Itabija Lupusa lwa Yehova
Itabija Lupusa lwa Yehova
“Mwanda kusanswa Leza i kulama mbila yandi.”—1 YOA. 5:3, BB.
1, 2. (a) Mwanda waka bavule kebasakangapo kukōkela ku lupusa dyalelo? (b) Lelo boba bemona amba kebalondangapo milangwe ya bakwabo badi na bwanapabo binebine? Shintulula.
DYALELO, bantu bavule kebetabijangapo “lupusa.” Bavule bamonanga kukōkela bisaka muntu mukwabo bu bibi. Boba kebasakepo kulonda milangwe ya bakwabo badi’nka bwa abo banenanga’mba: “Mpelele muntu kunombola kya kulonga.” Ino, lelo bano bantu badi na bwanapabo binebine? Mhm, nansha dimo! Bavule balondanga bulondelonde misoñanya ya bantu bavule basenswe “kudingakanibwa na bapanopantanda.” (Loma 12:2) Pa kyaba kya kwikala banapabo, i “bapika ba bubole,” mungya binenwa bya Petelo, mutumibwa Mwine Kidishitu. (2 Pet. 2:19) Banañanga “mwikadile muswelo wa panopantanda, konka kudi mulopwe wa lupusa lwa luvula,” Satana Dyabola.—Ef. 2:2.
2 Mulembi umo wādi wianya, amba: “Nkitabijapo amba kudi udi na lupusa lwa kuntongela kiyampe kyomfwaninwe kulonda, shi bambutwile bami, shi kitobo, shi mwingidi nansha mufundiji wa kipwilo, nansha ke Bible mwine.” Shako, kudi padi bantu bamo boketufwaninwepo kukōkela, mwanda bengidijanga lupusa lwabo bibi. Ino, lelo kudi muntu nansha umo ubwanya kutuna’mba kasakilwapo kuludikwa nansha dimo? Shi wele diso ku myanda idi mu ma julunale, kukabulwepo kukwatwa bulanda. Bine, i kyamalwa pa kumona amba, mu kino kitatyi kisakilwa bantu kuludikwa, ino bavule kebatanga’kopo mutyima nansha kwitabija’ko kwine.
Muswelo Otumona Lupusa
3. Bene Kidishitu ba mu myaka katwa kabajinji bālombwele namani amba kebādipo bakōkela bupūte-meso bantu bādi na lupusa?
3 Batwe Bene Kidishitu, tumonanga lupusa mu muswelo mwishile na wa ino ntanda. Kino kekilombolapo amba twitabijanga bupūte-meso byonso byobetulombola. Inoko, byaba bikwabo, tufwaninwe kupela kulonda bya bantu bakwabo, nansha shi badi na lupusa kampanda. Kino kyāfikile ne Bene Kidishitu ba mu myaka katwa kabajinji. Kimfwa, pobāpeleje batumibwa kusapula, abo kebākōkelepo bya mupidishitu mukatampe ne bakwabo bādi na lupusa ba mu Sanhedrini. Kebālekelepo mwikadilo wabo moloke mwanda wa kulonda bya bantu bādi na lupusa.—Tanga Bilongwa 5:27-29.
4. I bimfwa’ka bidi mu Bisonekwa bya Kihebelu bilombola amba bengidi ba Leza bavule kebādipo balonda bilonga bantu bonso?
4 Bengidi ba Leza bavule bāikele’ko kumeso kwa kitatyi kyādi’ko Kidishitu pano pa ntanda nabo bādi basumininwe kulonga muswelo umo onka. Kimfwa, Mosesa ‘wāpelele kutelwa dya bu-mwana mwana Felo mwana-mukaji; watongelako kumona malwa na bantu ba Leza,’ nansha kulonga namino byokwādi kubwanya kumukolomwena “bukalabale bwa mulopwe.” (Bah. 11:24, 25, 27) Yosefa wāpelele kulonda binenwa bya kumongola amba alale na mukaja Potifela, nansha byaādi na bukomo bwa kumulubwila kinongo ne kumulonga bibi. (Ngal. 39:7-9) Danyele “walanga umutyima wandi kutyina’mba nakesubija ami mwine ne bidībwa bya mulopwe’bya,” nansha byokebyādipo bipela kwitabijibwa na ba mu kipango kya mulopwe mu Babiloni. (Dan. 1:8-14) Bino bimfwa bilombola’mba, mu bula bwa manga yonso, bantu ba Leza bāendelele kulonga byoloke nansha byobyādi bikokeja kwibaletela makambakano. Kebādipo balonda bantu mwanda’tu wa kwibasangaja, ne batwe netu mo monka.
5. Muswelo otumona lupusa i mwishile namani na wa ino ntanda?
5 Kupela kotupela bintu bimo na kininga kekufwaninwepo kumonwa bu mutwe mūmu; mwanda ketudipo pamo bwa bamo batombokanga mwanda’tu kebetabijepo kintu kampanda mu politike. Ino tusumininwe kwitabija lupusa lwa Yehova kupita’ko lwa bantu. Shi bijila bya bantu bibepatanya na bya Leza, kekitukomenangapo kutonga kya kulonga. Tukōkelanga Leza bu mulopwe bantu kunyuma, na kulonda kimfwa kya batumibwa ba mu myaka katwa kabajinji.
6. Mwanda waka kukōkela bijila bya Leza kudi na kamweno nyeke?
6 I bika bitukwasha twitabije lupusa lwa Leza? Tulondanga byobya binenwe mu Nkindi 3:5, 6 amba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe.” Tuyukile amba byonso bitulomba Leza byo bidi na kamweno kotudi. (Tanga Kupituluka mu Bijila 10:12, 13.) I amo, mwanda Yehova witela ku meso a Isalela amba ami ye mwine “ukulombola kakumwenamo wakukukunkuja pa dishinda dyokōkeja kwenda.” Kupwa ubweja’ko amba: “E-e, shi watejeje ku bijila byami! longa nankyo ndoe yobe yaikele’nka bwa munonga, ne boloke bobe bwa mantanki a kalunga-kamema.” (Is. 48:17, 18) Netu tukulupile bino binenwa. Tuyukile amba kukōkela bijila bya Leza kudi na kamweno nyeke.
7. I bika byotufwaninwe kulonga nansha shi ketwivwanijepo senene kijila kampanda kidi mu Kinenwa kya Leza?
7 Twitabijanga lupusa lwa Yehova ne kumukōkela nansha shi ketwivwanijepo senene bubinga bwaetulombela bintu kampanda bidi mu Kinenwa kyandi. Kuno ke kwikalapo bu babitabija-vidingi; ino kilombola’mba tumukulupile. Kino kilombola kikulupiji kyotukulupile na mutyima umo mudi Yehova amba aye ye uyukile biyampe bitusakilwa. Kadi kikōkeji kyetu kilombola’mba tumusenswe, mwanda mutumibwa Yoano wāsonekele amba: “Mwanda kusanswa Leza i kulama binenwa byandi.” (1 Yoa. 5:3, BB) Inoko kudi kintu kikwabo kya kwikadila na kikōkeji kyoketufwaninwepo kwilwa.
Kwibidija bya Kwivwana Nabyo Byetu
8. Lelo kwibidija “byakwivwana nabyo byetu” kukwatañene namani na kwitabija lupusa lwa Yehova?
8 Bible witulombola’mba tufwaninwe kwikala ne ‘byakwivwana nabyo byetu bībidile kala bya kuyūkidila ne bulumbuluke ne bibi, mwanda wa kwivwanaivwana.’ (Bah. 5:14) Nanshi kitungo kyetu ke kya kukōkelapo bijila bya Leza bukōkelekōkele, mhm; ino, tusakanga bidi ‘kuyukidija ne bilumbuluke ne bibi’ kukwatañana na misoñanya ya Yehova. Tusakanga kumona mashinda a Yehova moekadile a tunangu, mwa kunenena mwānenene kaimba wa mitōto amba: “Mukanda-obe-wabijila udi umutyima wami.”—Mit. 40:8.
9. I muswelo’ka otukokeja kukwatañanya mutyima wetu wa mundamunda na misoñanya ya Yehova, ne mwanda waka i kipite buya kulonga namino?
9 Tufwaninwe kulanguluka pa byotutanga mu Bible pa kusaka’mba tumone mvubu ya bijila bya Leza mwāmwenine’yo kaimba wa mitōto. Kimfwa, potwifunda musoñanya kampanda wa Yehova, tukokeja kwiipangula’mba: ‘Mwanda waka ino mbila nansha uno musoñanya i muyampe? Mwanda waka kukōkela’yo kudi na kamweno kondi? I bipa’ka bibi byangwile boba bapelele kulonda madingi a Leza mu uno mwanda?’ Shi mutyima wetu wa mundamunda ubakwatañana na mashinda a Yehova, nabya ketukabulwepo kukwata milangwe ya mfulo ikwatañene na kiswa-mutyima kyandi. Tubwanya kwendelela ‘kuyuka kiswa-mutyima kya Mfumwetu’ ne kwikilonda na kukōkela. (Ef. 5:17) Ino ke ponsopo pobipēla kukōkela.
Satana Usakanga Kunyantyila Lupusa lwa Leza Panshi
10. Lelo Satana i musake kutyimpila lupusa lwa Leza panshi mu mwanda’ka?
10 Satana usakanga tamba kalā kutyimpila lupusa lwa Leza panshi. Mushipiditu wandi wa kusaka kwiludika i mumweke mu bintu bivule. Kimfwa, kubulwa kulēmeka mpango ya Leza ya busongi. Bamo basakanga kushikata bya ntekele nkuvwike, bakwabo nabo bakuta nkuku ya kusaka kwilubula na benē pabo. Bonso bano bakokeja kwitabija byānene mukayi umo amba: “Kebikokejikapo kwikala’nka na mulume umo nansha mukaji umo kete.” Kupwa ubweja’ko amba: “Kashā nkyamwene muntu udi enka na mwinē pandi umo nansha usaka kwikala’nka na umo kete.” Mukayi umo mutumbe nandi ulangulukila pa buluo bwandi bwapwile amba: “Nkiyukilepo shi twapangilwe mwanda’tu wa kwikala enka na muntu umo mu būmi bwetu bonso.” I biyampe twiipangule batwe bene amba, ‘Lelo ngitabije lupusa lwa Yehova mu myanda ya busongi’ni nansha kutala kutalanga ntanda bintu kilomonyeka ke kushinte milangwe yami?’
11, 12. (a) Mwanda waka bikolelanga bankasampe kwitabija lupusa lwa Yehova? (b) Sekununa mwanda ulombola’mba kubulwa kulēmeka bijila bya Yehova ne misoñanya yandi i bulembakane.
11 Lelo wi nkasampe udi mu bulongolodi bwa Yehova? Shi i amo, nabya Satana ukupwilanga mpumpu mwanda wa utyimpile lupusa lwa Yehova panshi. “Kilokoloko kya bunkasampe” pamo ne kuningilwa na balunda nobe kubwanya padi kukutonona ulange amba bijila bya Leza i bikomo. (2 Tem. 2:22) Kokakolwa kulanga namino. Longa buninge bwa kumona tunangu tudi mu misoñanya ya Leza. Kimfwa, Bible ukulombola’mba ‘tyina busekese.’ (1 Kod. 6:18) Pano napo wiipangule amba: ‘Mwanda waka kino kijila i kiyampe? Lelo i bika byonkamwena’mo shi nekilonda?’ Padi uyukile bantu bamo bapumpwinye madingi a Leza ne kwangula baangula bipa bilula. Lelo bine pano badi na nsangaji? Lelo badi na būmi buyampe kupita bobwa bobadi nabo dibajinji mu bulongolodi bwa Yehova? Le pano i basokole nsangaji ya binebine kupita bengidi ba Leza bonso?—Tanga Isaya 65:14.
12 Ivwana byanene kaka umo Mwine Kidishitu utelwa bu Sharon, amba: “Napile SIDA, luba lutukija bantu, mwanda najilwile kijila kya Yehova. Mvulukanga pavule pene myaka mivule yonadi ñingidila Yehova na nsangaji.” Witabija’mba kujilula bijila bya Yehova i bulembakane ne amba wadi ufwaninwe kwibimona na bulēme bukatampe. Bine, bijila bya Yehova bitulamanga. Mayenga asamba-abidi kupwa’tu kwa kunena bino bishima, Sharon wafwa. Bine, ino myanda ya bulanda yamufikile ilombola’mba Satana kadipo na kiyampe kyakokeja kupa boba bekuja mu ino ngikadilo imbi. Aye byadi ‘shandya bubela,’ ulayanga bintu bivule ino kwibifikidija mpika, enka na mwaālaile Eva. (Yoa. 8:44) Bine, i kitabuke buya kwitabija lupusa lwa Yehova nyeke.
Wilame ku Mushipiditu wa Bwanapabo
13. I mu ngikadilo’ka imo motufwaninwe kwilama kutyina kwikala na mushipiditu wa bwanapabo?
13 Tufwaninwe kwilama ku mushipiditu wa bwanapabo shi tusaka kwitabija lupusa lwa Yehova. Mitatulo ikokeja kwitulangija’mba ketusakilwapo kuludikwa na muntu kampanda. Kimfwa, tubwanya’nka ne kupela madingi etudingila boba batangidile bantu ba Leza kumeso. Leza i mutūle’ko mpangiko ya kwituletela bidibwa bya ku mushipiditu kupityila kudi umpika wa binebine ne wa manwa. (Mat. 24:45-47) Tufwaninwe kwitabija na kwityepeja’mba uno o muswelo ulela Yehova bantu bandi dyalelo. Ikala pamo bwa batumibwa ba kikōkeji. Pākukele bana ba bwanga bamo, Yesu wāipangwile batumibwa amba: “Lelo ne bānwe musaka kufunduka’ni?” Petelo wālondolola’mba: “Abe Mfumwami, le tukenda kudi ani? Abewa wi wa binenwa bya muya wa nyeke ne nyeke.”—Yoa. 6:66-68.
14, 15. Mwanda waka tufwaninwe kulonda madingi a mu Bible na kwityepeja?
14 Kwitabija lupusa lwa Yehova kulomba ne kwitabija madingi atamba mu Kinenwa kyandi. Kimfwa, kabumbo ka umpika wa binebine ne wa manwa ketudyumunanga’mba “tutalei’nka kutala kadi twikale senene umbyonso.” (1 Tes. 5:6, MB) Ano madingi i mafwaninwe mpata mu ano mafuku a mfulo mudi bantu ‘ba kwisanswa abo bene ne bupeta kumo.’ (2 Tem. 3:1, 2) Lelo netu tubwanya kutādilwa na uno mushipiditu uvudile umbantu? Bine, tubwanya. Kwitungila bitungo bya ku ngitu kubwanya kwitulādika tulo twa ku mushipiditu nansha kwitupa mushipiditu wa kusanswa bintu bya ku ngitu. (Luka 12:16-21) Nanshi, i kipite buya kwitabija madingi a mu Bible ne kwepuka būmi bwa kwisakila butādile ino ntanda ya Satana!—1 Yoa. 2:16.
15 Bidibwa bya ku mushipiditu bitekwa na kabumbo ka umpika wa binebine ne wa manwa byabanibwanga mu bipwilo na bakulumpe batongelwe. Bible witudyumuna’mba: “Kōkelai boba bemulelele, ne kwibakōkelelela; ke-bantu abo batengele ponka pa mityima yenu, pamo bwa boba bakapitamo mu bukalama bwabo, amba balonge kino’ki ne tusepo, ne kukālala mpika, ke-kintu kino namino bānwe kemukamwenamopo kantu, mhm.” (Bah. 13:17) Lelo ko kunena’mba bakulumpe kebalubangapo? Mhm, nabo balubanga! Leza umonanga kutupatupa kwabo biyampe kupita bantu bonso. Nansha nankyo, usaka twibakōkele. Kwingidila nabo pamo, nansha byobadi bakubulwa kubwaninina, kulombola’mba twitabije lupusa lwa Yehova.
Mvubu ya Kwityepeja
16. I muswelo’ka otubwanya kulombola amba tulēmekele Yesu bu Mutwe wa kipwilo kya Bwine Kidishitu?
16 Tufwaninwe kuvuluka nyeke amba Yesu ye mwine Mutwe wa kipwilo. (Kol. 1:18) Buno bo bubinga botulondela na kwityepeja buludiki bwa bakulumpe batongelwe, ne “kwibatumbika pene pakatampe.” (1 Tes. 5:12, 13) Bine, bakulumpe ba pa kipwilo nabo bafwaninwe kulombola amba bakōkele na kuta mutyima ku kusapula musapu wa Leza ku kipwilo, kupita’ko kunena milangwe ya abo bene. ‘Kebatabukangapo byobya bintu bilembwe’ mwanda wa kutangidija milangwe ya abo bene.—1 Kod. 4:6.
17. Mwanda waka mushipiditu wa kwitatula i mubi?
17 Bonso mu kipwilo bafwaninwe kwijiba ku kukimba ntumbo ya abo bene. (Nk. 25:27) Na bubine, dino dyo dikinga dyāpile’mo mwanā bwanga umo wētene na mutumibwa Yoano. Yoano wālembele amba: “Deotefese, wakusanswa bukatampe umbukata mwabo, ne kwitusepelela mpika. E ponka, shi ngiye kwako, nkavululanga mīngilo yandi yālonga, ya kwitubotakenya myanda imbiimbi.” (3 Yoa. 9, 10) Kudi ñeni yotukokeja kuboila’ko ne dyalelo. Tufwaninwe kufundula milangwe yonso ya kwitatula ya mu mutyima wetu. Bible witulombola’mba: “Kwitatula kubadikidila bonakane, kadi ne mushipiditu wa kwizunzula ubadikidila kupona.” Boba betabija lupusa lwa Yehova bafwaninwe kwepuka dikinga dya mitatulo, mwanda kwitatula kufwijanga muntu bumvu.—Nk. 11:2; 16:18.
18. Lelo i bika biketukwasha twitabije lupusa lwa Yehova?
18 Bine, witungile kitungo kya kupela mushipiditu wa bwanapabo ino itabija lupusa lwa Yehova. Kubadilwa kobadilwa mu bantu Leza kulombola’mba i mukukoke na mushipiditu sandu wandi. (Yoa. 6:44) Kokakwatyila kipwano kyobe na Leza ku nsongo ya minwe. Mu myanda yonso ya umbūmi bobe, longa bukomo wilombole amba upelele mushipiditu wa bwanapabo inoko witabije lupusa lwa Yehova.
Lelo Ukivulukile?
• Lelo kwitabija lupusa lwa Yehova i kulonga bika ne bika?
• Lelo kwibidija bya kwivwana nabyo byetu kukwatañene namani na kwitabija lupusa lwa Yehova?
• Satana ukimba kutyimpila lupusa lwa Leza panshi mu bika?
• Mwanda waka kwityepeja kudi na mvubu pa kwitabija lupusa lwa Yehova?
[Bipangujo bya Kifundwa]
[Kifwatulo pa paje 24]
“Tukōkele kudi Leza, bantu munyuma”
[Kifwatulo pa paje 26]
I biyampe kulonda nyeke misoñanya ya Leza