Tonga Kwingidila Yehova Pokidi Nsongwa
Tonga Kwingidila Yehova Pokidi Nsongwa
“Uminina’tu mu bino bintu byo wafundijibwa, ne mo wasumininwa namo.”—2 TEM. 3:14.
1. I muswelo’ka umwene Yehova mwingilo wa Batumoni bansongwa?
MWINGILO ujila wingila bankasampe i wa mvubu ku meso a Yehova wāsonekeje bupolofeto bwibatala. Kaimba wa mitōto wāimbile amba: “Bantu bobe bēpana abo bene ku mityima tō, mu difuku dya bukomo bobe, mu buya bwa bupandulwemo, kushilwilanga lubanga bwē! Udi ne lume lwa bunkasampe bobe.” (Mit. 110:3) Bine Yehova ukwete na mutyika bansongwa badi na mutyima wa kumwingidila.
2. Bansongwa dyalelo balwanga na lupusa’ka lwa ino ntanda pa mwanda utala būmi bwa kumeso?
2 Banwe bansongwa ba mu kipwilo kya Bwine Kidishitu, lelo kemudi bepāne kudi Yehova? Bavule bamonanga amba i bikomo kwingidila Leza wa bine. Basunga, badimu, ne kyaba kimo ba mu kisaka ne balunda bakankamikanga basongwa betungile bitungo ya ku ngitu. Kitatyi kilonda bankasampe bitungo bya ku mushipiditu, divule ntanda ibapunikanga. Ino kunena na bubine, kwingidila Leza wa bine dyo dishinda dilumbuluke kulonda mu būmi. (Mit. 27:4) Pa kino, tubandaulei bidi bino bipangujo bisatu: Mwanda waka ufwaninwe kwingidila Leza? I muswelo’ka okokeja kukekala na būmi bukwatañene na kwipāna kobe kudi Leza pampikwa kubanga binena nansha bilonga bakwenu? I mikenga’ka ya kutendelwa ya mwingilo ukola ikushitwidilwe?
Kwingidila Yehova Kyo Kintu Kiyampe Mpata
3. Bupangi bwa Yehova bufwaninwe kwitutonona tulonge bika?
3 Mwanda waka ufwaninwe kwingidila Leza mūmi, wa bine? Kusokwelwa 4:11 uleta bubinga amba: “Yō! abe ufwaninwe, Yehova wetu, Leza wetu, kupebwa ntumbo, ne buleme ne bukomo; mwanda wapangile bintu byonsololo, kadi i pa mwanda wa kiswa-mutyima kyobe obikadile’ko, ne kupangibwa’byo.” Yehova i Umpangi wa bintu byonso wa kutendelwa. Bine tala munengelele ntanda! Mityi, maluba, banyema, majiba, ngulu, ne mpumo—Yehova wēbipangile byonso. Mitōto 104:24 inena’mba: “Ntanda i miyūle bupeta bobe,” abe Leza. Bine tufwijanga’ko Yehova pa kwitupa na buswe ngitu ne ñeni itukwasha tusangele ntanda ne bintu byonso bitobala bidi’po! Mwene tufwaninwe kumufwija’ko pangala pa bupangi bwa kutendelwa ne kwikala na mutyima wa kumwingidila?
4, 5. Lelo i bilongwa’ka bya Yehova Leza byālengeje Yoshua afwene kwadi?
4 Bubinga bukwabo botwingidila Yehova butanwa mu binenwa bya Yoshua mwendeji wa Isalela. Kubwipi na lufu lwandi, Yoshua wālombwele bantu ba Leza amba: “Muyukile umityima yenu yonso ne mu myuya yenu yonso, amba nansha kintu kimo kine kyabulwa ku byonso bintu bilumbuluke byesambile Yehova Leza wenu pa mwanda wenu, mhm; byonsololo’tu byemufikidile.” Mwanda waka Yoshua wānene namino?—Yos. 23:14.
5 Yoshua paākidi mwanuke mu Edipito, wāyukile mulao wa Yehova wa kupa Bene Isalela ntanda yabo. (Ngal. 12:7; 50:24, 25; Div. 3:8) Kupwa Yoshua wāmwene mwāshilwidile Yehova kufikidija milao yandi paāletele Mpupo Dikumi pa Bene Edipito yāfikije Felo wa mutyima mūmu ku kulekelela Bene Isalela. Mu bantu bānyongolwelwe pa Kalunga Katyila, mwādi ne Yoshua wēmwenine Felo ne basola bandi batoma kabaya pa Kalunga. Kadi mu lwendo lwabo lwa mu Ntanda Mutuputupu ya Shinai, “mu kyala mwine mudi zole,” Yoshua wēmwenine muswelo wādi upa Yehova Bene Isalela byonso byobādi bakimba. Kekudipo nansha umo wāfwile kyumwa nansha nzala. (Kup. 8:3-5, 14-16; Yos. 24:5-7) Pāfikile kitatyi kya Bene Isalela kunekenya Bene Kenani ne kupyana ntanda ya mulao, Yoshua ne Bene Isalela bāmwene mwēbakwashishe Leza wabo.—Yos. 10:14, 42.
6. I kika kikakukwasha utamije mutyima wa kwingidila Leza?
6 Yoshua wāyukile amba Yehova ufikidijanga milao Yandi. O mwanda Yoshua wānene amba: “Ino padi amiwa nanshi ne njibo yami mine, tukamwingidilanga Yehova.” (Yos. 24:15) Lelo abe nobe? Polangulukila pa milao ya Leza wa bine ke mipwe kala kufikidila ne pa yoya keyafikidile, lelo wikalanga na mutyima wa kumwingidila pamo bwa Yoshua?
7. Mwanda waka lubatyijo i ditabula dikatampe difwaninwe kutabulwa?
7 Kubandila mingilo ya bupangi ya Yehova ne kulangulukila pa milao yandi ya kutendelwa kadi ikulupilwa, kukakutonona wipāne kudi Yehova ne kulombola kuno kwipāna na lubatyijo. Lubatyijo i ditabula dikatampe difwaninwe kutabula boba bonso basaka kwingidila Leza. Kino kyālombwelwe patōka na Yesu, Kimfwa kyetu. Kumeso’tu kwa kushilula mwingilo wandi wa bu Meshiasa, wāendele kukabatyijibwa na Yoano Umbatyiji. Mwanda waka Yesu wātabwile dino ditabula? Wānene mwenda mafuku amba: “Ami byo natūkile mūlu naiya pano nkyaīdile kulonga muswidile mutyima wami, poso monka muswidile mutyima wa yewa wantumine.” (Yoa. 6:38) Yesu wābatyijibwe mwanda wa kulombola’mba wāile kulonga muswidile mutyima wa Shandi.—Mat. 3:13-17.
8. Mwanda waka Temote wātongele kutōta Leza wa bine, le nobe ukalonga’po namani?
8 Tala kadi ne kimfwa kya Temote, nkasampe Mwine Kidishitu wāpelwe mingilo ne madyese mavule na Yehova. Mwanda waka Temote wātongele kutōta Leza wa bine? Bible witulombola amba mwanda ‘wafundijibwe, ne kusumininwa’mo.’ (2 Tem. 3:14) Shi wifunda Kinenwa kya Leza ne kukulupila byokifundija amba i bya bine, udi na mwādi mwikadile Temote. Nanshi, kwata butyibi. Wabulwa’po kulombola bambutwile bobe byobya byosaka kulonga? Mwanda abo ne bakulumpe pa kipwilo bakakukwasha wivwanije bilomba Bisonekwa pa kubatyijibwa.—Tanga Bilongwa 8:12.
9. Lelo i bika bikalonga bantu shi abakumone ubabatyijibwa?
9 Shi kodi mubatyijibwe, nankyo kodi kala na kyalwilo kilumbuluke kya kwingidila Leza wa bine. Kadi kutabula dino ditabula, ko kushilula lwendo lulampe lukakutwala ku mpalo ya būmi bwa nyeke ne nsangaji ilupukanga ku kulonga kiswa-mutyima kya Leza. (Bah. 12:2, 3) Ukasangaja ba mu kisaka ne balunda nobe ba mu kipwilo kya Bwine Kidishitu badi kala mu luno lwendo. Kutabukidila, ukasangaja mutyima wa Yehova. (Tanga Nkindi 23:15.) Bine, bamo kebakevwanijapo mwanda waka ubatonge kwingidila Yehova, ne bakeipangula kyowatongela namino. Bakwabo bakakukankaja. Ino ubwanya kukomena bino bikoleja.
Kitatyi Kyobakwipangula Nansha Kukukankaja
10, 11. (a) I bipangujo’ka bikakwipangula bantu powatonga kwingidila Leza? (b) I ñeni’ka yotuboila ku malondololo a Yesu ku bipangujo bitala mutōtelo wa bine?
10 Padi bakwenu ba ku masomo, balondakani, ne babutule kebakevwanijapo butyibi bobe bwa kwingidila Yehova. Bakokeja kukwipangula mwanda waka ubatonge dino dishinda ne byokulupile i bika. Le ukalondolola namani? Ufwaninwe bidi kubandaula mulangilo ne mwimvwanino obe pa kusaka kushintulula kine kyowatongela dino dishinda. Mwene i biyampe ulonde kimfwa kilumbuluke kya Yesu polondolola bipangujo bitala nkulupilo yobe?
11 Kitatyi kyāipangwile bendeji ba bipwilo bya Bayuda mwanda utala lusangukilo, Yesu wākokēle milangwe yabo pa kisonekwa kyobādi bavulaminwe. (Div. 3:6; Mat. 22:23, 31-33) Pāmwipangwile musonekeji kijila kikatampe, Yesu wāmulombwele bisonekwa byendele’mo bidi mu Bible. Uno muntu wāsangedile kilondololwa kya Yesu. (Levi 19:18; Kup. 6:5; Mako 12:28-34) Muswelo wāingidije Yesu bisonekwa ne muneneno wandi wālengeje “ne lupata lwabūkila ponka padi aye mu kibumbo,” ne balwana nandi bakomenwa kumusanshija. (Yoa. 7:32-46) Nobe powisambila pa myanda itala lwitabijo lobe, ingidija Bible ne kulondolola “ne butuukanye ne kilemeko ponka.” (1 Pet. 3:15, MB) Shi kuyukilepo kilondololwa, nena’tu amba nkiyukile, kadi kalonge bukimbi. Kupwa katale mwanda mu Index des publications de la Société Watch Tower nansha pa Watchtower Library pa dishike CD-ROM shi didi mu ludimi loimvwana. Shi witeakanye biyampe ukayuka mokikufwaninwe “kulondolola bonso, ku muntu, ku muntu.”—Kol. 4:6.
12. Mwanda waka kupangwapangwa kekufwaninwepo kukutyumuna mutyima?
12 Ukokeja kutanwa ne bintu bikwabo bipite ne pa bipangujo bitala pa mwimanino ne nkulupilo yobe. Ke-pantu, Satana Dyabola walwana na Leza uludikanga ntanda. (Tanga 1 Yoano 5:19.) Nanshi kulanga’mba bonso bakakwitabija ne kukufwija’ko i kwiongola, mwanda babwanya ne kukukankaja. Padi bamo ‘bakakunenena bibibibi,’ ne kuleka’byo mpika. (1 Pet. 4:4) Vuluka’mba kudipo bunka. Yesu Kidishitu nandi wāpangilwepangilwe. Mutumibwa Petelo nandi monka na monka, o mwanda wāsonekele amba: “Banwe baswedibwe, kemukikolelwai pa kyakyo kyemwakila momudi, kyemufikila mwanda wa kwimutompa, nansha kwikimona bu kyeni kyemufikila, mhm. Ino sepelelai byomususuka nenu masusu āsusukile Kidishitu.”—1 Pet. 4:12, 13.
13. Mwanda waka Bene Kidishitu basepelelanga nansha byobapangwapangwa?
13 Kukomena kupangwapangwa ne kulondwalondwa pa mwanda wa Bwine Kidishitu kuletanga nsangaji. Mwanda waka? Mwanda kwitabijibwa na ntanda kulombola’mba ulondanga ntanda iludikwa na Satana—ke na Lezapo. Yesu wādyumwine amba: “Yō! Yō! bānwe nenu malwa enu! po bakemunenena biyampe byonka bantu bonsololo mwanda bakulutuba babo e mo balongele nabo ku bapolofeto ba mabela enka nabya.” (Luka 6:26) Kupangwapangwa kulombola’mba Satana ne ntanda yandi ibakukalabele mwanda wingidilanga Yehova. (Tanga Mateo 5:11, 12.) Kadi “wivwane munenenwe bibi pa mwanda wa dijina dya Kidishitu” i kintu kileta nsangaji.—1 Pet. 4:14.
14. I byabuyabuya’ka byokamona shi ukōkele Yehova nansha byolondwalondwa?
14 Kudi bidi byabuyabuya biná byokamona shi ukōkele Yehova nansha byolondwalondwa. Ukabingija Leza ne wandi Mwana. Ukakankamika batutu ne bakaka obe shi ūminine na kikōkeji. Bantu bakwabo kebayukile Yehova bakokeja kwikala na mutyima wa kumukimba. (Tanga Fidipai 1:12-14.) Kadi pakupa Yehova bukomo bwa kūminina matompo, nobe kukabulwepo kumuswa bininge.
“Kibelo Kikatampe” I Kikushitwilwe
15. Lelo “kibelo kikatampe” kyāshitwidilwe mutumibwa Polo i kibelo’ka?
15 Mutumibwa Polo wāsonekele pangala pa mwingilo wāingile mu Efisesa’mba: “Kibelo kikatampe kya mīngilo milumbuluke i kinshitwile.” (1 Kod. 16:8, 9) Kino kyādi kibelo kikatampe kya kusapula myanda miyampe ne kulonga bana ba bwanga mu kine kibundi’ki. Polo pa kwitabija uno mukenga, wākweshe bavule befunde kuyuka Yehova ne kumutōta.
16. Lelo bashingwe māni basheleshele batwelele namani pa “kibelo kishituke” mu 1919?
16 Mu mwaka wa 1919 Yesu Kidishitu mutumbijibwe ntumbo wālombwele bashingwe basheleshele “kibelo kishituke.” (Kus. 3:8) Batwelele pa kibelo’kya, bashilula kusapula myanda miyampe ne kufundija bubinebine bwa mu Bible na bupyasakane kutabuka. Lelo kwalupukile bika? Myanda miyampe pano i mifike ne ku mafulo a pano panshi, kadi kintu kya bantu midiyo isamba ibidi bakulupile kukamona būmi bwa nyeke mu ntanda impya ya Leza.
17. I muswelo’ka okatwelela pa “kibelo kikatampe kya mīngilo”?
17 “Kibelo kikatampe kya mīngilo” kikidi pululu ku bengidi ba Yehova bonso. Boba batwela pa kino kibelo batananga nsangaji ne kuloelelwa mu mwingilo wa kusapula myanda miyampe. A bengidi ba Yehova bansongwa, lelo mukwete na mutyika ano madyese makatampe a kukwasha bakwenu ‘betabije myanda miyampe’? (Mako 1:14, 15) Lelo kemudi bengile bu pania mukwashi nansha bu pania wa lonso? Banwe bavule mukokeja padi kukengila ku Lūbako lwa Mobo a Bulopwe, ku Betele, kwingila bu mishonele. Ntanda imbi ya Satana byoyenda ipita, kwingila ino mingilo ya Bulopwe kubaikala ke kwa kampeja-bukidi difuku ne difuku. Lelo nobe usa kutwela pa “kibelo kikatampe” pano pakidi’ko kitatyi?
“Tompai Mumone’mba Yehova I Muyampe”
18, 19. (a) Lelo i bika byākweshe Davida ekale na mutyima wa kwingidila Yehova? (b) I bika bilombola’mba Davida kēalakenyepo pa kwingidila Leza?
18 Davida mulembi wa mitōto wānene bakwabo amba: “Tompai mumone’mba Yehova i muyampe.” (Mit. 34:8) Kadi uno Mulopwe wa Isalela wa kala, paādi ukidi nkasampe mukumbi, Yehova wāmunyongolwele ku banyema ba budyani. Leza wāmukweshe paālwile na Ngodiata ne kumupandija mu tusuwa tuvule twine. (1 Sam. 17:32-51; Mit. 18, binenwa bya kungala) Davida pa kumona kanye kakatampe ka buswe bwa Leza, kyāmutonwene asoneke amba: “Abe Yehova Leza wami bilongibwa byobe byo walongele bitendelwa i bya ntanda ne ntanda; kadi ne mifwatakanyo yobe nayo īdi padi bātwe: Kekudipo muntu nansha umo ubwanya kudingakanibwa na abe.”—Mit. 40:5.
19 Davida wāsenswe Yehova mpata ne wādi usaka kumutendela na mutyima wandi onso ne ñeni yandi yonso. (Tanga Mitōto 40:8-10.) Myaka pa kupita’po, Davida keālakenyepo pa myaka yāpityije mu kutōta Leza wa bine. Kwikala mwine Leza kyo kyādi kya bulēme kyandi kikatampe—nsulo ya nsangaji keidingakanibwa. Davida pa kununupa wānene amba: “Abe wi lukulupilo lwami, abe Mfumwami Leza; wi lukulupilo lwami ne ku bwanuke bwami. Eyo, i binebine, pa kununupa ne mvwi ku mutwe, abe Leza, kokandekelela.” (Mit. 71:5, 18) Kikulupiji mudi Yehova ne bulunda bwabo byādi byenda biningila’ko, nansha bukomo bwandi byo bwādi bwenda bupwa.
20. Mwanda waka kwingidila Leza o muswelo mulumbuluke wa kwingidija būmi bobe?
20 Būmi bwa ba Yoshua, Davida, ne Temote bulombola’mba, kwingidila Yehova o muswelo mulumbuluke mu būmi bobe. Byabuyabuya bya kitatyi kityetye bimwenwa mu twaji twa ino ntanda, kebisenselelapo nansha kubwipi kwine na byabuyabuya bya nyeke bitamba ku “kumwingidila ne mutyima wenu onso, kadi ne muya wenu onso.” (Yos. 22:5) Shi kowipēne kudi Yehova mu milombelo nankyo wiipangule amba, ‘I bika binkankaja kwikala Kamoni wa Yehova?’ Shi wi mutōtyi wa Yehova mubatyijibwe kala, le, kusakilepo kubweja nsangaji ku būmi bobe? Shi usakile, nankyo tandabula mwingilo obe, kadi endelela kutama nyeke ku mushipiditu. Kishinte kilonda’ko kikesambila pa muswelo okokeja kutama ku mushipiditu na kulonda kimfwa kya mutumibwa Polo.
Usa Kulondolola Namani?
• Leta bubinga bubidi botufwaninwe kwingidila Leza.
• I bika byākweshe Temote atonge kwingidila Leza?
• Mwanda waka ufwaninwe kwimanija nansha byotanwa na kupangwapangwa?
• Lelo i mikenga’ka ya mingilo ikushitwidilwe?
[Bipangujo bya Kifundwa]
[Kifwatulo pa paje 22]
Kwingidila Yehova o muswelo mulumbuluke mu būmi
[Kifwatulo pa paje 23]
Le ubwanya kulondolola bipangujo bitala lwitabijo lobe?