi mu bipwilo. Bano batadi batongwe bakōkelanga bwendeji bwa Kidishitu ne kwiula mwikadilo wandi muyampe na bakwabo. Bonso badi mu kipwilo bakōkelanga ku mpangiko ya Yesu ipānwa na “umpika wabinebine, udi na manwa” ya kuleta bidibwa bya ku mushipiditu mu kitatyi kitungwe. (Mat. 24:45-47) Dyalelo, kufunda ne kulonda ino myanda na kipyupyu kulombola’mba tukōkele bumutwe bwa Kidishitu, bwine bwituletela ndoe ne bumo.—Loma 14:13, 19.
Kukōkela—Kufika ne pa Ludingo’ka?
12. Lelo i kika kinenenwa’mba kukōkela kudi na mikalo?
12 Inoko, kukōkela kekwitulombepo kutuna lwitabijo nansha kujilula misoñanya ya Leza. Lelo Bene Kidishitu babajinji bālongele namani pebākankeje bendeji bwa bipwilo kusapula mu dijina dya Yesu? Petelo ne batumibwa bakwabo bānene kwampikwa moyo amba: “Mo monka mo kyendele muno’mba, tukōkele kudi Leza, bantu munyuma.” (Bil. 4:18-20; 5:28, 29) Ne dyalelo dine mo monka, shi balupusa babikele kebetukankaja kusapula myanda miyampe, ketukaleka’byopo, inoko mu ino ngikadilo, tubwanya kushinta musapwilo wetu na bunwa. Shi abetukankaja kusapula ku njibo ne njibo, tukokeja kukimba muswelo mukwabo wa kwitana na bantu ku mobo ne kwendelela kukōkela ku mwingilo witupele Leza. Mu muswelo umo onka, shi “bakatampe balupusa” abapeleja kupwila kwetu, nabya tukebunga mu bufyafya mu bisumpi bityebitye.—Loma 13:1; Bah. 10:24, 25.
13. Yesu wānene bika pa bitala kulēmeka lupusa?
13 Yesu, mu Busapudi bwandi bwa ku Lūlu, wālombwele mvubu ya kwikadila na kikōkeji ku lupusa, amba: “Wakusaka kukukokela mu kidye, akuyate mutwelo, mulekele ne kikutu kīne, ayate. Wakukunyingila lwendo lwa kyala kimo enda nandi bidi ne bibidi bīne.” (Mat. 5:40, 41) * Ko kunena’mba, kulēmeka bakwetu ne mutyima wa kwibakwasha nabyo bitutononanga twende nabo kyala kikwabo.—1 Kod. 13:5; Tet. 3:1, 2.
14. Mwanda waka ketufwaninwepo kukōkela bupondo?
14 Inoko, Mutyima wetu wa kukōkela keufwaninwepo kwitufikija ku kwilunga na batupondo. Mu uno mwanda, ketufwaninwepo kujina mu mwimanino wetu wa binebine, mwa kulamina butōki bwa bubinebine ne bumo bwa kipwilo. Polo wāsonekele pangala pa “bāna betu ba bubela” amba: “Abo nanshi, ketwebajikwilepo kwibakōkela abo, mhm, nansha patyutyu pene, amba bu-binebine bwa myanda-miyampe bwikale na bānwe.” (Ngat. 2:4, 5) Kitatyi kilupuka bupondo, Bene Kidishitu bepāne bashalanga balamatyidile ku bubinebine.
Batadi Bafwaninwe Kwikala na Kikōkeji
15. Batadi Bene Kidishitu babwanya kulombola kikōkeji muswelo’ka pobebungila pamo?
15 Mu bisakibwa bya boba batongwa bu batadi mubadilwa ne kwikala na mutyima wa kikōkeji. Polo wāsonekele amba: “I kyendelemo yewa mukulumpe wa kilelo ēkale . . . wakikōkeji.” (1 Tem. 3:2, 3) Kino kidi na mvubu nakampata kitatyi kibandaula bano bana-balume batongwe myanda ya kipwilo. Kumeso kwa kukwata butyibi, mukulumpe yense utenwe’po udi na bwanapabo bwa kulombola milangwe yandi patōkelela, nansha shi kekinenwepo amba umo ne umo enka anene’po kintu. Mu mīsambo, milangwe ya umo ibwanya kwishila na ya bakwabo po besambila mwa kulondela misoñanya ya mu Bisonekwa. Mukulumpe mupye ukakōkela bya bakwabo pa kyaba kya kupatana ne kulēmenena enka ku milangwe ya aye mwine. Ku ñanjilo, babwanya kwikala na milangwe mishileshile, inoko kulanguluka ne milombelo ponka kubwanya kwibakwasha bekale umbumo na bujalale ne kukōkela bya bakulumpe bakwabo.—1 Kod. 1:10; Tanga Efisesa 4:1-3.
16. Mutadi Mwine Kidishitu ufwaninwe kulombola mushipiditu’ka?
16 Mukulumpe Mwine Kidishitu ufwaninwe kwikankila’ko kulonda ndudi ya kiteokratike mu mingilo yandi yonso. Uno mushipiditu o wafwaninwe kwikala nao nansha ke pakumba luombe pene, ukamukwasha alēmeke bakwabo ne kwikala nabo senene. Petelo wālembele amba: “Kumbai luombe lwa Leza ludi umbukata mwenu, ne kuyūka bukulumpe bwa kilelo, bwakubulwa kuningilwa, poso ku mityima yenu tō bānwe bene, monka mwikadile Leza; nansha pa mwanda wa bupeta bwa mu byabumvubumvu, poso ne mutyima mutele monka, tō.”—1 Pet. 5:2.
17. Bonso badi mu kipwilo babwanya kulombola mutyima wa kikōkeji mu mwikadilo wabo na bakwabo namani?
17 Banunu badi mu kipwilo basangelanga bukwashi ne bulēme bwibalēmekele bankasampe. Bankasampe nabo balēmekanga banunu bemwenine bivule mu mwingilo wa Yehova umbula bwa myaka. (1 Tem. 5:1, 2) Bakulumpe Bene Kidishitu bakimbanga bana-balume babwanye bisakibwa bobabwanya kupa biselwa bikwabo, bebeija mwa kukwashisha luombe lwa Leza. (2 Tem. 2:1, 2) I biyampe Mwine Kidishitu yense alonde madingi a Polo a ku bukomo bwa mushipiditu sandu anena’mba: “Kadi kōkelai boba bemulelele, ne kwibakōkelelela; ke-bantu abo batengele ponka pa mityima yenu, pamo bwa boba bakapitamo mu bukalama bwabo, amba balonge kino’ki ne tusepo, ne kukālala mpika, ke-kintu kino namino bānwe kemukamwenamopo kantu, mhm.”—Bah. 13:17.
Ikalai na Kikōkeji mu Kisaka
18. Mwanda waka mutyima wa kikōkeji i muyampe mu kisaka?
18 Mutyima wa kikōkeji ufwaninwe kwikala ne mu mpangiko ya kisaka. (Tanga Kolose 3:18-21.) Bible ulombola mingilo ya umo ne umo mu kisaka kya Bwine Kidishitu. Tata i mutwe wa mukaji kadi ye mwine kiselwa kya kuludika bana. Mukaji ufwaninwe kuyuka lupusa lwa mulume, ne bana nabo bafwaninwe kwikankamika kukōkela, mwanda kino kisangajanga Mfumwetu. Umo ne umo mu kisaka ubwanya kukwasha ku kulama bumo ne ndoe ya njibo na kukōkela bya bakwabo ne kwikala na bujalale. Bible udi na bimfwa bimobimo biketukwasha twivwanije uno mwanda.
19, 20. (a) Lombola kwishila kwishidile Yehova na Edi mu kwitabija bya bakwabo. (b) Le bambutwile babwanya kuboila ñeni’ka ku bino bimfwa?
19 Pādi Samwele nkasampe, Edi wādi wingila bu kitobo mukatampe mu Isalela. Inoko, bana ba Edi, ba Hofini ne Finease, “badi bāna ba Bediale, kebayūkilepo Yehova.” Edi wāivwene bilongwa bibi bilonga bandi bāna, amba badi balonga ne busekese na bana-bakaji badi bengila pa kibelo kya kipema kya kitango. Le wālongele’po namani? Edi wēbanena’tu amba shi balubile Yehova, nankyo kekudipo muntu ukebasengela kwadi. Ino kēbalemunwinepo nansha kwibadingila. Bana ba Edi bāendelela na kulonga bibi. Ku mfulo, Yehova wēbatyibila butyibi mokyolokele amba bepaibwe. Edi pa kwimvwana musapu wa lufu lwa bandi bana, nandi wāfwa. Bine, baāngwile bipa bilula! Kibamweka patōka’mba kukōkela kwākōkele Edi bilongwa byabo bibi—na kwibatala bitupu—kekwādipo kwendele’mo.—1 Sam. 2:12-17, 22-25, 34, 35; 4:17, 18.
20 Inoko, tala mwikadile Leza na bandi bana, bamwikeulu. Mupolofeto Mikaya, wāmwene mu kimonwa Yehova ne bamwikeulu Bandi bebungile pamo. Yehova wāipangula i mwikeulu’ka ukatununa Ahaba Mulopwe umbi wa Isalela amba akapone. Yehova wāteja milangwe palapala ya bana bandi ba ku mushipiditu. Penepo mwikeulu umo wanena amba ami nkamutununa. Yehova nandi wamwipangula’mba: Muswelo’ka? Yehova pa kwitabija mulangwe wandi’wa, wātuma uno mwikeulu akalongele monka. (1 Bal. 22:19-23) Mwene boba badi mu kisaka bakokeja kuboila ñeni ku ino mānga pa mwanda utala kukōkela bya bakwabo? Mulume Mwine Kidishitu ukalonga biyampe shi uteja ne milangwe ya mukaji ne ya bandi bana. Pakwabo napo, bakaji ne bana nansha shi abaleta milangwe yabo, bafwaninwe kukōkela na kulonda butyibi bwa mfulo bwa yewa upelwe lupusa na Bisonekwa.
21. I mwanda’ka ukabandaulwa mu kishinte kilonda’ko?
21 Bine tufwija’ko Yehova pa bivulujo byandi bya buswe kadi bilumbuluke byetuvuluja kukōkela! (Mit. 119:99) Kishinte kyetu kilonda’ko kikashintulula kukōkela ne bujalale ponka mokukokeja kuletela nsangaji mu busongi.
[Kunshi kwa Dyani]
^ Kishima kyāingidije mutumibwa Polo i kikomo kwalamuna mu kishima kimo mu Kiluba. Dibuku dimo dya kunyemena’ko dinena’mba: “Kino kishintulula kwitabija bisaka bakwabo, kwikala na bulēme ne kwikala biyampe na bantu bakwabo.” O mwanda kino kishima kidi na buluji bwa kwikala na kikōkeji ne na mutyima unekena, kwampikwa kuningila bantu bijila mu kamo ne kamo, nansha kwibanena kulonda enka byotusaka.
^ Tala Kiteba kya Mulami kya Falanse kya mafuku 15 Kweji 2, 2005, paje 23-26, kishinte kinena’mba: “Shi Abakunyingila mu Mwingilo.”
Usa Kulondolola Namani?
• Lelo kikōkeji kilupulanga bipa’ka bilumbuluke?
• Lelo batadi bakalombola namani mutyima wa kukōkela?
• Mwanda waka i biyampe kwikala na mutyima wa kukōkela mu kisaka?
[Bipangujo bya Kifundwa]
[Kifwatulo pa paje 10]
Bakulumpe beulanga mwādi mwikadile Kidishitu biyampe na bakwabo
[Kifwatulo pa paje 12]
Kulanguluka ne milombelo ponka na mutyima wa kukōkela biletanga bumo kitatyi kībunga bakulumpe pa kipwilo