Muswelo Ubwanya Kukupandija Lufu lwa Yesu

PANO kepadi kintu kya myaka 2000, mu difuku dya Pashika ya Bayuda mu mwaka wa 33 K.K., muntu wambulwa mambo wāfwile amba bantu bakwabo bamone būmi. Lelo i ani? I Yesu wa Nazala. Lelo i bāni bakokeja kumwena mu kino kilongwa kya kwanwa? I muzo onso wa muntu. Vese wa mu Bible uyukilwe na bavule ushintulula biyampe kino kitapwa kipāna būmi amba: “Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.”—Yoano 3:16.

Bavule shabo bayukile kino kisonekwa, ino i batyetye kete bayukile buluji bwakyo. Beipangulanga amba: ‘Mwanda waka tusakilwa kitapwa kya Kidishitu? Le lufu lwa muntu umo lubwanya namani kupandija muzo onso wa muntu ku lufu lwa nyeke?’ Bible ulondolola bino bipangujo senene mu muswelo wivwanikwa.

Mwābikadile Lufu Bulopwe pa Bantu

Bantu bamo balañanga amba bantu bāpangilwe mwanda wa kwikala mafuku abala-anga pano pa ntanda, pa kupwa kususuka ne kusangala bityetye, kupwa bafwa ne kwenda mu kifuko kingi kilumbuluke. Mungya uno mulangilo, lufu lwādi kala mu mpango ya Leza pa kupanga bantu. Ino Bible aye ulombola buluji bwishile na buno bufwila bantu. Unena’mba: “Monka mwatwelele bubi panopantanda ku muntu umo, ne lufu nalo ponka pa bubi, mo monka mwasambakanine lufu ku bantu bonso, mwanda abo bonso bapīle mambo.” (Loma 5:12) Uno vese ulombola amba bantu bafwanga pangala pa bubi. Penepa uno “muntu umo,” mwine wāletele byamalwa biletela muzo wa muntu lufu i ani?

Dibuku dimo (The World Book Encyclopedia) dinena amba befundi bavule ba sianse bakulupile amba bantu bonso batambile kuntu kumo, kadi Bible nandi utela patōkelela amba batambile enka ku “muntu umo.” Tutanga mu Ngalwilo 1:27, amba: “Leza wapanga muntu monka mu bu-kyelekejo kya Leza mwine, i monka mu bu-kyelekejo kya Leza mwine mwāmupangile, webapanga ba-mulume ne mukaji.” O mwanda Bible unena’mba ba mulume ne mukaji yo yādi ntumbo ya bupangi bwa Leza Mwine Bukomo Bonso.

Nsekununi ya Ngalwilo itushintulwila kadi myanda itala pa būmi bwa muntu umbajinji pa kupwa kupangwa na Yehova Leza. I kya kutendelwa, mwanda mu ino nsekununi yonso Leza katelele’mopo lufu, ino badi bakufwa enka shi ababulwe kikōkeji kwadi. (Ngalwilo 2:16, 17) Wādi usaka bantu bekale nyeke mu paladisa milumbuluke pano pa ntanda, mu nsangaji kadi bakomo nkē. Kādipo usaka basusuke na bununu butwala enka ku lufu. Shi ke pano, lufu lwāikele namani ke mulopwe pa muzo wa muntu?

Ngalwilo shapita 3 ulombola amba ba mulume ne mukaji babajinji bātyibile mbila ya kuleka kukōkela ku kusaka Yehova Leza, Mwine wēbapele būmi. Pa kino, Leza wāfikidija butyibi bwaābadikile kala kwibayukija. Wālombola muntu amba: “Ke-wi-muntu wi biloba, kabidi i kubiloba konka kokajokela.” (Ngalwilo 3:19) Byānene Leza byādi bya bine, mwanda bantu babidi bābudilwe kikōkeji’ba bafwile.

Inoko, ke’nkapo ba mulume ne mukaji babajinji bāfwile kete. Kubulwa kikōkeji kwabo kwāonene ne būmi bubwaninine bwādi bwa  kupyanwa na lutundu lwabo. Yehova wātwejeje bano bana bādi kebabutukile mu mpango yandi paānene ba Adama ne Eva amba: “Butulai; mwivudijei, muyujei panopanshi ne kwipanekenya, kabidi bikalai bulopwe bwa pa mwita wa kalunga-kamema, ne bwa pa byoni bya mūlu, ne bwa pa bintu byonso byumi bilandala panopanshi.” (Ngalwilo 1:28) Mwenda mafuku, ntanda yadi ya kuyula bantu bekele na būmi bwa nsangaji kufwa mpika. Ino uno “muntu umo”—nkambo wabo Adama wēbamunija mu bupika bwa bubi, ye mwātwelele lufu. Mutumibwa Polo, umo wa ku lutundu lwa uno muntu umbajinji wāsonekele amba: “Amiwa ngidi wa bya bu-ngitu, mumunwe na bubi.”—Loma 7:14.

Pamo na monenanga bantu ba kyoneja bipungwa bya bulēme mu ano mafuku, ne Adama nandi pa kulonga bubi, wāonene bupangi bwa kutendelwa bwa Leza—muzo wa muntu. Bana ba Adama bābutwile bana, bankana, ne kwendelela. Bantu ba lukongo ne lukongo lwiya’ko badi batama, babutula bana, kupwa bafwa. Penepa bonso bafwanga mwanda waka? I mwanda’tu abo bonso i batambe kudi Adama. Bible unena’mba: “Bangi bangi bafwidile pa mwanda wa muntu umo.” (Loma 5:15) Misongo, bununu, mutyima wa kulonga bibi, ne lufu kumo, i bipa bileta bulanda bipyanikile Adama kisaka kyandi kyonso. Batwe bonso tubadilwa mu kino kisaka.

Mutumibwa Polo pa kutumina Bene Loma mukanda wāsonekele pangala pa ngikadilo ya bulanda ya kubulwa kubwaninina kwa bantu, kubadila’mo ne aye mwine, pamo ne bulwi botulwa na bipa bilupuka ku bubi. Wādila’mba: “Yō! Yo! nanshi ne muntu wa malwa! Le i ani wakunyongololapo mu ngitu ya lufu luno?” Mwene kino i kipangujo kiyampe? I ani wādi wa kunyongolola Polo—ne boba bonso babila kunyongololwa—ku bupika bwa bubi ne lufu? Polo aye mwine wālondolwele amba: “Nafwijako Leza padi Yesu Kidishitu Mfumwetu.” (Loma 7:14-25) Bine, Umpangi wetu i mukwate’ko mpango ya kwitunyongolola kupityila kudi Yesu Kidishitu wandi Mwana.

Mwingilo wa Yesu mu Mpango ya Leza ya Kunyongolola Bantu

Yesu wālombwele mwingilo waingila pa kunyongolola bantu mu bupika bwa bubi buleta lufu. Wānene amba: “Mwanā muntu  [wāile] . . . kupana muya wandi ke kikūlwa kya bavule bene.” (Mateo 20:28) Le būmi bwa Yesu bwāikele bu kikūlwa namani? Kadi, tukokeja kumwena namani mu lufu lwandi?

Bible ulombola amba Yesu i “wampikwa kabubi,” ne kadi amba i “mupatulwe ku babipya-mambo.” Yesu wālamine Bijila bya Leza ne pa mfulo mu būmi bwandi bonso. (Bahebelu 4:15; 7:26) Nanshi Yesu kāfwilepo bwa Adama wāfwile pangala pa bubi ne kubulwa kikōkeji. (Ezekyele 18:4) Inoko, Yesu wāitabije kufwa lufu lwaādi kafwaninwepo mwanda’tu wa kuvuija kiswa-mutyima kya Shandi kya kunyongolola muzo wa muntu ku bubi ne ku lufu. Monka motwanenenanga kala, Yesu wādi usaka “kupana muya wandi ke kikūlwa.” Bine, Yesu ‘wātompele bantu bonso lufu’ na mutyima tō mwanda wādi na buswe kebwāikele na muntu nansha umo mu mānga yonso.—Bahebelu 2:9.

Būmi bwāpēne Yesu bu kitapwa bwādi budingakene biyampe na būmi bwājimije Adama paālongele bubi. Penepa lufu lwa Yesu lwāletele bika? Yehova wāitabije kitapwa kya Yesu bu “kikūlwa kya bonsololo.” (1 Temote 2:6) Pa kino, Leza wāingidije mvubu ya būmi bwa Yesu bu lupoto lwa kukūla nalo muzo wa muntu ku bupika bwa bubi ne lufu.

Bible utela divule dine kino kilongwa kikatampe kya buswe buswele Umpangi bantu. Polo wāvulwije Bene Kidishitu amba “mubapotyibwa ku lupoto.” (1 Kodinda 6:20; 7:23) Petelo nandi wāsonekele amba Leza kanyongolwelepo Bene Kidishitu ku mwikadilo wabo uleta lufu na nsahabu nansha na ndalama, ino i na mashi a wandi Mwana. (1 Petelo 1:18, 19) Yehova wākwete mpangiko ya kupandija muzo wa muntu ku lufu lwa nyeke kupityila ku kitapwa kya kikūlwa kya Kidishitu.

Le Nobe Ukamwena mu Kikūlwa kya Kidishitu?

Mutumibwa Yoano wālembele pangala pa byabuyabuya bivulevule bya kikūlwa kya Kidishitu amba: “[Yesu Kidishitu] i kipwanino kya myanda yetu; kadi ke kya yetupo yonka, mhm, i ne kya ya bapanopantanda bonso.” (1 Yoano 2:2) Bine, kikūlwa kya Kidishitu kyāelelwe bantu bonso. Le nanshi ko kunena’mba muntu yense ukamwena mu ino mpangiko ya mvubu? Mhm, ke amopo. Vuluka kunyongololwa kwa bantu kotwesambilanga’po mu kishinte kishele kunyuma. Boba bapandije bengidi ba mu mungotyi batūkije kintu kidi bwa kisaku mobadi, ino umo ne umo wadi ufwaninwe kukanda mu kisaku’kya. Mo monka ne boba basaka kumwena mu kikūlwa kya Kidishitu nabo kebanenwepo enka kwilaija amba Leza ukebesela. Ino bafwaninwe kulonga’po kintu kampanda.

Lelo Leza usaka balonge bika? Yoano 3:36 witulombola amba: “Ino wakwitabija mudi  Mwana nabya udi ne būmi bwa kulādila monka nyeke ne nyeke, nanshi yewa wakubulwa kwitabija nankyo kakamonepo būmi, mhm, ino kukalabala kwa Leza kudi nandi pādi kumutengele.” Leza usaka twitabije kitapwa kya Kidishitu. Kadi kudi bikwabo bitusakilwa. “Ino i ponka pano ponka po tuyūkila’mba, nanshi tumuyūkile [Yesu], shi tulame bijila byandi.” (1 Yoano 2:3) Nanshi i kimweke patōka amba pa kusaka kunyongololwa ku bubi ne lufu tufwaninwe kwitabija kikūlwa kya Kidishitu ne kukōkela ku mbila yandi.

Muswelo muyampe wa kulombola lwitabijo mu kikūlwa kya Yesu i kumufwija’ko pangala pa lufu lwandi na kuvuluka’lo, monka mwaāsoñaninye. Yesu wāshilwile bidibwa bya kyelekejo pamo na batumibwa bandi ba kikōkeji kumeso kwa kufwa, kadi wēbanena’mba: “Mukaloñanga enka namino pa kumvuluka.” (Luka 22:19) Batumoni ba Yehova bamwene kipwano kyobapwene na Mwanā Leza na mvubu mikatampe, kadi bakōkelanga ku luno lubila. Uno mwaka, Kivulukilo kya lufu lwa Yesu Kidishitu kikavulukwa mu Dya Mposo, mafuku 22 Kweji 3, dyuba pa kupwa kupona. Tubakwite na nsangaji yonso wiye utanwe ku kuno kupwila kwishile na kukwabo mwanda wa kukōkela ku musoñanya wa Yesu. Batumoni ba Yehova ba mu kyenu kibundi bakakusapwila kitatyi ne kifuko kine kya kupwidila’ko. Ku Kivulukilo ukayukila’ko bikwabo byofwaninwe kulonga pa kusaka’mba kikūlwa kya Kidishitu kikunyongolole ku bipa bileta lufu bilupukile ku bubi bwa Adama.

Bantu batyetye dyalelo bo bafwijanga’ko Umpangi ne wandi Mwana pangala pa kitapwa kikatampe kya kwibakūla ku bonakani. Boba betabija kino kitapwa badi na nsangaji ya pa bula. Mutumibwa Petelo wālombwele banababo Bene Kidishitu amba: “Aye [ Yesu] wakubulwa kumweka pano umbamwitabija, ne kusepelela pakatampe pene, ne tusepo twampikwa kwalakanwa, tutyite ne ntumbo yato; pa kutambula mfulo ya kwitabija kwenu ke lupandilo lwa mityima yenu kadi.” (1 Petelo 1:8, 9) Shi uswe Yesu Kidishitu buswe bukatampe ne kwitabija kitapwa kyandi kya kikūlwa, kukabulwepo kwikala na būmi bwa nsangaji tamba dyalelo ne kutengela kunyongololwa ku bubi ne lufu mu mafuku āya kumeso.

[Kifwatulo pa paje 6]

Yesu wāpēne būmi bwandi mwanda wa kufundula bibi bilupukile ku bubi bwa Adama

[Kifwatulo pa paje 7]

Kivulukilo kya lufu lwa Yesu Kidishitu kikavulukwa mu Dya Mposo, mafuku 22 Kweji 3, 2008, dyuba pa kupwa kupona